Glimpses from My Instagram Gallery

2007-12-29

مدوناتنا ليست إرهابية يا سي عبدو

ظهر الحق يا رجالة

ومدوناتنا ما طلعتش إرهابية

والمستشار عبد الفتاح مراد صاحب معلقة القاضي المستشار عبد الفتاح مراد

خسر القضية
خسر القضية

فقد حكمت محكمة القضاء الإداري اليوم برفض دعوى مراد من حيث الموضوع

وأكدت المحكمة على حرية التعبير وعدم المساس بالمواقع

ومراد خسر القضية يا رجالة
فلنوزع الأنخاب ونعلق الزينات

وسمعني أحلى سلام مربع

2007-12-26

المراكز "القبطية" لمناهضة حقوق الإنسان... عمار يا مصر

مبدئيا لا يوجد ما يسمى أصلا ناشط في الشأن القبطي!
أيوة أنا عارف إن فيه ناس كتير اسمها كدة وبتبيع وتكسب على حس اللقب "الفزيع" ده
بس من تاني مفيش حاجة اسمها كدة

أولا حقوق الإنسان لا تتجزأ
ودي ألف باء حقوق بني آدمين
يعني يا البني آدم فينا بيدافع عن حقوق الإنسان على بعضيها يا بيسيبها كلها على بعضيها
هي كدة حزمة واحدة
take it or leave it
مفيش حاجة اسمها بتدافع عن الحريات الشخصية مثلا
لكن بتناهض الحريات المدنية والسياسية
(كما هو الوضع في تونس مثلا)

أو إنك بتدافع عن حرية الاعتقاد وبتناهض الحقوق الاقتصادية والاجتماعية
وهكذا

وحتى لو انت متخصص في مجال ما من حقوق الإنسان
فدا المفروض بيبقى على أساس إنك بتركز في خدمة هذه الحقوق المعينة كجزء من تبنيك لحقوق الإنسان كمنظومة عالمية متكاملة غير قابلة للتجزئة ولا للتصرف

الإخوة بقى بتوع إكشاك حقوق الإنسان (والمراكز الحقوقية بتاعة تحت السلم) اللي بيدعوا إنهم حقوقيين
لكن عند أول عطفة تجدهم يظهرون وجههم البغيض المناهض لحقوق الإنسان
دول الواحد مش عارف يقول عليهم إيه الحقيقة

بالأمس حكمت محكمة القضاء الإداري برئاسة المستشار محمد الحسيني
(نفس القاضي اللي قضى بعدم إلزام جهة الإدارة بإصدار بطاقات رقم قومي للعائدين إلى المسيحية في القضية الشهيرة في أبريل الماضي)
حكمت بقبول الدعوى المرفوعة من "الناشط الحقوقي"، الناشط في الشأن القبطي، المحامي "المحتسب" ممدوح نخلة
المرفوعة ضد جهة الإدارة لإلزامها بسحب بطاقة الرقم القومي من المواطن "الأنبا ماكسيموس" رئيس جمعية (أو مجمع) القديس أثناسيوس الرسولي.


الظريف والمفجع في هذه القصة اللطيفة إن الأستاذ ممدوح هنا - وإن كان بشكل غير رسمي - يمثل موقف الكنيسة الرسمية اللي شايفة في تنامي "ماكسيموس" واتساع تأثيره والاعتراف الرسمي - من الدولة - به تهديدا على سطوتها وهيمنتها على "رعيتها" التي تتحكم فيها كما يتحكم "خولي العزبة" في أنفاره... وهو شكل حديث من أشكال القنانة (عبودية الأرض).

للإخوة بتوع حقوق الإنسان "القبطي" أقول...
حلوا عن سمانا وروحوا شوفوا لكوا شغلانة شريفة تاكلوا منها عيش
وبلاش تشويه لسمعة حقوق الإنسان عشان مش ناقصة
مش هتبقوا انتوا والدولة علينا

2007-12-24

السعودية بتمسي على المدونين... مساء القمع يا حاج بودي!ـ

الحرية لعميد المدونين السعوديين


المدون السعودي فؤاد الفرحان في المعتقل منذ 10 ديسمبربدون إبداء أسباب ولا حتى مكانه معروف
الجهاز الأمني لعزبة الحاج بودي بيمسي ع المدونين السعوديين

فؤاد اتخطف من مقر عمله يوم 10 ديسمبر اللي هو بالصدفة اليوم العالمي لحقوق الإنسان... حلاوتك يا بودي يا قامعهم

فؤاد الفرحان مدون إصلاحي جريء يطلق عليه متابعوه "عميد المدونين السعوديين"

لقراءة بيان الشبكة العربية عن اعتقال الفرحان اضغط هنا

غدا يوم التدوينة البيضاء

action note blanche



حلاوتك يا زيزو يا قامع الحريات والآكل من لحم التونسيين على مدى عشرين عاما

بكرة يوم التدوينة البيضا تضامنا مع زملائنا المدونين التونسيين
يا اخوانا تونس بقيادة زيزو (الشهير بـ "بينوشيه العرب") تتفوق قمعيا على مصر وبجدارة!!

فلنتضامن غدا مع زملائنا المدونين التونسيين في يوم التدوينة البيضاء

"الي ميعرفهاش التدوينة البيضاء هي حركة احتجاجية من قبل المدونين على حجب المواقع و المدونات في تونس الحركة هادي متنطويش تحت اي حزب او توجه سياسي وهي مفتوحة للكل بش يشارك فيها."... (التعريف من هنا)
ومن هنا برضو تقدر تخش تاخد أكواد البانرات بتاعة التدوينة البيضاء وبكرة ندون في نفس الوقت تدوينات بيضاء وعليها شعار التدوينة البيضا





2007-12-19

أوقفوا التمييز الديني في سوق الدعارة في إسنا!

في أحداث عدوان المسلمين على المسيحيين في إسنا على مر الأيام الماضية
توقفت على نقطة عبثية جدا في هذه القضية



البداية الأولى للاعتداءات والتي توالى بعدها تتابع أحداث العنف "الإسلامي" ضد المسيحيين كانت "ليلة حمراء"!



نعم... هذه "الليلة الحمراء" هي التي أدت إلى أحداث "الليلة السوداء" التي فيها هاجم الأهالي المسلمون كنيسة المسيحيين وسلبوا ونهبوا ممتلكاتهم ومحالهم التجارية والتي لم تبرد نارها بعد
والتي بلغت خسائر المسيحيين فيها ملايين الجنيهات



نعود إلى واقعة "الليلة الحمراء"...
قبل أيام من وقوع الاعتداء المبارك لمسلمي البلدة على مسيحييها وسرقة ممتلكاتهم وحرق محالهم ثم حرق كنيستهم كان شابان مسيحيان (قيل إنهم ثلاثة بس مش مشكلة) اتفقوا مع إحدى المومسات (غانية لعوب يعني بلغة روايات الستينات) على قضاء ليلة حمرا مع بعضيهم في الصيدلية التي يعمل بها الشابان واتفقا معاها على 100 جنيه (18 دولارا كما أوردت العربية في خبرها)...

ولحد كدة المفروض مفيش مشكلة في الحياة!!


الدعارة شيئ قذر ومقيت وإهانة للمرأة وتسليع لها وإهانة لإنسانية المرأة قبل أي شيء آخر... إلخ إلخ...

لكن كل آرائنا الأخلاقية والحقوقية هذه لن توقف الدعارة أبدا وكما يدخن أغلبية الشعب المصري الحشيش ولا يتصور عاقل أن تتوقف يوما تجارة الحشيش على الرغم من تجريمه فالمصريون (والبشر عموما) رغم رفضهم للدعارة إلا إنهم يعرفون جيدا أن العاهرات هيفضلوا موجودين وهيفضل فيه قبول شبه ضمني لفكرة الدعارة من حيث المبدأ وخصوصا في المجتمعات الذكورية اللي بتعود عليها منفعة ما من عمل العاهرة والتي بناء عليه استحقت (من وجهة النظر الذكورية عينها) عن هذا العمل تلك الأجرة!!

الشيء الصادم بقى في ليلتنا الحمرا التي نتحدث عنها هذه المرة هي أن المجتمع تعامل معها بشكل محير للغاية...
كانت مشكلة المسلمين الثائرين في تلك الليلة هي...

إزاي المسيحيين يناموا مع المومس المسلمة؟؟؟

طبعا البعض - من السذج أمثالي - هيتصور إن المشكلة مش كدة وإنها قضية "شرف" عادية ولا علاقة للدين بها وأن الثورة من أجل "الشرف" والعرض أمر معتاد في الصعيد...

كان نفسي الحقيقة أقول لكم إن الموضوع شرف وعرض وكلام تخين وكدة بس سوري الموضوع مكانش كدة!

ببساطة لو كان شرف ونيلة كان الإخوة المسلمون الثائرون دبحوا البت أو ضربوها بالرصاص - ومكانش هيبقى فيه قصة أصلا ولا حتى أهلها كانوا هيبلغوا... مش قلنا مجتمع مفروض إنه ذكوري!! - بس دا محصلش!!

الإخوة المسلمون الثائرون أخدوا البت (اللي هي مومس وقابضة أجرتها!) وسلموها - بأمان - لأهلها دون أن يمسها أحد بسوء!! ومسكوا في الولدين المسيحيين اللي كانوا مأجرينها (بعد هروب الثالث)... ووتوالى الأحداث ويتدخل بالطبع أمن الدولة!!

الولدين يتقبض عليهم... أيوة بس مفيش تهمة في القانون تسمح بإدانتهما! أيوة حضراتكم القانون بيدين المومس بس لا يدين طالب المتعة الذكر (لأن المجتمع والمشرع نفسه ذكوري عادي يعني)... طب يبقى الولدين نعمل فيهم إيه؟
يخرجوا براءة مثلا؟
لأ طبعا... أمن الدولة لازم يتصرف... يبقى يتوجه لهم تهمة إثارة الشغب!

أيوة بس دول ناس ما عملوش حاجة مثيرة للشغب خالص
هل أمن الدولة مثلا شايف إن المية جنيه قليلة على البنت وبالتالي العيال أثاروا شغب؟

وهنا نتساءل هل المفروض الذكر المسيحي يدفع في المومس المسلمة مبلغ أكبر مما يدفعه المسلم وإلا يبقى مثير للشغب؟
وهل بالتبعية ينبغي أن يدفع الذكر المسلم مبلغا أقل في المومس المسيحية مما يدفعه في المومس المسلمة على أساس إنها أقلية؟!!

شايفين إني باتبلى على الأهالي؟
طب إيه رأيكوا إن الذكورالمسلمين قالوا كدة بالفم المليان...

"إن شا الله ننام معاها واحد واحد، لكن المسيحيين ما يلمسوهاش"!!!

يعني المشكلة اللي عند "الرجالة" بارمي الشنبات المحترمين دول مش جريمة شرف ولا أزمة عرض بينتهك ولا أزمتهم بنتهم اللي جابت راسهم في الأرض (بحسب منظومة قيم الصعيد القديمة)
لكن مشكلتهم هي دين طالب المتعة الحرام!!

فالمومس المسلمة محرمة على المسيحي لكنها حلال (وإن كان الأمر كله مكروها بالطبع) للمسلم أو على الأقل مش هتتقلب البلد بسببها!!

طب تعالوا نفترض بقى افتراضات جدلية...

دلوقت كلنا بنرفض الدعارة كتجارة وأغلبنا عارفين إنه بالرغم من رفضنا مفيش قانون ولا شرع يمكن أن يمنع الدعارة وهتفضل الدعارة تمارس حتى لو طبقنا الحدود!

طيب بناء على كدة لابد من الإقرار (عمليا) بأن فيه عاهرات مسلمات وعاهرات مسيحيات (عادي يعني طبيعة مصر الديموجرافية بتقول كدة)

طب بناء على ما يطلبه المسلمون الثائرون... هل نقصر النوم مع المومسات المسلمات على الذكور المسلمين؟

وهل سيلتزم الذكور المسلمون بمقاطعة المومسات المسيحيات؟

وبالنسبة للمومسات المنسيحيات من سيعوضهن عن الخسائر المالية إذ يقتصر سوقهن على الرجال المنتمين إلى الأقلية الدينية المسيحية بينما منافساتهن من المسلمات يعملن على سوق أوسع من الرجال المنتمين إلى الغالبية الدينية المسلمة...

وحيث أن الدولة تتبع سياسات الليبرالية الجديدة ورأسمالية السوق المفتوحة

فإنني أدعو من هذا المنبر لإطلاق الحريات الدينية في سوق الدعارة المصرية!!

ورفع الضرر عن العاهرات المسيحيات إعمالا لأبجديات المساواة الدينية الحقيقية بين العاهرات المصريات دون تمييز على أساس الدين بما قد يؤدي إلى إلحاق الضرر بهذه "الصناعة" الوطنية وهذا "المرفق" الحيوي... وإلا وجدنا المستهلكون المصريون - مسيحيوهم ومسلموهم - زهقوا من وجع الدماغ وبدءوا يوجهون أموالهم للعاهرات الأجنبيات بما يعني إهدار رأس المال الوطني بشكل لا يقبله أي وطني "شريف"!!

إن جموع الوطنيين تهيب بالرئيس "المثقف" أن يتدخل بنفسه لإيقاف هذا الظلم الواقع على هذه الفئة من مواطنات بني شعبه

2007-12-11

نقاطع يوتيوب ولا ما نقاطعش؟ حد عنده بدايل؟؟

تحديث عاجل: وائل عباس ينشر خبرا عاجلا من نص ساعة عن استرداد فيديوهاته على يوتيوب
شكلنا كدة مش هنقاطع يا شباب
مبروك يا وائل



بداية القصة: وائل عباس يصرخ في رسالة على تويتر:
disaster: youtube disables my account claiming there were complaints about my police torture videos!!!
(كارثة: يوتيوب أوقف حسابي مدعين أن كان فيه شكاوي من فيديوهات تعذيب الشرطة بتاعتي!!!)

وبعدها كتب وائل على مدونته عن فضيحة إيقاف يوتيوب لحسابه وتساءل عن الاحتمالات القائمة وراء إيقاف حسابه على يوتيوب:
فهل هناك
تعاون بين يوتيوب والنظام المصري؟؟
أو أنه خطأ يمكن إصلاحه؟
أم أن يوتيوب أصبحت تدعم التعذيب وتتستر على فاعليه وتتعاون مع الحكومات الديكتاتورية؟؟

حساب يوتيوب بتاع وائل عباس كان عليه أهم فيديوهات التعذيب في أقسام الشرطة المصرية اللي كانت ضربة موجعة بالفعل لجهاز الشرطة المصري اللي بينتهج التعذيب كسياسة منظمة واشتهرت قضايا التعذيب في أقسام الشرطة المصرية إعلاميا باسم "كليبات التعذيب" وبالإنجليزية
El-Adly VideoGate

بعد شوية يوتيوب بدأت ترد بشكل رسمي - طبعا بعد ما وائل سيح للي جابوهم وما سكتش - وكان ردهم محاولة لحفظ ماء الوجه إذ أعلن الأخ المتحدث الرسمي ليوتيوب إن يوتيوب كانت وهتفضل دايما منبر حر للتعبير للجميع ولكن برضو لازم يحافظوا على اليوتيوب كبيئة آمنة للمستخدمين (يا حلاوتك يا حنين) وبالتالي حذفوا فيديوهات التعذيب بتاعة وائل لأن قال إيه الفيديوهات كانت بتحتوي مشاهد عنف وبلاوي مسيحة والسياق بتاعها مكانش واضح (!!!) وبالتالي هما راجعوا الموضوع وقرروا يرجعوا حساب وائل لكن الحساب طبعا راجع ع البلاطة وفاضي تماما، بس معندهمش مانع خالص خالص إن وائل يرجع يرفع فيديوهاته على اليوتيوب بس يبقى يشرح السياق بتاع الفيديوهات عشان يبان إنه تعذيب مش حاجة تانية (!!!)

طبعا ناس كتير - وأنا منهم - كلوا من الكلام بتاع يوتيوب واعتقدوا - بالخطأ - إن يوتيوب تابت وأنابت عن عملتها المهببة بإرجاعها الحساب بتاع وائل... بس الحقيقة - كما فضحها وائل - إن يوتيوب بتستهبل بالأوي وطبعا محاولتها لحفظ ماء وجهها - إن كان في وجههم ماء أصلا - مفضوحة ومكشوفة... فإرجاع حساب وائل بدون الفيديوهات ليس له معنى (ببساطة كان ينفع يعمل حساب جديد لو القضية هي الحساب الفاضي!)، والفكرة بتاعة "سماحهم" بأن يرفع عباس الفيديوهات من تاني فكرة هطلة جدا لأن تحميل هذه الفيديوهات من جديد معناه مئات من الساعات الطوال في رفع أكثر من مائة فيديو
(180 فيديو بحسب وائل نفسه) كانت على حساب وائل في يوتيوب تحوي كليبات التعذيب وتغطياته للمظاهرات وغيرها وغيرها من الفيديوهات الهامة التي - في رأيي - أكسبت وائل ومدونته الوعي المصري هذا التأثير المذهل المشهود له عالميا ومحليا (وائل حاصل على أكثر من جائزة دولية ومحلية ودوره في التدوين المصري لا جدال عليه).

وائل في رده على كلام الأخ المتحدث الرسمي ليوتيوب جاب م الآخر في تسييحه لهم لما قال:
وقال إيه مسموح لي ارفعهم تاني بشرط إني أكتب معاهم شرح بيوضح فيهم إيه علشان محدش يفتكر حاجة غلط لا سمح الله
طب هو أنا لما أكتب
Egyptian police brutality
ده مش كفاية؟
يعني ممكن حد يفتكر فيديو عماد الكبير ده مثلا
Gay Orgy
(أو جنس جماعي للشواذ)
ولا فيديو البنت المتعلقة بين كرسيين ده BDSM
(تلذذ سادي مازوخي)
ما أنا كاتب إنه
Egyptian police torturing a female murder suspect
(البوليس المصري بيعذب أنثى متهمة في جريمة قتل)
وبعدين معظم الفيديوهات طالع فيها الظباط باليونيفورم
هل ده ممكن يعتبر عند يوتيوب
Police uniform fetish
(تلذذ جنسي بارتداء ملابس شرطة)
الخلاصة يعني ومن الآخر
It was a hoax

(كانت نصباية!!!)
--------------------

بعض المدونين طرحوا فكرة مقاطعة يوتيوب وأنا شايف إن كلامهم وجيه... مش مجرد حملة تهويش... بس محتاجين فعلا نطرح بدايل لمواقع فيديو تانية تكون سمعتها محترمة شوية عن يوتيوب... فيا ريت اللي عنده أفكار وبدايل يطرحها الله يكرمكوا

دا لنك لجلوبال فويسز أونلاين بيتكلم عن الموضوع

2007-12-03

بالفيديو: اقتحام الجيش لجزيرة القرصاية

فيديو يصور حصار القوات المسلحة واقتحامها لجزيرة القرصاية الثلاثاء الماضي

فضيحة اقتحام الجيش المصري لجزيرة القرصاية والتي أجبرت الصحف على طمس الحقيقة فيها... البديل كانت الجريدة الوحيدة التي قالت أن القوات تتبع لجهة سيادية... المصري اليوم بقى جالها أمر من فوق بوقف النشر في الموضوع!!!

من مسئول عن توريط القوات المسلحة المصرية في هذه المهزلة؟؟؟



رابط الفيديو هنا
http://www.youtube.com/watch?v=38EXk57sJ6w
شكرا للفنان محمد عبلة