Glimpses from My Instagram Gallery

2008-08-20

له صفات ربنا لكن له ولد

اليوم السابع | الشريف يجتمع مع أعضاء مجلس الشورى بمبنى الشعب

أعرب أعضاء مجلس الشورى (المحروء) عن تقديرهم البالغ للرئيس حسنى مبارك لمتابعته الحريق الذى اندلع بمبنى مجلس الشورى مساء الثلاثاء، فور وقوعه، ولتوجيهاته السريعة إلى كافة الأجهزة الحكومية بسرعة تدارك الموقف.


طب دول يترد عليهم يتقال إيه؟؟؟
المجالس الموقرة في مصر اتحرقت واتطربقت على دماغ اللي خلفوهم ويوم ما يتهببوا يقعدوا يبدءوا يسموا باسم الواحد الأحد الفرد الصمد الذي له ولد - على رأي الشاعر عبد الرحمن يوسف - ويعربوا عن تقديرهم البالغ للرئيس الموكوس حسني مبارك لمتابعته الحريق فور وقوعه... طب ما فيه تمانين مليون موكوس تانيين كانوا بيتهببوا بيتابعوا الحريق - ويشجعوا اللعبة الحلوة من قلوبهم - فور وقوعه برضو... ما اتهببوش أعربوا عن تقديرهم ليهم ليه؟؟؟

وبعدين مش فاهم إيه موقع "إعرابهم عن التقدير للموكوس" من الإعراب أصلا وتوجيهات سيادته بسرعة تدارك الموقف إذا كان الموقف لم يتم تداركه والحريقة فضلت مستمرة أكتر من عشر ساعات وجابت أم المجلسين على التراب ودخلت على الضرايب ووقعت حيطان الجمعية الجغرافية بسبب الإهمال الجسيم وعدم تجهيز المباني بأجهزة مكافحة حريق أو حتى أجهزة إنذار... دا طبعا بخلاف إن أصلا لسة فيه شبهة إن عناصر في النظام أو قريبة منه ورا الحريقة أساسا وهذه قصة أخرى!!

حتى في عز المصايب المهببة اللي بتنزل على دماغكم نفاقكم للرئيس المؤله هو هو يا كفرة يا ولاد الحرام؟؟!!!

أنا كان رأيي إن بتوع مجلس الشورى يتهببوا بعد كدة ويروحوا يتقابلوا ويقعدوا على أي قهوة في التحرير بعد ما المجلس اللي كانوا بيقعدوا فيه ولع على دماغهم!!

لكن يشاء السميع العليم إن القاعة الكبيرة في مجلس لا مراخذة الشعب ما يولعش والنواب بتوع الشورى اللي أغلبهم أصلا "ساقط شعب" واضطر يخش الشورى باعتبارها "الملحق" بتاع البرلمان غالبا مكتوبالهم يقعدوا فترة من نفسهم على كراسي مجلس الشعب ولو بصفة مؤقتة وغالبا هما فرحانين أوي بده!!!

وبعدين الأخ صفوت الشريف كان امبارح اتجعص وقال إن الترميم هيتعمل بفلوس الأعضاء!!
ليه النهاردة طالع الرئيس الإله يقول إن الترميم هيبقى من نفقة لا مؤاخذة الدولة اللي هي فلوسنا لا مؤاخذة؟؟؟


هناك 7 تعليقات:

  1. طيب مابواب المجلس كان بيتابع
    والاطفال فى الشارع كانوا بيتابعوا
    ومصر كلها كانت بتابع
    مش حد جاب سيرتهم ليه
    وبعدين فلوس مين اللى يرمموا بيها ده ايه العالم الرمم دى

    ردحذف
  2. هههههههه
    ههههههههههه
    ههههههههه
    هههههههههه
    ههههههههههه
    انا لسة قارية البوست دلوقت حالا
    يخرب مطانك
    الظاهر الكفايين عامل شغل جامد قوي من امبارح
    هههههههه
    هههههههههه
    هههههههههههه

    ردحذف
  3. طيب والنبي جايين على نفسهم ليه وبيتعازموا .. واحد يقول الاعضاء هيدفعوا التاني يقول له لاااااا
    وحياة ابني ابدا .. الشعب هو اللي هيدفع ده بتاعي وانا قلت هيدفع يعني هيدفع

    بس يعني جايين على نفسهم ليه دي حاجة بسيطة يبقوا يطبخوا القوانين في اي حتة مش مشكلة دي حاجة بسيطة .. او خليهم قاعدين في بيوتهم مرتاحين والقوانين توصلهم دليفري ويبقوا يوافقوا بالايميل

    ردحذف
  4. Desert cat

    أنا شخصيا أعرب عن تقديري للسيد بواب المجلس والإخوة بتوع أمن المجلس اللي تابعوا الحريقة لحظة بلحظة واللي منعوا المطافي إنها تاخد خرايط المجلس لأنها "سرية"... ناس فاهمة شغلها بصحيح!!

    كما أعرب عن تقديري العميق للإخوة المصريين الذين توافدوا بالآلاف لمتابعة الحريق بأنفسهم في شارع قصر العيني واللي كنت واقف وسطهم بنفسي وسمعت "متابعاتهم" العظيمة بنفسي وإزاي الحزن كان مالي قلوبهم بصدق وعمق على إن المجلس اتحرق "بينما الأعضاء ما كانوش فيه... أصل الناس دي مش حاسة بينا"... دا كان ناقص إن الجماهير تهتف... "حريقااااا هيييييييه"

    ردحذف
  5. نوارة

    الكافيين عامل شغل عظيم جدا لحد دلوقتي

    هههههههههههه
    طول عمرك فضحية وهتفضلي فضحية
    ربنا يسامحك
    :P

    ردحذف
  6. ماريان

    أحد التعليقات المسخرة التي ربطت بين طبخ القوانين وحريقة المجلس إن "القوانين بعد ما اتسلقت حرقوها"

    وكما كانت تقول العرب قديما أنه هل يضير الشاة سلخها بعد ذبحها هكذا نقول الآن "هل يضير القوانين حرقها بعد سلقها"؟

    وعجبي

    ردحذف
  7. غير معرف8/22/2008 1:35 ص

    ابقى عد كويس يااستاذ ... ولدين يااااااخويا.....

    ردحذف