Glimpses from My Instagram Gallery

2007-09-16

إيمان الرئيس الذي لا يتزعزع




الخبر دا بيقول حقيقة لطيفة صغيرة... إن الرئيس حسني مبارك (رئيس مصر لمن لا يعلم) هو اللي وكل المحامي اللي اسمه أحمد رسلان (لا علاقة له بأولاد رسلان بتوع الكبدة في الجيزة وتوابعها) في قضية السب والقذف اللي اتسجن فيها عيسى وقنديل والإبراشي وحمودة!

وكانت وكالة أنباء الشرق الأوسط المصرية (الحكومية) قد قالت الوكالة إن الرئيس حسني مبارك سبق أن أقام توكيلاً للدكتور أحمد رسلان المحامي الذي فوض عنه محامين من الحزب للدفاع عن الحزب أمام القضاء واتخاذ الإجراءات القانونية اللازمة بشأن الحزب. قالت الوكالة ذلك نقلاً عن حيثيات حكم محكمة العجوزة بحبس رؤساء التحرير الأربعة عادل حمودة، وإبراهيم عيسي، ووائل الإبراشي، وعبدالحليم قنديل!!

النكتة مش في الكلام ده لأن دي الحقيقة العارية (هي ليه كل الحقايق في بلدنا بقت عريانة دايما ووشها مكشوف؟)... النكتة اللي بجد هي تصريحات أتت في حوار فخامته مع الصحفي العبقري (المعارض جدا) مصطفى بكري بتاع "الأسبوع"، قال فيها إن "إيمانه بحرية الصحافة لا يتزعزع!!"..... يا له من تصريح مؤثر يمزق نياط القلب من جوة، فعلا يا ريس "الصدق أقصر الطرق إلى الإقناع".

وإدي إدي إدي إديها كمان حرية!!
عايزين الحرية تطلع من مناخير الشعب يا ريس!!

فخامته قال للصحفي الشريف النزيه مصطفى بكري أن إيمانه بحرية الصحافة لا يتزعزع‏,‏ وأن الحفاظ علي زيادة رقعة هذه الحرية (فعلا الحرية بالنسبة للنظام رقعة في ثوب الوطن... لازم نعمل بقى "مصريون من أجل الترقيع") لن تؤثر فيه بعض التجاوزات التي تتعارض مع القيم الصحفية والمهنية‏,‏ وكذلك مواثيق الشرف الصحفي‏,‏ بل وقانون نقابة الصحفيين

وشدد الرئيس (المؤمن بالحرية إيمانا لا يتزعزع) علي أن هذه الحرية وجدت لتبقي‏,‏ وقد أصبحت ملكا للشعب المصري‏,‏ وليست منحة يقدمها الحاكم وقتما يشاء‏,‏ ويسحبها وقتما يريد‏. (لأ كدة كتير أنا على وشك أعيط وقد اغرورقت عيناي بالدموع وكادت أوتار قلبي ونياطه أن تتمزق).

عاش الرئيس الحر ابن الأحرار وليسقط الشعب الواطي اللي ما بيطمرش فيه!!

ولنهتف جميعا هتافا واحدا من القلب...
حوووسنييييي حوووسنيييييي
أوه .. أوه

حسني عمهم وحارق دمهم!!

وبالطول والعرض
حسني هيجيبكوا الأرض

إلى الأمام كمان وكمان يا ريس يا حبيب الكل
ويا مبارك دوس دوس
إحنا معاك "من غير فلوس"

الحقيقة يا ريس إحنا معاك من غير فلوس ولا شغل ولا جواز ولا سكن ولا مية ولا كهربا ولا مجاري ولا أكل ولا شرب...

إحنا معاك من غير حياة ولا معنى ولا قيمة ولا هدف!!


إحنا معاك لآخر نفس يتردد في صدرك وآخر نبضة في قلب مصر!!
ـ

هناك 14 تعليقًا:

  1. الاعتراف سيد الميدلية
    وبعدين ايه يا مينا احنا معاك من غير فلوس ولا شغل ولا جواز ولا اكل ولاشرب اللى قولتهم دول
    ما هو الراجل سايبنا عايشين فى عزبته وبنمشى فى الشوارع براحتنا
    وبتنفس
    بنستنشق الاكسجين ونخرج ثانى اكسد الكربون
    شعب ناكر للمعروف بصحيح

    ردحذف
  2. هلا هلا على الجد
    و الجد يلا يلا عليه
    و الى يتكسف من بنت عمه ميجيبش منها خضار
    فلازم نتكلم بحق الله
    بحق الله
    .......
    هو مع حرية الصحافة
    هو الى وكل المحامين
    هو الى عرى الحقيقة
    ملناش دعوة
    انا م فاهم حقدك الدفين عليه و على اهم كاتب مصرى قومى معارض السيد الاستاذ مصطفى بكرى العراقى
    ...
    دمتم زخرا للوطم
    ...
    هو فى كده
    ده فى كده
    و كده
    و كده

    ردحذف
  3. رمــضان كريــم
    وكل عـام وأنتـم
    بخيـر
    ..

    ردحذف
  4. غير معرف9/17/2007 5:38 م

    الاقباط متحدون
    ازى كان مصدر الخبر وسخ زيك
    ازاى نصدقك
    انت فقدت مصداقيتك يا منافق

    ردحذف
  5. قطة الصحراء

    العزبة اتباعت يا قطة
    -----------------


    عباس العبد

    لونك حزايني ليه كدة يا فسواني؟
    جبت معاك طيب الدفاش وأبو دومة؟

    إنت يا بني جاي تعزي ولا جاي تهزر؟

    عموما أبوك هيسيب البيت يا سلطان...
    البيت دا هيتطربق على دماغ اللي فيه يا ابو السلاطين

    ومعنديش غير كلمة واحدة هقولها لك

    برررم برررم تا ري را را
    ---------------



    ابن ناصر

    كل سنة وانت طيب ورمضان "مبارك" يا رفيق
    ---------------


    غير المعرف قليل الأدب

    أيوة يا سيدي الأقباط متحدون هما مصدر الخبر وأنا فعلا باخد تمويل أمجلو صهيوني ومتآمر مع الماسونية العالمية ومؤتمر كولورادو

    ابقى خش يا أذكى إخواتك هتلاقي إن مصدر الخبر الأصلي في أحد الخبرين هو جريدة الأهرام اللي ما بينفعش يتاخد منها لنكات والتاني مصدره الأصلي من جريدة البديل اللي ما بتعملش تلقيمات آر إس إس بعكس موقع الأقباط متحدون حبايبي الطافئيين بتوع المهجر اللي بيقبضوني المعلوم من فلوس المؤامرة كل شهر

    مش عايز تتجند مع المؤامرة؟

    ردحذف
  6. بعيدا عن القضية والصحفي المعارض كوي كوي مصطفى بكره .. الاسماء اللي هتدخل السجن دي عايزة الحرق هي كمان ..
    يعني ممكن اتفق معاك في الوقوف ضد محاكمتهم وسجنهم .. لكن لا يمكن اوافق ابدا على وصفهم بانهم اقلام حرة ولا صحافة نزيهة ولا بتاع ..
    لانهم لا اقلام حرة ولا نزيهة ولا ذكية كمان .. كل ما هنالك شوية تصفية حسابات في لعبة قذرة كل اطرافها اقذر من بعض ..

    ردحذف
  7. ههههههه
    تصدق يا مينا صعب عليا نياط قلبك يا حبة عيني، و خلي بالك النياط لو اتقطع مش هتعرف تجيب غيره اكمن القص مش زي اللزق يا بغداده
    حبه جد بقي شوف يا عمونا، احنا حكومتنا قلعت برقع الحيا من زمان،
    واللي كانت بتستحي تعمله قبل كده بقت خلاص مش فارق معاها، قلعتلنا ملط و قالتلنا التخين فيكو يوريني نفسه، عشان كده تصريحات زي دي ما بقتش تحرق دمي

    ردحذف
  8. ايه ده هو انت طلعت عميل والاقباط المتحدون طلعوا شرفاء اخسسسسسسسسسسس عليك ماكنتش متوقع انك كده ياعميل

    بس و النبى قولى هم كمان الاقباط الاحرار بيحملوا ميثاق الشرف و الامانه زى الاقباط المتحدون لانى ملاحظ انهم كمان متحرين الصدق و الشرف و الامانه وخاصه تجاه المسلمين اللى بيتجوزوا كتير دول الوحشين
    بالمناسبه فى بوست تهيس هتلاقينى يا اما كتبته او لسه ما كتبتهوش بس انت هتلاقى حاجه اسمها الاسلاموفنشى كود عندى ياريت تتابعها و تقولى رايك لاننا محتاجين راى واحد قبطى او مسيحى فى الموضوع ده وشكرا

    صديقك الوسواس المصرى

    ردحذف
  9. ههههههههههههههههه

    والله زمان

    والله احنا المفروض نألف له كام هتاف كمان معبرين عن حالتنا الضنك اصل متهيألي ان إنجازاته فينا مش كفايه ومحتاجين شويه إنجازات كمان

    ردحذف
  10. انضم الى الحملة
    حملة
    سى السيد
    vs
    كلنا ليلى
    شارك معنا فى اعادتهن الى رشدهن
    طالبهن رفع شعار
    كلنا امينة
    زوجة سى السيد
    ....
    قولوا ورايا يا بنات
    كلنا امينة

    ردحذف
  11. بلو ستون

    ((يعني ممكن اتفق معاك في الوقوف ضد محاكمتهم وسجنهم .. لكن لا يمكن اوافق ابدا على وصفهم بانهم اقلام حرة ولا صحافة نزيهة ولا بتاع))

    لأ معلش بقى مضطر أختلف معاكي إختلافا جذريا وكليا...

    مش أقلام حرة ممكن أعديها... لأن الحرية لا تتجزأ ومفيش حد النهاردة حر بجد والكل مطاطي وبايع نفسه بطريقة أو بأخرى!

    ومش صحافة نزيهة برضه ممكن تعدي على أساس إن كلهم عندهم أجندات مهببة وعندهم سياسات وسخة في مواضيع وقضايا بعينها وبيلعبوا بحسابات معينة لا يمكن وصفها بالنزاهة

    لكن مش بتاع؟ دي بقى اسمحيلي ما أقبلهاش أبدا وما أقدرش أعديها

    لأ طبعا دول بتاع وبتاع جدا كمان
    أومال إحنا متضامنين معاهم ليه؟
    ما هو عشان هما بتاع!
    وبعدين هم الأربعة الحقيقة ما تقدريش تقولي إن واحد فيهم مش بتاع... وما يتخيروش عن بعض... كلهم بتاع!
    لأ يا بلوستون... راجعي نفسك لأنهم فعلا بتاع وإحنا جميعا لازم نتضاءل أمام حقوق البتاع لأن البتاع قضية ولا يمكن التفريط في البتاع مهما كان... كله إلا البتاع!! فداك عمتي وخالتي أيها بتاع!

    قال مش بتاع قال!
    ــــــــــــــــــــ


    اتفضل عندنا

    احنا حكومتنا قلعت برقع الحيا من زمان،
    واللي كانت بتستحي تعمله قبل كده بقت خلاص مش فارق معاها، قلعتلنا ملط و قالتلنا التخين فيكو يوريني نفسه

    صح صح صح جدا كمان... دي حكومة فعلا "لا مؤاخذة" ومن النوع القارح كمان اللي لا بيخاف ولا يختشي ولا عند أمها دم
    ــــــــــــــــــــ


    egyptianocd

    آه يا فندم كل المواقع الطائفية دي ذات مصداقية عالية جدا وتتوخى الحرص على الدقة والمهنية (وبالمناسبة المهنية من المهانة وسلم لي على خالتك بهانة)... وكلها بتقبض من المؤامرة الماسونية ومؤتمرات كولورادو وأول فيصل... وإذا كانوا موضوعيين أوي كدة مع المسلمين وخصوصا في موضوع تعدد الزوجات فدي غيرة مش أكتر على أساس إن المسيحي يا عيني محروم بينما كل مسلم ماشي ومعلق في إيده أربع مزز... يا عم هو احنا لاقيين ناكل لما نتجوز!!

    كل المواقع الإخبارية اللي في العالم العربي خرا وكلها مش مهنية وكلها زفت من أول الجزيرة للعربية لبي بي سي لسي إن إن لكل المواقع الطائفية المسيحية الهطلة... يا عم الحاج الإعلام كله مطبوع ممقروء ومرئي وإلكتروني عايز الحرق بجاز وسخ... وأخيرا المدونين هما كمان ما بقوش فارقين عن الباقيين وكله عايز يتحرق بنفس الجاز الوسخ
    ـــــــــــــــــــــ

    ردحذف
  12. alnadeem

    أنا متهيأ لي يا عمر نتخلص بقى من كل الهتافات القديمة اللي ثبت عدم جدواها ونهتف مجموعة مبتكرة من الهتافات...

    احكم فينا كمان يا كبير
    إحنا زهقنا من التغيير!
    ـــــــــــ

    مهما هترفع في الأسعار
    هنبايعك والعيشة مرار
    ـــــــــــ

    اسجن تاني في الصحفيين
    دول خلوا عيشتنا زي الطين
    ـــــــــــ

    مصطفى بكري يعمر بيتك
    إحنا كلابك إنت وسيدك
    (دا طبعا هتاف مناسب للصحفيين اللي عايزين يفتحوا دماغهم وياكلوا عيش في هذه الحقبة المجيدة)
    ـــــــــــ

    مبارك يا حبيب الكل
    بايسين رجليك وعيشتنا فل


    وهكذا لحد ما نتملي بالقناعة (والقناعة كنز زي ما انت راسي) إن إحنا عايشين أحسن عيشة وإن أي اعتراض يبقى بطر وكفر بالنعمة وساعتها هنعيش إشطة ونقب على وش الدنيا بقى ومش بعيد نمسك حاجة في لجنة الافتكاسات والبلية تجري في إيدك بقى يا زعيم وننسى الفقر وأيام الصياعة

    يلا اقلع هدومك واهتف معايا

    عري وعري كمان في الشعب
    إنت مكانك هنا في القلب!!

    ههههههههههههههه
    ويا مبارك دوس دوس
    إحنا معاك من غير فلوس

    ردحذف
  13. عباس العبد

    بالعند فيك أنا شخصيا هنضم للنسوان في حملة كلنا ليلى بعد ما نظام مبارك الطيب لبسنا كلنا "طرح"!
    ـــــــــــــــ

    ردحذف
  14. الفصاميات

    الله معااااك و معاك قلوبنا و الروح فداااك دانت حبيبنا
    و إنت الشراع في بحرنا
    الله معااااك و معاك قلوبنا

    أسأل الله و بحق صيام 75 مليون مصري مسلم و مسيحي و بهائي و غيره من ساقطي القيد أن يخسف بكسم مصطفى بكري و أمثال كسمه الأرض

    ردحذف