Glimpses from My Instagram Gallery

2008-05-27

مشكلة طلاق المسيحيين وإعادة تزويجهم مسئولية الدولة مش الكنيسة

في مسألة الأحوال الشخصية للأقباط:

على الدولة تحمل مسئوليتها تجاه حق المواطنين في الزواج وتكوين أسرة

في تعليق على الجدل المحتدم بشأن لائحة الأحوال الشخصية للأقباط الأرثوذكس، طالبت المبادرة المصرية للحقوق الشخصية اليوم بأن تتحمل الدولة مسئوليتها القانونية عن كفالة وحماية حق جميع المواطنين في الزواج وتكوين الأسرة، والمكفول بموجب الدستور المصري والقانون الدولي لحقوق الإنسان. وأكدت المبادرة المصرية أن على مسئولي الدولة إيجاد بدائل فورية تكفل للمواطنين حقهم في اتخاذ القرارات وثيقة الصلة بحياتهم الخاصة والأسرية، بصرف النظر عن ديانتهم أو عن موقف المؤسسات الدينية الرسمية.


لقراءة البيان كاملا على موقع المبادرة المصرية للحقوق الشخصية، اضغط هنا


وأيضا على صفحة المبادرة المصرية على الموقع الجديد للشبكة العربية لمعلومات حقوق الإنسان، اضغط على الصورة أدناه


هناك 8 تعليقات:

  1. نوستالخيا5/27/2008 9:48 م

    مش عارف انا ايه سبب طرحك للموضوع ده .. عموما الكنيسه ستظل هى من تحمى الايمان و كلامك ده ممكن يحصل عادى (مدنيا) فقط بالظبط زى دول كتيير بس الكنيسه مش ملزمه بيه ..

    و شكرا

    ردحذف
  2. في أوروبا في قوانين ماشيه علي الكل، مالهاش دعوه بالكنيسه. ممكن تلاقي قانون مثلا زي حرية الشواذ حتي مع معارضة الكنيسه. ممكن تلاقي قوانين للزواج والطلاق مختلفه مع أراء الكنيسه ..... عادي خالص. الجواز عندهم شقين، واحد مدني في مجلس المدينه، والتاني كنسي في الكنيسه التابعين ليها، المهم بالنسبالهم الجزء المدني، اما جزء الكنيسه فدا بس علشان التصوير والزفه، هما أساسا مش فارق معاهم الكنيسه ولا بيرحوها اصلا.

    في مصر الوضع مختلف خالص بالنسبه للمواطنين... مفيش مسلم حيقبل يمشي علي قانون مخالف لشريعته، ومفيش مسيحي حيقبل يمشعي علي قانون يخالف شريعته، لأن الناس عندنا مؤمنه ومرتبطه بدينها ... ولو ظاهريا.

    بالنسبه للقضيه إلي إنت طرحتها هنا نقلا عن المبادره المصريه للحقوق الشخصيه، المشكله إنهم بيحاولوا يهمشوا دور الدين في حياتنا ويعظموا مبداء المواطنه.... جميل جدا، نعظم مبداء المواطنه مفيش حاجه، بس منحكمش علي الكنيسه إنها تغير دينها ومعتقدتها. إلي عايز يتطلق مدني ويتجوز مدني هو حر، بس ملوش دعوه بالكنيسه بعد كده، ويعيش حريه أوروبيه بتحمي حقوق الإنسان.

    المره الجايه حيطلعوا بيان عن حقوق المواطن المثلي في تكوين أسره، ماهي دي كمان مكفوله في القانون الدولي لحقوق الإنسان!!

    ردحذف
  3. نوستالخيا

    سبب طرحي للموضوع إنه من أهم الموضوعات المطروحة على الساحة حاليا ولأنه يتعلق بمشاكل مئات وآلاف من الأسر والأفراد الذين يعانون ويبحثون عن حلول لمعاناتهم فلا يجدون لا عند الكنيسة ولا الدولة

    بالنسبة لحماية الكنيسة للإيمان دايما سيبقى السؤال هو أي كنيسة نعني وأي إيمان نقصد!

    البيان المشار إليه لم يهاجم الكنيسة لكنه يواجه الدولة بمسئوليتها القانونية والأخلاقية في حماية حقوق المواطنين جميعا وتوفير بدائل أمامهم... البديل المدني لا يفترض بالطبع إجبار أحد عليه ولا يفترض أن تجبر الكنيسة على توثيقه ولكنه يجب أن يكون بديلا مدنيا توفره الدولة لمواطنيها يكفل لهم كافة حقوقهم في الزواج وتكوين أسرة وما يترتب على هذا من آثار

    طبعا الكنيسة مش محتاجة تكون ملزمة بيه لكن الدولة هي اللي لازم تبقى ملزمة بتوفيره

    حاليا مفيش غير زواج ديني بس ولا يوجد بديل مدني لمن لا يرغب في الزواج الديني

    على فكرة الأنبا بيشوي نفسه قال مؤخرا اللي مش عاجبه نظام الكنيسة في الزواج يروح يتزوج في الشهر العقار... هايل جدا... يبقى على الدولة إنها توفر ده لأنه مش متاح حاليا!

    ردحذف
  4. وجهة نظري

    خليني أنقل كلامك وأرد عليه...
    إنت بتقول:

    ==مفيش مسلم حيقبل يمشي علي قانون مخالف لشريعته، ومفيش مسيحي حيقبل يمشعي علي قانون يخالف شريعته==

    كلامك مش مظبوط بدليل آلاف حالات طلاق الأقباط بسبب "تغيير الملة" واللي بحسب القانون يتتطبق عليهم الشريعة الإسلامية... يعني المبدأ موجود وفي قانون الدولة نفسه وفيه مسيحيين بيقبلوا إن تتطبق عليهم قوانين مختلفة مع الشريعة المسيحية أو على وجه الدقة تفسيرات معينة للشريعة

    الدولة أساسا مختلفة مع موقف الكنيسة ولم تقر تعديلات اللائحة متعللة بأن اللائحة مبنية على تفسير ضيق قد يتغير بين وقت وآخر

    خليني أرد على حتة تانية في كلامك
    إنت بتقول

    ==الناس عندنا مؤمنه ومرتبطه بدينها ... ولو ظاهريا==

    الكلام بتاعك بيناقض نفسه!
    منين الناس مؤمنة ومنين مرتبطة بدينها ظاهريا؟
    الإيمان شيء عميق في حياة الإنسان ولا يمكن الجمع بين "الإيمان" والارتباط الظاهري بالدين.
    الأصح إنك تقول إن مش كل المنتمين للأديان مؤمنين... لأن الناس بتتولد في دين أو اعتقاد ما ولا يتاح لها أصلا الحق في حرية الاعتقاد على نحو واقعي وبالتالي أغلب الناس مش مؤمنة بقدر ما هي منتمية لدين ما أو اعتقاد ما وأعتقد أنك تعلم أن الانتماء لدين ما يختلف جذريا عن الإيمان

    تعال لنقطة تانية في كلامك
    إنت بتقول

    ==منحكمش علي الكنيسه إنها تغير دينها ومعتقدتها==
    متفق معاك قطعا
    لو انت كنت رحت قريت النسخة الكاملة للبيان اللي أنا حاطط فقرته الأولى كنت قريت الفقرة التالية وفهمت المقصود:
    "وإن كان من حق الكنيسة أن تتمسك بتفسيرها للنصوص الدينية، فإن من حق الدولة ـ بل من واجبها ـ أن توجد خياراً أمام الأقباط الذين يختلفون مع هذا التفسير"... وضحت الرؤية كدة؟ البيان بيواجه الدولة بمسئوليتها نحو المواطنين بتوفير بدائل تخلي الناس تعرف تعيــــــش

    إنت بتقول
    ==إلي عايز يتطلق مدني ويتجوز مدني هو حر، بس ملوش دعوه بالكنيسه بعد كده==
    طب ما هو دا اللي ناس كتير بتدور عليه ومش لاقياه... حل مدني يحل مشاكل الناس ولو ما عجبش الكنيسة حقها... بس مش فاهم جملتك بتاعة "مالوش دعوة بالكنيسة بعد كدة"... تقصد مالوش دعوة بالكنيسة في موضوع الجواز ده ومباركته؟ ولا ملوش دعوة بيها بعد كدة بمعنى طرده من الكنيسة وتكفيره واعتباره زانيا مرتدا مثلا؟ ولو قصدك التانية يبقى لازم نسأل نفسنا هو الزواج المدني زنا؟؟؟؟؟؟؟؟ إذا كان يا عم الحاج الزواج العرفي غير الموثق ليس زنا وإذا كان أي عاقل في أي دين لا يجرؤ على وصف المتزوجين خارج إطاره الديني بأنهم زناة... في نظري لازم الاختيارات كلها تكون متاحة أمام الجميع والفرد هو اللي يختار وتوفير البدائل دي مسئولية الدولة بالأساس

    ردحذف
  5. والله يا حج جرجس انت حيرتني دماغك دي حتكون سبب في انك تطرد من الكنيسة او تموت مقتول علي ايد المتطرفين بتوع الكنيسة ربنا ينصرك بعيد عن الاديان انت هدفك الحرية الشخصية وحرية التعبير ربنا معاك ومع كل واحد حر

    ردحذف
  6. تامر صلاح

    تصدق بجد إنك قلقتني
    هو ممكن المتطرفين المسيحيين في مصر يوصلوا فعلا لقتل المختلفين معهم؟
    بما إن كل شيء في بلادنا جايز حتى حبل العجايز وحكمهم للبلاد أيضا فمش بعيد يا ابو صلاح

    أخبار صفوت الشريف معاك إيه؟
    يا بتاع الملفات الصفرا
    هههههههههههه

    ردحذف
  7. يا سلااااااااااااام
    ح نهبل بقى

    ردحذف
  8. غير معرف5/08/2011 3:25 م

    لو اهم حاجة هى الحرية الشخصية المدنية وان احنا ندور على حلى مدنى بعيد عن الدينى و منعتبروش خروج على الدين يبقى ايه لازمة الدين اساسا

    ردحذف