Glimpses from My Instagram Gallery

2008-04-28

الإسلام دعا إلى ثورة الجياع المسلحة... فهل كثير عليكم الإضراب؟؟

تصحيح لابد منه: المقولة ثبت أنها مقولة لأبي ذر الغفاري وليست حديثا نبويا عنه
لكن في كل الأحوال االفكرة ثابتة ولم تتغير... فالصحابي الجليل أبو ذر أعتقد إن تعاليمه ما حدش يقدر يزايد عليها ويقول إنها مخالفة لصحيح الإسلام!!
واللي مش عجباه العبارة هيقول إيه في الحديث بتاع أفضل الجهاد قول كلمة حق في وجه سلطان جائر؟؟

وبالتالي أرجع وأؤكد... الإسلام بيدعو لثورة الجياع والخروج على الحاكم الظالم المستبد!
وفي تدوينة تانية أكدت إن تعاليم الكتاب المقدس برضه بتدعو للدفاع عن الحق والتمرد على الفساد والظلم

يبقى عايزين إيه تاني بقى؟؟؟

خليكوا بالبيت يوم أربعة مايو
-----------------

أول مرة أسمع عن هذا الحديث النبوي الذي يقول...

" عجبت لمن لا يجد قوت يومه ثم لا يخرج شاهرا سيفه "

وهو حديث على الأرجح صحيح عن أبي ذر الغفاري

وبالنسبة لي فهو يسقط كل دعاوى وفتاوى فقهاء السلطان المنافقين طبالي زفة النظام الذين يقنعون الناس أن الخروج على الحاكم الظالم المستبد هو حرام

رسول الإسلام دعا الجياع إلى الثورة المسلحة ويعجب لتخاذلهم
ولا أعلم إلى متى سيجعل المسلمون رسولهم يتعجب؟؟؟؟


إن كان الرسول قد دعا إلى ثورة جياع مسلحة فنحن كل ما دعونا إليه هو إضراب سلمي ومقاومة سلمية لنظام فقد عقله ورشده وصوابه وصار كأنه قوة احتلال غاصبة تقمع الشعب وتذله وتجوعه وتحاصره بشتى صنوف الإرهاب والخوف والقهر والاستبداد

يا مسلمي مصر ويا كل مواطنيها من كل دين ممن في قلبهم إحساس ودم

إلى متى تخافون؟

إلى متى تقبلون بالذل والجوع؟

لا أدعو إلى إشهار السيف في وجه الظالمين بل أدعو إلى احتجاجات سلمية وإضرابات عامة وعصيان مدني شامل يسقط النظام الفاسد دون قطرة دم واحدة ودون فوضى وتخريب

تذكروا أن نفس الرسول الذي يتعجب من خنوع الجياع وتخاذلهم وعدم إشهارهم السيف في وجه ظالميهم هو أيضا من قال أن

أفضل الجهاد هو قول كلمة الحق في وجه سلطان جائر


أفلا تفيقون بعد؟؟؟؟؟

هناك 17 تعليقًا:

  1. كلمتين وبس4/28/2008 2:17 م

    والله يا حاج مينا أنا مش عارف أنت عايز إيه بالظبط؟؟
    أنا كمسلم عمرى ما سمعت الحديث ده ، ولو فرضنا إنه حديث صحيح فالمفروض إنه جه فى سياق معين أنت ماذكرتوش ، مش يعنى أى واحد جعان ياخد سيفه ويطلع يقطع الطريق.

    بقولك إيه؟ ما تقولنا حاجة من الكتاب المقدس بتحث على الإضراب علشان إخواننا المسيحيين يتشجعوا ويعملوا إضراب سلمى وسيب الإستشهاد بالأحاديث للمسلمين.
    مش كدا ولا إيههههههههه

    ردحذف
  2. بعد إذنك يا مينا..ده فعلا مش حديث قاله الرسول عليه الصلاة و السلام...دي مقولة عن أبي ذر الغفاري فعلا لكن مش حديث...لكن ينفع طبعا تستحث الناس بيها...انا بس بصحح الخطأ للدقة مش اكتر :-)

    ردحذف
  3. هي المقوله مشهوره و سواء كانت حديث للنبي او كلمه لصحابي فهي في تراثنا الاسلامي ثابته و موجوده و لا اعتقد انه من المفروض السكوت علي الظلم لمجرد ان التراث النبوي يخلو من المطالبه بالثوره عليه

    ردحذف
  4. اه يا مسيحي يا دسيسة ياللي مش بتقول سياق المقولة بتاعة ابو ذر الغفاري
    اممممممممممممم عايز ايه؟ ايوة ايوة انا احنا عارفين خبث الكفاتسة بس على مييييييييييين
    مش ح نولك مرادك وح نجوع ونسكت بالعند فيك يا كفتس

    يا اخ كلمتين وبس
    المقولة مش حديث المقولة لابي ذر الغفاري وما اظنش ان ابي ذر الغفاري كفتس زي الواد مينو الوحش ده
    واقول ايه كمان يا سيد
    حديث: افضل الجهاد كلمة حق عند سلطان جائر حديث صحيح

    واتقوا فتنة لا تصيبن الذين ظلموا منكم خاصة اظن انت عارف انها اية وللا ايه؟
    في سورة التوبة وللا ايه؟
    وللا ح نلغيها من القرآن عشان الواد الكفتس ده ما ينبسطش
    انت وحش يا مينو
    وحش وحش
    عايزنا لما نجوع نزعل
    امشي امشي
    ما بتقولش ليه حاجة من الكتاب المقدس؟
    يمكن عشان مافيش قسس علقوا على الاضراب وعشان احنا عندنا مشايخ السلطان قالوا الاضراب حرام؟
    امممممممممممم
    وطب وايه يعني
    طب ما...ما...ما انتوا ما عندكوش طلاق كمان بس هه
    اما ناس زرقا صحيح عايزين مننا ايه؟
    -----
    ده بس كان تعليق على الاخ كلمتين وبس
    المهم
    يا مينو انا مع الاضراب لو عشان الجوع وعشان الحرية بس مش عشان التهريج
    الله يخليك ركز شوية
    احنا عايزين حاجة يكون لها فعالية عشان يبقى لها تأثير وعشان كمان الناس تتشجع وما تحسش انهم ح يروحوا النار عشان بيقولوا جعانين
    يعني هم مش راضيين بقى بنصيبهم وللا ايه
    مش كده يا اخ؟

    ردحذف
  5. ماهو لو كنا طبقنا الحديث الصحيح و واجهنا السلطان الجائر بكلمة الحق ماكناش وصلنا للحال اللى ينطبق عليه مقولة أبى ذر بس إزاى وأحنا أصلا اتربينا غلط ع المثل اللى بيقول أصبر على جارك السو يا يرحل يا تجيله مصيبة تشيله و الصبر ع البلاوى عبادة

    ردحذف
  6. مينا
    عاوز اقول لك على حاجه احنا كمسلمين بنخاف نقول حديث الا اذا عرفنا موقعه ومكانه والسبب حتى لايحسب علينا
    انا ازيدك صح لو عاوز تقرأ كتاب الفتن والملاحم لابن كثير ستعلم ان رسولنا الكريم صلى الله عليه وسلم اخبرنا بحالنا الان وماسيكون كما اخبرة المولى عز وجل

    ردحذف
  7. يا جماعة ممكن نراعي إن مينا مش مسلم
    يعني ببساطة شديدة ممكن يكون مش فاهم يعني إيه حديث وتخريج وصحيح وحسن وضعيف وإلخ إلخ ...
    ما أقوله الآن مجرد تصحيح للمعلومات :
    " عجبت لمن لا يجد قوت يومه ثم لا يخرج شاهرا سيفه "
    بعد البحث تأكدت أن هذا ليس حديثا نبويا .

    " أفضل الجهاد هو قول كلمة الحق في وجه سلطان جائر " أما هذا فهو يحمل معنى الحديث الذي رواه عن النبي صلى الله عليه وسلم الأئمة : أبو داوود والترمذي والنسائي وابن ماجه وأحمد والدارمي والبيهقي ومنهم من قال أنه حديث صحيح ومنهم من قال أنه حديث حسن .

    وهذا لا يعني أن الإسلام لا يعترض على الظلم بل إن رفض الظلم مبدأ إسلامي أصيل
    إكمالا لكلام جبهة التهييس الشعبية أنا أنقل لكم رواية لحديث أفضل الجهاد كلمة حق عند سلطان جائر :

    رواه الإمام أحمد بسنده عن أبي سعيد الخدري قال : خَطَبَنَا رَسُولُ اللَّهِ -صلى الله عليه وسلم- خُطْبَةً بَعْدَ الْعَصْرِ إِلَى مُغَيْرِبَانِ الشَّمْسِ حَفِظَهَا مِنَّا مَنْ حَفِظَهَا وَنَسِيَهَا مِنَّا مَنْ نَسِىَ فَحَمِدَ اللَّهَ - قَالَ عَفَّانُ وَقَالَ حَمَّادٌ وَأَكْثَرُ حِفْظِى أَنَّهُ قَالَ بِمَا هُوَ كَائِنٌ إِلَى يَوْمِ الْقِيَامَةِ فَحَمِدَ اللَّهَ - وَأَثْنَى عَلَيْهِ ثُمَّ قَالَ « ... أَلاَ إِنَّ لِكُلِّ غَادِرٍ لِوَاءً يَوْمَ الْقِيَامَةِ بِقَدْرِ غَدْرَتِهِ أَلاَ وَأَكْبَرُ الْغَدْرِ غَدْرُ أَمِيرِ عَامَّةٍ أَلاَ لاَ يَمْنَعَنَّ رَجُلاً مَهَابَةُ النَّاسِ أَنْ يَتَكَلَّمَ بِالْحَقِّ إِذَا عَلِمَهُ أَلاَ إِنَّ أَفْضَلَ الْجِهَادِ كَلِمَةُ حَقٍّ عِنْدَ سُلْطَانٍ جَائِرٍ ».

    اكرر :
    ألا إن لكل غادر لواء يوم القيامة بقدر غدرته ألا واكبر الغدر غدر أمير عامة ( هذا يوم القيامة )
    وأما في الدنيا : ( ألا لا يمنعن رجل مهابة الناس أن يتكلم بالحق إذا علمه )
    وبشكل عام ( ألا إن أفضل الجهاد كلمة حق عند سلطان جائر )

    هذا التأصيل الإسلامي لأحاديث النبي صلى الله عليه وسلم .
    ولابد أن يوقن الجميع أن نهي الظالم عن ظلمه أمر شرعي بل هو واجب على المسلم

    روى البخاري عن أنس :
    قَالَ رَسُولُ اللَّهِ - صلى الله عليه وسلم - « انْصُرْ أَخَاكَ ظَالِمًا أَوْ مَظْلُومًا » . قَالُوا يَا رَسُولَ اللَّهِ هَذَا نَنْصُرُهُ مَظْلُومًا ، فَكَيْفَ نَنْصُرُهُ ظَالِمًا قَالَ « تَأْخُذُ فَوْقَ يَدَيْهِ »

    في النهاية ليس من حق أحد أن يمنع إنسانا ( أيا كان دينه ) أن يتكلم عن الإسلام طالما أنه لم يتعمد الخطأ أو الإساءة لهذا الدين أما إن أخطأ فإننا نصحح له ما أخطأ فيه .

    آسفين للإطالة

    ردحذف
  8. غير معرف4/29/2008 2:51 ص

    على فكره يا مينا , مش بنحب الكلمه دى "رسول الإسلام" .. هى كلمة مستحدثه و مكناش بنسمعها من المسيحيين زمان و إنما دلوقت بقت على الإنترنت من المسيحيين .. بالعقل كدا , الرسول بيكون من إللي أرسله فالكلمه الصح هى رسول الله لانه هو الذى أرسل محمد و لا نقول رسول الإسلام و رسول المسيحية و رسول اليهوديه .. و ياترى هتقولوا إيه عن إببراهيم مثلا ؟ .. رسول إيه .. ؟ .. فبلاش الكلمه دى "رسول الإسلام" .. أنا عارف غنك مش مطالب بإنك تؤمن بيه .. دا عادى و شيء طبيعى و بالتالى لا تقل رسول الله .. مش مشكله ... و لكن إبدأ إنت كاول مسيحي يستعمل كلمه غير كلمة "رسول الإسلام" ... مثلا قل محمد ... أو قل الرسول محمد .. و هيتفهم إنت تقصد مين بالظبط لأن مفيش غير محمد واحد بس إللى يقول أتباعه عليه إنه رسول .. أو قل الرسول محمد أو النبى محمد او محمد الرسول أو نبى المسلمين أو النبى محمد او ... الخ
    و أنا على فكره علمانى و لا أريد أن أسبب أى ضيق عليك و إنما إنت صحافتك شعبيه تبصر الناس بالحقيقه فدى كلمه منى لهذا الهدف

    و تحياتى

    ردحذف
  9. ليس حديثاً ، إنما هى مقولة لأبى ذر الغفارى

    وأظن أنه لازم تعدل الموضوع
    لأنه غير صحيح

    ردحذف
  10. يعني الأخ مينا كان في زيارة سريعة لمدونة ما بدا لي
    قوووم عجبه المقولة أو الحديث كما لم يتأكد و لم يقف عند النقطة دي .... وبنى على أساسها إستغرابه من عدم الثورة أو على الأقل الإضراب
    قووووم جل - إن لم يكن كل - وقف عند .... هو حديث ولا مقولة!!!!!!
    لا و الأكتر من كده اللي بيعلمه ماذا يسمي الرسول عليه الصلاة و السلام!!!!!
    مش ملاحظين إن الحديث عن لب الموضوع أهم من قشوره
    عجبت يا أخي
    عجبت لمن يرى شعبا يهتم بالفرعيات ويسيب الأساسيات كيف لا يخرج عليهم ببنطلونه!!!!!
    الموضوع ده فكرني بأيام تعديلات الدستور و لما المجلس المنقر عدل الصيغة و أضاف
    ولما أضاف
    أضاف .,
    شفتوا أضاف إيه؟؟؟
    مشفتوش
    أضاف نقطة . و فاصلة ,
    و عجبي

    ردحذف
  11. كلمتين وبس

    خدي يا سيدي السياق بنص كلمات الصديقة العزيزة نوارة...

    الحقيقة انا مش عارفة ح تفرق مع الاخ المجهول في ايه انه يعرف سياق مقولة ابو ذر
    واذا كان ضروري بقى يبقى يلبس دي في وشه: ابو ذر كان بيقول الكلام ده في عهد معاوية بن ابي سفيان، وسيدنا ابو ذر اللي تنبأ له الرسول بانه ح يعيش لوحده ويموت لوحده ويبعث لوحده، وهو كان من خيرة الصحابة الذين انفقوا من قبل الفتح وجاهدوا، كان من معارضين لمعاوية بن ابي سفيان لان كان فيه ناس جعانة في عهده، وكان ابو ذر بيحرض الناس على معاوية وبيشكك في شرعية خلافته
    ها؟ كان لازم يعني نفتح الموضوع ده ونضايق الناس اللي عمالة تقول معاوية رضي الله عنه؟
    ------------

    بالنسبة لطلبك إني أقول لك حاجة من الكتاب المقدس بتحث على الثورة على الحاكم الظالم... خش التدوينة اللي بعد دي بعنوان "يوحنا المعمدان، اغتيال معارض سياسي"... أظن ما حرمتكش من حاجة يا زعيم

    ردحذف
  12. Hook

    شكرا للتصويب وقد راعيت ذلك وأضفت تصويبا في أعلى الموضوع
    -----------


    ذو النون المصري

    لأ التراث النبوي لا يخلو من الدعوة للثورة وأنا جايب الحديث بتاع أفضل الجهاد قول كلمة حق في وجه سلطان جائر... وفيه بالطبع الحديث بتاع منى رأى منكم منكرا ... بس للأسف أساء المتشددون الإسلاميون استخدامه فبات لديهم تكئة لتكفير المجتمع وإرهابه بالعنف... على الرغم أن معناه في الحقيقة ينطبق أكثر على الاحتجاج على الظالم المتجبر والطغاة المستبدين مش إنك تتشطر بيه على الغلابة
    ---------------

    ردحذف
  13. نوارة

    طبعا الإضراب والاحتجاج لأجل الجوع والقهر والقمع والإرهاب المباركي

    الموضوع نفيهوش تهريج خالص
    وهو لو كان فيه التهريج كان فضيلة المرشد (لأ مش مرشد مباحث) المرشد الأستاذ مهدي عاكف "تجاوب مع دعوة نشطاء الإنترنت" بالالتزام بالبيت؟

    الموضوع جد وجد أوي كمان
    واللي يخاف يروح من دلوقت عشان مش عايزين حد يعيط

    ردحذف
  14. سنابل قمح

    إحنا وصلنا للحضيض في الحقيقة
    لأول مرة في تاريخ مصر يبقى عندنا "شهداء خبز"!!!
    مستنيين إيه تاني بقى

    ردحذف
  15. احه دوت كوم

    ==احنا كمسلمين==

    إيه ده هو دا إسم واحد مسلم؟

    هو فيه مسلمين بيسموا أحه حاليا؟
    جديدة عليا دي

    ردحذف
  16. أبو أسامة

    تم تصحيح الخطأ وبالطبع المبدأ والفكرة لم تتغير لكون العبارة حديثا أم مقولة لأبي ذر

    بس عندي سؤال بريء....
    أنا نقلت العبارة من مدونة صديق مسلم إخواني وكان قايل إنها حديث برضو ومحدش اتطنطط عليه ولا شتمه ولا هاجمه ولا حتى صلح له... عندك فكرة ليه؟

    ردحذف
  17. free zone

    إنت جبت المفيد
    تحياتي

    ردحذف