Glimpses from My Instagram Gallery

2007-12-19

أوقفوا التمييز الديني في سوق الدعارة في إسنا!

في أحداث عدوان المسلمين على المسيحيين في إسنا على مر الأيام الماضية
توقفت على نقطة عبثية جدا في هذه القضية



البداية الأولى للاعتداءات والتي توالى بعدها تتابع أحداث العنف "الإسلامي" ضد المسيحيين كانت "ليلة حمراء"!



نعم... هذه "الليلة الحمراء" هي التي أدت إلى أحداث "الليلة السوداء" التي فيها هاجم الأهالي المسلمون كنيسة المسيحيين وسلبوا ونهبوا ممتلكاتهم ومحالهم التجارية والتي لم تبرد نارها بعد
والتي بلغت خسائر المسيحيين فيها ملايين الجنيهات



نعود إلى واقعة "الليلة الحمراء"...
قبل أيام من وقوع الاعتداء المبارك لمسلمي البلدة على مسيحييها وسرقة ممتلكاتهم وحرق محالهم ثم حرق كنيستهم كان شابان مسيحيان (قيل إنهم ثلاثة بس مش مشكلة) اتفقوا مع إحدى المومسات (غانية لعوب يعني بلغة روايات الستينات) على قضاء ليلة حمرا مع بعضيهم في الصيدلية التي يعمل بها الشابان واتفقا معاها على 100 جنيه (18 دولارا كما أوردت العربية في خبرها)...

ولحد كدة المفروض مفيش مشكلة في الحياة!!


الدعارة شيئ قذر ومقيت وإهانة للمرأة وتسليع لها وإهانة لإنسانية المرأة قبل أي شيء آخر... إلخ إلخ...

لكن كل آرائنا الأخلاقية والحقوقية هذه لن توقف الدعارة أبدا وكما يدخن أغلبية الشعب المصري الحشيش ولا يتصور عاقل أن تتوقف يوما تجارة الحشيش على الرغم من تجريمه فالمصريون (والبشر عموما) رغم رفضهم للدعارة إلا إنهم يعرفون جيدا أن العاهرات هيفضلوا موجودين وهيفضل فيه قبول شبه ضمني لفكرة الدعارة من حيث المبدأ وخصوصا في المجتمعات الذكورية اللي بتعود عليها منفعة ما من عمل العاهرة والتي بناء عليه استحقت (من وجهة النظر الذكورية عينها) عن هذا العمل تلك الأجرة!!

الشيء الصادم بقى في ليلتنا الحمرا التي نتحدث عنها هذه المرة هي أن المجتمع تعامل معها بشكل محير للغاية...
كانت مشكلة المسلمين الثائرين في تلك الليلة هي...

إزاي المسيحيين يناموا مع المومس المسلمة؟؟؟

طبعا البعض - من السذج أمثالي - هيتصور إن المشكلة مش كدة وإنها قضية "شرف" عادية ولا علاقة للدين بها وأن الثورة من أجل "الشرف" والعرض أمر معتاد في الصعيد...

كان نفسي الحقيقة أقول لكم إن الموضوع شرف وعرض وكلام تخين وكدة بس سوري الموضوع مكانش كدة!

ببساطة لو كان شرف ونيلة كان الإخوة المسلمون الثائرون دبحوا البت أو ضربوها بالرصاص - ومكانش هيبقى فيه قصة أصلا ولا حتى أهلها كانوا هيبلغوا... مش قلنا مجتمع مفروض إنه ذكوري!! - بس دا محصلش!!

الإخوة المسلمون الثائرون أخدوا البت (اللي هي مومس وقابضة أجرتها!) وسلموها - بأمان - لأهلها دون أن يمسها أحد بسوء!! ومسكوا في الولدين المسيحيين اللي كانوا مأجرينها (بعد هروب الثالث)... ووتوالى الأحداث ويتدخل بالطبع أمن الدولة!!

الولدين يتقبض عليهم... أيوة بس مفيش تهمة في القانون تسمح بإدانتهما! أيوة حضراتكم القانون بيدين المومس بس لا يدين طالب المتعة الذكر (لأن المجتمع والمشرع نفسه ذكوري عادي يعني)... طب يبقى الولدين نعمل فيهم إيه؟
يخرجوا براءة مثلا؟
لأ طبعا... أمن الدولة لازم يتصرف... يبقى يتوجه لهم تهمة إثارة الشغب!

أيوة بس دول ناس ما عملوش حاجة مثيرة للشغب خالص
هل أمن الدولة مثلا شايف إن المية جنيه قليلة على البنت وبالتالي العيال أثاروا شغب؟

وهنا نتساءل هل المفروض الذكر المسيحي يدفع في المومس المسلمة مبلغ أكبر مما يدفعه المسلم وإلا يبقى مثير للشغب؟
وهل بالتبعية ينبغي أن يدفع الذكر المسلم مبلغا أقل في المومس المسيحية مما يدفعه في المومس المسلمة على أساس إنها أقلية؟!!

شايفين إني باتبلى على الأهالي؟
طب إيه رأيكوا إن الذكورالمسلمين قالوا كدة بالفم المليان...

"إن شا الله ننام معاها واحد واحد، لكن المسيحيين ما يلمسوهاش"!!!

يعني المشكلة اللي عند "الرجالة" بارمي الشنبات المحترمين دول مش جريمة شرف ولا أزمة عرض بينتهك ولا أزمتهم بنتهم اللي جابت راسهم في الأرض (بحسب منظومة قيم الصعيد القديمة)
لكن مشكلتهم هي دين طالب المتعة الحرام!!

فالمومس المسلمة محرمة على المسيحي لكنها حلال (وإن كان الأمر كله مكروها بالطبع) للمسلم أو على الأقل مش هتتقلب البلد بسببها!!

طب تعالوا نفترض بقى افتراضات جدلية...

دلوقت كلنا بنرفض الدعارة كتجارة وأغلبنا عارفين إنه بالرغم من رفضنا مفيش قانون ولا شرع يمكن أن يمنع الدعارة وهتفضل الدعارة تمارس حتى لو طبقنا الحدود!

طيب بناء على كدة لابد من الإقرار (عمليا) بأن فيه عاهرات مسلمات وعاهرات مسيحيات (عادي يعني طبيعة مصر الديموجرافية بتقول كدة)

طب بناء على ما يطلبه المسلمون الثائرون... هل نقصر النوم مع المومسات المسلمات على الذكور المسلمين؟

وهل سيلتزم الذكور المسلمون بمقاطعة المومسات المسيحيات؟

وبالنسبة للمومسات المنسيحيات من سيعوضهن عن الخسائر المالية إذ يقتصر سوقهن على الرجال المنتمين إلى الأقلية الدينية المسيحية بينما منافساتهن من المسلمات يعملن على سوق أوسع من الرجال المنتمين إلى الغالبية الدينية المسلمة...

وحيث أن الدولة تتبع سياسات الليبرالية الجديدة ورأسمالية السوق المفتوحة

فإنني أدعو من هذا المنبر لإطلاق الحريات الدينية في سوق الدعارة المصرية!!

ورفع الضرر عن العاهرات المسيحيات إعمالا لأبجديات المساواة الدينية الحقيقية بين العاهرات المصريات دون تمييز على أساس الدين بما قد يؤدي إلى إلحاق الضرر بهذه "الصناعة" الوطنية وهذا "المرفق" الحيوي... وإلا وجدنا المستهلكون المصريون - مسيحيوهم ومسلموهم - زهقوا من وجع الدماغ وبدءوا يوجهون أموالهم للعاهرات الأجنبيات بما يعني إهدار رأس المال الوطني بشكل لا يقبله أي وطني "شريف"!!

إن جموع الوطنيين تهيب بالرئيس "المثقف" أن يتدخل بنفسه لإيقاف هذا الظلم الواقع على هذه الفئة من مواطنات بني شعبه

هناك 26 تعليقًا:

  1. لا الظلم ح يقع على العاهرات المسلمات ليه بقى
    اولا لان مش صحيح ان العاهرات المسيحيات ح يقتصروا شغلهم على المسيحيين... الرجالة المسلمين لهم في المسيحيات يعني العاهرات المسلمات هم اللي ح يتقطع عيشهم خصوصا ان الزباين المسيحيين اغنى من الزباين المسلمين يعني لازم يبقى فيه نقابة تنظم الموضوع عشان ما يحصلش فتنة طائفية ما بين العاهرات المسلمات والعاهرات المسيحيات ونلاقيهم مسكوا في شعر بعض ويخربشوا بعض في خناقة طائفية على الزباين
    لان ده معناه تمييز ديني كما وكيفا لصالح العاهرات المسيحيات اللي ح يستأثروا بالزباين من الديانتين ومش ح يقع في ارابيز العاهرات المسلمات غير الزباين المسلمين المقشفين اللي مش لاقيين ياكلوا

    وبكده تبقى المؤامرة الامريكية اكتملت لحصارنا
    وبعدين البت بتسترزق يقولوا ننام معاها واحد واحد لكن مسيحي ما يلمسهاش؟ طيب كان ح يدفعوا لها ميت جنيه؟ هم لاقيين ياكلوا؟

    الا قول لي هي اخدت الميت جنيه على الشروة وللا على الراس؟

    وفين بقى جمعيات حقوق الانسان ياخويا؟ انت مش بتشتغل في حقوق الانسان؟ لازم يعملوا نقابة ووزير المالية يعمل يأمن لهم معاشات هي الحاجة ح ترجع تشتغل تاني بعد الموضوع ده؟
    الا هم عرفوا منين انها اشتغلت مع زباين مسيحيين؟ يعني اخدت حسنتها ومشيت لازم تمشي تلوش في الكلام وللا هم العيال اللي لوشوا في الكلام؟ يمكن هي دي اثارة الشغب حضرتك؟ يعني مشيوا يقولوا بقى ويعيدوا ويلتوا ويعجنوا
    طب ليه كده مش اللي يعمل الخير يعمله في السر؟

    ردحذف
  2. hذيك يا مينا
    الموضوع مكتوب بطريقة انا شايف انها مش مباشرة ولافة كثير
    المهم ممكن تشوف الموضوع ده لانه مهم جدا عن الاضهاد المسيحي في مصر
    http://ra-shere.blogspot.com/2007/12/blog-post_19.html

    ردحذف
  3. غير معرف12/21/2007 8:59 ص

    ايه يا عم المراقب انت مش بتشوف غير الارهاب و العنف الاسلامي؟ اومال الارهاب و العنف المسيحي مش مضايقك ليه؟ مئات الالوف اللي اتقتلوا في العراق و افغانستان و البوسنه و لبنان دول مش بني ادمين؟ و لا انت بتزعل بس من المسلمين الغزاه و رسولهم الكذاب و دينهم الارهابي؟
    يا راجل عيب بطل نفاق و بلاش تعقد تلف و تدور . . قول اللي في نفسك عالطول

    ردحذف
  4. شفت بقى أهمية خانة الديانة في البطاقة ؟؟
    اللي كان الكفرة العلمانيين الماسونيين الليبراليين الشووعوييين عايزين يلغوها

    آدي اهميتها الضرورية .. اي واحد هيعوز يأجر فتاة ليل عشان ليلة حمراء لازم يتأكد من خانة الديانة في البطاقة الأول عشان يبقى في السليم ومابيعملش حاجة غلط

    ردحذف
  5. صحيح أيها المراقب المصري مش بتتكلم عن اضطهاد المسلمين في أفغانستان ليه؟

    هاه؟ هو أنت يعني كنت عايش في اسنا؟ طيب يبقى تفرق ايه أفغانستان عن اسنا؟

    حقيقي يا أخي الكفاتسة دول ظلمة بيقعدوا يمسكوا في حاجات تافهة كده مع أن الدنيا والعة.

    ردحذف
  6. صديقتي العزيزة نوارة التهييس

    بصراحة بقى إنتي عندك حق والعاهرات المسلمات فعلا هما اللي هيتضروا في الموضوع ده... أنا افترضت فرض جدلي إن الذكور المسلمين هيقاطعوا بضاعة العاهرات المسيحيات... بس طبعا ده مش هيحصل لأن الذكور المسلمين الإسناويين غالبا سيعتبروا العاهرات المسيحيات سبايا وغنائم حرب وبالتالي مش هيبطلوا يناموا معاهم واحتمال كمان ما يدوهومش فلوس على أساس إنهم من ملك اليمين والشمال كمان... طب ما نسهل الموضوع ونلغي خانة الديانة من بطاقات ... العاهرات!!

    ردحذف
  7. أحمد عبد الفتاح

    يا ابني الموضوع تهييسة
    واللي عايز الكلام الجد أنا حاطط الروابط للي عايز يتابع تغطيات القصة

    شكرا لتعريفي بمدونة ابن رع
    المدونة جامدة جدا وموضوعاته مهمة فعلا

    ردحذف
  8. غير معرف (أي النكرة)
    لأ يا سيدي مش بتضايق من الإرهاب والعنف المسيحي لأن أنا من هواة متابعة الإرهاب والعنف المسيحي وكل يوم باتعشى باتنين أفغان وتلاتة بوسنيين

    أظن ما خليتش في نفسك حاجة ما قلتهاش أهوه

    ردحذف
  9. bluestone

    اسمحيلي أختلف معاكي في هذه النقطة الجوهرية الخاصة بتأييدك لإبقاء خانة الديانة في بطاقة العاهرة لأنه يكرس حالة التمييز الديني في سوق الدعارة ولا يلغيها إطلاقا

    الحل في علمنة الدعارة وتشييعها أي جعلها مشاعا من الكل وإلى الكل... وطبعا التوزيع يجب أن يكون في هذه الحالة بحسب القاعدة الشووعية الشهيرة "من كل بحسب قدرته إلى كل بحسب احتياجه"... والا إنتي ليكي رأي تاني؟

    ردحذف
  10. علاء الغائب في بلاد الكفر والكفار

    فكرت فعلا أكتب موضوع عن المسلمين في أفغانستان بس رجعت في كلامي بسبب حقدي الدفين على الإسلام والمسلمين وخفت الجماعة في المؤامرة التنصيرية العالمية يقطعوا عني المصروف لو تضامنت مع مسلمي البوسنة

    ففضلت الحقيقة أمسك في المواضيع التافهة عملا بالمثل الأفغاني القائل علمني التفاهة يا ابا، قال له تيجي في الهايفة وتصدر!

    وإنت أخبار المؤامرة الماسونية إيه معاك؟

    ردحذف
  11. مالوش لازمة الكلام دة تعالوا ندور على حل نعوض الناس المتضررة
    خلونا نشوف حل عملي لان الناس دي عاوزة اكل و شرب لعيالهم
    للاسف دا موضوع ثقافة غالبة مش هتتغير غير باعطاء قدوة من
    ناس مثقفة وواعية
    موضوع تغيير تفكير البشر ده عاوز سنين

    ردحذف
  12. الأخ محمد حسن

    موضوع إيه اللي موضوع ثقافة غالبة مش هتتغير غير باعطاء قدوة من ناس مثقفة وواعية؟؟
    مش فاهم يعني حضرتك

    تقصد موضوع إن المسيحيين ما ينفعوش يأجروا فتاة ليل مسلمة؟
    ولا موضوع إن المسيحيين لازم يتأدبوا عشان افتروا وبالتالي لازم نحرق لهم بيوتهم ومحلاتهم وكنايسهم؟
    وقدوة إيه بقى اللي هتتعطي فتغير المواضيع دي؟؟؟

    الموضوع بسيط... أغلبية دينية أصابها الهوس وبتعامل أقلية دينية باعتبارها دخيلة ع المجتمع وفئة يجب تأديبها أول بأول... دا مالوش علاقة بالقدوة... دا ليه علاقة باستعلاء ديني مقيت عند قطاع كبير (أغلبية) من المسلمين... هذا الاستعلاء بيخليهم يحسوا إنهم يقدروا يعملوا أي حاجة ويحرقوا ويدمروا في ممتلكات الأقلية المسيحية على أساس إن محدش هياخد منهم حق ولا باطل ولا فيه دولة أصلا

    الحل لا في القدوة ولا في الخرا
    الحل في وجود دولة
    يعني قانون ومؤسسات
    والمجرم يتحاكم جنائي ومدني بحسب الجريمة وحجمها.... فهمت يا سيدي؟؟؟

    ردحذف
  13. غير معرف12/21/2007 11:51 م

    ايوة كده خليك صريح و طلع حقدك الدفين علي المسلمين عشان ماتموتش مكبوت و مقهور و طاققلك ميت عرق
    احنا المسلمين الغزاة مبسوطين و اخر حلاوة في بلدنا مصر و اللي كانت قبطية بس يا خسارة خلاص عمرها ما حاتبقي قبطية تاني
    انا مش حارد علي شتيمتك بشتيمه لأني حاسس بيك و عارف انك موجوع و فيك اللي مكفيك
    هو مش الرب يسوع قالك حب جارك؟ بتكره جارك المسلم ليه؟ليه؟ليه؟

    ردحذف
  14. ههههههههههههههههه
    احسن يا مينا
    احسن احسن احسن احسن
    هيييييييييييييه

    ردحذف
  15. يعني العصبية هي اللي هتحل المواقف دي
    الحكومة كلنا عارفين عاوزاكوا تولعوا في بعض
    انتا كنت عاقل و حكيم يا استاذ
    لية بس تتخلى عن هدوئك
    احرق اعصابك يا اسطى و ابقى قابلني
    ولعوا في بعض يا عم انا مالي

    ردحذف
  16. ههههههههههههههههه

    والله بجد انت دمك خفيف يا مينا

    طبعا الي حصل هناك دا هبل

    ..

    كلمه في ودنك هو الطريق ليهم ازاي

    ردحذف
  17. واحد عايش بينكم12/22/2007 6:41 م

    الاخ المراقب صاحب البلد الي مبيعرفش فيها حاجهانت بتتكلم عن الدعاره بشكل يقرف وعايز تفهمنا انك واعي وبتاع حقوق انسان بس ياخساره الي بيكتب علي حقوق الانسان لازم ميفرقش في دين او لون او جنسيه ومتفهمناش ان موضوع اسناانكم مظلومين فيه ابدا شوفوا مين دفعلوكوه علشان تظهروا للعلم ان موضوع دعاره تافه عملوا ايه المسلمين فيكو مين ياحلو اللي دفع السفاره الاس ولا المر ولا الكنيسه نفسها ارجوك ان وجدت الاجابه تقولي ياحلو عيلتك واخواتك وعشيرتك

    ردحذف
  18. احلى حاجه فى البوست الملئ بالمعلومات المفيده ده ان اسنا فيها محلات تجاريه بملايين الجنيهات..
    فعلا الواحد كل ماعاش كل ما اتعلم

    كل سنه وانت طيب يا دكتره

    ردحذف
  19. رأفــــتلــوجيــا الرأفتـــانى

    أحد المحال التي سلبت وحرقت وتم نهبها قبل حرقها كانت محل أدوات كهربائية... يعني تلفزيونات وفيديوهات وحاجات كدا... ودي طبعا زي ما انت عارف لوحدها كافية إنها ترفع قيمة الخساير
    كمان لجنة تقدير الخساير وهي لجنة بسمية قدرت الخساير مبدئيا (ودا عادة بيكون أقل بكتير من الواقع) بمليون و300 ألف... يعني إسنا فعلا كان فيها فلوس... وعايز أقول لك كمان إن بعض التجار المسلمين في البلدة كانوا ورا التحريض على سلب وحرق ممتلكات التجا المسيحيين... صراع رأسمالية قذر يعني تم توظيف الدين فيه بوساخة يا باشا

    بس سيبك إنت... إنت واحشني جدا ياض انت... مش هتيجي بقى؟

    ردحذف
  20. الله و ليه مجبتش سيرة الولد المسيحي اللي اتهجم على ست منقبة عشان بس شك انها سرقت موبايل من محله
    ما هي بلوستون كاتبةعن القصتين
    ليه منشرتش غير دي يعني؟؟؟
    فين الحيادية اللي انت فقعتني بيها و رايح تنادي بالحرية لسامينا على اساسها؟؟
    مكنش العشم يا حاج

    ردحذف
  21. العزيزة حفصة

    بالنسبة لقصة الولد المسيحي "جوزيف" اللي قيل إنه كشف عن وجه الست المنقبة بعد اشتباهه أنها سرقت الموبايل من محله فيه كذا نقطة...
    أولا: الحالة أساسا ليست حالة مواجهة طائفية بين مواطن من دين ما ومواطن من الدين الآخر، بل هي مواجهة بين مواطن اتسرقت منه حاجة ومواطن مشتبه فيه إنه سرق الحاجة. وفي غياب القانون وغياب الدولة أساسا كل واحد بيتصرف بقانونه الخاص وبيحاول يجيب حقه بدراعه

    ثانيا: الست المنقبة قالت إن "جوزيف" لم يرفع عن وجهها النقاب أصلا

    ثالثا: لم تكن قصة النقاب هي البداية الأولى للقصة التي بلغت ذروتها باعتداءات المسلمين على كنيسة المسيحيين وحرقهم لممتلكاتهم بعد سلب محتوياتها

    رابعا: هو حتى اعتداء مواطن مسيحي على مواطنة مسلمة - مع التأكيد أن ليس ثمة اعتداء قد حدث - هل هو مبرر لحرق كنايس المسيحيين وسرقة محلاتهم وحرق ممتلكاتهم؟؟؟

    خامسا: التدوينة بتاعتي مش بتناقش مين حلو ومين وحش وكخة... التدوينة جوها كله فانتازي ساخر مشهيص... فالمفروض التعليقات كمان تيجي في نفس الجو المشهيص في الفنيخة... وسبب إني باهزر وباشهيص في قضية جادة حاجتين: أولا إنها عادتي ومش هاشتريها وثانيا: إني قلت كل الكلام الجاد قبل كدة في تدوينات سابقة عن غزوات المسلمين على المسيحيين السابقة وبالتالي قلت كل الكلام الجد الممكن أن يقال

    يمكن الرجوع إلى أرشيف بمها وغزوة الروضة المجيدة لمعرفة آرائي الجادة في الليلة الطائفية

    تحياتي يا جميلة

    ردحذف
  22. ههههههههههههه يخرب بيت دا بوست على يخرب بيت التعليقات ... انا ميت من الضحك .... مكنتش شوفته ايامها .. بس شوفته دلوقت لما حطيت اللينك على التويتر ...تححححححححححححفه
    بس كدا جو السويد مخدش من فطرتك المصريه حاجه
    وبتعرف لسه تطلع الافيه من وسط العتمه
    انتا مصرى اصيل :)

    ردحذف
  23. بالمناسبه ..عاجبنى اوى موضوع حقدك الدفين دى
    على فكره دى اول تهمة فى جيبنا لما حد يجيب فى سيرة المسلمين
    بطلوا حقد بقا :P

    ردحذف
  24. أيوة يا عم أنا حقدي الدفين على الإسلام والمسلمين لا ينكره إلا حاقد أو جاحد

    ردحذف
  25. غير معرف1/20/2011 9:41 م

    أستاذ مينا أكون منصف معاك اللي حصل في اسنا ساعتها كان همجية وبربرية مرفوضة لا يقبلها الاسلام لكن صدقني كل اللي شارك فيها غير ملتزم يتعاليم الاسلام. أتمنى نتواصل شكرا

    ردحذف
  26. غير معرف1/20/2011 9:42 م

    سمحلي برده جملة سوق الدعارة في اسنا لأن أي حد حيقرئها حيفهم معناها غلط لأن دي حادثة عابرة و أكيد برده انت متفق معايا على إن اللي فعله الشباب المسيحي و ابن جرجس صاحب السوبر ماركت في حادثة النقاب كان خطأ كبير لكن السيئة لا تعم واللي غلط هو اللي يتعاقب و ولا رأيك ايه؟

    ردحذف