Glimpses from My Instagram Gallery

2009-05-03

الإخوان المسلمون يبثون الكراهية ضد المسيحيين في هوجة أنفلونزا الخنازير

تحديث
أزال الموقع الصورة المسيئة ووضعت إدارته الاعتذار التالي
إدارة الموقع

إعتذار

نعتذر عن الصورة التي كانت مصاحبة للخبرفهي لم تكن مقصودة بعينها، وتم الإستعانة بها من جوجل . وننوه أننا لا نقصدبأي حال إهانة أتباع الديان الاخرى ، لكن هناك أساليب حضارية للإعتراض !
......

بالنسبة لي ، اعتذار مقبول (بالرغم من إني مش فاهم الجملة الأخيرة أوي)

ده رابط لخبر على موقع نافذة مصر التابع لجماعة الإخوان المسلمين والمشكلة مش في الخبر نفسه لكن في الصورة اللي نشرها الموقع الإخواني مرفقة بالخبر

دي الصورة


عبارة عن خنازير في جزء من الصورة ومصلين مسيحيين في الجزء الآخر منها

دا ربط بين الوباء وبين المسيحيين المصريين بكل صراحة وفي سياق الخبر دي اسمها حملة كراهية ضد المسيحيين فهل دا موقف الإخوان فعلا بشكل رسمي؟؟؟ حد يرد علينا ويفهمنا

هناك 30 تعليقًا:

  1. استنى بس يا مينا، يمكن تبقى غلطة واحد غبي

    ردحذف
  2. يا ستي ما انا مستني أهو

    وعشان كدة بسأل مين المسئول؟؟

    الموقع ده تابع رسميا للجماعة والصورة بالفعل مسيئة

    والليلة مش ناقصة توسيخ يعني

    ردحذف
  3. يعنى بالذكاوة كده

    ده حيبقى موقف الاخوان من المجوس نفسهم ؟

    !!!

    فى أكتر من30 موقع اخوانى فى المحافظات لو حتدور على غلطة مش حنخلص

    عنوان البوست اللى انت كتبه ده ظريف اوى

    ردحذف
  4. معاك حق الخبر بالشكل ده مينفعش المشكلة مش في شكل الخبر المشكلة في الصورة !!! أنا عمري ما شفت كده بلد ينشروا فيها فتنة طائفية عشان وباء هي المصايب بتجمع ولا بتقسم ده إيه القرف ده !!!

    ردحذف
  5. مستنى ايه ؟

    ما انت نشرت خلاص قبل متتأكد منهم

    صباح الفل

    ردحذف
  6. مش عارف بجد اقول ايه
    فعلا صورة غبية جدا
    انا شخصيا بعتذر يا مينا
    و مش عارف ايه اللي المفروض اعمله .. خصوصا اني حقيقي معرفش حد في ايجيبت ويندو اكلمه بسرعه !

    ردحذف
  7. الموقع على فكرة مش رسمى

    وديه تانى مشكلة يعملوها فى الصور

    أول مشكلة زمان كان فى تسويد صورة فيوليت داغر الحقوقية

    ما هو يا يحطها يا ما يحطهاش

    لأ الباشا حطها وشخبط عليها :-)

    ردحذف
  8. انت راسلت مسئول الموقع؟

    ردحذف
  9. محمود بيقول موقع غير رسمى

    يعنى مش تابع للأخوان زى المواقع الرئيسية

    ردحذف
  10. هو فعلا غير رسمي ..
    بس المفترض انه يكون موقع مسؤول
    و زي ما محمود قال دي تاني مشكلة فعلا

    ردحذف
  11. الموقع غير رسمي لكنه يحمل شعار الجماعة ويمثلها... وبعدين الليلة مش ناقصة تحريض وتوليع (ومش عايز حد ناصح يطلعني أنا اللي بولعها يعني!)... الموضوع محتاج وقفة مش بس اعتذار... موضوع محتاج مراجعة حقيقية

    ردحذف
  12. http://www.amcoptic.com/article/brain-extremist-in-egypt/4224/

    ردحذف
  13. فعلاً الصورة مش ظريفة وممكن حد يفهمها بطريقة تانية ..
    لكن موضوع إن الخنزير عند المسلمين نجس وأكل لحمه من الكبائر

    العكس تماماً عند الأقباط الخنزير وغيره من الحيوانات أو الطيور طاهرة

    وكل واحد حر في إعتقادة

    لكن بحيادية تامة الصورة فيها شئ من الواقع لأنه بيتربى أو بيدبح فى كتير من الكنائس والأديرة أيام الموالد

    يعني الصورة مش من الخيال و برضه وجهة نظري الشخصية غير مقصود بيها أى شئ من التفسيرات اللي حاول البعض يدور حواليها

    ردحذف
  14. طيب يا استاذ خاطر، ما عندكش مانع بقى ان حد يعمل صورة جواميس بتاكل برسيم وجنبها صورة ناس بتركع وللا تسجد عشان المسلمين بياكلوا جواميس؟
    يا اخ خاطر: إن الله يأمر "بالعدل" والإحسان وإيتاء ذي القربى
    خليك عادل

    ردحذف
  15. مينا : يعني ايه مراجعة حقيقية ؟ عنوان البوست ده بيفكرني بعناوين روزاليوسف المضروبة

    ردحذف
  16. طبعا إلي عمل صورة زي دي واحد أهبل، برنامج فوتوشوب وضربلوا صورتين جابهم من النت علشان يقول الخبر بيتكلم عن إيه.

    عموما ماتاخدش في بالك، المعاتيه كتير، والموقع إتشتم بما فيه الكفايه وغيروا الصوره وإعتذروا.

    ردحذف
  17. الصورة اتشالت
    لكن للاسف واضح تمام انها مقصودة او يكون اللى حط الصورة غبى او جاهل
    و حاطين اعتذار و بعترضوا على الاسلوب الغير حضارى لاعتراضنا
    و عجبى

    ردحذف
  18. هههههههههههه
    معلش يا يمينا احنا اصلنا سلخناهم قوي
    وانا والله عارفة انها غلطة غباوة مش مقصود منها الاهانة بس يركزوا بقى

    ردحذف
  19. blank socrates
    واضح تمام انها مقصودة منين يعني؟ وللا انت ما صدقت؟ لو مقصودة ح يخلوا الصورة مش ح يشيلوها ولا يعتذروا
    وللا انت زعلان انهم شالوها واعتذروا؟ كان نفسك تتشعلل؟

    هي ناقصاك انت راخر

    البلد دي ما بقتش نافعة
    تيجي الانفلوانزا تشيلنا ونخلص بقى، احنا حتى قدمنا قوي، بقالنا سبعتلاف سنة، ايه الزهق ده

    ردحذف
  20. يا نوارة العزيزة
    انت لو حزب الله اطلق قنبله نوويه فى مصر هتقولى "معلهش قصدهم يضربوها فى اسرائيل و لا انت بتلككوا للمقاومه"
    موضوع انها مقصودة لان بكل صراحه معروف الحساسيه المفرطه للاخوان من الاقباط
    و لو شغلنا العقل
    واخدة بالك من موضوع العقل
    طالما هما بيرفضوا ان يكون رئيس الدوله قبطى فدا معناه عنصريه و تحقير للاقباط و اعتباره مواطن مشكوك فيه او درجه تانيه
    اما بقى ردك المتوقع هو انك تتهمينى بالتعالى و الكره و التعصب
    شكرا تحياتى

    ردحذف
  21. بلانك سقراط

    اللي واضح تمام إنك لسة معرفتش إن الجنازة خلصت والناس أخدوا العزاء والميت صحي كمان

    ردحذف
  22. بلانك سوكراتس

    على فكرة أنا كمان مؤيد لدعم حزب الله لحماس من على أرض مصر... آسف جدا إني ما كتبتش حاجة من ساعتها بس ملحوقة غالبا هكتب حاجة عن الموضوع ده قريب وأعلن تأييدي للسيد فيما قام به

    ردحذف
  23. باقة ورد وفل لك يامينا.

    ردحذف
  24. مساء الخير

    1- الموقع مش رسمي .

    2- الناس غيروا الصورة يا مينا .

    3- الناس نزلوا اعتذار فعلا .

    4- الاعتذار مكانه وصياغته - فعلا - أكثر استفزازا من الصورة نفسها .

    5- مستحيل ده يكون موقف الإخوان اللى أعرفهم .

    6- ممكن حد يقوللي على الإخوان اللى عندهم حساسية مفرطة من المسيحيين دول مكانهم فين بالظبط علشان مشفتهومش عندنا في الجماعة ؟

    7- واضح إن مش مينا هو اللى بيولعها حريقة ولكن واحد تاني "فاضي" - واخد بالك من فاضي دي - .

    8- فعلا معاك حق ... الموضوع محتاج مراجعة .
    لكن سؤال مهم وجوهري وبدون سخرية :
    مراجعة يعني يعملوا إيه بالظبط ؟

    تحياتي للجميع

    ردحذف
  25. أبو أسامة

    المراجعة معناها الوقوف مع الذات بأمانة وصدق والجماعة تسأل نفسها: هل نحن طائفيون بقدر ما؟

    هل نقبل ونحترم المسيحيين وغير المسلمين ونؤمن حقا بالمساواة الكاملة بين المواطنين دون أي تمييز من أي نوع وأي شكل؟

    هل أعضاء الجماعة لديهم إجابات واضحة على الأسئلة أعلاه أم أن الأمر متروك لكل حسب اجتهاده؟

    هل الجيل القديم من الجماعة يؤمن بدولة مدنية حقا (يعني دولة المساواة الكاملة بين المواطنين) حتى وإن كانت مرجعيتها دينية كما يقولون؟

    وهل الجيل الجديد يؤمن حقا بمنظومة أفكار واحدة هي فكر الإخوان أم أن أغلب من يدعون الانتماء إلى الإخوان هم في الواقع سلفيون أو جهاديون أو متأثرون بغير ذلك من أفكار جماعات أخرى ليس لها منهج الإخوان وثوابتهم أو حتى متغيراتهم؟؟

    هذه الأسئلة ومثيلاها قد تكون بداية جيدة لمراجعة حقيقية

    ردحذف
  26. تقارير دولية كثيرة تتوقّع للأسف مشاكل طائفية بمصر في حال ظهرت أي حالة داخل الأراضي المصرية حتى لو كانت نتجة عدوى إنسان- إنسان, و ترى أن الحملة ضد الخنازير و مربّيه و مستهلكي منتجاته (مثل الحملة الإخوانية..) قد عبأت النفوس ضد المسيحيين المصريين بشكل كبير...


    أتمنى أن يكون في الأمر مبالغة... و أهل "مصر" أدرى بشعابها

    مع التحية

    ردحذف
  27. يا رجالة مصر سواء كنتم مسيحيين او مسلمين بلاش الحساسية دي
    الصورة ممكن تتفسر علي 1000 طريقة انا لما شفتها اول مرة ملفتتش نظري ولا ربطت بينها و بين المسيحيين
    بس بعد ما قريت الكلام و التعليقات بردو مش قادر اربط بينها و بين المسيحيين
    لأنه اصلا مفيش حاجة تربط و اللي عاملها اكيد كان قصده انه لحم الخنزير يخص المسيحيين بس همه اللي بياكله لكن الكلام الكبير اللي الناس قالته و الأعتذارات و العملية كبرت اوي
    ودي عادتنا احنا المصريين
    يا ريت نقدر نفوق من التوهان ده و نحاول نعمل حاجة صح

    ردحذف
  28. بدايء ذي بدء طبقا لكل الأعراف الإعلامية والمناهج الصحفية وقوانين التواصل هي صوةر خاطئة وسقطة إعلمية ليست بالبسيطة ولكن لما كل أمر يُؤخذ على أنه نهج وأن الصورة لابد وأن ورائها من قصد...باختصار شديد لست أنا مسئولا إعلاميا في جماعة الأخوان ولست منتم الى تلك الجماعة ولكن الباحث ولو بشيء طفيف في اسلوب نهجها ومنهاجها سيجد أنهم يتعاملون بشيء كبير من الحذر خاصة حيال الأمور التي تتعلق بقضية مثل الأقباط
    اذا الصورة دون فلسفة خطأ فادح وقع فيه صحفي قام بوضع الصورة لأنه يجدها مناسبة ومعبرة لأنها تجمع الموضوعين في صورة واحدة .. ولا أنكر أنه سقطة وخطأ فادح ولكن الأمر لا يحتاج الى وقفة وتفسير وتحليل وغوص في الأعماق والنوايا ..الا إذا كنا نعهد دائما على الاخوان نشر مثل تلك الصور او انتهاج هذا الاسلوب..نقطة

    الحارة سد

    ردحذف
  29. مينا معلش أنا آسف بس عندي سؤال خارج الموضوع :
    ممكن أعرف إزاي عملت الشكل بتاع التصنيفات بتاعة المدونة label cloud .

    يعني لو له كود أو حاجة ممكن تبعته لي ونكون شاكرين الفضل .
    إيميلي أهوه
    abo.osama1@gmail.com

    ردحذف
  30. الصراحة هى صورة جارحة للاقباط المصريين المسيحى والمسلم
    اكيد صورة زى دى تخرج من انسان غبى وما عندوش احساس
    كله الا الاديان والكنيسة مكان دينى مقدس له احترامه
    مش عارف اتكلم هاتقولو دبلوماسى...
    اما الاخوان المسلمين فاعتقد انهم اعقل من كدة واخلاقهم ما تسمحش الا لو كان حد خارج عن السيطرة
    سيطرة ايه على مين مش عارف

    ردحذف