Glimpses from My Instagram Gallery

2008-07-29

كفاكم تشهيرا بالشرفاء

قلت لها هذا الصباح... طب ما انتي ياما اتصبتي بكدمات متفرقة في جسمك أيام ما كنتي متجوزة...
هل كان منطقي إنك تتهميه ساعتها بإنه تسبب في موتك غرقا؟؟

غرقى العبارة - اللي ضحكتوا علينا وقلتوا إنهم شهداء - طلع إنهم ما ماتوش بسبب غرق العبارة (يا ظلمة يا كفرة يا اولاد الحرام) وإنما ماتوا بسبب "الإجهاد، وكدمات متفرقة، والتهاب في الحلق"!!! (من وحي حيثيات حكم المحكمة بتاعة قضية العبارة الغارقة)
يعني م الآخر الغرقى اللي افتكرناهم ماتوا غرقانين بسبب الإهمال بتاع ممدوح إسماعيل طلع إنهم ماتوا بسبب التهاب في الحلق وإنهم مش واخدين على البرد والعوم لمسافات طويلة وأوقات أطول وسط أسماك القرش الأليفة!

اللي أنا بس مستغرب له وأدينه وأشجبه بشدة هو إزاي نكافئ الموتى غير الأكفاء دول بتعويضات 300 ألف جنيه للواحد منهم في حين إننا ظلمنا الناجين الأقوياء اللي ما فرقش معاهم البرد ولا الموج العالي ولا السباحة لأوقات ومسافات كبيرة واللي كانوا مصدر رعب لأسماك القرش وغيرها واستطاعوا أن يصلوا بجهودهم الذاتية لبر الأمان ونديهم بعد دا كله 50 ألف جنيه بس لكل واحد...
والأخطر من ده إننا ظلمنا الشرفاء مالكي العبارة وقبطانها الشهيد (اللي هرب أول واحد من السفينة على متن زورق نجاة وساب السفينة تغرق)... متناسين إن لولا الشرفاء دول ما كانتش أتيحت أصلا فرصة إثبات الكفاءة للناجين ومعاقبة غير الأكفاء من "الضحايا" المستضعفين اللي صحتهم تعبانة وبيموتوا من شوية برد واللي بحمد الله تخلصت سفينة الوطن من حمولتهم الزائدة!

حلال ده ولا حرام؟؟؟؟
دا بدل ما كنا نعاقب الغرقى بتشريد أسرهم مثلا وتجويع عيالهم ونكافئ اللي غرقوهم وخلصونا منهم ومن ضعفهم وفقرهم بكل ما أوتينا من موارد وإمكانيات؟
إن ما حدث هو تدهور حاد في أخلاقياتنا البيولوجية إذ انحزنا للمجرمين الغارقين الضعفاء ولم نكرم الأقوياء الناجين والأقوى منهم اللي غرقوهم!

من هنا ورايح - عشان ينصلح حالنا - لازم ندرك جميعا إن سفينة الوطن ما ينفعش يتبقى عليها إلا الأقوياء جدا وينبغي التخلص - كل شوية وبالتدريج - من كل الضعفاء والمستضعفين والجبناء واللي بيجيلهم التهاب في الحلق لنصل بعدها إلى التخلص من الأقوياء العاديين حتى لا يتبقى على متن سفينة الوطن سوى الأقوياء جدا أو السوبر أقوياء وأسماك القرش والحيتان!!

غوروا بقى في ستين داهية الله يقرفكوا

هناك 25 تعليقًا:

  1. انا مكسوف اوي من نفسي و انا اللي كنت فاكرهم غرقوا !! و ظلمت الراجل الكبرة و قعدت اقول انه السبب في غرقهم
    اتاريهم ما ماتوش غرقانين
    لازم بقي نلم من بعض و نجيب ورد كتير و نروح نستناه في المطار يمكن يدوس علينا بعربيته فنموت بسبب نزيف داخلي حاد مش بسبب عربيته

    ردحذف
  2. طبعا
    البقاء للاقوى زي ما قال داروين
    للاسف يا دكتور مينا هذا الانحطاط الاخلاقي البيولوجي اللي بيستتبعه مكافأة الضعفاء سببه الحقيق اننا ابعد ما نكون عن العلم والنظريات العلمية
    الغرب بيتقدم بالعلم واحنا هنا بنناقض نظرية داروين ونكافئ الضغفاء
    عمرنا ما ح بنصلح حالنا
    ثم انا شاكة في نوايا اللي ماتوا
    اصل بيني وبينك كده التحاب في الزور ما يموتش
    اغلب الظن انهم تعمدوا يموتوا عشان يصرفوا الفلوس
    اعوذ بالله ده شعب فعلا الطمع عامي عينيه
    تفتكر ننزل اعتذار للسيد مالك العبارة وشريكه قصدي رفيقه قصدي صديقه
    ونجمع عليه توقيعات وتبقى دي اقل حاجة نقدمها لصاحب العبارة الشريف ومراته..يوووو وصديقه صديقه
    ربنا يعدلها لهم ويتلموا في بيت واحد بقى

    ردحذف
  3. ظهر الحق و زهق الباطل
    الراجل اتبهدل معانا كل ده وفى الاخر اصلا مفيش اى حد مات غرقان
    انا معاك يا هانى فى مشوار الورد والمطار ده انا عاوزه اكفر عن ذنبي فى حق الراجل العظيم ده وكمان عاوزه اروح اعتزر للمحامى المسبسب بتاعه عشان طول الليل كنت باشتم فيه وباسبله الدين هو واهله من ساعه ما شفته ع العاشره مساءا وطلع الراجل فى الاخر مأخدش ولا مليم اتعاب وبيدافع عن المظلوم مجانا ولله وللوطن

    ردحذف
  4. حقيقي إننا ناس ظلمة بجد يا مينا..

    تصدق المفروض ممدوح إسماعيل يرفع قضايا تعويض على الضحايا ، دول كده شهروا بيه و بوظوله العبارة بتاعتوا كمان .. مكانوش قادرين يقفزوا في المية من الاول و يبقوا اقوى من كده ..

    ناس معندهاش دم صحيح.. المفترض نجمع توقيعات نعتذر بيها لمالك العبارة ونجله على ما احاط بهم من ظلم..

    هي الناس دي تقرب لشوبنهاور او نيتشه من بعيد ولا حاجة؟؟؟!!!

    ردحذف
  5. شوفت ازاي يااااا
    ريحت بالى يا مينا بجد وانا اللى بقالى يومين باكل فى نفسي وظلمت ابو شعر مسبسب اللى شلني
    وحتي
    ظلمن سمك القرش

    الا بقولك ويجد موضوع التعويضات ده شكه فيه اوي مش عارفه ليه

    ردحذف
  6. الله يرحمك يا قراقوش ..انت طلعت مسكين و معتـّر ..لو كان قراقوش عايش كان انتحر ..لأنه هالحيثيات لا يمكن تخطرله على بال ..مهما عصر مخـّه ..
    و الله أنا بقرأ ومش مصدّق ..
    على كلّ و تكفيرا عن الذنب ..انا بقترح تعملوا حملة للتضامن مع المجني عليه ممدوح اسماعيل ..و التشنيع بالغرقى و أهاليهم ..لكي يكونوا عبرة لكل من تسوّل له نفسه الموت غرقاً أو دهساً أو نتيجة تناوله أغذية أو أدوية فاسدة في القادم من الايام .

    ردحذف
  7. طبعا مش ازهي عصور الديموقراطية نعيش تحت مظلة القضاء النزيه ابن .... النزيهة

    اخص علينا

    احنا اصلا شعب ابن كلب عايز ضرب الجزمة

    وانا قلت من الاول احنا اصلا كلنا حمولة زايدة .. وياريت حكومتنا الرشيدة بنت ... الرشيدة برضه تغيرنا وتجيب شعب تاني نضيف مستواه احسن من كده يشرفها في المحافل الدولية

    معلش يامينا .. انا صايبني احباط مزمن وحالة ازبهلال وقرف مش طبيعيين من ساعة الحكم .. اللي ريحته مجاري ده

    ردحذف
  8. طيب بمناسبة التهاب الحلق
    حد يجيبلي دوا " اوحا"

    ردحذف
  9. كراكيب

    إنت بتتكلم كدة وكأننا رايحين نجامل أو بلغة الفقه كأن الموضوع سنة أو فرض كفاية في حين إن التكفير عن ذنبنا في حق الراجل الشريف ابن المرة... الشريفة هو فرض عين على كل كلب فينا غلط في الراجل وخاض في سمعته وسمعة اولاد المرة... النزيهة عياله... الفلوس يا حبيب ألبي هتتلم مش بمزاجك لكن غصبن عنك وصدقني مش هزار ولا تهريج إن فلوس جميل سعيد وشلة المحامين الشرفا اولاد المرة الشريفة هتندفع من ضرايبك وضرايب الغلابة!

    ردحذف
  10. جبهة التهييس الشعبية

    أنا متوقع بالفعل إن جميل سعيد يرفع قضية على المجرمين اللي ماتوا عشان يفضح ألاعيبهم القذرة... قال إيه يموتوا ويلموا الفلوس واديها تلويث يا صحافة في سمعة الشرفاء والخوض في أعراضهم

    فيه توقع إنهم يلموا بقية الأشلاء بتاعة الضحايا المجرمين ويحرقوها على أساس إن الغرق مش كفاية وإنهم جرابيع يستاهلوا الحرق!

    لازم ممدوح سماعين يرفع قضية رد شرف على الشعب المصري الحقير وبما إن الشعب ما حيلتوش اللضى هيبقى الحل إن ممدوح اسماعين يشتري الشعب المصري ويبيعه بالكيلو... بس هتفضل مشكلة وأزمة إن الموضوع هيقع عليه بالخسارة لأن الإنسان المصري بقى رخيص... رخيص أوي يا نوارة!

    ردحذف
  11. Nsreen Bsunee

    الظلم ظلمات يوم القيامة
    والأستاذ ممدوح اسماعين انظلم كتير
    وغالبا يوم الحكم دا كان هو يوم القيامة
    وعشان كدة كان ظلمات وكآبة ما بعدها كآبة على كل الكفرة الملاعين اللي ظلموا الراجل الأمير السكرة

    طبعا الحق كان لازم يظهر والباطل كان لازم يزهق... إحنا كمان زهقنا ع الآخر!

    جاية معانا المهم ع المطار بالورود وأظرف النقوط في استقبال ابن المرة... الشريفة وهو جاي؟

    ردحذف
  12. دعاء

    إذا كنتي ظلمتي حد وانتي مش في وعيك ومنجرفة بأكاذيب الباطل وسخافات الكذابين الكفرة ولاد الحرام فباب التوبة مفتوح وممكن تصومي شهر دون أكل ولا شرب وتتبرعي بفلوس الأكل في الشهر ده لأسرة الضحية المظلوم الباشمهندز ممدوح سماعين... مش مهم إنك غلطتي... المهم ما تستمريش في الغلط وترجعي لعقلك وتتوبي عن معصيتك بحق ولي من أولياء الله الصالحين كسيدي ممدوح اسماعيل المنوفي.... مددي يا سيدي ممدووووح مدددددددددددد

    مستيني تيجي معانا ف مشوار المطار
    جهزي الورد وقصيدة اعتذار!!

    ردحذف
  13. appy

    طبعا من حقك تشكي في كل شيء وتتوقعي المؤامرة من كل تفة أو نفة في هذا البلد العظيم... وإذا كان بعض المرتزقة المأجورين في هذا البلد الأمين يقولون أن البلد بحاجة إلى ثورة فإن تلك الثورة بالتأكيد هي "ثورة الشك"!

    ردحذف
  14. حـنــّا السكران

    سدقني أنا كل شوية أروح أقرا الحيثيات تاني وأتأكد بعيني من الجمل... مش قادر أصدق إن القاضي ابن الست المحترمة جرؤ إنه يقول بلسانه إن موت الضحايا لم يمكن الجزم أن سببه هو غرق العبارة!! وكأن موتهم في البحر كان مجرد صدفة تزامنت مع غرق العبارة واللي كانوا بمحض نفس الصدفة راكبين عليها!!

    ردحذف
  15. bluestone

    طب خلي بالك إنك بكدة تبقي بتعلقي على الحكم ودا ممكن يحطك تحت طائلة قانون أم احمد!!

    ماهر عبد الواحد طبخ القضية طبيخ مفيش بعد كدة وأهو قبض التمن ومسكوه الدستورية العليا... والقضية وصلت الشاب الغلبان بتاع جنح سفالة وهي متهلهلة وطالع دين أمها أصلا أساسا يعني

    لأ وقال إيه النيابة دلوقت بتعمل عم الدكر وتطعن على الحكم لأن به كسور في التسبيب (من السبوبة غالبا) وفساد في الاستهبال... طب يا نيابة يا شريفة يا بنت الشريفة لما عند أمكوا ضمير كدة سبتوا القضية أصلا من البداية تخرج متهلهلة كدة إزاي من قلب النيابة وتتحول من جناية إلى جنحة

    ردحذف
  16. HafSSa

    مفيش دوا أوحا للأسف
    ينفع مرهم بواسير؟

    ردحذف
  17. أنت متأكد أنك أنت اللى كاتب المقال دة ؟
    مش عارف لية حاسس كأنة بيان صادر عن الحزب النازى ؟
    يعنى حتة من هتلر على حتة من نيتشة على حتة من .... بلاش أحسن

    تحياتى

    ردحذف
  18. يا سلام يا دكتره عليك
    طول عمر القضاء بتاعنا متجدد ومتطور فى الاحكام بتاعته اللى ملهاش مثيل

    وهنا يعترينى مشهد من فيلم تيتانك الشهير لما قبطان السفينه فضل واقف لحد ما مات فيها قبل ما ينط مع اللى نطوا

    واتضح ان القبطان فى تيتانك رجل علق بتاع فلام وحوارات مش زى الدكر بتاع العباره بتاعتنا هنا
    اللى ساب كل قوانين البحريه ومس فى القانون اللى بيقول
    الجرى نص الجدعنه

    تحياتى يا دكتور

    ردحذف
  19. يعني احنا ظلمنا الراجل الغلبان المفروض بقى ياخد تعويض من الأهالي عشان اتهموه زور وعشان لما غرقوا ادعوا ان هو السبب معا ان السبب انهم ما بيعرفوش يعوموا

    ردحذف
  20. Maikel Nabil Sanad مايكل نبيل سند

    ياه يا أستاذ مايكل إنت فكرتنا بأسماء عظيمة زي العظيم هتلر وخالد الذكر فريدرك نيتشه والغني عن التعريف .... ولا بلاش احسن

    ده أنا عندي قصص عن الأستاذ "ولا بلاش أحسن" ده إنما إيه... تشيب على رأي توفيق الدقن.... تشيببببببببببب!!

    ردحذف
  21. ® رأفتـــلوجيا الرأفتانى

    حاسب "يعتريك" مشهد من فيلم الفك المفترس يجيلك التهاب في الحلق من كتر "الاعتراء" ومن ثم تموت غرقان!

    الجري نص الجدعنة مش مجرد قانون... دا مبدأ فقهي لا جدال عليه ويقال أنه من المعروف من الفقه بالضرورة... وأما إذا كان الجري هربا لوحدك على زورق يسع 30 بني آدم وتسيب المئات يطلع دين أمهم من التهاب الحلق يبقى الجري هنا كل الجدعنة ومنتهى البراجماتية والجاري هنا يدخل الجنة بلا حساب أساسا... والله أعلم

    ردحذف
  22. كريم عاطف

    //لما غرقوا ادعوا ان هو السبب معا ان السبب انهم ما بيعرفوش يعوموا//


    عشان كدة لازم تعلموا أولادكم السباحة والرماية وركوب الخيل.... السباحة عشان يركبوا عبارات ممدوح اسماعيل ن غير ما يجيلهم التهاب في الحلق... والرماية عشان يعرفوا يرموا نفسهم في المية قبل ما تغرق بيهم العبارة... وركوب الخيل كتدريب على ركوب أي لوح خشب تلاقيه على وش المية جنبك وتتعامل معاه على إنه حصان

    ردحذف
  23. انا فعلاً حسيت بغلطتي .. احنا بجد وحشين اوي وما نستاهلش العيشة اللي عايشنها دي .. لا مش بس كدا .. إحنا ولاد ستين كلب .. ايوة , عشان بنضايق الناس الطيبة دي ونلطخ سمعتها بالطين .. واحنا الللي المفروض نغرق في الطين غرقاً شنيعاً ..

    انا لازم اعتذر للراجل الطيب دا وجهاً لوجه

    ردحذف
  24. وقطار الصعيد ومسرح بني سويف

    ردحذف
  25. غوروا بقى في ستين داهية الله يقرفكوا

    وبس

    ردحذف