Glimpses from My Instagram Gallery

2008-04-23

إضراب 4 مايو... رسالة من شعب مصر إلى رئيس الدولة

يحمل إضراب الرابع من مايو عدة رسائل من شعب مصر إلى رئيس الدولة
أقل هذه الرسائل أهمية ودلالة هي أن الإضراب يوافق يوم مولد سيادته
فهذه جزئية تعكس حس الدعابة والسخرية عند المصريين وليس أكثر
لكن الأكثر أهمية هو أن شعب مصر قرروا أن يعبروا عن اعتراضهم بإيجابية
هذا الشعب الذي يراهن النظام الفاسد على سلبيته وتتحدث النخبة عن ذات السلبية
قرر أن يقلب الترابيزة على الجميع
ويفاجئ الجميع بأنه لا يزال شعبا حيا
على الرغم من رفض جماعة الإخوان للإضراب
ورفض الأحزاب للإضراب
وعدم وضوح حركة كفاية حتى الآن من الإضراب
إلا أن الشعب قال كلمته وسيضرب يوم الرابع من مايو
على الرغم من استخدام القوة المفرطة في إضراب 6 أبريل
وعلى الرغم من وجود قتلى ومصابين
وعلى الرغم من الاعتقالات
إلا أن الشعب المصري واضح إنه قرر إنه يعلن تمرده على منظومة الفساد الحكومية ويعبر عن رفضه ليها
كرة التلج اتحركت ومحدش هيقدر يوقف نموها ولا تسارعها
اللي بيراهن على إن الشعب المصري مات يبقى خد أكبر خازوء في عمره
الشعب ما ما ماتش هو بس كان "منفض" شوية
وعلى فكرة... القضية ما بقتش إيه اللي هيحصل وبس في 4 مايو
الموضوع عدى وعدى أوي....
الموضوع خلاص بقى شعب في مواجهة عصابة
والشعب دلوقت بقى عارف عدوه
عصابة مبارك كيان معادي ليس لمجموعة نشطاء
ولكنها عصابة تعادي شعبا
تقرير مباحث الإنترنت المرفوع لوزير الداخلية بيأكد إن الإضراب لا يمكن منعه
وإنه لمنع الإضراب ومنع الدعوة له يحتاج البلطجية أن يعتقلوا 50 ألف مواطن
هع هع هع هع
حتى لو قبضوا على الخمسين ألف
مش هيقدروا يوقفوا نضال شعب قرر أن يتحرك وأن يقاوم

عزيزي مبارك... شعب هذا البلد يكرهك بعمق
يا شعب مصر... قاوموا الطاغية
المقاومة السلمية هي سلاحنا

فلنضرب في كل مكان... فلنقاطع كل ما له علاقة بالنظام والحكومة
6 أبريل كان البداية و4 مايو لن يكون النهاية

لقد بدأت مقاومة الشعب المصري

المقاومـــــــــــــــــــــــــة إلى أن يسقط الطاغية
المقاومـــــــــــــــــــــــــة من أجل الإصلاح
المقاومـــــــــــــــــــــــــة من أجل غد أفضل لنا ولأولادنا
المقاومـــــــــــــــــــــــــة حتى المــــــــــــــوت أو الحياة بكرامة!!!

هناك تعليقان (2):

  1. غير معرف4/24/2008 4:50 م

    الإخوان وأحزاب المعارضه مش حيشتركوا في الإضراب اللى جاي زي عدم إشتراكهم في الإضراب السابق بحجة عدم معرفة الجهه المنظمة وأهدافها 0 ده كلام جميل جدا وهم صح 00000 بس ياريت مدام هم شايفين إن الشعب عايز يعمل إضراب طب ما يساعدوا الشعب وهم يعلنوا عن إضراب ويعلنوا عن أهداف محدده للإضراب واحنا كده كده حنضرب مع اي حد يضرب ( بضم الميم ) 0 ولا هى حجج فارغه وخلاص ؟ يقولوا كده بصريح العبارة ان هم مش قد عمل إضراب وان شباب مصر بس الغلبان اللى لا ليه لا في الطور ولا في الطحين اللى بيتسجن وبيتقتل وبيتسحل هو اللى قادر يعمل إضراب0 ويريحونا بأه من النغمة الكدابه ديه انهم اقوي جهه معارضه في مصر 000 لان في رايي انه لا يوجد جهه معارضه في مصر اساسا غير الشباب اللى مش عارف يشتغل او يعيش او يتجوز او يتنيل على عينه حتى 0

    ردحذف
  2. غير معرف4/26/2008 10:10 ص

    تشرق الشمس كل يوم ولم يمنعها مخلوق اغرقت الشمس الارض بنورها ولم يستطع ان يوقفها احد ليس معني ان تغرب الشمس انها لن تشرق ثانية سوف تشرق حتي لو طال الظلام ففي الظلام يسود الفساد والكل يعمل ما يحلو له من خير اوشر وان كان الشر هو مهنة الفساد والمفسدين حتي يتفننون فيما يخربون ولقد بزغ شعاع النور ليعلن عن اشراقت شمس جديده تحلق لتمحي ما احدثة الظلام من فساد

    ردحذف