Glimpses from My Instagram Gallery

2007-09-25

لماذا يخاف الرئيس الشرعي "المنتخب" من شعبه الذي انتخبه؟؟


الرئيس مبارك الذي هو أول رئيس شرعي منتخب - كما تروج ماكينة إعلامه الدعائية - في تاريخ مصر... والذي فاز برئاسة مصر بنسبة 88 في المية من إجمالي الأصوات (يعني سيبكم من إن اللي راحوا صوتوا أساسا نسبتهم 23 في المية ممن يحق لهم التصويت بما يجعل شعبية مبارك الحقيقية 19 في المية بس، دي مش قضيتنا دلوقتي)... الرئيس بقى الشرعي ده، المنتخب ده، الحلو ده، السكر ده أبو شعبية طاغية ده... بيخاف ليه بقى من شعبه اللي انتخبه ده؟؟؟

يعني الرئيس - اللي صحته زي الفل على حد قول السيدة الفاضلة قرينته - نازل يوزع عشرين شقة من بتوع مشروع مبارك على الشوباب في ستة أكتوبر يقفل أم الشوارع اللي في القاهرة كلها ليه؟؟؟

(بمناسبة شقق مبارك اللي الشقة منها 63 متر... أنا ليا شقة دافع مقدمها من سنتين يا ريس وانت كلت عليا فلوسي ولغاية دلوقت لا حس ولا خبر بالرغم إن الاتفاق يا ريس كان إن التخصيص يبقى خلال ست شهور والاستلام خلال نمنتاشرشهر... كدة عيب يا زعيم)

المهم... الرئيس في المشوار ده عطل ما لا يقل عن مليون شخص لدرجة أن جريدة المصري اليوم المؤدبة المهذبة مقصوصة الأظافر خرجت عن تهذبها وانتقدت الرئيس (ودي مش عادتها على فكرة) في صفحتها الرئيسية وقالت في المانشيت:

ذهب الرئيس إلي «٦ أكتوبر» لتسليم ٢٠ شقة.. فتعرض مليون مواطن للحصار

وجاء في متن الخبر أنه بسبب تسليم الرئيس مبارك عقود تمليك عشرين شقة، مساحة الواحدة ٦٣ مترا فقط، تحولت منطقة سكنية مساحتها نحو ١٠٠٠ كيلو متر مربع، ويقطنها نحو مليون مواطن أمس إلي ثكنة عسكرية يحكمها الحرس الجمهوري ورجال الأمن المركزي، وغاب التلاميذ والطلاب عن مدارسهم وجامعاتهم، كما تأثرت برامج الهواء في الفضائيات التي تبث برامجها من مدينة الإنتاج الإعلامي.
ــــــــــــــــــــــ

وفي النهاية لم يذهب الرئيس إلى ستة أكتوبر برا بل جوا! فقد وصل الرئيس إلى المدينة بمروحية شاهدها الجمهور وهي تحلق فوقهم ، وهو ما استفز الزميل وائل عباس ليكتب في مدونته ساخرا من الوضع العبثي الذي حدث في تدوينة بعنوان:

عندما قال مبارك وعليكم واحد


وقد جاء فيها أن "الإنتظار ظل من الصباح الباكر حتى الواحدة ظهرا
حتى ظهر موكب بسلامته ومر
لكن المفاجأة الكبيرة والمهموز الكبير اللي لبسه السادة المواطنين
هو إن مبارك مكانش في الموكب الوهمي !!!"
ـــــــــــــــــ

إن خوف الرئيس من شعبه هو انعكاس واضح وطبيعي وبسيط لعدم شرعية الرئيس، وتيقنه من أن أغلبية الشعب ترفضه وتكرهه ولا تريده هو أو أي حد من آله أو صحبه أجمعين... ومن ثم فإن هذا النظام باق فقط بشرعية واحدة فقط... شرعية القمع وإرهاب الشعب وقهره بشكل ممنهج... وهي ذات الشرعية التي قام عليها نظام حكم المهيب الركن صدام حسين والذي نعرف جميعنا نهايته... رحم الله مصر ورحم شعبها، وبجد الكرامة دي حاجة ما بتتشريش بالفلوس يا ولاد والإحساس نعمة لو انعدمت لما تعمل اللالي برضو البعيد مش هيحس!!
ـ

هناك 9 تعليقات:

  1. ح نتنيل نعمل ايه يا مينا
    ح نعمل ايه؟
    ابراهيم اتحول لمحكمة امن دولة طوارئ
    امن دولة طوارئ يا مينا
    ح نعمل ايه

    ردحذف
  2. سؤال فى الجون بصراحه

    يا ريت الرئيس كان سمع نجوم اف ام و هى بتكلم الناس الواقفين على محور يوليو شوف كام ساعه

    و لا الطرق اللى وقفت
    و لا 6 اكتوبر اللى كأنها مدينه محاصره

    بس تقول لمين

    لا حياه لمن تنادى

    ردحذف
  3. يا دين النبي!! تلاتة وستين متر!!! ودول بالسلم والمناور والحدائق الغنّاء المحيطة؟؟

    ردحذف
  4. نوارة نجم

    شكلنا كدة يا أختي ما قدامناش غير الاستراتيجية الإخوانية الشهيرة الفعالة جدا في مثل هذه الأحوال....

    نتحسبن!!!!!!!!!!!
    ---------------------



    مريم

    يقال أن الكائنات من ذوات الجلد السميك لا تحس!!
    ----------------------



    مختار العزيزي

    طبعا التلاتو وستين متر دا مش صافي يعني شاملة كل اللي بتحكي عليه... يعني في الآخر الشقة تصفي على أوضة وحمام... وبسلامته نازل وهازز طوله يوزع 20 شقة من المقاس السفروت ده

    شفت الهطل؟؟؟؟

    ردحذف
  5. ايه اللى بيحصل دا
    على راى جبهة التهييس هنعمل ايه

    ردحذف
  6. الخازوق الحقيقى

    انا حاجز شقة من الشقق دى و رحت اسأل فى بنك الاسكان و التعمير ببراءة عن دورى فى الاستلام بس فوجئت بموظف البنك اللى كان قاعد يقرا قرآن بيحلفلى ان ماحدش استلم من الناس الحاجزين و البنك مايعرفش اى حاجة عن الشقق اللى سلمها الريس رغم ان المفروض ان التسليم يكون من خلال البنك نفسه

    فكروا فى اللغز دة و اللى هايكسب هاتنازله عن شقتى

    ردحذف
  7. غير معرف10/28/2007 1:15 م

    لكــــــــــى تعـم الفائــدة على الجميع

    مصائب قوم عند قوم فــــــــوائد

    http://gamal51.blogspot.com/

    ردحذف
  8. غير معرف10/29/2007 3:40 م

    واحد كاتب أن البنك قاله مفيش حد أستلم من الحاجزين من الشقق ده فكرني بالسادات لما كان يروح يزور المزارع يجبوله أحلي جاموس وأحلي فاكهه وكمان أحلي بقر فاهميين يا.....

    ردحذف
  9. غير معرف6/18/2008 3:00 ص

    يا جماعة متستهزءوش ب63 متر دول ينفعو اى شاب بابا وماما مش عملنلو مستقبل اى حاجة يتجوز فيها بس للاسف باين ان الحكومة مستكتراها علينا والنبى يا ام الدنيا عايزين شقة

    ردحذف