Glimpses from My Instagram Gallery

2008-04-13

لن نصالح على الدم .. حتى بدم ! إنها الحرب!

في بيت قتيل المحلة الطفل أحمد مبروك

الحادية عشر مساء الإثنين 7 أبريل 2008:
يا احمد سيب الكمبيوتر بقى كفاية لعب وخش نام عندك "درس" الصبح
حاضر يا بابا... (ويخش سريره ياخد الدبدوب بتاعه في حضنه وينام)
......

بعد وقت قصير

صوت هرج ومرج في الشارع تحت البيت يقوم أحمد منزعجا وبقية أهل البيت عليه
أحمد يجري على البلكونة اللي فاتحة على أوضته
يطلع أحمد يبص من البلكونة وأبوه يخش وراه ويقول له خش جوة يا احمد
.........

يبص الأب يشوف بعنيه قوات أمن من العمليات الخاصة في الشارع وناس بتجري
وفي لحظة يسمع صوت الضابط قائد الفرقة يصرخ في جنوده "اضرب... إضرب"!!
.........

في اللحظة التالية يجد عم علي ابنه أحمد والدم يتدفق من أنفه
يظن أبو احمد - في لحظة ذهول - أن ابنه يعاني من عراف من الأنف وإن ده "دم فاسد" نازل من مناخيره
لكن لذهوله أدرك إن راس ابنه كلها غرقانة دم!!
..........

بنتكلم عن لحظات وثواني حرفيا...
في لحظة يسقط أحمد على الأرض وهو غارق في دمه بين يدي أبيه المذهول من هول الكارثة
........

عمة أحمد تتصل بالإسعاف
يرفض الإسعاف الحضور لنجدة أحمد أو محاولة إسعافه!!
........


يركض عم علي مبروك حمادة بأحمد المحتضر بين يديه إلى الشارع
ويستقل سيارة أحد الجيران الذي يقله إلى مستشفى خاص لمحاولة إنقاذ أحمد

المستشفى ترفض استقبال أحمد

........


الواد بيطلع في الروح يا جدعان
......

يوصل عم علي إلى "مستشفى القصر" اللي هي المستشفى العام
بس أحمد كان مات
......

أحمد مات يا كفرة يا ولاد الحرام
أحمد مات يا حبيب يا عادلي
أحمد مات يا حسني!!!
.....

أحمد مات وشهود العيان قالوا لي إنهم شافوا في جثة أحمد خرم في أسفل رأسه أعلى الرقبة وخرم تاني في أعلى الرأس من الناحية التانية!!!!
.....

ظباطك يا عادلي وكلابك يا حسني بيضربوا رصاص حي على طفل في بلكونة بيتهم!!
.....

أحمد مات بين إيدين أبوه على باب المستشفى العام
دلوقت يا فندم نقدر نستلم جثة إبنك!!
دخلوه على المشرحة يا رجالة!!
......

الجنازة هتكون تحت الحراسة
ومش عايزين حد يعمل دوشة
من المستشفى للمدافن كله تحت حراسة مكثفة ومشددة
......

وانا في أوضة أحمد كنت شامم ريحة الدم... مش مجازا لكن حرفيا... ريحة دم الولد كانت في مناخيري
اتهزيت من جوايا وكأنه زلزال عنيف
شفت دم أحمد على الستاير
شميت دم أحمد بمناخيري

......

دم أحمد ما ينفعش يروح هدر
بيننا وبينك با حسني دم!!!
بيننا وبينك يا حكومة دم!!
بيننا وبينك يا عادلي إنت وكلابك دم!!
.....

لن نصالح على الدم... حتى بدم!!


إنها الحرب!!

.....

دم أحمد مسئولية في رقبتي ورقبتك ورقبة أي حد فينا لسة عنده دم
اعتقد إننا مهم جدا نوثق شهادات قتلى المحلة التلاتة بسرعة عشان نقدر نحرك قضية قتلى المحلة على كافة المستويات
ممكن نعمل حاجات كتير على المستوى القانوني والمستوى الحقوقي... القضية ينفع تتاخد على المحكمة الأفريقية بس محتاجين أدلة وشهادات وتوثيق

علينا دور مهم أوي في توفير غطا إعلامي وحقوقي لحماية أسرة القتيل الطفل أحمد علي مبروك
علينا إننا نقف جنبهم بجد لأن المتوقع في الوقت الجاي إنهم يلبسوا القضية للأهالي والبلطجية اللي كانوا بيمارسوا الشغب!!
ومتوقع يساوموا الأب على فلوس وخبرتنا مع قتيل الفيوم بتقول إن دي سياستهم المنهجية

عايزين ما ننساش الاتنين التانيين القتلى في أحداث المحلة ونبدأ نوثق حوادث قتلهم
ونجمع شهادات وأدلة ينفع نستخدمها بعد كدة في الدعاوى القضائية
.....

على الهامش

خال الطفل القتيل ثار جدا لما لقى جريدة البديل كاتبة إن وكيلة وزارة التضامن عدلات عبد السلام زارت المصابين وإدت كل مصاب تلتميت جنيه وأدت أسرة القتيل أحمد علي مبروك ألف جنيه!!
صرخ عم علاء الشبيني بأعلى صوته... "دول بيتاجروا بدمنا!!!!"

فعلا يا عم علاء
دول بيتاجروا بدمنا!!




ده فيديو صوره وائل أثناء الزيارة بيحوي شهادة شهود العيان ومصور البلكونة اللي اتقتل فيها أحمد وآثار الرصاص على حيطة جيرانهم
بالمناسبة... هو الرصاص المطاطي ينفع يعمل حفر بالشكل ده في الحيطان؟؟؟؟؟؟؟


هناك 15 تعليقًا:

  1. غير معرف4/13/2008 4:32 م

    الحرب
    ودم وبدم
    اشمعنا ده
    ما احنا ياما راح مننا كتير
    يمكن عشان طفل بري
    يمكن عشان الواحد دموعه نزلت وهو بيقرا البوست ده
    بس بجد
    هو احنا عندنا دم
    تصدق ده لو ابني او حاسس بجد انه ابني
    كنت هاعمل حاجة من اتنين
    لا اولع في نفسي وعيلتي
    او ..........
    تفتكر ان دي ممكن تكون دعوة للعنف
    لا ما افتكرش
    بعد ما تم سبي الجميع
    فين الاحرار
    ااااهههههههههههه يا بلد

    ردحذف
  2. يعني انتا في رأيك ان الأمن قتل احمد وهو قاصد؟ مش يمكن كانوا بيضربوا في الهوا علشان يخوفوا الناس؟ وبعدين تفتكر الأمن كان المفروض يتعامل ازاي مع الناس اللي كانت بتحدف عليه طوب وزجاجات حارقة زي ما كلنا شفنا في التلفزيون؟ انا طبعاً حزين على وفاة احمد ولكن حزني لا يفقدني الموضوعية! انتا عايز دم او حتى حرب! هتقتل مين؟ وزير الداخلية؟ رئيس الوزراء؟ المجندين اللي اطلقوا الرصاص؟ الضابط اللي ماسكهم؟ ولا اللي ولع في المدرسة وكسر المحلات وولع في القطر؟ ولا كلهم؟

    ردحذف
  3. غير معروف

    إشمعنى ده؟
    عشان السياق بتاع مقتل أحمد علي مبروك سياق دم... سياق حرب... سياق إجرام دولة مقترن بالفجور... عشان أحمد طفل اتقتل في بلكونة بيتهم برصاص حي!!

    عشان الكلب اللي قتل أحمد واخد أوامر بالضرب في المليان من فوق... فوق أوي!! فوق تحديدا يعني العادلي ومبارك وعمر سليمان كمان

    الداخلية والمخابرات ورئاسة الجمهورية كلهم أجرموا في حق البلد وقتل أحمد علي مبروك تجسيد لهذه الجريمة... عشان كدة باقول إنه لن نصالح على الدم حتى ولو بدم!!

    يعني أنا ضد العنف وضد الأخذ بثأر أحمد لأن مش دا اللي هيحل الأزمة... بس أنا مع محاكمة المجرمين من أول الكلب اللي داس على الزناد وقتل أحمد لحد بقية الكلاب اللي أصدروا الأوامر العليا ... العليا أوي

    وبما إن مفيش محاكمات وحتى الظابط الصغنون اللي قال اضرب مش هيتحاكم ولا هيتحاسب... يبقى لن نصالح... يعني مش هنقبل ولا حتى بالقصاص!!!

    لن يكفيني سوى أن أرى نظام مبارك يسقط - سلميا - ولا أرى بديلا في الوقت الحالي يصلح لإسقاط نظام مبارك سلميا سوى بالمقاومة السلبية والعصيان المدني

    ردحذف
  4. الأخ بتاع نهضة مصر

    أنا هحاول أرد عليك بهدوء - لا يتناسب مع الظرف بس هحاول - الأمن لما يضرب في الهوا رصاص حي يبقى اللي بيضرب ابن كلب وسخ وفاجر وحتى لو لم يقصد قتل أطفال لكنه متوقع وعامل حسابه إن فيه إمكانية قتل سكان مدنيين قاعدين في بيوتهم أو في بلكوناتهم... الغارة اللي شنها الأمن في الشارع الضيق اللي جنب بيت أحمد علي مبروك كانت غارة أمنية إرهابية قذرة فيها نية قتل بالفعل... وبيت أحمد - ودا شفته بعيني - بعيد عن الشوارع الرئيسية اللي كانت فيها المظاهرات... وبالتالي الجريمة القذرة اللي ارتكبوها كلاب مبارك وكلاب العادلي مكتملة الأركان يا باشا

    بالنسبة لرأيك إن اللي نادوا بالإضراب جهلة وأغبياء والكلام السخيف ده اللي قريته في مدونتك واللي جاي تكمله هنا بإن كان فيه أهالي بترمي زجاجات حارقة أقدر أقول لك إن دا كلام غير دقيق وغير صحيح على الإطلاق... فيه قوات أمن ضربت قنابل مسيلة للدموع والأهالي كانوا بيقاوموا بحجارة ودا رد فعل طبيعي جدا... وكان البعض بياخد القنبلة المسيلة للدموع ويرميها على القوات المعتدية من تاني... يعني إنت لو في مظاهرة سلمية - ودا حقك القانوني والدستوري إنك تتظاهر سلميا - واترمى عليك قنبلة مسيلة للدموع وانت أعدت إلقاءها على اللي رماها عليك فأنا شايف إن رد فعلك ساعتها طبيعي تماما

    التخريب والتكسير اللي حصل كله عليه علامات استفهام وتعجب كتيرة وشهود العيان بيأكدوا إن الشرطة مثلا هي اللي نزلت سواق القطر واعتدت عليه وإن بلطجية تابعين للشرطة أو معروفين لهم هم اللي عملوا كثير من التخريب والتدمير... يعني الموضوع كله مش زي ما انت متخيل

    خليك موضوعي يا أخي... فيه ناس كانت ضد الإضراب وغيرت رأيها لما شافت إن الموضوع فعلا عمل فرق وأثر تأثير ما كانش حد متوقعه

    بالنسبة للدم والحرب
    اقرى كلامي كويس
    أنا قلت لن نصالح على الدم حتى لو بدم
    يعني الانتقام الدموي مش هو الحل... كلامي واضح... لن نصالح ولن نقبل إلا بإسقاط النظام وبمواصلة المقاومة السلمية لتخريب مبارك وعصابته... أنا مؤمن بالحل السلمي... وإن كان هذا لا ينفي أنها الحرب بالفعل!!

    وبعدين لو انت قريت شوية ودورت في جوجل على كلمات لا تصالح على الدم حتى بدم... إنها الحرب لعرفت أنها ليست كلماتي وإنما اقتباس من العظيم الشاعر أمل دنقل في قصيدته العبقرية لا تصالح

    أتمنى أن تكون فهمت
    تحياتي

    ردحذف
  5. ضرب رصاص فى الهوا لتخويف الناس ليس مبررا لقتل طفل ليس له اى ذنب سوى انه مواطن فى بلد معرصه..
    ولو كنا فى بلد محترمه..كان العادلى ورجالته اتحاكموا من الف سنه فاتت..بس للاسف احنا فى بلد.. اللى ما يخدش حقه بإيديه يطلع عين امه

    الله اعلم الايام اللى جايه مخبيه ايه..

    بالنسبه للاضراب سواء مختلف معاه او مؤيده انا من رأى ان اللى حصل فى المحله ده هو بدايه وليس نهايه

    تغطيه جميله يا مينا برغم ان انها موجعه للقلوب

    ردحذف
  6. انا ضد العنف ضد تاعنف حتى آخر عمري ومش هأقدر اقول ان حسبي الله ونعم الوكيل في الظابط اللي ضرب والوزير اللي أمر والرئيس اللي فكر وقرر وحسبي الله ونعم الوكيل حسبي الله بجد من قلبي

    ردحذف
  7. رأفت

    بما إن العادلي ومبارك مش هيتحاكموا يبقى لا سبيل سوى المقاومة السلمية المستمرة لأجل إسقاط هذا النظام

    الإضراب والعصيان المدني أفضل حل وخصوصا لأنك بتطلب من الناس مقاومة سلبية مش هتعرضهم لمخاطر أمنية مباشرة لكنها ذات تأثير فعال

    النظام اتهز بالفعل في ستة أبريل
    والغلطة كانت المظاهرات

    لو بندعي لإضراب يبقى بس إضراب
    لو هندعي لمظاهرة يبقى هنقول مظاهرة
    بس أدعي لإضراب بعنوان خليك بالبيت
    واليوم اللي بعده أأكد على الناس إننا هنقابلهم بقى في الشارع!!!؟؟

    إضراب يبقى الناس تقعد في البيت
    يبقى فيه مقاومة سلبية سلمية مؤثرة وبتهز النظام من أركانه

    ردحذف
  8. عفريــت

    انا برضو ضد العنف
    وعشان كدة بنقول المقاومة السلمية هي الحل
    ثورة الجياع في الطريق والجياع لا أنا ولا انت تقدر تحكم تصرفاتهم... وزي ما رأفت قال اللي حصل في المحلة بداية مش نهاية

    ردحذف
  9. حسبنا الله ونعم الوكيل
    حسبنا الله ونعم الوكيل ارحمنا يارب برحمتك
    تحياتي

    ردحذف
  10. حسبنا الله ونعم الوكيل
    حسبنا الله ونعم الوكيل
    حسبنا الله ونعم الوكيل
    حسبنا الله ونعم الوكيل
    حسبنا الله ونعم الوكيل
    حسبنا الله ونعم الوكيل

    .....................
    حضرتك شوف تحبوا تعملوا ايه واحنا معاكم ان شاء الله
    حتى لو بالسلاح
    انا مابهزرش

    ردحذف
  11. ان الدم الذي اهدرهو دم كل المصرين انا نعيش تحت الاحتلال بصوره حقيقيه ويجب ان يعامل مبارك وكلابه علي هذا الاساس
    ده اسرئيل مبيتعملش كده مع فلسطنين

    ردحذف
  12. ان الدم الذي اهدرهو دم كل المصرين انا نعيش تحت الاحتلال بصوره حقيقيه ويجب ان يعامل مبارك وكلابه علي هذا الاساس
    ده اسرئيل مبيتعملش كده مع فلسطنين

    ردحذف
  13. غير معرف4/28/2008 11:49 م

    جنود الملك سليمان
    إلى أحمد على مبروك

    الشعر القاتل
    دفعك الى الطيران للمحلة

    بعد أن انطفأ موقد قوافيه..!!
    فصارت معلقة
    كسيوف دون كيشوت


    كان حيا لا يموت
    وكانت ثيابه الشفافة الناصعة البياض
    تزيد صباحات الوطن الملبدة جمالا


    ستدخل حجرته
    وهو يجلس على مقعد خشبى
    بمنتصف العالم

    كانت صلاة المهرجين والجنود تصنع أقواسه الذهبية



    إختار العميلة ذات النهدين المنتفضين
    واندمج فى دحر الإرهابيين بدولة من العالم الثالث
    رغم احتمائهم بالمسجد



    وهو يغوص فى عصاه
    كان يحيى الموتى


    المصباح المترنح كسكير
    والشاشة
    يضيئان ساحة المعركة الإلكترونية

    المجد لك

    ما أجملك.......
    ما أجملك.......


    الظلام يلف احشاء الحجرة
    ستباغتك رائحة الدم بالهجوم الخاطف


    هو مانح الرزق لديدان الأرض
    وعصافير السماء


    لماذا تسللت كلص ايها الشعر القتيل؟
    لماذا تسلقت جدران هذه الحجرة الفقيرة
    بالمحلة الكبرى؟
    هل استوعبت قصيدتك حجابا يلف رأس فتاة
    فى الرابعة؟


    بخنصره يحل معضلة طوابير الخبز
    ورواتب الجوعى
    والأطباء


    طلقة
    من أعلى الرقبة الى منتصف الرأس
    يهمس الهدهد لصولجان الملك بأسراره الدفينة


    لا تسألن عن السبب
    وقف على حد الأدب


    نافورة تسدل الستار على خشبة المسرح
    سليمان عار
    وعصاه اكتسبت هشاشتها من النمل والموت



    سوف تسقط جثته
    والجنود يحيطونه بالنياشين

    ردحذف
  14. غير معرف4/28/2008 11:53 م

    القصيدة السابقة بعنوان جنود الملك سليمان من تأليفى
    سعيد ابوطالب

    ردحذف
  15. غير معرف5/20/2008 10:24 م

    5 يونيو،23 يوليو،6 أكتوبر;أيام إضراباتناالقادمة من أجل تطهير مصرنا منهم! أيامعشر المحبطين والمقهورين والمدهوسين تحت أقدام العائلة المُدنسّة ذات الأصول الإنجلوـيهودية من أحفاد التمرجية الإنجليزية!جالكم كلامي!

    ألم أقل لكم إن إبن المُحضرـالذي تربى من الحرام وتعود عليه ـسيخذلكم،وسيمارس الشبق السياسي،مع وطيئه بوش?!!إنه كنيش أمريكاني!!زرعته الموساد بالتعاون مع المخابرات الأمريكيه،في مركز صنع القرار ،ليخدم مصالحهم وإبنه من بعده!!لقد زرعوا من قبل من دمر بلاده وحلفاؤه،كجورباتشوف وأمثاله.الحل الأوحد في إنقاذ مايمكن إنقاذه؛إستئصال شقفةأسرته وحاشيته ولو بثورة حمراء!!ولكم في الثورة حياة ياأولي الألباب!!!سالم القطامي

    ردحذف