Glimpses from My Instagram Gallery

2007-12-11

نقاطع يوتيوب ولا ما نقاطعش؟ حد عنده بدايل؟؟

تحديث عاجل: وائل عباس ينشر خبرا عاجلا من نص ساعة عن استرداد فيديوهاته على يوتيوب
شكلنا كدة مش هنقاطع يا شباب
مبروك يا وائل



بداية القصة: وائل عباس يصرخ في رسالة على تويتر:
disaster: youtube disables my account claiming there were complaints about my police torture videos!!!
(كارثة: يوتيوب أوقف حسابي مدعين أن كان فيه شكاوي من فيديوهات تعذيب الشرطة بتاعتي!!!)

وبعدها كتب وائل على مدونته عن فضيحة إيقاف يوتيوب لحسابه وتساءل عن الاحتمالات القائمة وراء إيقاف حسابه على يوتيوب:
فهل هناك
تعاون بين يوتيوب والنظام المصري؟؟
أو أنه خطأ يمكن إصلاحه؟
أم أن يوتيوب أصبحت تدعم التعذيب وتتستر على فاعليه وتتعاون مع الحكومات الديكتاتورية؟؟

حساب يوتيوب بتاع وائل عباس كان عليه أهم فيديوهات التعذيب في أقسام الشرطة المصرية اللي كانت ضربة موجعة بالفعل لجهاز الشرطة المصري اللي بينتهج التعذيب كسياسة منظمة واشتهرت قضايا التعذيب في أقسام الشرطة المصرية إعلاميا باسم "كليبات التعذيب" وبالإنجليزية
El-Adly VideoGate

بعد شوية يوتيوب بدأت ترد بشكل رسمي - طبعا بعد ما وائل سيح للي جابوهم وما سكتش - وكان ردهم محاولة لحفظ ماء الوجه إذ أعلن الأخ المتحدث الرسمي ليوتيوب إن يوتيوب كانت وهتفضل دايما منبر حر للتعبير للجميع ولكن برضو لازم يحافظوا على اليوتيوب كبيئة آمنة للمستخدمين (يا حلاوتك يا حنين) وبالتالي حذفوا فيديوهات التعذيب بتاعة وائل لأن قال إيه الفيديوهات كانت بتحتوي مشاهد عنف وبلاوي مسيحة والسياق بتاعها مكانش واضح (!!!) وبالتالي هما راجعوا الموضوع وقرروا يرجعوا حساب وائل لكن الحساب طبعا راجع ع البلاطة وفاضي تماما، بس معندهمش مانع خالص خالص إن وائل يرجع يرفع فيديوهاته على اليوتيوب بس يبقى يشرح السياق بتاع الفيديوهات عشان يبان إنه تعذيب مش حاجة تانية (!!!)

طبعا ناس كتير - وأنا منهم - كلوا من الكلام بتاع يوتيوب واعتقدوا - بالخطأ - إن يوتيوب تابت وأنابت عن عملتها المهببة بإرجاعها الحساب بتاع وائل... بس الحقيقة - كما فضحها وائل - إن يوتيوب بتستهبل بالأوي وطبعا محاولتها لحفظ ماء وجهها - إن كان في وجههم ماء أصلا - مفضوحة ومكشوفة... فإرجاع حساب وائل بدون الفيديوهات ليس له معنى (ببساطة كان ينفع يعمل حساب جديد لو القضية هي الحساب الفاضي!)، والفكرة بتاعة "سماحهم" بأن يرفع عباس الفيديوهات من تاني فكرة هطلة جدا لأن تحميل هذه الفيديوهات من جديد معناه مئات من الساعات الطوال في رفع أكثر من مائة فيديو
(180 فيديو بحسب وائل نفسه) كانت على حساب وائل في يوتيوب تحوي كليبات التعذيب وتغطياته للمظاهرات وغيرها وغيرها من الفيديوهات الهامة التي - في رأيي - أكسبت وائل ومدونته الوعي المصري هذا التأثير المذهل المشهود له عالميا ومحليا (وائل حاصل على أكثر من جائزة دولية ومحلية ودوره في التدوين المصري لا جدال عليه).

وائل في رده على كلام الأخ المتحدث الرسمي ليوتيوب جاب م الآخر في تسييحه لهم لما قال:
وقال إيه مسموح لي ارفعهم تاني بشرط إني أكتب معاهم شرح بيوضح فيهم إيه علشان محدش يفتكر حاجة غلط لا سمح الله
طب هو أنا لما أكتب
Egyptian police brutality
ده مش كفاية؟
يعني ممكن حد يفتكر فيديو عماد الكبير ده مثلا
Gay Orgy
(أو جنس جماعي للشواذ)
ولا فيديو البنت المتعلقة بين كرسيين ده BDSM
(تلذذ سادي مازوخي)
ما أنا كاتب إنه
Egyptian police torturing a female murder suspect
(البوليس المصري بيعذب أنثى متهمة في جريمة قتل)
وبعدين معظم الفيديوهات طالع فيها الظباط باليونيفورم
هل ده ممكن يعتبر عند يوتيوب
Police uniform fetish
(تلذذ جنسي بارتداء ملابس شرطة)
الخلاصة يعني ومن الآخر
It was a hoax

(كانت نصباية!!!)
--------------------

بعض المدونين طرحوا فكرة مقاطعة يوتيوب وأنا شايف إن كلامهم وجيه... مش مجرد حملة تهويش... بس محتاجين فعلا نطرح بدايل لمواقع فيديو تانية تكون سمعتها محترمة شوية عن يوتيوب... فيا ريت اللي عنده أفكار وبدايل يطرحها الله يكرمكوا

دا لنك لجلوبال فويسز أونلاين بيتكلم عن الموضوع

هناك 4 تعليقات:

  1. نقاطع يا مينا مفهاش حاجة بس من الممكن تحصل نفس المشكلة دى فى اى موقع تانى , لان الشكاوى والتهديدات بتوصل لموقع اليوتيوب او غيره بحجب الموقع فى مصر

    فتخيل موقع زى اليوتيوب لما يتحجب بسبب فيديوهات معينه بتمثل تهديد ليوتيوب فيعتبر دا ضرر لشركة كبيرة وخسارة اكبر لو تم الحجب

    ودا توقعى للحصل

    والممكن يحصل مع يوتيوب مرة تانية او اى موقع تانى والحجج موجودة

    ردحذف
  2. غير معرف12/12/2007 10:42 ص

    الاخ اللى بيقول حجب
    القانون المصري مفيهوش نص يسمح بحجب اي موقع انترنت سواء كان اباحي ولا سياسي ..
    ويوتيوب لا ليها اتصالات لا مع اجهزه امن ولا نيله .
    مش عاجبكوا يوتيوب اشتروا سيرفراتكم
    واعملوا مواقعكم بايديكم ..

    احمد هتلر .

    ردحذف
  3. انا لسه ما اعرفش استخدم يوتوب ازاي و لسه معملتش حساب خاص فيها لاني لم احتاجها الي الان

    ردحذف
  4. نقاطع؟؟ و حملة؟؟ مش عارفة انا بقت عندي حساسية من الكلمات دي لان بحس وراها بحاجات سلبية كتيرة
    لكن وائل ده على العين والراس هل ممكن نبتدع طرق جديدة غير المقاطعة او الحملات؟
    يعني لسنا متعظناش من ان اغلب حملاتنا بتيجي على فاشوش
    ليه مثلا منعلمش بيان و يتعمل فيديو و نزله على يوتيوب نفسها
    يعني نمشي على راي المثل من دقنه وافتله
    ليه منبعتش لوكالات صحفيه و اخباريه و نعرفها باللي حصل
    ليه مثلا منقولش لاصحابنا لو لينا اصحاب اللي عايشين بره سواء كانوا عرب او مش عرب و هما طبعا مش حيسكتوا
    ليه الناس اللي عملت حملة توقيعات لسامينا متعلمش حملة توقيعات لوائل
    يووووه
    اديني رجعت اقول حملات و توقيعات
    بقلك بقت ارتيكاريا
    اللهم اشفينا يا رب
    بس لو يوتيوب فعلا رجعت الفيديوهات المبهمة على حد قولهم دي تبقى ضربة معلم و نصر لوائل و ده يفرحني لاسباب كتيرة
    سبب منها انه انتصار لشخص وحيد على هيئة كبيرة و اي انتصار شخصي على قوة غاشمة بيديني امل في بكرة
    الف مبروك يا وائل
    مشنكرين يا مينا

    ردحذف