Glimpses from My Instagram Gallery

2008-08-17

الإسلام دعا إلى حسن معاملة الحيوانات... فما بالك بأهل الكتاب!!!


كثر اللغط والتزيد على موقف نقيب الأطباء العظيم حمدي السيد في قراره الحكيم (ما هي كل القرارات في بلادنا حكيمة) بمنع نقل الأعضاء البشرية بين المسيحيين والمسلمين!!

لا أجد داعيا لكل هذا اللغط وهذه المزيادة على الرجل المحترم الشجاع الواضح والصريح
الراجل واضح وصريح طبعا

فالراجل رأيه في تبريره لقراره الحكيم - م الآخر - إننا شعب واطي!!

وبيقولها بالفم المليان أننا كمجتمع لم نصل بعد إلى هذه الدرجة من العطاء والإنسانية بحيث يتبرع مسلمونا إلى مسيحيينا أو مسيحيونا إلى مسلمينا بالأعضاء!!

ونعم القول يا حضرة النطاسي الحكيم نقيب أطباء مصر
(وهو انا استقلت وسبتها لهم مخضرة من قليل!!!)

طبعا سيادتك إحنا شعب واطي عشان أصلا يسمح للمتنطعين من أمثالك يكونوا في منصب مرموق زي منصب سعادتك!

وطبعا إحنا شعب واطي إننا مستنيين فتوى - والفتوى الآن من كل من هب ودب - عشان نتبرع لأعضائنا لمين ونمنعها عن مين!

وفي الأساس إحنا شعب واطي عشان نخلي المتنطعين - ليس فقط في النقابة - يقرروا لأعضائنا تسكن وتستقر في أي جسد من أجساد العباد!

وطبعا إحنا شعب واطي عشان لما قبل الرجل الفاضل العظيم حمدي السيد ما يتمطع ويقرر قراره الحكيم هذا سكتنا وبلعنا ألسنتنا - ومعاها
جزمة - لما أحد الأفاضل وهو نيافة قداسة الحبر الجليل الأنبا بيشوي اتمطع راخر وقال إن حرام على المسيحيين أن يتبرعوا بالدم للمسلمين عشان دم المسيحيين مقدس إذ تجري فيه دماء المسيح المباركة!!!

إحنا فعلا شعب واطي ومعندوش إنسانية ولا عطاء عشان بيقبل وجود أحد اللا إنسانيين كحمدي وبيشوي في مناصبهم التي يتحكمون فيها - بإلوهية مذهلة - في أدق خصوصيات الإنسان وهي أعضاء جسمه!!

وإحنا فعلا شعب واطي لأننا بنتخاذل عن "العطاء" بالجزمة لكل من تسول له نفسه بالتنطع على خصوصياتنا الخاصة جدا ويقول لنا نتبرع بأعضائنا لمين وما نتبرعش لمين!!

عزيزي الدكتور حمدي السيد ... غور في ستين داهية جتك القرف!
-------

على الهامش...

أحد "العلماء" الأزهريين اللي قرروا يدلوا بدلوهم في هذه القضية المحورية عمل بمبدأ "جه يكحلها عماها!" إذ قال لا فض فوه - وهو المدعو الشيخ جمال قطب" الرئيس الأسبق للجنة الفتوي بالأزهر - "أن الإسلام دعا أتباعه لحسن معاملة الحيوانات والإحسان إليها، فما بالك بأهل الكتاب، فالأمر لا أساس شرعي له تماماً فالإيمان في القلب وليس في الجسد."
مش قلت لكوا إننا فعلا شعب واطي واطي!!

هناك 25 تعليقًا:

  1. المرجعية الدينية للأفراد تتبع اهوائهم غالبا، فصار اليوم الفرق بين التدين والتدني اقل بكثير من إبدال حرفين. أنا حزين جدا مما وصلنا إليه، ولست أدري نهاية لمسلسل التخلف والإنحطاط الأخلاقي الذي يُفاخر به أنصاف البشر هؤلاء.

    ردحذف
  2. المسلسل نهايته إن - كالعادة - الشر هينتصر في الآخر... معروفة دي

    ردحذف
  3. مينو
    انا كتبت بوست في الموضوع ده بالعند في مالك

    ردحذف
  4. اذا كان القرار يشترط وجود القرابة الى الدرجة الثالثة .. يبقى اساسا لازمته ايه اي اضافة على اساس الدين او الجنسية .. الشرط بتاع القرابة بيلغي كل الحاجات التانية

    ردحذف
  5. بس تعليق الشيخ جمال قطب جامد جامد
    وبيظهر طبقا لاحدث المعتقدان
    ان المسيحيين في مصر نزلوا من مرتبة مواطنين درجة تانية لكائنات مساوية للحيوانات او اكثر قليلا والله اعلم

    وطبعا الخرفان حمدي السيد ومن هم على شاكلته .. حاجة تقرف يا مينا بجد

    احنا فعلا شعب واطي ومتخلف
    جدا

    لما هنتجادل كمان في التبرع بالاعضاء بين المسلمين والمسيحيين .. ده على اساس ان الدم مختلف .. دول دمهم اخضر
    ودول دمهم فوشيا

    او الالهة اللي خلقتهم مختلفة

    ده ايه الهرطقة دي كلها
    كفرتونا اللي يخرب بيوتكوا

    ردحذف
  6. مينو
    الشر مش بينتصر في الاخر دي مش حقيقة
    مافيش ظالم انتهى نهاية كويسة ابدا
    اما موضوع الشر والخير مين اللي ح ينتصر
    فالاخر لسة ما جاش ومش ح ييجي لحد يوم القيامة
    طول ما احنا عايشين مافيش اخر
    اما نهايات الظلمة فدايما سودا
    حتى بص على نهاية السادات
    هع هع هع هع هععععععععععععع

    ردحذف
  7. الواحد اصلا مش عارف يقول ايه؟؟

    حاجة تقرف فعلا

    على فكرة كل يوم بتصدق مقولة ان الشعوب تستحق حكامها

    واحنا نستحق يحكمنا ناس اسوا من الموجودين كمان لاننا شعب

    ولا بلاش

    ردحذف
  8. mhsn_10

    هو لسة مش واضح أصلا القرار شكله إيه بالظبط
    والنقيب بيقول إنه قرار مؤقت لحين تمرير قانون خاص بنقل الأعضاء
    المشكلة إن فعلا الفكرة بتاعة منع النقل بين مختلفي الديانة فكرة طائفية مقيتة

    كان الأكثر منطقية إن يتم تقنين الموضوع بحيث يتم إيجاد تشريع للنقل من الموتى وتأسيس بنوك للأعضاء ومحاربة الفساد المالي في المستشفيات الكبرى اللي بيحصل فيها التجارة

    لكن إن يبقى الحل هو الخرا ده فده يعني شيء فعلا حقير

    ردحذف
  9. bluestone

    اللي عاجبني في التعليق بتاع الشيخ يا ماريان إن الراجل بجد طيب وبيقول اللي جواه بصدق وأمانة وعفوية

    هو الخرا ده اللي جوة الأغلبية من الدينين ناحية بعض... فكرة مسيحي بس كويس... أو مسلم بس احسن م المسيحي

    اللي جوة الناس ناحية بعض خرا والعلاج الوحيد إننا نطلع كل الخرا ده ونواجهه

    أعتقد بالفعل أن الآلهة التي خلقتهم مختلفة والدليل إن فعلا دول دمهم اخضر ودول دمهم فوشيا... دا كلام علمي لا يقبل الجدل زي كدة كلام الشيخ جمال قطب بالظبط

    ردحذف
  10. جبهة التهييس الشعبية

    أنا بتكلم عن الآخر النسبي مش الآخر المطلق يا حبيبتي

    وبعدين مالها نهاية المرحوم السادات؟؟
    ما هو الراجل مات شهيد بالعند فيكي
    :P
    وبعدين نهاية السادات تثبت وجهة نظري إن الشر بينتصر في الآخر بدليل إن نهاية السادات كانت بداية عصر مبارك السعيد الذي لن ينتهي - بإذن الله - حتى قيام الساعة

    هي الساعة كام دلوقت؟؟

    هع هع هع هع هع

    ردحذف
  11. Bella

    مالهم بقى حكامنا يا ست بيلا؟؟
    إحنا بيحكمنا أعظم حكام في العالم
    ولا مش عاجبك حكامنا وعايزة نلجأ للتحكيم الأجنبي؟

    لعلمك بقى
    إحنا لا نستحق حكامنا لأن من دون بلدان العالم إحنا الوحيدين اللي بيحكمونا آلهة مش بشر

    عاش الإله وابنه إلى أبد الآبدين آمين

    ردحذف
  12. غير معرف8/17/2008 10:23 م

    د.حمدي السيد نفى الموضوع في برنامج 90 دقيقة - و الله أعلم!

    ردحذف
  13. غير معرف8/18/2008 12:21 ص

    الدكتور حمدى السيد نقيب يشرف الاطباء بصدقة وعلمة وشجاعتة فى الحق وبرلمانى ممتاز وخطيب مفوة وسياسى شريف واللى يقول غير كدة... يطلعلى برةلامؤاخذة..!!

    ردحذف
  14. غير معرف8/18/2008 12:26 ص

    اة ونسيت اقول انة "نطاسى" ايضا وان كنت لا ادرى اصلها الغوى الا انة واللة العظيم نطاسى ياجماعة.........

    ردحذف
  15. مينا
    طبعا معاك تماما فى رفض موقف السيد من مسالة نقل الاعضاء للمسلمين او مسيحيين، بس كنت عايزة اقولك جمال قطب اكيد مايقصدتش اللى قاله!

    يعنى انا متابعة كويس الراجل، هو معظم ارائه متسامحة وباواقه عليها، لكن تلاقى بس التعبير خانه :)

    ردحذف
  16. غير معروف

    أنا يا ابني متفق معاك تماما
    هو نطاسي جدا... نطاسي بشكل مفزع

    ردحذف
  17. نهى

    أمال كان يقصد إيه؟
    والنبي تشرحي لي عشان أنا العربي بتاعي ضعيف شوية

    هو بيقول نصا الإسلام دعا إلى حسن معاملة الحيوانات... فما بالك بأهل الكتاب؟

    يبقى يقصد إيه بقى؟

    -----
    الراجل دا أصلا فكرني بصلاة اليهودي في القرون الغابرة إذ كان يقف يصلي ويقول "اللهم أشكرك لأنك لم تخلقني أمميا (من الأغيار يعني) ولا امرأة، ولا كلب!"

    تحياتي

    ردحذف
  18. هدى بس اعصابك اولا يا مينا

    :)

    انا مش باقولك انه يقصد حاجة غير اللى انت ، العربى بتاعك اسم الله عليه حلو

    انما هو اكيد "ماكنش يقصد" يعنى كلامه مستفز بس اظنهمايقصدش معناه.. سوء تعبير منه يعنى

    على سيرة الحيوانات، خلينى افتكر لحظة اليمة، سمعت فيها واحدة قاعدة فى الجامع بتكلم الستات على "وجوب كراهية البرص والنصارى"!!!!..اه والله درس عن ال "كراهية" فى "الجامع" و"برص" .. وكمان "نصارى"

    مساءك فل!

    ردحذف
  19. :)))) اوعي تحرق دمك
    :)))))))) بيهزر معانا يا مينا

    ردحذف
  20. نهى

    هو الراجل قصده خير أنا عارف وكان جاي يقول بقين حلوين من بتوع إخواننا الأقباط النبي وصى عليهم وكدة... بس هو طلع من قلبه بجد ومش عارف إن اللي جوة فعلا خرا

    ما هي دي أزمة الخطاب الديني إنك أنتجتي ناس بجد طيبة بس التصطيب بتاع دماغهم خرا فعلا ومتفيرس

    فاهماني؟؟؟؟

    ردحذف
  21. كراكيب

    أهو زفت فيهم اللي بيهزر؟؟؟

    ردحذف
  22. هو انت دكتور؟ يخربيت كده ، و الله ما يبان عليك
    يا عم انت ، و ايه أصلا العلاقه بين المسيحيين و الحيوانات؟ مافيش علاقه طبعا

    يعني سيبك من الأفندي ده ، فيه ناس كتير بتعتبر انها لما تأكل كلب هاتاخد ثواب ، بس لما تشتري حاجه من بياع مسيحي هاتاخد سيئات

    فكرتني بنكتة ، بيقلك هتلر كان راجل عطوف اوي على الحيوانات ، و كان قلبه بيتقطع لما يشوف حيوان يدبح أو يتسلخ ، المهم لقى ان كل العساكر و الظباط لابسين جزم بوت طويلة مصنعه من جلود الحيوانات ، يا عيني اتأثر أوي خالص مالص ، و أمر انهم يبتدوا يصنعوا الجزم البوت من جلد اليهود
    نهارك فل

    ردحذف
  23. ربيع

    هههههههههههههههه
    أيوة يا سيدي أنا طبيب سابق
    وبعدين مفروض يبان عليا إزاي يعني؟
    يبقى طالع لي سماعة مثلا في سمانة رجلي الشمال؟

    اللطيف إن الشيخ فعلا كان داخل يقول بقين حلوين وقلبت معاه بغم

    نكتة هتلر مناسبة جد للموقف طبعا

    ردحذف
  24. والله يا مينا بالرغم من حرقة دمى من كتر ما اتكلمت فى الموضوع دا الا انى عامل اضحك من تعليقات الناس و كلام جمال البنا
    تحس ان العالم دى قبل ما بتطلع تقول تصريح بتكون مصرصره مثلا !!!!!
    ربنا يرحمنا بقى الواحد قرف ... عايزين نخترع اختراع يكون كدا حاجه زى جهاز كشف العنصرية و نحاول ننضف البلد دى بقى

    ردحذف
  25. غير معرف10/06/2013 1:09 م

    mada t9oul ya ragl

    ردحذف