Glimpses from My Instagram Gallery

2008-10-10

الإخوان الحشاشون وحقيقة انتمائي للمحظورة

الإخوان حشاشون وبتوع مخدرات وبيتاجروا في الأدوية غير المرخصة!


هذه هي أحدث الاتهامات التي تفتق عنها ذهن عباقرة أمن الدولة البواسل وعيون مصر الساهرة في أحدث قضية يتم فيها تظبيط و"تكييف" الاتهامات لعناصر تنتمي إلى "المحظورة"!


قال لي أحدهم أن "تحذيرات وصلت للجماعة منذ سنتين ونيف تفيد بأنه سيتم تلفيق قضايا جنائية للإخوان وليس قضايا سياسية"...
وبالفعل صدقت التحذيرات وحيث ان الحذر لا يمنع "القضاء" والقدر، فأتت قضية "غسيل الأموال" التي اتهمت فيها "الروس الكبيرة" في الجماعة والتي أحيلت للقضاء العسكري بعد "فشل" القضاء الطبيعي في إثبات التهم الجنائية في تلك القضية. وانتهت قضية "الغسيل" العسكرية إلى أحكام بالحبس وصلت إلى عشر سنوات بحق البعض وشملت الرجل الثاني في الجماعة خيرت الشاطر وأحد أهم "رجال أعمالها" وهو الأخ حسن مالك.

وبينما يقبع العديد من قادة الجماعة في السجن حاليا تنفيذا للحكم العسكري الخاص بقضية "الغسيل" العسكرية، فإن جهود "الدولة" وأمن الدولة لم تتوقف عند ذلك ولم تعتبر ضربة "الغسيل" كافية لقصم ظهر الجماعة وتعليمها "الأدب"! فالجهود مستمرة على أكمل وجه وأسفرت مؤخرا عن ضبط "تنظيم" جديد لللإخوان يشترك في صفة أساسية وهي صفة "الفضائية"... فهو بالفعل تنظيم "فضائيات" يضم عددا من المخرجين والإعلاميين ومعدي البرامج في عدد من القنوات "الفضائية" الخاصة وغير الخاصة، مصرية وغير مصرية، مستقلة وحكومية (أحد العناصر معد برامج في التلفزيوم المصري!!).

وبالطبع وكالعادة فإن التهم جاءت تقليدية للغاية من نوعية "الانتماء إلى جماعة محظورة"، و"إعادة إحياء فكر الإخوان" (وكأن الإخوان تم استئصال شأفتهم مثلا في مرحلة سابقة وكأن ليس لهم 88 عضوا في البرلمان المصري)، وبالطبع "قلب نظام الحكم عبر اختراق الإعلام والفضائيات"... كل دا مش قضية يعني ولا افتكاسة...

العبقرية حقا تتجسد في تهمة جديدة وفريدة من نوعها - حتى أنها أثارت إعجاب المحرر الأمني للأهرام حتى أشاد بتفردها وطزاجتها - وهي "حيازة المخدرات" (اللي هي تحديدا خمسة جرام حشيش لا أعتقد أنها تكفي للف سيجارة محترمة أو حتى تدخين خابور عليه القيمة)...
(مساااااء الخييييييييييييير)


وطبعا لزيادة إحكام "تكييف" القضية قالت التحريات والتحقيقات بتاعة أمن الدولة (سواء مباحثها أو نيابتها العوليا) فقد أضيفت تهمة عبقرية اخرى جنب التنظيم "الفضائي" و"حيازة المخدرات"، وهي تصنيع "الأدوية" - في منزله - بدون ترخيص... ويتردد أن السبب في اتهام "الأخ الدكتور" حسن عبد العظيم مرسي بهذه التهمة "الدوائية" تحديدا هو أن الدكتور حسن وهو صاحب شركة أدوية كان أهم مصدر للأدوية اللي كانت بتروح لقوافل الإغاثة بتاعة فك الحصار عن غزة "المحصورة" (يعني المحظورة عايزة تفك الحصار عن المحصورة شفتوا الحلاوة!).

والحقيقة إن بعد هذوها الاتهامات الخطيرة الموجهة للجماعة "المحظورة" (المؤيدة لغزة "المحصورة") فإنني قد اتخذت قرارا أرجو منكم جميعا ان تساعدونني عليه... فلقد قررت أن أتنحى عن أي منصَب (بفتح الصاد هي بتتقال كدة في خطابات التنحي) رسمي في جماعة الإخوان الحشاشين (المسلمين سابقا)، وان أعود بين صفوف المواطنين (أحرض طبعا على قلب نظام الحكم بينهم) ... إلخ وكدة

أصل بصوا يا جماعة
م الآخر كدة وبصراحة...
لما الإخوان عملوا ميليشيات عسكرية قلنا وماله...
خلي الشباب تلعب ودا عرض رياضي وكدة
ولما عملوا غسيل أموال قلنا برضو مفيش مشاكل...
النضافة برضو حلوة!
لكن مخـــــــــــدرات؟؟؟!!!
وحشيش بالكميات الفزيعة دي؟؟؟
خمسة جرام مرة واحدة يا كفرة!!!
دول عايزين يدمروا شبابنا!!



طبعا حد ناصح يسألني طب وهو انت كنت إمتى انضميت للجماعة عشان تتنحى عنها... أقول لك يا عم الناصح ان لهذوها الموضوع قصة طويلة من أول ما واحد بتاع أمن دولة صرخ في بلطجيته "هاتوا لي أبو دقن ده" (مشيرا بيده إلى العبد لله) وهو الأمر الذي تحرك بناء عليه ثلة أفراد بلطجية نحوي وانهالوا عليا ركلا واعتقلوني مع ثلاثة من الأصدقاء (طبعا الناس اتصدموا لما عرفوا إني مسيحي بعد كدة بس مش دي القضية)... وبقية القصة هي مكالمة مع شخصية ما من كام يوم كانت بتزايد عليا وبتتهمني إني مش بدافع عن المسيحيين المعتقلين في قضايا رأي في الوقت اللي فيه بدافع عن معتقلي الإخوان (مثل عبد المعنم أي حبسته وعبد الجليل الشرنوبي والمهندس خالد حمزة) وكان السبب في راي هذه الشخصية لمواقفي المغرضة هذه هي انتمائي "المعروف" لجماعة الإخوان.... ههههههههههههه

أيوة بجد اتهمتني هذه الشخصية بالحرف قائلة "أصل يا مينا إنت طول عمرك إخوان ودا معروف للجميع" ... طبعا أنا ما لقيتش حاجة أدافع بيها عن نفسي إذ ان الأمر "معروف للجميع" ومش محتاج جدال يعني لأني "طول عمري إخوان"!! ههههههههه

وعملا بالقاعدة الفقهية الشهيرة "لا ضرر ولا ضرار" وشقيقتها المشهورة "أنا قلت أدفع الفاتورة أحسن يشيلوا العدة... مع إن معنديش تليفون"، فأنا قلت بدل ما أقعد أجادل - بالتي هي أحسن - وأدافع عن عدم انتمائي للجماعة (وهو ما قد يعتقد منه الخصوم إن الجماعة جربة أو سبة مثلا) فقد قررت بدلا من ذلك ان أعلن انسحابي من الجماعة بعد أن اتضحت حقيقتها وافتضح أمرها على أيدي رجال أمن الدولة البواسل الذين قطعوا الشك باليقين وأثبتوا إن الجماعة جماعة حشاشين وبتوع أدوية بدون ترخيص وكمان بتوع غسيل أموال وهو ما أربأ بنفسي من الانتماء إليه لأن أحلى م الشرف مفيش!!

وسنوافيكم بتفاصيل قضية "الكائنات الفضائية التحشيشية الإخوانية" أولا بأول فور ورود مزيد من التفاصيل الساخنة من مصادرها

فتابعـــــــــــــونا

(وش بيغمز)

هناك 33 تعليقًا:

  1. هههههههههههههههههههههه
    طيب ليه كده بس يا مينا
    ما كنت عضو في المحظورة بجلالة قدرها
    كده حتفقد شهرتك و تميزك و تبقى من غمار الناس
    :)
    صحيح هم يضحك و هم يبكي

    ردحذف
  2. هههههههههههههههههههههههه

    تصدق أتا كنت شكة فيك طول الوقت

    Manal

    ردحذف
  3. حتى اعلان الانسحاب ده مش حقيقي .. دي خدعه

    الرجل ده طول عمره اخوان .. بس متنكر في زي سلفيه

    بمناسبة الحشيش

    انت سمعت عن الناس اللي كانوا راكبين عربيه في طريق البحيره وكمين فتشهم لقى معاهم حشيش .. أخذه منهم ومشاهم .. قاموا راحوا مديرية الأمن بلغوا ان الكمين سرق منهم الحشيش؟؟!! والمديريه انتقلت فعلاً لمكان الكمين لقوا الحشيش

    ردحذف
  4. مهندس مصري

    معلش بقى دي أسرار "الجماعة" واحنا جماعتنا من عيلة محافظة وما بتتكشفش على رجالة... أنا "جماعتي" تحشش آه لكن تطلع أسرارها برة عيب أوي... دا انا ما كنتش أقعدها في البيت يوم واحد

    ردحذف
  5. Blacknoble

    خلاص يا ستي استري عليا بقى... تاخدي سنسون حشيش صغنن كدة بالخمسة جرام وتسكتي؟

    ردحذف
  6. TAFATEFO

    فعلا سلفي إخواني شيوعي قبطي له ميول شيعية متصوفة

    ردحذف
  7. هههههههههههههههههههه

    اسمها قطعوا الشورت فى البى سين دول يتقالوا عليهم كده
    وبعدين يا مينا مش قولنا بقى بطل تقول اسمك الحركى كده ينفع يعنى
    قولى بقى الحقيقى يالا هههههههههه
    وبعدين اللى بيقولك الكلام ده وهو متاكد صدقه يمكن انت شربت من الخمسه جرام حشيش ومش فاكر ههههههههه
    الا خمسه جرام دول فعلا قليل اوى يعنى ههههههههه
    طيب المجانين مش يجيبوا اكتر شويه ربنا يشفيهم
    بس انا شايفه انهم عملوها خمسه جرام علشان تبقى مصداقيه ههههههههههههه
    والله ما عارفه اقولك ايه
    باين عليه ظابط لسه جديد

    ردحذف
  8. أيها المنشق!!
    أيها المنشق!!
    أيها المرتد!
    اضربوهم حتى لا تكون فتنة..
    أيها الشنقيط..
    إلى جهينة وببس العصير!!

    ردحذف
  9. ياااااااااه أخيراً عرفت الحوار بتاع الإخوان ده..كان محيرني جداً .. و لأقعد أقول إيه يا جدعان..انتهو اتهبلتوا...ده مسيحي مبتفهموش ولا إيه..اتضحلي إن فيه ناس تانية هي اللي مبتفهمش ...و بعدين يا مينا يعني يوم ما أعرف يا مينا يعني يا مينا تسيبها..لأ لأ ملكش حق...

    ردحذف
  10. يا اه يا اه
    عود احمد يا اخ مينا الحمد لله ان قوات الامن قطعت الشورت في البيسين واظهرت حقيقة هذه الجماعة المحزوءة المتضامنة مع المحصورة مع اننا اتفقنا على اننا ما عندناش ثقافة الحمامات وان شختنا بتهد جبال وان على كل مواطن صالح انه يحصر الشخة ويمسك نفسه لكن تقول ايه في اعداء الوطن المدعومين من الخارج
    ده غير انك متهم بالعمالة للمؤامرة الصليبية الصهيونية ولمراكز حقوق الانسان
    يعني صليبي واخواني وصهيوني وحقوق انساني
    يا ساااااااااااتر
    اختصر وقول شامبانزي
    ---
    اما بخصوص الغسيل فوالنبي يا مينا قبل ما تسيب الجماعة عندي ملايتين وكيس مخدة مبقعين شيكولاتة من الواد ابن الجيران وعايزاهم يمرشوهم لي وانت برضه اكيد ليك دلال عليهم بما انك عضو قديم ومعروف
    ومن هنا ورايح ارفع شعار: نعم للسمكة لا للطيارة

    ردحذف
  11. يا ابي

    لا يا حبيبتي الظابط مش جديد ولا حاجة
    الظابط كان معاه قرش طمع فيه وقعد يلف ويعزم على صحابه لحد ما خلصه وما بقيش منه غير خمسة جرام قال لك لسة ح ارجع القسم واجيب تاني؟ ياللا اهو دول كويسين كبداية يعني اهم يعملوا سمسون

    ردحذف
  12. الا قولي يا مينا يا خويا
    هي خمسة جرام حشيش دي كبيرة يعني و لا قد ايه؟؟
    يعني مثلا عشان نقربها
    هل هي قد طبق كشري من عند طارق من ابو خمسة جنيةو لا سبعة جنية؟؟
    ولا قد وجبة كنتاكي قطعتين و مشروب؟
    يعني ايه حجم الكمية الي بنتكلم عنها و هل تستدعي ان الحكومة تمسك الاخوان عشان الكمية دي ايا كان حجمها؟؟
    و هل انت شايف ان ده له علاقة بهبوط البورصة المصرية.؟ و هل ده علاقة ان الحكومة فاقت و بقت تمسك في الاخوان على اي شئ و لاي شئ و باي شئ؟؟

    دمتم

    ردحذف
  13. ههههههههههههههه

    طول عمر الواحد كان شاكك فيك يا مينا انك اخواني ، والحقيقة ظهرت ، بس متفتكرش إنك هتضحك علينا وتقول تنحيت.. هو حد ممكن يصدق دي الجماعة متأصلة في عروقك يا مينا انت بس اعترف ومتخفش..

    إلا صحيح الخمسة جرام حشيش دول شركة بين الجماعة كلها يعني و لا كل واحد عنده الخمسة جرام بتعوه..

    ردحذف
  14. ﻻ يا كابتن خمسة جرام تعمل سيجارات كتير محترمين انت بس اللي ناسي .

    سمعت انت عن اللي اشتروا الحشيش م الكمين اللي جنب مديرية أمن اسماعلية ؟ ههههههه مش مصدقني أسأل الواد عربي

    ردحذف
  15. ﻻ يا كابتن خمسة جرام تعمل سيجارات كتير محترمين انت بس اللي ناسي .

    سمعت انت عن اللي اشتروا الحشيش م الكمين اللي جنب مديرية أمن اسماعلية ؟ ههههههه مش مصدقني أسأل الواد عربي

    ردحذف
  16. نوراه
    ======
    معلش يا مينا هرد عليها
    هههههههههههههه
    نورتى المحكمه وانا اقول ليه بيوقونى ويشوفوا الرخص وانا لابسه الحزام والعربيه مغسوله ومش بتكلم فى الموبيل ولسه الترخيص منتهاش
    كل ده بسبب الحشيش
    صحيح حشيش حاجه تيجي كده لا انا كده اخد لهم سجاير يمكن مياخدونيش مخالفه
    هههههههههه
    صحيح صحيح الا سمسون ده بتاع الكارتون ولا ايه ظروفه طيب هما بيشربوا سمسون ليه بقى حد يشرح يا جدعان

    ردحذف
  17. هههههههههههههه

    بص يا مينا

    انا بقولك أهوه

    لو خبر انسحابك ده طلع جد مش تقية

    أنا هسيب الإخوان
    ــــــــــ
    وبعدين يا أخي مستقل بخمسة جرام
    بكرة ربنا يبارك فيهم ويبقو خمسة كيلو
    بس انت ادعي ...

    (وجه يقهقه حتى انقلب على قفاه)

    ردحذف
  18. آبي

    زي ما نوارة قالت لك كدة بالظبط... هو مش جديد... هي بس الفكرة إنه عضو في تنظيم الضباط الحشاشين.... واستهلك الكمية مع اظحابه
    ------------

    أحمد نصر
    جامدة أوي جهنم وبئس العصير دي
    أنا يا ابو حميد ما انشقيتش أنا اتنحيت
    ومستني صفوف الجماعة طبعا تخرج أفواجا تطالبني بالتراجع عن التنحي مع الهتاف الشهير أحا أحا لا تتنحى وكدة... أنا سامع إن القواعد الشعبية بدأت بالزحف بالفعل نحو العمرانية العظيمة لإثنائي عن التنحي... لكن هيهــــــــات
    ----------

    sabsoob

    يلا بقى إن ذهبت الملائكة حضرت الشياطين
    هههههههه
    ----------


    نوارة التهييس الشعبية

    الله يرحمه بقى وفيق الدقن هو اللي كان فاهم الأشكال دي... وهو كان عارف من زمان أوي إن "العلبة فيها فيل" وأهو طلع فيها فيل وحشيش كمان

    بالنسبة للغسيل يتردد بقوة في أوساط أمنية رفضت ذكر إسمها أن الشاطر يغسل أكثر بياضا... ودا مالوش علاقة إطلاقا بالقاعدة الفقهية الشهيرة "الشاطرة تغزل برجل حمار" والله أعلم
    ------------


    حفصة

    يا حفصوصة يا ست الكل قيل أن الخمسة جرام ما يعملوش سوجارتين على بعض بينما تؤكد صاحبة الزنزانة إنهم يعملوا "سيجارات" (وليس سجائر) كتير... وعملا بالقاعدة الفقهية الشهيرة القائلة بأن اختلافهم رحمة... أرى إن اللي مش عاجبه ومش مقتنع "يوزن برة"
    ------------


    دعاء

    فعلا عندك حق وزي ما قال البابا شنودة "الإخوان ليست جماعة نحيا فيها ولكنها جماعة تحيا فينا" ولعلمك يتردد بقوة أن البابا شنودة هو كمان إخوان بس مش بيقول (عشان الحسد طبعا)

    بالنسبة للخمسة جرام لأ كانت بتلف ع الجماعة كلها لأن الجماعة حاليا في مرحلة المشاركة لا المغالبة وبالتالي هم يؤمنون أن الحشيش (حتى لو خمسة جرام بس) هو مناولة مش مقاولة
    ------------


    زنزانة العزيزة

    كمين الاسماعيلية بيبيعوا القرش بكام؟ أنا سامع إن مديرية أمن الجيزة الحشيش فيها أرخص
    ------------


    بنت القمر

    منورة
    ------------


    أبو أسامة أبو كباية شاي

    اتفضحتوا يا حلو وطلع إن كوباية الشاي معاها جوينت حشيش والقهوة فيها أفيون... بلاش والنبي يا شيخ تجيب سيرة التقية هنا أحسن يتهموني إني شيعي وساعتها هتاخد في الرجلين وانت عارف أبوك القرضاوي ما بيرحمش اليومين دول... إخوان وحشاشين ممكن تعدي لكن تقية وتشيع يبقى نهارنا مش هيعدي

    ردحذف
  19. انا مش متابع الاهرام الله يخرب بيتها هى واحمد موسى الامنجى
    وزميلة الجديد
    محمد دنيا

    حاجة تكسف كل حاجة فى البلد دى بتمشى طلسئة
    حتى الفبركة مش عارفيين يعملوها

    ردحذف
  20. لا لا لا..أنت مش فاهم خالص

    أنت مش بس إخواني و حشاش، أنت شيعي إسماعيلي كمان، و مسافر غير شرعي عبر الزمن.

    نزل حواجبك و أنا أقول لك ازاي:
    هو مش الإخوان جماعة؟ (-> 1)
    و مش الإخوان حشاشين؟ (-> 2)
    إذن الإخوان جماعة حشاشين (-> 3)
    و طبعا معروف من هم جماعة الحشاشين بتوع القرن 11.

    يعني ليلتك خيال علمي من الآخر.

    ردحذف
  21. صح صح يا أستاذ ألف
    وانا بقول أنا ليه عندي نوستالجيا وحنين لحي الباطنية اليومين دول إذ كانت "طائفة الحشاشين" تقطن تلك المنطقة وأعتقد أن تسمية المكان كان نسبة إلى مذهب الباطنية الذي كانوا ينتمون إليه

    ولا أنا خلطت الشيعة بالصوفية كدة كالعادة؟

    ردحذف
  22. loooooooooooooooooool@ alif and mina
    حرام انا في الشغل و منظري بقى وحش اوي
    بس بجد
    u made my day
    thanks

    ردحذف
  23. مينو
    لا ما خلطتش الشيعة بالصوفية
    هي اصلها تشبيكة
    بما انك بقى حشرت مناخيرك عندنا وبقيت طول عمرك اخوان

    طائفة الحشاشين اللي كانت قلعتها في بلاد فارس هي فرع من الطائفة الباطنية والطائفة الباطنية هي فرع من الطائفة الاسماعيلية والطائفة الاسماعيلية هي طائفة منشقة عن الطائفة الشيعية والطائفة الشيعية اتخانقت مع الطائفة السنية على موضوع الخلافة وموضوع الخلافة

    ايييييييييييييييييييه
    ايييييييييييييييييييييييييييييه
    انت فاضي سنة كام؟
    وكمان طلعت شيعي
    ده انت مافيش فيك امل
    روح يابني انتحر

    ردحذف
  24. أطالـــب بطـــــرد كــــــــل مــــــن : ـــــ
    أولا :ـــ السفــــــير السعـــــــــــــــــودى من مصر
    ثانيا :ـــ الغـــــــاء اللجنـــــــــــه المصرية السعـــودية المشتركة
    ثالثا :ـــــ منـع السـعودى من دخــــــول بلدى بدون تأشيرة وكفيل لتكون المعاملة بالمثل
    رابعا :ــــ طـــــــــرد ألأمير طــــلال بن عبد العزيز من مصــــــــر
    خامسا :ــــ طــــــــــرد ألأمير تركـى بن عبد العزيز من مصـــــــر
    سادسا : ــــ منع ألأمــير الولـــيد بــــن طــــلال من دخـــــــول مصــــــر
    وجميعهم يعلمون بمأساتى فى السعودية والتى دامت على مدى ثلاثة عشر عاما والتى
    بدأت من 2/11/1992م وحتى عودتى لبلدى مصر فى 8/5/2005م وعلمهم بكل
    ماتعرضت له من ظلم وقهــــــــر وقمــــــــع ولم يحركوا ساكنا لأن المصرى دمه وماله
    وان لـــم يكن عرضه مستباح للسعودى فى بلدهم
    علآوة على كذب الداخلية والخارجية السعودية فى كتاباتهم للقنصلية المصرية بجده
    والذى كشفته وفضحته بالمستندات وفوق كل هـــذا امعانا فى الظلم والقهر تدخل الملك
    عبدالله بن عبد العزيز فى القضاء لضياع حقى يوم أن كان وليا للعهــــد
    وأخيرا وليس بآخر أتحدى مناظرة علنيـــة مع أى مسئول سعودى رجل دولة أو رجل دين
    ممن يتاجرون سواءا بالدين أو بالعلاقات الثنائية بين مصر والسعودية أو العلاقات بين
    الشعبين السعودى والمصرى
    وهـــــذا رجاءا الى كل من يطلع على هذا البوست نشــــــــره على مدونته وجميع مواقع
    المنظمات الدولية لحقوق ألأنسان وكذا جمعيات حماية حقوق الحيوان فى العالم
    وذلك لاصابتى نتيجة للظلم والقهر والقمع فى السعودية بمرض السكر ومضاعفاته
    ومرض القلب وكذا مرض الضغط وتعرضى لفقد البصر لولا تدخل السفير المصرى
    بنقلى الى احدى المستشفيات الخاصة لأننى كأجنبى ممنوعا من العلاج فى السعودية

    ردحذف
  25. نوارة
    ايه اللي بتقوليه ده؟؟
    "
    وكمان طلعت شيعي
    ده انت مافيش فيك امل
    روح يابني انتحر
    "
    ليه فيه ايه
    هما الشيعة وحشين
    كله محصل بعضه

    ردحذف
  26. الشريف جمال طه
    يا شيخ النبي يسيئك
    ارحمنا شوية
    مافيش وراك حاجة غير انك تنشر تعليقات مالهاش علاقة بالبوست و تقرفنا بيها و لما بنيجي نعلق عندك و ننصحك و نقلك كلمتين يفيدوك بتمنع التعليق
    هي دي الحكاية بقت كدا و لا ايه؟؟
    روح اعملك حاجة مفيدة بدل ما انت شغال الله ينور من سنتين تنشر تعليقات
    و قرفت شرفنا بيهم

    ردحذف
  27. ياشعب مصر إن النظام الحاكم في مصر قد بدأ في الترنح فلا تعطوه الفرصة ليكسب هذه الجولة ولقد حان الوقت لكي ينزاح هذا الكابوس الكامن على صدورنا لما يقرب من الثلاثين عاما ولذلك نقترح عندما يبدأ الإعتصام المدني فلابد وأن يستمر إلى أجل غير مسمى ليكون صفعة قوية وردا حاسما على ألاعيب الطغاة وإعلموا أنهم لن يستطيعوا إجبارالناس ليذهبوا إلى أعمالهم بالقوة

    ياشباب مصر و يارجالها ونسائها أنتم المستقبل والأمل في هذا البلد فلا تعطوا الفرصة لهذا النظام المترهل أن يستمر وأيضا لا مجال لأي حزب من الأحزاب القائمة أن ينسب لنفسه أي دور فيما يجري على الساحة الآن فنرجوا منهم أن يصمتوا وذلك أكرم لهم

    نعود إلى موضوع الإعتصام المدني الذي لابد وأن يستمر وإلى أجل غير مسمى حتى يتم تحقيق كل ماجاء بوثيقة المستقبل والأمل مع الأخذ في الإعتبار الآتي

    أ ) العمل وبكل قوة على نشر هذه الفكرة بين كل طوائف الشعب عن طريق أجهزة المحمول والإيميلات والإنترنت

    ب) الإستمرار في الإعتصام المدني وعدم ممارسة أية عمل عام أو خاص مدرسيا كان أم جامعيا إلا إذا كانت هناك ضرورة قصوى تحتم ذلك حتى يتم الرضوخ لمطالب الشعب وبداية تحديد سلطات الحكومة ورئيس الدولة مع الأخذ في الإعتبار عدم إتلاف أو تدميرأي مرافق عامة كانت أو خاصة

    ج) الهدوء التام وعدم الإشتباك أو الإحتكاك مع أفراد الشرطة وتجنب التظاهر والعنف بصفة عامة لأننا نتعامل مع بطش ليس له مثيل

    د) رفع وتعليق رايات في البلكونات وعلى الجدران مكتوب عليها
    "طبقوا وثيقة المستقبل والأمل"

    ه) عدم التنازل أو التهاون في مطالبنا حتى إذا أزيح العادلي
    أو أن رغيف الخبز أصبح فجأة متوفرا لأن سياسة تخدير الأمة لن تصلح من الآن فصاعدا

    و) شراء إحتياجات تكفي لفترة طويلة مع التركيز على مستلزمات الأطفال وتخزين كميات كبيرة من المياه والشموع لإحتمال إنقطاع المياه والكهرباء عمداً ولفترات طويلة لإجبارالناس على الخروج من البيوت وتصيدهم في الشوارع

    ز) من حق كل مواطن أن يدافع عن نفسه وأهله وبيته في حالة تعرضه في مسكنه لأية إقتحامات أو إنتهاكات غير قانونية


    إن الدولة ومرافقها في حالة إنهيارتام فلا نتوقع أن الحياة الوردية ستبدأ غدا ولكن لابد أن نبدأ التغيير من أجل الأجيال القادمة ولتكن البداية من الآن

    ونلخص عرض مطالب الشعب والأمة (وثيقة المستقبل والأمل مثلا) في التالي

    ١ ) الإفراج فورا عن كل المعتقلين السياسيين وخصوصا من أمرت النيابة بالإفراج عنهم ولازالت وزارة الداخلية تتخذ منهم رهائن ومحاسبة كل المسئوليين الذين خالفوا أحكام القانون والدستور وفورا
    ٢ ) إنهاء كل القوانين الإستثنائية والعسكرية من تطبيقها على المدنيين والحد من سلطات العسكريين وأجهزة الشرطة في الحياة المدنية

    ٣ ) البدأ فورا في تكوين لجنة عليا من أساتذة القانون أوالقضاة أو منهما معا لإعادة أو بداية كتابة وصياغة دستورالدولة ولا يكون أحدهم يعمل أو سبق له العمل في أي حزب من الأحزاب القائمة أو السابقة وذلك لوضع ضوابط ومواصفات وشروط ترشيح أو إقالة رئيس الدولة ونائبه وضوابط الهيئة البرلمانية والهيئة القضائية العليا وتحديد سلطات وإختصاصات كل هيئة بما فيها رئيس الدولة وعلى ألا تزيد فترة الرئاسة عن فترتين بحد أقصى ولا يجوز أن تجدد أو تمد بأي حال من الأحوال وذلك حتى لاتكون سياسة الدولة تبعا لأهواء وشطحات أي حاكم من الحكام

    ٤) تكون هذه اللجنة هي النواة للجهة القضائية العليا
    (Supreme Court)
    وتكون ذات عدد فردي (خمسة أو سبعة مثلا) حتى لا تتعادل الأصوات عند التصويت على أمر ما

    ٥) لابد وأن يكون هناك إشراف دولي عن طريق الأمم المتحدة أو إحدى منظماتها للمراقبة والإشراف على سائرالعمليات الإنتخابية نظرا لإنهيار الثقة في أي نظام داخلي محايد

    هذه مجرد خواطر وأرجو من الجميع المشاركة بكل الآراء والأفكار لتكون هذه الوثيقة بحق نابعة من وجدان المصريين وتكون هي النواة للمستقبل والأمل

    لابد أن نتحرك وإعلموا أن ساعة العمل قد حانت
    والسلام عليكم ورحمة الله وبركاته

    ردحذف
  28. الشيعة وحشين قوي يا اوختشي خلي بالك من خطر التشيع
    خطر التشيع اوحش من فلفوزا الطيور
    وح يعملوا لها اعلانات توعية ويطلع القرضاوي فيها وهو بيغني:
    اوعى تتشيع حاسب من الشيعة
    دي حاجة وسخة خالص دي حاجة فظيعة
    ايييييييييييييييييه
    اييييييييييييييييييييييييييييييه

    ردحذف
  29. هاهاهاها
    والله يا مينا ضحكتني من قلبي

    ردحذف
  30. ازيك يا حج اخباررك ايه
    عارف عادل امام لما بيقوا
    انا شربت حشيش يا سعاد هههههههههههه

    ردحذف
  31. الأخوان الضباط مسكوا حماعة مينا المحظوره
    وبعدين متكمل ياعم
    الولعه يابت

    ردحذف
  32. غير معرف6/03/2010 6:26 م

    الاخوان دعوتهم دايما عاليه ومين قال ان الاخوان حشاشين دول مش اخوان دول لابسين زى الاخوان ومتنكرين فيهم بالله عليكم فكروا صح ولازم تعرفوا ان الاخوان دعوتهم دايما عاليه

    ردحذف