Glimpses from My Instagram Gallery

2008-12-24

شريف حسام الدين... جلاد الخصوص

خناقة بين مسلم ومسيحي في الخصوص/ الخانكة
الخناقة اتطورت وكان فيها ضرب نار

عادي... كل الخناقات اللي في الدنيا ينفع يبقى فيها كدة

فيه ناس اتصابت من الطرفين وكلها إصابات سطحية

عادي برضو ... كل الخناقات اللي في الدنيا ينفع يبقى فيها كدة

الأزمة المرة دي مش مسيحي ومسلم... بالعكس الأهالي أكدوا إن معندهمش مشاكل من ناحية بعضهم البعض وعادي يعني مصارين البطن بتتخانق والإخوات بيتخانقوا ومفيش مشكلة

المشكلة بقى في رئيس المباحث بتاع قسم الخصوص


شريف حسام الدين... اسم جديد في عالم الجلادين

شريف حسام الدين ظابط مباحث منقول لقسم الخصوص من شهر تمانية اللي فات ومن أول ما مسك وهو سايق في الافترا على خلق الله
شريف حسام الدين ظابط المباحث في قسم الخصوص لا يعرف وسيلة للتفاهم سوى "جزمته" وسلك "الكهربا" و"الفلكة"

شريف حسام الدين رئيس مباحث الخصوص نزل قبض على عدد كبير من أفراد العائلة اللي كانت طرف في الخناقة
شريف حسام الدين عذب الأفراد دول بالضرب على الفلكة وتعليقهم وكهربتهم عشان يدلوا باعترافات عن مين اللي ضرب النار في الخناقة

ولما الناس ما اعترفتش ... لأنهم ما يعرفوش أو ما شافوش

جاب زوجاتهم
جاب أمهاتهم

ولما سألوه "طب والحريم مالهم يا بيه بالموضوع؟"

شريف حسام الدين جلاد الخصوص قال لهم "وهي الحفلة تكمل من غير الحريم؟ دا حتى المخبرين بقالهم أسبوع ما روحوش بيوتهم"

شريف حسام الدين تحرش جنسيا بالنساء في حضرة أزواجهن وأبنائهن عشان يخلي الناس تعترف
إحدى السيدات لبسها بنطلون عشان يسخر منها ويكسر عين جوزها
إحدى السيدات وهي في السبعين من عمرها تم تعليقها على الفلكة وجلدها على قدميها

الكهربا عامل أساسي مشترك بين أغلب ضحايا شريف حسام الدين جلاد الخصوص
أبو أحد المحتجزين شاف ابنه وهو متعلق في القسم وبيتم كهربته

أحد الذين تم احتجازهم أثناء القبض عليه كان باين عليه إنه "لبط" وبيقول له دا مش قانوني وما يصحش وما ينفعش
فما كان من شريف حسام الدين جلاد الخصوص إلا إنه قلع الجزمة ولبسها في إيده وضرب بيها الراجل على وشه مرات متعددة قدام الأهالي

شريف حسام الدين له سوابق تعذيب كتيرة من أول ما اتنقل للخصوص
منها واقعة اعتداء وتعذيب متسجل بيها محضر في النيابة رقم 5489 لسنة 2008- إداري الخصوص
والبيه شريف حسام الدين امتنع عن المثول أمام النيابة للتحقيق معه في البلاغ السابق الذكر

دا بيان المبادرة المصرية للحقوق الشخصية حوالين واقعة التعذيب واللي طالبت فيه النائب العام بوقف رئيس مباحث الخصوص عن العمل وإحالته للمحاكمة بتهم التعذيب وهتك العرض والاحتجاز غير القانوني

لن يهدأ لي بال إلا لما اشوف شريف حسام الدين في القفص زي إسلام نبيه

2008-12-22

يوم التدوينة البيضاء... من أجل حرية الإنترنت في تونس

يوم الخميس 25 ديسمبر 2008
هو يوم التدوينة البيضاء في تونس
شارك بتدوينة بيضاء في هذا اليوم احتجاجا على سياسة حجب المدونات التونسية

نهدي هذا اليوم للدكتاتور زين العابدين بن علي دكتاتور تونس
قبل أن تصبح حرية الإنترنت في مصر مثل حرية الإنترنت في تونس
شارك معنا ومع مدوني تونس في يوم التدوينة البيضاء

ActionBlankPost



"الي ميعرفهاش التدوينة البيضاء هي حركة احتجاجية من قبل المدونين على حجب المواقع و المدونات في تونس الحركة هادي متنطويش تحت اي حزب او توجه سياسي وهي مفتوحة للكل بش يشارك فيها."... (التعريف من هنا)
ومن هنا برضو تقدر تخش تاخد أكواد البانرات بتاعة التدوينة البيضاء ويوم الخميس ندون كلنا في نفس الوقت تدوينات بيضاء وعليها شعار التدوينة البيضا