Glimpses from My Instagram Gallery

2007-09-14

هو ابراهيم عيسى مسلم ولا كافر؟ خلاص يبقى نطرد البهائيين من مصر!ـ




اللي بيحصل للأستاذ إبراهيم عيسى كوم والتحريض عليه من جهاز أمن الهانم والحكم بسجنه كوم وهذه الرسالة التي جاءتني على الفيسبوك قصة تانية!!

دي رسالة جاتني من بنت اسمها مروة على الفيس بوك بترد بيها على موضوع أنا كنت نشرته عن إحالة إبراهيم عيسى إلى المحاكمة في موضوع شائعة موت الرئيس... دا طبعا قبل ما يصدر عليه حكم السجن بتاع امبارح... المهم آدي نص الرسالة وردي عليها وردها على الرد وهكذا...

Today at 8:50am

Hello,
I watch Ibrahiem 3eissa and I feel he is not muslim, I mean kafer or sheyoo3y not sheyoo3y in politica only but in every thing. So I really wanna know if this right.
Thank you for replying.

وهو ما ترجمته... سعيدة، أنا بتفرج على ابراهيم عيسى وباحس إنه مش مسلم، أقصد إنه كافر أو شيوعي، مش شيوعي بالمعنى السياسي بس لكن في كل حاجة (!!!). وعشان كدة أنا بجد عايزة أعرف إذا كان ده صح. شكرا لردك.

ودا كان ردي عليها...
Today at 2:53pm
عزيزتي مروة
ما أسهل أن نطلق الأحكام المسبقة على الناس دون حساب.
إبراهيم عيسى مسلم والنهاردة هو محسوب على تيار الإخوان المسلمين كمان.
لكن هو شخصيا بيميل ناحية الصوفية فكرا وتشيعا. يعني الراجل مسلم مش كافر، اتطمني... بس ممكن أسألك سؤال؟
هو لو كافر أو مش كافر هتفرق إيه في حقه في الحرية وفي التعبير والاعتقاد؟
هو حقوق الإنسان الأساسية حكر على المؤمنين بس؟؟

شكرا لاهتمامك

وترد مروة...
Today at 11:56pm

Really thank you for replying,
About religion, it's important because it give him logic and base for thinking and being balanced. I didn't judge him before being sure so I asked you. I like freedom and liberty and all these rights never aganist them. Rabena ma3ah in sha2 allah.
again thank you for replying.

وهو ما ترجمته... أشكرك على ردك. بخصوص الدين، هو مهم لأنه بيدي منطق وقاعدة للتفكير والإتزان (لأ ما هو واضح فعلا!!) أنا ما حكمتش عليه قبل ما اتأكد وعشان كدة سألتك (لأ برافو عليكي سألتي الحد الصح!!) أنا بحب الحرية والحريات وكل الحقوق دي وعمري ما كنت ضدها (يا راجل دانا كنت فاكرك ضدها) ربنا معاه إنشاء الله. ومن تاني شكرا على ردك (!!)

يعني الأستاذة مروة قبل ما تدعي للأستاذ إبراهيم بإن ربنا يكون معاه محتاجة الأول تستفتي حد بيفهم وفقيه فاهم يعني ويا حبذا لو من النوع اللي بيشق عن قلوب البشر كدة زيي وتشوف إبراهيم كافر ولا مؤمن والحمد لله أنا فحصت قلبه وطلع مسلم مش كافر!! وبالتالي استطاعت مروة بحمد الله أن تدعو لإبراهيم (واضح إن مروة دعواتها مستجابة جدا لأن تاني يوم الصبح إبراهيم خيطوه في سنة سجن في قضية تانية!! يا ريتو كان كافر يا اختي وما كنتيش دعيتي له).

طبعا شيطاني لأنه كافر ما بيتربطش في رمضان رحت خابط البنت سؤال كمان بقى على سبيل الاستفزاز....

Today at 12:55am
طب تعالي بقى أستفزك شويتين
إنتي بتسألي إذا كان إبراهيم عيسى كافر ولا مسلم
وبعد ما اتأكدتي إنه مسلم قررتي تتضامني معاه وتدعي له

طب إيه رأيك في 12 ألف بني آدم مصري
ديانتهم بهائية
بالنسبة لك كفرة
وحتى مش أهل ذمة
إيه رأيك في حقوق هؤلاء؟؟؟
من حقهم يعيشوا؟؟
من حقهم يكونوا مواطنين؟
الدولة بتقول لأ مش من حقهم يعيشوا!!!
وقررت ما تعترفش بيهم أساسا وما تديهمش شهادات ميلاد
ولا بطائق شخصية
يعني بتحرمهم من حق الحياة نفسه!!
ومن حق الانتماء لوطن!!

تفتكري الناس "الكفرة" دول من حقهم يعيشوا؟؟؟

(طبعا أنا تخيلت إني بالسؤال ده جبتها تثبيت أكتاف وإنتهى الماتش إلا إني فوجئت بإجابتها اللي ما كانتش تخطر لي على بال!!! واللي ثبتت أكتافي وأردافي على الحلبة حتى صرت كالشبشب أبو صباع الذي فقده بتاع الشباشب الشهير في الأغنية الشهيرة للمطرب غير المعروف)

Let them go outside and live their life far away because we are not believing in their religion and so we can't admit of their existance among us.

وهو ما ترجمته... خليهم يغوروا برة البلد ويعيشوا حياتهم بعيد عننا، لأننا ما بنؤمنش بدينهم، وبالتالي لا يمكننا أن نسمح بوجودهم ما بيننا (!!!)

ودا كان ردي وانا مذهول ومتثبت ومش لاقي كلام أقوله!!!
ـ
Today at 6:29am
بس دول مصريين يا مروة
!!!
يعني اتولدوا في أرض مصر وأهاليهم مصريين
إنتي تفكيرك شاذ جدا وفاشستي جدا
وبعدين طب ما هو المسيحيين يا مروة بالطريقة دي المفروض نرميهم برة برضو على أساس إنك مش بتؤمني بدينهم وبالتالي بحسب وجهة نظرك المريضة دي ما ينفعش تسمحي لهم بالوجود

وبعدين إنتي مين أصلا عشان تسمحي بالوجود لناس ربنا هو اللي خلقهم وسمح لهم بالوجود!!

وبعدين مش حرام عليكي تبلي دول تانية بناس كفرة؟؟
الأحسن نبعت لهم المسلمين عشان يهدوهم للإسلام

اعقلي يا بنتي وفوقي

الأرض ليها رب والحمد لله إنك مش ربنا!!
ـ
طبعا كفاية عليكوا كدة لأني لو جبت الرسايل اللي بعد كدة واللي بتتهمني فيها إني راجل انحلالي وإني بانادي بحرية اللواط والسحاق والعياذ بالله!! وإني باشجع اليهود على حساب المسلمين والمسيحيين، ساعتها صيامكم هيبطل ودا اللي أنا مش عاوزه!!
ـ

بقي أن أقول لكم إن مروة طالبة جامعية في البكالوريوس
ودول شباب المستقبل!! شفتوا السواد اللي المستقبل وصل له من واحنا لسة في المضارع التام؟؟

هناك 50 تعليقًا:

  1. غير معرف9/14/2007 9:38 ص

    بسم الله الرحمن الرحيم.
    انا مروة و ده نص اخر رسالة:

    Ok....so u r allowing anything anywhere so let us be like west and allow gays and lesbian cause this is the begining and jews by this way will dominate us muslims and christians.

    يا أستاذ مينا انا لم اتهمك و لكن معنى كلامى ان الموضوع كله زى السلسلة بيجر بعضه يعنى لمل نسمح بالبداية نبقى نكمل بقى للاخر و نسمح بالحرية المطلقة.
    مش عيزين نقول كلام و خلاص انت نفسك لو لقيت حد يهمك زى اخوك او اختك اختاروا كامل حريتهم و هى الالحاد مثلاً مع كل ما يترتب علية من ممارسات شاذة ساعتها اكيد هتصادر حريتهم او هاتقاتعهم نهائى و تبعدهم عن بنتك عشان متتأثرش بيهم. يبأى رأى الدين فى النهاية بردة صح انهم ممكن ينشروا دينهم اكتر فيبعدوا.
    و شكراً

    ردحذف
  2. بصي يا مروة
    أولا إنتي عايشة وتتغذي على أفكار وأحكام سابقى التعليب والتجهيز

    مين اللي قال لك إن لو أخويا أو أختي إختار الإلحاد هاقرر إنه لازم يتنفي برة البلد وتتسحب بطاقته؟
    إيه الهطل ده؟؟
    طبعا من حق أخويا أو أختي إنه يختار ما يشاء من معتقدات بما فيها الإلحاد!!
    على الأقل اللي بيختار عقيدته حتى لو كانت الإلحاد يتوجب احترام قراره الإرادي الحر عكس اللي ورث دين بالميلاد والتربية بغض النظر عن قناعته أو إيمانه بجد بيه من عدمه!!

    يعني إنتي مثلا إتولدتي مسلمة وبالنسبة لك الإسلام صحيح لأن هذا ما وجدتي عليه آباءك! والمسيحي بيتولد مسيحي ويفضل مسيحي بل ومتعصب للمسيحية والسبب الوحيد إنه اتولد فيها واتربى فيها ولم يختر شيئا!!

    حتى البهائيين يا أستاذة اتولدوا بهائيين وما اختاروش البهائية... لكن أيا كان مش دي القضية...

    القضبة إن حق الاعتقاد سواء بالميلاد أو بالاختيار أو بأي طريقة في الدنيا حق أصيل من حقوق البني آدمين

    دا حتى القرآن يا أستاذة بيقول من شاء فليؤمن ومن شاء فليكفر!!! ولا هتعترضي ع القرآن كمان؟؟

    وبغض النظر عن رأي القرآن والأديان... البهائيين مواطنين في دولة مش أنفار في عزبة عشان حضرتك تتنططي على دين أمهم وتقرري إنهم يطلعوا برة!! هما مش شغالين عند أبو حضرتك في العزبة... دول مواطنين غصبن عن عين التخين ومنعهم من حق الوجود دا سفالة وقلة أدب من الدولة ومن الداخلية ومن أي حد بيعترض على حقهم في الوجود

    إيه بقى علاقة دا بالهيمنة اليهودية ع العالم ومن تشجيع الشذوذ؟ ولا هي هلفطة والسلام؟؟؟؟

    وبعدبن البهائيين ما بينشروش دينهم وحتى لو بينشروه ما هم بيدفعوا ضرايب والضرايب دي جزء منها بيروح في الدعوة للإسلام من خلال وزارة الأوقاف والأزهر... يبقى مش أقل من إنهم يعتقدوا زي ما همة عايزين ويدعوا كمان للي بيعتقدوه... دي يا أستاذة اسمها حقوق إنسان!!

    ودي ربنا اللي خلقها مش جايبها من عند أمي!!

    شالله تكوني فهمتي يا مروة هانم

    ردحذف
  3. غير معرف9/14/2007 10:28 ص

    على فكرة انا عمرى ما بصادر على رأى حد طول عمرى مابفكرش غير فى نفسى و تحسين ذاتى انا (مش انانية منى) و لكن رأيى ان كل واحد حر فى نفسه. و لكن ما اخبييش عليك انا فوجئت انك تشجع الحرية المطلقة لدرجة السبهللة و لم اقصد الاهانة لكن ما فهمته كدة يعنى انت مش بتنادى باليوتوبيا و حلمك مش ان المجتمع المصرى يبقى سوى لأ ده انت عايزها على البحرى حتى لبنتك و الناس اللى يهموك و صدقنى لم اقصد الاهانة خالص. بس انا ماشية فى حياتى حسب الشرع ما بيقول لذلك نسأل حد يفيدنا فى الموضوع بتا البهائيين يكون عالم دينى بس يكون مش من بتو ع التلفزيون.

    ردحذف
  4. يا خبر اسود ومهبب
    بتدوري على فتوى عشان السماح للبشر يعيشوا؟؟؟
    نسيبهم يعيشوا ولا نحرقهم ولا نطردهم م البلد؟؟؟
    إنتي بتستهبلي؟ ولا بتهرجي ولا بتتكلمي جد ولا دي تخاريف الصيام؟؟

    بقول لك بشر مولودين في مصر زيك وليهم كل حقوقك بموجب الدستور والقانون تقولي لي نستنى فتوة حد بيفهم؟؟؟؟

    بقول لك ممنوعين من حق الحياة ومن تطليع شهادات ميلاد ومن تطليع بطايق شخصية تقولي لي نسأل شيخ؟؟؟

    طب الحكومة بتقول لهم اختاروا دين من التلاتة المتاحين... يهودية أو مسيحية أو إسلام ودا الموجود عندنا فيردوا يقولوا بس إحنا مش مسيحيين ولا مسلمين ولا يهود إحنا بهائيين! أيوة يا تبقوا مسلمين يا مسيحيين!! أيوة بس إحنا مش كدة... خلاص اكتبوا كدة واللي في القلب في القلب!!!

    هو النفاق دا اللي انتي عاوزاه؟؟
    بالنسبة للطرد من بلد أبوهم وجدهم فدي مش عزبة أبوكي يا أستاذة عشان تطرديهم منها... دي بلد يعني وطن يعني من حق المولود فيها إنه ياخد جنسيتها وخصوصا لما أبوه وأمه يكونوا بيحملوا نفس الجنسية

    بطلوا بقى العنجهية والغرور اللي فيكوا ده بقى!!
    هتسألي شيخ في حق الوجود؟؟؟
    هو الشيخ دا إيه بقى؟ المندوب السامي لله على الأرض؟؟
    اتقي الله يا شيخة دا احنا في رمضان

    ردحذف
  5. غير معرف9/14/2007 10:47 ص

    انا نسييت اقول ان ان مروة فى الرسالة اللى فاتت
    سؤال للاستاز مينا: معنى كلامك انك حتى الناس اللى يهموك مش مهم يعملوا اللى هما عايزينه يعنى بنتك و ابنك يشتغلوا اللى هما عايزينه رقاصة او تاجر مخدرات مثلاً، هل هاتقاطعهم ولا تبارك بنوتهم ؟

    ردحذف
  6. لا إله إلا الله يا مروة

    إنتي يا بنتي حد مسلطك عليا ولا إنتي فعلا عندك قصور في الفهم؟

    بصي يا أمي تجارة المخدرات دي جريمة يعاقب عليها قانون العقوبات يعني ما ينفعش تدعي عليا زورا وإفكا وبهتانا إني أنا منحل وبلطجي وبأؤيد تجارة المخدرات وأما الرقص فهو مهنة مقبولة اجتماعيا وغير مقبولة أخلاقيا وأنا شخصيا مش بأؤيد إن بناتي يشتغلوا رقاصات... لكن تعالي بقى للرقاصات فعلا هل من حقهن إنهم يطلعوا بطايق رغم احتقارنا ليهم؟ هل من حقهم يعيشوا؟ ولا من حق أي مسلم يصادف رقاصة في الطريق يخبطها بالمطواة في صدرها وعادي... كلبة وراحت؟

    مش بقول لك من حقها تبقى رقاصة... بسألك للمرة المليون يا أذكى اخواتك... من حقها تعيش ويبقى عندها بطاقة شخصية ولا لأ؟؟؟؟

    البهائيين بقى يا عبقرية الزمان لا هما رقاصات ولا هما تجار مخدرات... دول ناس عاديين طبيعيين بس ديانتهم مختلفة عنك وعني مش أكتر وفيه منهم الفنان وفيه منهم الأستاذ في الجامعة ومنهم الطبيب ومنهم كل حاجة عادي يعني ناس عادة محترمين جدا وراقيين جدا ومش بيتجاوزوا القوانين بل بالعكس بترفض تعاليمهم أي تمرد على السلطة أو على نظام الحكم... وهم مش بيطالبوا بالاعتراف بدينهم... هما بس بيطالبوا بالاعتراف بيهم كبني آدمين بس! والسؤال من تاني يا عبقرية... هو الكافر بيفقد آدميته؟؟
    وهل يفقد الحق في الحياة يا فاشستية يا داعية القتل والطرد؟

    ردحذف
  7. غير معرف9/14/2007 12:01 م

    انا مروة تانى
    يا استاذ مينا انت عمال تتبلى عليا و بتقول ان اناإللي بتبلى عليك هو نظام خدوهم بالصوت ؟؟؟؟؟؟؟؟؟؟؟؟

    انا بتكلم بهدوء و بحاول اتناقش و نطرح افكرنا مع بعض و نفهم بعض لكن انت بتجاوب على إللى انت عايزه من الرسالة و بتسيب إللى مش عايزه، كلامى كان كله واضح و صريح. انت بتاخد السؤال تعمله اتهام ليه؟؟؟؟؟؟؟؟

    انت حسستنى انى بقول نقتلهم.
    انا بقول ما دام حاجة مش عارفاها فى الدين لا افتى و اسأل حد عالم فى الدين يجاوب يكون موثوق فيه و كمان تكون لجنة عشان يبقوا كتير و يكون رأى صائب مش من بتو ع التلفزيون.

    انا لا وزعت احكام ولا اتهامات ، احنا بنتاناقش مع بعض فقط لا غير و مش اسلوب السخرية ابداً هوا لازم إللى يكسب و ينهى الليلة بالتسفيق لييه.

    و شكراً و دى اخر مشاركاتى و صدقنى مش زعلانة.

    ردحذف
  8. غير معرف9/14/2007 2:32 م

    يا سيدي انت حارق دمك ليه ؟ لا يكلف الله نفس الا وسعها

    هي ما بتفهمش غير كده .... وتفهم - هي واللي زيها , وطبعا لا اقصد الدين ولا الجنس - ازاي تصلا في مجتمع لا يقبل الاخر ولا يتفاهم معه ... انت مختلف ... اذن مت او اذهب للجحيم ايهما اسرع

    حتي اللي زيي يعني مسلم زيي مثلا ممكن ببساطة يعتبر من الاغيار الاخريين الشررين لو المجتمع اللي هو النظام قال عليه انه مش معانا ... دا مع التانيين

    اشتري دماغك والنبي يا عم مينا

    انت اساسا مسبحي كافر مشرك تستحق الشنق على باب زويلة وكون ان المجتمع سايبك تعيش في المحروسة دا شرف وكرم لو تعرف عظيم

    فـ ..... مخك

    ردحذف
  9. غير معرف9/14/2007 4:35 م

    مينا انا مش مروة
    وعايز اقولك انسي ومتتكلمش وترد تاني
    انت في وادي وهي في وادي اخر ولا هي فهمة اساسا اي حاجة في البطيخ
    دة اولا
    ثانيا الهانم مروة عايز اقول انها اصبحت تمثل شريحة كبيرة من الشباب اللي هو ميعرفش غير ان الانسان المسلم هو بس اللي انسان
    اما الكفرة ولاد الكلب فدول بقي تجار مخدرات وقتالين قتلة وشاذين جنسيا وكل دين ام البلاوي فيهم لية عشان مبيؤمنوش بدين الاسلام وانهم ناس مش طبيعين خالص
    وانا احب اقولها حاجة
    كلا من المسلمين والكفرة بياكلو ويجوعو ويدخلو الحمام ويتمنو ممارسة الجنس وبيخلفو وبيضحكو وانهم مش مختلفين بيولوجيا يختي الاختلاف بس ان دينيا مختلف
    دة بقي فعلا حافة الانهيار بتاع المجتمع المصري
    وربنا يستر علي دين ام دي بلد عشان انا خلاص زهقت من ام الغباء بتوع العالم دي

    ردحذف
  10. ما انا قلتلك و انت الى مصدقتش
    مع منصور
    انت فى ايد امينة
    برضه اخدتها عند
    و عملت الى فى دماغك
    .......
    ملكش فيه متتدخلش فيه
    مش جايز يكون كافر و انت مش مركز
    تبقى ظلمت الراجل و البونية

    ردحذف
  11. مينا

    واضح إن الحوار مش على نفس المستوى الفكري وفيه فجوة كبيرة جدا .. لأ أعتقد أنه يمكن تخطيها بسهولة

    وده واضح من بداية الرسائل الأولى عن إبراهيم عيسى ... وأنا لو مكانك كنت أستمر قليلا فهناك فعلا من لديه نية للإقتناع ولكن ، ولكن بعدما تبين عدم إستعداد الطرف الآخر لمحاولة تفهم ماتقول والتشبث بالأراء .. فأفضل أن تقف في الحوار عند تلك النقطة

    ومع إحترامي للآنسة مروة إلا أني اتفق معك في إستشهادك في نهاية البوست بأن هذا هو مستوى التفكير لمن وصل في العلم لأقصى مراحله بالنسبة لسنه وعلى وشك تولي دوره في الحياة

    أما البهائية وماتقول فلي وجهة نظر اخرى لا أعتقد أن المجال كافي الآن لسردها

    ده انت طلعت حقنة في البوست ده وعندك طولة بال تحسد عليها

    ردحذف
  12. ليك سؤال عندى خش جاوب عليه

    ردحذف
  13. ونبي يا مينا يا خويا سيبني ارد بقى عشان انا اتخصيت من الاسلامجيه اللي فكرهم راكب شمال دول
    الاستاذه مروه:
    المفروض حيب ما فهمت انك من اللي بيقولوا انهم مسلمين و يغاروا على إسلامهم زي ما بيقولوا
    ممممم
    احب اهنيكي ان طول مانتي مقتنعه ان انتوا اللي بس هتدخولوا الجنه و باقي الخلق دول كلهم هيترموا في جهنم عشان يدفوكوا في برد الشتاء ( لو الجنه فيها صيف و شتا يعني )
    يبقى عمرك ما هتفهمي ولا هتتقبلي اي فكر غير كدا

    - انا بقول كدا يا عم مينا عشان انا خلاص هنتحر بسبب الاسلاامجيه دول لتفكيرهم المتحجر-

    يعني انتي عشان ابوكي مسلم تدخلى الجنه
    و انا عشان ابويا بهائي ادخل النار و كمان عايزا تطرديني برا البلد
    الشيوعين اللي انتي شيفاهم تجار مخدرات حاربوا في بورساعيد و اتهببوا طفحوا الدم في سينا
    و لما الرئيس المؤمن اترستأ على العرش رماهم في المعتقلات
    الشيوعين اللي شيفاهم تجار مخدرات بنوا إمبراطوريات واحدا منهم حضرتك بتصلى على المصليه الي هما صنعواها لسعتك -الصين-

    و نبي لو في حد لازم يترمي برا البلد دي يبقوا الاسلامجيه اللي من النوع دا
    بس مش منحقي اقول دا حتى لو في ساعة غضب

    و السلام على من اتبع مية البطيخ

    ردحذف
  14. انا كنت كتبت تعليق هو فين :@

    ردحذف
  15. ـ(((انت عمال تتبلى عليا و بتقول ان اناإللي بتبلى عليك هو نظام خدوهم بالصوت))))

    لأ خالص مش الهدف خدوهم بالصوت... بس الفكرة ببساطة يا آنسة مروة إني بحاول أنكش دماغك شوية وأهرش لك مخك وأستفزه حبتين عشان يشتغل على موجة مختلفة، وعشان كدة تلاقيني بالغرم من حدة كلامي عليكي إلا إني من جوايا هادي جدا وأنا بتكلم ومواصل الحديث معاي سواء هنا أو على الفيس بوك

    (((انت حسستنى انى بقول نقتلهم.
    انا بقول ما دام حاجة مش عارفاها فى الدين لا افتى و اسأل حد عالم فى الدين يجاوب يكون موثوق فيه )))

    إنتي صحيح ما قلتيش نقتلهم بس قلتي ننفيهم يا أستاذة بس أنا لازم أبالغ عشان أسخن المواضيع وأستفزك أكتر وأوريكي بشاعة وفظاظة ووقاحة المنهج الفكري اللي انتي بتتبعيه (ولا أقصد بالطبع هنا الإسلام للمتصيدين في الماء العكر)! وبعدين إنتي بالفعل فتيتي في الموضوع وقلتي بشكل جازم إن الحل إننا ننفيهم برة البلد والحجة كانت إننا لا نؤمن بما يؤمنون به وهي حجة جد خطيرة وقبيحة ووقحة وقليلة الأدب كمان (الحجة بالطبع وليس صاحبتها الفاضلة الرقيقة قتالة القتلة)طب كنتي استني لجنة العلماء الموثوق فيهم تتشكل الأول وبعدين افتي... وبعدين فين مبدأ استفتي قلبك؟؟!!

    (((انا لا وزعت احكام ولا اتهامات ، احنا بنتاناقش مع بعض فقط لا غير و مش اسلوب السخرية ابداً هوا لازم إللى يكسب و ينهى الليلة بالتسفيق لييه)))

    هههههههه بس فعلا أسلوب السخرية هو اللي كسب في الآخر والناس سقفت له ومش عارف ليه ههههههههههه مع إني كنت متوقع ألاقيلك مشجعين يسقفولك ويسبوا لي الدين كالعادة... لكن حتى المختلفين معي في الموقف من البهائية برضو سقفوا لي... غالبا السخرية سحرها لا يقاوم... يا ستي خليكي فريش إحنا ف رحلة

    :-)

    ردحذف
  16. غير معرف بتاع لا يكلف نفسا إلا وسعها

    ما هو يا سيدي اللي أنا بحاول أعمله إني أشوف وسعها

    بمعنى إني بحاول أستفز وأنكش اللي قدامي لحد ما أجيب آخره ولعل وعسى يكون آخره أوسع مما هو عليه في الوقت الحالي... يعني في بعض الناس "وسعها" يجيب أكتر من اللي سايعينه بس هم اللي مستهبلين فيها على رأي واحد صاحبي كان بيقول لي ما تلعبليش في نخاريب مخي اللي أنا ملصمها بالعافية

    طب ما نجرب نلعب في النخاريب ويمكن نجيب وسع أكتر من الوسع اللي احنا راضيين بيه لأن "وسعها" الحالي دا أضيق بكتير من "الوسع" اللي ممكن نجيبه بشوية لعب في النخاريب

    (طبعا لا يوجد أي إسقاطات أبيحة في الكلام للإخوة السيكوباتيين)

    بالنسبة يا عزيزي لكوني مسيحيا مشركا يجب شنقي على باب زويلة فاعلم أن زويلة ماتت في حادثة لأنها كانت في مقطورة ماركة مع منصور أنت في أيد أمينة وبعدين أمينة ماتت مع زويلة في نفس الحادثة وواحد صاحبي كان هناك اتفرج على جثة زويلة وجثة أمينة وقعد يضحك على أساس إنه أول مرة تحصل له حادثة... مكتوباله بقى تقول إيه!!
    ههههههههههه

    ردحذف
  17. غير معرف بتاع أنا مش مروة

    إيه دا يا راجل؟؟؟
    هو المسلمين برضو بيخشوا الحمام زي الكفرة وبيعملوا قلة أدب؟؟ لأ قول كلام غير ده!!

    بس هو فعلا يا غير معرف، غير المسلمين طبعا قردة وخنازير وبتوع مخدرات ودعارة وبيشربوا سينالكو ع الريق

    تشيييييرز
    (معلش هي جات ع الآخر بقى وطلبت تهييس)
    هههههههههههه

    ردحذف
  18. عباس العبد

    هو فعلا إبراهيم كافر بس أنا مرضيتش أقول لها عشان ما اصدمهاش

    يا راجل واحد بيقول للرجالة بتوعه الدستور اللي عملكوا مش انتوا اللي عملتوا الدستور يبقى كافر ولا مش كافر

    هههههههههههههههه

    بس أنا مش عارف قلب الأم وطقم الحنية اللي نازل عليا من جهة أبو يحيى دا إيه حكايته..... ههههههههه

    طبعا مع منصور أنت في أيد أمينة
    منصور اللي هو إبراهيم منصور؟؟
    هو صحيح بدقن بس كافر برضو
    بس أمينة إيدها حنينة أوي الصراحة

    ردحذف
  19. عمنا الكبير أحمد باشا شقير

    يا عم أنا آسف إن التعليق بتاعك اتأخر في الطلوع أنا بس كنت طول اليوم برة وما رجعتش إلا الساعة متأخر ويدوب على ما اتسحرت بقى دخلت ع الداش ونزلت التعليقات اللي ما شفتهاش

    لأ طبعا هي مش طولة بال... بس زي ما تقول كدة خباثة أصيلة... يعني شد الزبون وانصب له الفخ واستمتع بكل شقاوة واشتغال وانت بتجيب الزبون برجليه للفخ اللي انت قعدت تنصبهولو من بدري... طبعا أول ما رجل الزبون تيجي في الخية انشر با عم بلوجر واديها... بس طبعا استأذنت مروة في الأول في النشر

    :-D

    إنت اللي قريتني صح... حقنة حقنة طبعا هو انا اصحابي مسمييني مينا بوتاجاز من قليل!! ههههههههههههه

    بالنسبة لوجهة نظرك في موضوع البهائيين خليها لبوست قريب هانشره للتضامن مع البهائيين وقضية حقهم في الوجود وفي الحياة وفي الانتماء إلى وطن

    وطبعا عشان أغيظك مش هاتطرق لحقهم في الاعتقاد أو الاعتراف بدينهم أو حتى الدعوة ليه هههههههههههههههه عشان أسد عليك المداخل والمخارج

    مش بقول لك بوتاجاز يا باشا

    شرفت المدونة يا زعيم

    ردحذف
  20. يساري مصري
    (تشي جيبارا)
    يا ابني أنا قعدت أدور على تعليقك المزعوم ومالوش أثر... يمكن سبته كثلا على تدوينة تانية؟ أو في كفاية حرام مثلا؟؟
    طب دور وانا معاك واللي يلاقيه الأول يقول للتاني

    نهارو إشطة

    ردحذف
  21. A7A ??!??

    i can't find other words....

    ردحذف
  22. hi
    just saying hi .... !!
    ( ps : i think u r too young to get datebes , high blopd pressure ... just take my advice and ignore these "stuff" ! )

    ردحذف
  23. i think i totally misspelled somthing ... XD;;

    ردحذف
  24. غير معرف9/16/2007 4:38 ص

    رغم جديه الموضوع بس ما قدرتش امسك نفسي من الضحك بسبب تعليقاتك
    الله يفقرك

    عمر قناوي

    ردحذف
  25. غير معرف9/16/2007 1:07 م

    يا معلم مينا ....

    انا الغير معرف بتاع لا يكلف نفسا إلا وسعها

    اولا انا اتفق معاك تماما في انك تنكش وتنخرب وتجيب اخر اي حد ... بس الناس دي فااااااضية ... مسطحة ... بيضا وطبعا حافظة مش فاهمة والدليل قالولوه ... لا لا قصدي ان الاخت قالت طب لما نسال حد يفتينا في موضوع تكفير وطرد عيسى والبهائيين والشيوعيين والكفرة والمارقين اعداء الله ... ما علينا

    وبالنسبة يا عزيزي لكونك مسيحيا مشركا يجب شنقك على باب زويلة

    فانا صدمت جدا لمعرفة ان زويلة توفاها الله ومن ايه ؟!!! من مقطورة ماركة منصور !!!! مع انك معاه انت في ايدي امينة ... لكن - وياللهول - امينة برضو ماتت وبشهادة عباس العبد صاحب الحادثة

    يا استاذ مينا ... لم اقصد اهانتك بالطبع ... هي كانت سخرية سوداء لا اكثر ... جاوبتها انت بسخرية بمبي !!! واسف جدا لو كنت اذيتك

    ردحذف
  26. Aardvark EF-111B

    hehehehehe
    يا راجل أديك فطرت وفطرت الناس بالكلمة دي... الأستاذة نوارة بتتحايل في المقف ده وتقول كحك هههههههه وربنا طبعا أعلم باللي ف نيتها

    ردحذف
  27. زهرة اللوتس العزيزة

    ههههههههههه أنا فعلا لسة صغير على السكر والضغط بس هتعملي إيه بقى ف دماغي... بادور على السكر والضغط بنفسي

    Yes u misspelled the word Diabetes
    بس أنا فاهمك فمفيش مشكلة
    نشيل بعضنا يعني

    ههههههههههه

    ردحذف
  28. عمر باشا قناوي

    بس إيه رأيك؟
    بوست مسخرة فعلا
    واخوك بوتاجاز خمسة شعلة يعني مش أي حاجة

    هههههههههههههه
    إلا قل لي يا شيخ عمر
    هو إبراهيم فعلا كافر؟؟
    ;-)

    ردحذف
  29. غير معرف بتاع لا يكلف نفسا إلا وسعها

    شفت السخرية البمبي؟
    ههههههههههه
    زويلة يا أخويا ماتت شهيدة
    وبفكر نعمل لها نصب تذكاري ونكتب عليه بالبنط العريض
    ماتت بين أيد أمينة مع تحيات لعنة الآلهة منصور وشركاه

    حلوة حكاية إنك مكنش قصدك تهينني دي وإعتذارك الاحتياطي عما إذا كنت آذيتني

    ههههههههههه
    يا عم هو الناس متلزقة للأذية؟؟
    لا يا عم لا أهنتني ولا آذتني وإنت لو كنت عملت كدة كنت أنا رحمتك؟؟؟؟
    ههههههههههه
    ما انت شايف لساني طوله أد إيه

    بس ما تكتب اسمك بدل تقييد التعليق كدة ضد مجهول

    :-D

    ردحذف
  30. يا مينا انا مش مروة

    يا مروة انا مش مينا

    ايه اللمة والتجمهر ده

    كل واحد يلعب في الفيس بوك بتاعه بعيد

    ومش عايزين ريحة وحشة

    لأحسن ونعمة ربي ابلغ عنكم لواحد صاحبي عضو في الحزب الوطني

    وذنبكو على جنبكو

    على فكر العضو ده مش احمد شقير ده واحد تاني

    ردحذف
  31. نيهاهاهاها

    بجد انا واقع على ظهرى من الضحك على التعليقات استمروا استمروا

    يوه جاتكو ايه الله يحظكوا

    ردحذف
  32. مش قادره أقولك قد ايه يا مينا انا مبسوطه من ردودك على مروه واللى زيها , انت لازم تفضل ترد على الناس اللى زى دى يا مينا , ماينفعش تسبهم , دول زى مانت قلت, دول الشباب بكره , ولو سبناهم بالغباء ده يبقى عليه العوض. أوعى تكبر دماغك منهم , كفايه الناس الكبار اللى مش عارفين نتواصل معاهم,حيبقى جيلنا كمان مهبب

    ردحذف
  33. Heba

    يا فندم إحنا يهمنا انبساطك... إحنا لينا بركة الا انتي؟؟
    بس فيه مثل بيقول لك إيه...

    لا يصلح العطار ما أفسده الدهر

    ;)

    ردحذف
  34. غير معرف9/29/2007 12:49 ص

    علي فكره يامينا انا قرات بعض الي انت كتبته لمروه واشك انك مسلم واعتقد انك من المسيحين الي بيتشدقوا اليوم بحقوق الانسان فلو كنت منهم فعلا فلا تذكر القرأن بكلمه
    لان الكتاب المقدس اكبر كتاب ضد الحريات ومستعد اثبت لك من العهد القديم والجديد كمان فبلاش تتدعوا انكم ملايكه عشان الي قرا كتابكم ميخبطش فيكم ويطلع المستخبي من نصوص ارهاب وزنا وقتل
    وسلام يا مينا

    ردحذف
  35. غير المعرف (النكرة يعني)

    أولا ما ينفعش تقرا "بعض" ما كتبته في الموضوع وتتهبب تخش تعلق من غير ما تقرا "وتفهم" بقية "الكل"... عشان مش ناقصة قرف ووجع دماغ وقلة أدب

    ثانيا: أنا فعلا مش قادر أفهم تركيباتك اللغوية لأن فيها حاجة غلط فأنت تقول أنك تشك أني مسلم
    وتردف قائلا أنك تعتقد أنني مسيحي أتشدق بحقوق الإنسان وأنني لو كنت منهم لما ذكرت القرآن بكلمة

    طب معلش بس فهمني عشان أعرف أرد عليك
    إنت شاكك إني مسلم إزاي يعني وف نفس الوقت بتعتقد إني مسيحي متشدق؟
    وبعدين لو كنت "منهم"، ضمير الغائبين هنا عايد على مين؟ على المسلمين ولا على المسيحيين المتشدقين بحقوق الإنسان؟

    ثالثا: قرآن إيه يا ابني اللي أنا ذكرته بكلمة؟ إنت عبيط يا ابني؟ فين يا ابني أصلا كلامي عن القرآن في هذا النص؟؟ ويعني إيه أصلا ذكرت القرآن بكلمة؟ بذمة اللي خلفوك دي تركيبة لغوية؟ هو ذكر القرآن بكلمة دي حاجة كويسة يعني ولا حاجة وحشة ولا إيه بالظبط؟

    رابعا: إنت عار على المسلمين بغبائك ده... يعني أصلا واضح تماما إن الموضوع ليس فيه نقد لا للإسلام ولا للمسلمين لكن إنت من الناس اللي عندها شعور بالنقص رهيب وكأن الإسلام على راسه بطحة والمسلم لازم يفضل يحسس على هذه البطحة وخير وسيلة للدفاع الهجوم... وهاتك يا شتيمة وتلقيح كلام على الكتاب المقدس على قاعدة اللي فيها تجيبه فيك

    يعني لا الإسلام يا راجل يا ساذج هيتأثر بمقالة ولا حتى بنقد ولا أصلا النقد المعاصر للكتب المقدسة - وهو عادة غير موضوعي يتجاهل تاريخية النصوص - هيقوض إيمان الناس بيها فبلاش تحسس على بطحة غير موجودة يا عزيزي وبلاش قلة الأدب والسفالة بتاعتك دي مع حد ما جاش جنبك ولا جنب بطحتك الوهمية

    ردحذف
  36. غير معرف9/29/2007 8:12 ص

    بجد يا مينا انا ماكنتش متوقع ردك الهمجي ده وحقيقي انا مستغرب من اسلوبك وانت الي بتتغابي وبتعمل انك مش فاهم اللهجه المصريه شكلك بتشتغل نفسك واوعي تقول لي معناها ايهدي كمان
    احنا هنستهبل علي بعض يامينا ده انت مصري وانا مصري يعني فاهم كويس اللهجه العاميه ولو كنت من بلد عربي تاني كنت التمست لك العذر

    خلينا نخش في الموضوع وارد عليك وواضح انك بتستهبل اوي او ربما مش مركز
    بتقول الاتي وانا بقتبس عنك


    طب معلش بس فهمني عشان أعرف أرد عليك
    إنت شاكك إني مسلم إزاي يعني وف نفس الوقت بتعتقد إني مسيحي متشدق؟

    يا محترم انا بقول لك انا اشك انك مسلم ودي تحتلف عن انا بشك ان مسلم وقلت اعتقد انك من المسيحيين وانت بفهمك الضيق مفكر ان مفيش غير ديانتين اما اسلام او مسيحيه اعتقد انك سمعت عن اخر اختراع الديانه البهائيه!

    بتقول برضه
    ثالثا: قرآن إيه يا ابني اللي أنا ذكرته بكلمة؟ إنت عبيط يا ابني؟ فين يا ابني أصلا كلامي عن القرآن في هذا النص؟؟ ويعني إيه أصلا ذكرت القرآن بكلمة؟ بذمة اللي خلفوك دي تركيبة لغوية؟ هو ذكر القرآن بكلمة دي حاجة كويسة يعني ولا حاجة وحشة ولا إيه بالظبط؟

    ليه يامينا تجيب سيره اهلي في الحوار!! عموما انا هقول اللهم اني صائم ومش هغلط فيك
    وياسيدي انا بقول لك انا قرأت بعض الحوار ودي غلطتي انا عشان كده اسأت الظن بيك بس مكنش في داعي تجيب سيره اهلي وعموما احب اقول لك انك بتساند البهائيين وده رائيي الشخصي وانت عارف كويس ان مصر بلد مسلمه وحكومتها مسلمه ومن حق الدوله ترفض الاعتراف بديانتهم وعاجبهم علي كده اهلا بيهم مش عاجبهم متخافش مش هنقتلهم يعني ولا حاجه بس الباب يفوت جمل

    وكمان بصراحه انا اعرف ان اسم مينا اسم مسيحي وده الي شككني فيك ولو كنت انا غلطان ياسيدي حقك عليا ولو كنت انت حتي مسيحي بس اخلاقك كويسه حقك عليا برضه لاني انا ضد فئه معينه منهم وهما اقباط المهجر مش انت في المهجر برضه يامينا؟
    معلش يعني يا ريت تجاوب وتستحمل رخامتي ياسيدي

    وبرضه بتقول الأتي

    "رابعا: إنت عار على
    المسلمين بغبائك ده... يعني أصلا واضح تماما إن الموضوع ليس فيه نقد لا للإسلام ولا للمسلمين لكن إنت من الناس اللي عندها شعور بالنقص رهيب وكأن الإسلام على راسه بطحة والمسلم لازم يفضل يحسس على هذه البطحة وخير وسيلة للدفاع الهجوم... وهاتك يا شتيمة وتلقيح كلام على الكتاب المقدس على قاعدة اللي فيها تجيبه فيك
    "
    بالعكس انا فخور باسلامي ويمكن انت الي عار علي الاسلام لان دي مش اخلاق مسلم في الرد
    وبعدين هجوم ايه هو انا اتكلمت في حاجه اصلا انا مهاجمتش اي دين ودخلت في تفاصيله لسه لكن عندي المزيد وواضح ان مدونتك مش متخصصه في الاديان لذلك محبتش اطول وعلي فكره ده اسلوبي وفي مثل انا بعمل بيه دايما
    "وكل كلب عوي القمته حجرا في فمه"
    وطبعا انا مقصدكش ابدا انا اقصد الفئه الاخري "اقباط المهجر "
    فالحمد لله انا بحمد ربنا اني مسلم وبفتخر باني مسلم وجاهز للدفاع عن ديني بقدر استطاعتي !

    برضه اسلوب الشتايم متواصل ؟؟؟
    عموما مش هرد عليك لكن انا عمري ماكنت سافل ولا قليل الادب ولا عندي بطحه زي مانت بتقول وبعدين يامينا احنا في رمضان والمفروض تحافظ علي صيامك!
    ونقطه اخيره اوجهها لك انت اصلا بتناقش واحد واضح انها صغيره في السن وثقافتها محدوده وانت ما صدقت وسلخت البنت وهاتك يا اسئله وتريقه عليها !
    لو انت انسان مثقف فعلا كنت تغض النظر عن الحوار معاها من الاول واعتقد ناس قالت لك كده
    وانا مش بقلل من مقدر مروه ولا حاجه كلنا كنا في صغرنا وفي بدايه العشرين تقريبا كانت ثقافتنا محدوده
    المهم يامينا متبقاش متعسف وتحذف البوست ده لاني هزعل بجد ههههههه
    وبالمناسبه متبقاش تفسر القرأن علي كيفك وخصوصا "ومن شاء فليكفر ومن شاء فليؤمن "

    سيب التفسير لأهله وبطل تفتي وتتحاور مع اشخاص صغيره
    ويلا سلام وعلي فكره انا هكون زائر دايم هنا علي طول ويارب متتعصبش وتشد في شعرك لاني لسه ياما هعلق علي مواضيعك

    ردحذف
  37. غير معرف
    (والغير معرف في اللغة هو النكرة)

    طول ما بتيجي وتقيد تعليقك هنا ضد مجهول غير متحمل مسئولية كلامك يبقى تستحمل يا حلو... دا مبدئيا... يعني حط اسمك وإيميلك كدة زي الناس المحترمة هتلاقي أحسن معاملة ونحطك على راسنا من فوق

    تقسيمك الغبي للناس على أساس الدين شيء مقيت وممجوج وأعتقد إن رأيك في موضوع البهائيين إنهم برضو يغوروا م البلد ينهي كل مناقشة أساسا في الموضوع!!

    فيه بس نقطة واحدة أحب أوضحها للناس اللي بتقرا حوارنا ده

    حاجة إنت قلتها وحابب أرد بس عليها

    ((وانت عارف كويس ان مصر بلد مسلمه وحكومتها مسلمه ومن حق الدوله ترفض الاعتراف بديانتهم ))

    أولا مين قال لك إن أنا عارف كويس إن مصر دولة مسلمة؟ ومين قال لك إن فيه حاجة أصلا اسمها دولة مسلمة؟

    بص يا حبيبي الدولة دي كيان افتراضي عبارة عن نظام إدارة بيدير مصالح الشعب.

    وبما إنه نظام افتراضي (يعني ما تقدرش تمسكه... مش حاجة مادية يعني وإنما منظومة إدارة) فما هواش بني آدم

    وبما إن الدولة مش بني آدم فطبيعي إن ما لهاش دين لأن الدين أصلا اختيار عاقل حر وهو خاصية تميز فقط الإنسان العاقل الحر... فلا يوجد حيوان مثلا لديه دين معين... ولا يوجد جماد عنده دين معين... هل تقدر تقول مثلا إن هذا الكلب مسلم؟ أو هذه القطة مسيحية؟
    طبعا كلام عبثي

    هل يمكنك أن تقول هذه الكنبة مسلمة؟ أو أنا أسكن في عمارة مسلمة وأنا فخور أني في عمارة مسلمة؟

    كلام أهبل طبعا

    المسلم دا كائن بيقول الشهادتين وبيؤدي الفروض... صح؟

    يبقى الدولة لو قلت - بسلامتك - إنها مسلمة ينطبق عليها دا إزاي؟

    عمرك شفت دولة رايحة جامع مثلا وبتركع الركعات سنة وفرض؟

    عمرك شفت الدولة دي مثلا بتحج؟

    طب الدولة بتصوم مثلا؟ ولو صامت بتعطش؟ ولما تعطش بتشرب؟ طب لو دولة مسلمة ارتدت... هتروح النار مثلا ولا يقام عليها الحد ونصلبها من خلاف... طب ساعتها فين إيديها ورجليها عشان أصلا نقطعها لها؟؟

    وبعدين كلمة دولة مسلمة دي تدخلنا في جدل رهيب... يعني مثلا الدولة المسلمة مثلا هل هي ذكر أم أنثى؟ بما أن الإسلام بيفرق بين الراجل والست في الأحوال الشخصية والميراث وكدة يعني...

    يعني لو طلعت الدولة أنثى هل دا معناه إن الدولة المذكرة زي السودان أو لبنان يبقى ليها حظ دولتين أنثيين زي مصر وليبيا مثلا؟؟

    وبعدين لو الدولة طلعت ست وجات لها الدورة - الأفريقية اللي بتيجي كل سنتين دي - ساعتها يحرم صيامها؟؟

    من كل ما سبق يا عزيزي غير المعرف (كي لا أقول النكرة) نجد أنه لا يوجد شيء في العالم اسمه دولة مسيحية أو دولة مسلمة أو دولة حلامنتيشية

    يوجد دولة اشتراكية
    ودولة رأسمالية
    ودولة استبدادية
    ودولة ديمقراطية
    ودولة مطلعة دين أم شعبها
    (زي دولتنا كدة)

    لكن مفيش دولة عندها دين ودولة كافرة
    فالدول لا تسلم ولا تتنصر
    ولا تدخل الجنة ولا تدخل النار

    فالمرء يحاسب أمام الله فردا
    وسيقف كل امرئ أمام رب العرش يوم الدينونة العظيمة بمفرده ويحاسبه الله كفرد وليس كشعب ولا كأمة ولا بالطبع تقف الدول أمام العرش فهي أصلا كائنات افتراضية لا وجود مادي لها


    إن شا الله تكون فهمت

    انتهى الحوار في هذه التدوينة عند هذه النقطة بسبب خروج الحوار عن موضوع التدوينة
    ولا مزيد من الجدل

    ولو دخلت تعلق في أي موضوع تاني ابقى بعد إذنك حط إسمك عشان نعرف نكلمك بس

    متشكرين

    ردحذف
  38. بالنسبة لأقباط المهجر

    لأ يا سيدي أنا مش من أقباط المهجر
    أنا تبع المؤامرة الماسونية الصهيونية الأمريكية وعميل أصلي يعني وافخر بعمالتي لأن العمالة حق العمالة شرف العمالة واجب

    وشكرا

    وبعدين إنت ما بتجيش ليه؟ ابقى تعال

    ردحذف
  39. غير معرف9/29/2007 9:31 ص

    الله انت هتجبرني يامينا ادخل باسم معين ليه؟ فين الحريات الي قاعد تتكلم عليها انا حر جوجل نفسها واضعه اختيارات انا اختارها بمزاجي لاني حر فهتجبرني ليه ادخل باسم معرف خليني مجهول مؤقتا
    ثانيا انت عملت فيلم طويل عريض وفضلت تتلاعب بالكلام عشان تخلق لنفسك مبررات في الرد عليا
    وكل الي انت كتبته ده متزعلش مني يعني اشتغالات فاضيه وفلسفه فارغه كمان عارف ليه؟ لأنك فاهم قصدي من البدايه كويس
    البلد فيها دستور وقانون لابد من احترامه
    المادة الثانية من الدستور المصري والتي جري منطوق نصها :

    الاسلام دين الدولة ، واللغة العربية لغتها الرسمية ، ومبادئ الشريعة الاسلامية المصدر الرئيسى للتشريع

    اظن النص واضح الاسلام دين الدوله وطبعا يا عبقري ما يقصدش ان الدوله هنا شخص عاقل لكنه يقصد بلفظ الدوله الشعب اهو انا حلت لك اللغز الي انت فضلت تتفلسف فيه في خمسين سطر في كلمتين وتقولي قطه مسلمه وقطه مسيحيه؟ بتشتغلني يامينا؟ يا مينا احنا مصريين فبلاش اللون ده معانا راح تتعب اوي ويانا ههههه
    ومين قال لك اني عنصري ومتزمت وبكره المسيحين؟؟؟ انا حددت لك فئه منهم فقط وهما اقباط المهجر او بمعني اصح غجر المهجر ومنهم عدلي ابادير اما الباقيين فدول في منهم اصدقائي وجيراني
    فبلاش تحور في كلامي وتقول اني بكره المسيحين بشكل عام
    وبعدين زي ماقلت لك ان الاسلام دين الدوله الرسمي بنص القانون وطبعا انا عارف انك بتحترم القانون !!
    فمينفعش نعتمد البهائيه كدين ثالث لان ده ضد عقيده الدوله وبكرر ان الدوله هنا الشعب عشان مترجعش ترص من جديد وتقولي دول اشتراكيه ورأس ماليه الحاجات دي انا ممكن ادرسها لك يا مينا لاني افهم فيها كويس
    وليا عوده تانيه في موضوع تاني بس امسك اعصابك واوعي تشتم
    وسلام مؤقت وياريت تنشر البوست ومتحذفوش

    ردحذف
  40. غير معرف9/29/2007 9:34 ص

    من حق يامينا مقلتليش يعني انت في المهجر ولا في مصر ومعلش يعني لو سؤالي في رخامه شويه

    ردحذف
  41. بص يا نكرة يا غير معرف

    بالنسبة للمادة التانية من الدستور
    دي حطها السادات عشان يلاعب بيها الإسلامجية عشان يلهيهم عن تعديله للمادة 76 بتاعة أبدية الحكم واللي الإسلامجية ما أمهلوهوش يتمتع بيها فاتشخرمنا كلنا بيها إذ تم تطبيقها على خليفته فاستمتع بها واستمتع بالشعب جميعا (وبما إن الدولة مسلمة فقد استمتع الرجل بها إشارة إلى نكاح المتعة)

    المادة التانية ما بتقولش إن الدولة مسلمة يا حلاوة... كلمة دولة مسلمة مش في الدستور... إسلامية دي كلمة مطاطة جدا ولا تعني شيء!! هو برضو الله يرحمه كان صايع... اتحطت المادة عشان تداعب خيالات الإسلامجية في دولة دينية تطبق فيها أحكام الشريعة... لكن هيهات!!!

    دولة إسلاميها دينها الرسمي الإسلام ومبادئ الشريعة مصدر رئيسي للتشريع

    لا تعني شيئا إطلاقا والإسلامجية نفسهم مدركين إن المادة دي مفرغة تماما من أي دلالة فهي مادة لفظية لا تطبيق قانوني لها إلا في نطاقات محدودة جدا... ودا ما يمنعش إنها مادة دخيلة على الدستور وتحتاج إلى تعديلها بالطبع

    الشريعة يستعان بها فقط في تشريع القوانين يا فتك ولا يحكم بأحكامها إلا في الأحوال الشخصية للمسلمين

    الدولة في نصوص الدستور الحقيقية علمانية بلا ريب وتقوم على المواطنة وتكرس الحريات بما فيها حرية الاعتقاد وحرية تغيير الدين ولم تحدد ديانات محددة تختار من بينها وهي تلك المسماة سماوية

    الدستور بالفعل يتيح حرية الاعتقاد تماما وبالتالي المادة التانية اتحطت لزوم الديكور الإسلامجي أيام مداعبة السادات للإسلامجية لكن ترزية القوانين كانوا على قدر من الاحتراف والصياعة بحيث خلوها كدة زي البيت الوقف لا قيمة لها ولا تطبيق... يعني بلها واشرب ميتها يا حلاوة

    البهائيين بقى وهما موضوعنا الأساسي

    هم مصريون كاملو الحقوق غصب عن عينك وعين اللي خلفوك واللي خلفوني

    وأي كلب ينادي بطردهم برة البلد هو جاهل حقير سافل فاشستي يستحق الضرب بالجزم... لأنهم مصريون زيهم زيك يا حلاوة

    ردحذف
  42. اعتذار علي مابدر مني
    بالرغم من انني مازلت عند موقفي في قضيه البهائيين الا انني وبعد تصفح المدونه ومعلوماتها واخبارها احيييييييييييييييك وبشده علي هذه الانجازات الرائعه
    واتمني ظهور العديد من امثالك علي الانترنت وتشتمروا في فضح الفساد
    خالص تقديري واحترامي لك ولأمثالك وارجو تقبل اعتذاري

    ردحذف
  43. اولا انا معترض على حاجات كتير فى كلام مروة زى ما انا معترض على حاجات كتير فى كلامك ولكن
    دى مش نظرية سياسية زى الاشتراكية الايام كفيلة بانها تثيت خطاها او صوابها او موضه وحتخلص لا يا استاذ دا دين..يعنى لو فتحنا السكة فعلا حتبقى على البحرى وكل شئ قابل للنقاش والتشكيك فى اطار حرية الفكر والاعتقاد انا احترم حرية فكرك اه لما تكون بتطرح فكر انما تطرح فكر بيضرب فى عقيدتى ودينى وعايز تنشره واعترف بيه كمان لا اسف
    اسف جدا كمان
    اعتقد ان مروة بتتكلم من الناحية دى
    ويا ريت تقرى عن البهائية عشان تعرف ان الموضوع مش موضوع حرية فكر او اعتقاد وبلاش ناخد من القران اللى يعجبنا
    وعلى فكرة هما من زمان اصلا مقيدين مسلمين ابا عن جدا عن جدا دا المفروض يعنى..ايه سبب قومتهم دلوقتى..صدفة؟ تعتقد؟
    الموضه دلوقتى يا استاذ شك فى كل حاجة دين وتاريخ وفكر وكله
    فوضى خلاقة
    وعلى فكرة انا لا اخوان ولا يحزنون ومش متشدد كمان
    انا مصرى مسلم عادى

    ردحذف
  44. غير معرف10/28/2007 1:27 م

    لكــــــــــى تعـم الفائــدة على الجميع

    مصائب قوم عند قوم فــــــــوائد

    http://gamal51.blogspot.com/

    ردحذف
  45. على الرغم من مدى تقززي من ردود المدعو مينا زكري إلا أن أحب أقوله:
    ما تقولنا يا مينا أفندي إنت ديانتك إيه بالضبط ؟!!
    الأديان السماوية ثلاثة
    أما ما يسمى بالبهائية فأنا مش عارف أصلها أيه بل هي بدون أصل بل لمن يحب أن يعلم (وعليكم بذلك) هي من البلاوي المسلطة علينا من الصهيونية يعني من الآخر هي دعاوى تدمير العقيدة الإسلامية ، فلما نعرف كده تتوقع يبقى إيه الحل؟!! نسيب الموضوع برضه لحرية العقيدة ؟ نسيب العبيط على عبطه ؟!! نخليها تخرب ؟ ثم سيادتك ومعاليك متنرفز أوي كده ليه وليه العصبية العمياء دي إلا لو كانت بالضبط عصبية أيضاً صهيونية ؟ يابني فوق ، وقبل ما تتكلم باسم الدين وتدافع عن حرية العقيدة والفكر اتعلم الأول قبل ما تودي نفسك وغيرك في ستين داهية ، وعموما رأي سيادتك هو بالضبط رأي البهائيين لأن هي دي حججهم باستغلال حرية العقيد والفكر لتظبيط مصالحهم ولو إني أشك في أنهم أصلاً عارفين مصالحهم لأن الغالبية العظمى منهم عبارة عن بهائم تسوقها الصهيونية العالمية والبعض منهم يعلم أنه يخدم هذه المصالح .. أما الدين الإسلامي والقرآن الكريم فهو بريء مما تدعون ويكفيكم جهلاً به استغلالكم لاسمه ، بل إننا كمسلمين مأمورون بالقتال أي الجهاد لتكون كلمة الله هي العليا وكلمة الله هي الإسلام (إن الدين عند الله الإسلام) ولا توجد أديان أخرى تسمى مسيحية أو يهودية بل كان هناك الإسلام منذ الأزل وإبراهيم أبو الأنبياء عليه السلام كان دينه الإسلام ولم يكن مسيحياً ولا يهودياً ، إن هي إلا أسماء سميتموها ، كانت هناك رسالات ورسل وأنبياء منها التوراة والإنجيل ولكنها الأديان غير موجودة ولم يتبقى منها سوى الإسم فقط لكن محتواها مزور وملفق ومفترى على الله عز وجل ، بل إني لأعجب أن لديكم من الإنجيل الواحد العديد من الإصدارات التي تحتوي على العجائب من التناقضات ..!! ألم تسألوا أنفسكم عن سبب هذا الكم من التناقض .. هل حاولتم دراسة ما تقرأون ؟؟ أم أنكم كالبهائم تساقون .. أخي .. إن أصررتم على دعواكم فلا يبقى لي سوى كلمة أخيرة: نحن جميعا نؤمن بالله العلي القدير القادر على هدايتنا جميعا لو شاء .. ولكن الله يهدي من يشاء ويضل من يشاء ومن نعمته جل وعلا أن منحنا العقول كي نتدبر ما حولنا حتى في ديننا ولا نساق كالأنعام وإلا فما فائدة العقل ؟
    أخي في الله .. أنظر لما بعد الحياة الدنيا واحسبها بعقلك ولا تنخدع بزيف القول والعصبية العمياء ، فتش في قلبك (استفت قلبك) وسائل نفسك هل أنا على حق ؟ هل هذا هو شرع والله ونهجه ؟ أخي الكريم لست بعالم دين ولا فقيه بل إنني أضعف من ذلك بكثير وكثيرا ما ساءلت نفسي بل وعذبتها بالتفكير ولا تجد من حل لهذا سوى بالتعمق في التاريخ وتابع رسالات الأنبياء منذ البدائية تتضح لك الحقيقة جلية لا شبهة فيها: أن الدين عند الله الإسلام ونحن محاسبون إن تخاذلنا عن نصرة ديننا وعلينا المجادلة بالتي هي أحسن ولكن أن يمس ديننا ويتعرض له من الحاقيدن والمتعصبين والمزورين فعلينا الوقوف بالمرصاد مقاتلين مجاهدين في سبيل الله ونصرة دينه ، فإن حققنا النصرة لدين الله فمن شاء فليؤمن ومن شاء فليكفر ولكن على من يكفر أن يصغر لحكم المسلمين ولا يسمح له بنشر دينه بين المسلمين فليعبد ما يشاء له الحرية في ذلك ولكن لا يمس الإسلام والمسلمين بل يعلم أنها ما كان له أن ينال حرية تعبده تلك سوى سماحة من المسلمين وتحت سمعهم وبصرهم ...
    أخوتي في الله ..تعهد المولى عز وجل بحفظ كتابه ودينه إلى يوم القيامة فلا حزن ولا غم بل البشرى لنا جميعاً ولا نيأس أبداً فالله ناصر من ينصره .. والحمد لله على نعمة الإسلام ..
    الحمد لله حمداً كثيراً طيباً فيه .

    ردحذف
  46. غير معرف3/21/2008 3:00 ص

    الدليل الشامل للمدونات العربية
    سياسة ، اقتصاد ، ثقافة ، حوار ،
    أدب ، شعر ، فن والمزيد

    http://arab-blogs-guide.blogspot.com/

    ردحذف
  47. معتقدش ان المفروض نضيع وقتان بالرد على الاستاذ مبنا
    فهو من الواضح انه سوف يتبع اسلوب الاستهزاء و الاستخفاف للدفاع عن وجهه نظره
    " لا تجادل الاحمق فيختلط على الناس من منكما الاحمق"
    وانى لاحيى الاخت مروه على ضبط النفس و عدم الغضب رغم اسائات مينا و اهاناته لها
    ولكنى اخذ عليها اصلا التوجه اليه بالسؤال عن الاستاذ ابراهيم عيسى
    و لن اتكلم فى تشريعات اسلميه و احكام هنا فليس مجالها فالاسلام اكبر ان يناقش منى مع مينا و رفاقه
    و فى النهايه ادعوا للجميع و انا اولهم بالهدايه
    " لن ترضى عنك اليهود ولا النصارى حتى تتبع ملتهم"
    صدق الله العظيم
    ارجو نشر التعليق

    ردحذف
  48. السلام عليكم


    بغض النظر عن أي نقاش يدور في هذا الموضوع ...يا أستاذ مينا لو أني مريت علي هذا النقاش مرور الكرام و لم أبالي بأي وجهة نظر أو أي هدف منه ..
    لعرفت الحق مع من ...


    من الواضح يا أستاذ مينا انك بالرغم من محاولاتك الجاهدة في الظهور بالصورة المتكاملة الواعية بل و المحاور الذي لا يقهر ..إلا أنك و للأسف فشلت فشلا ذريعا ..فعزائي الشديد لك و لحرية الرأي ....

    يا أخي الكريم أعتقد أن آداب الحوار ...ينص عليها كل دين ..و إلا كنت قلت أن دينك مجهول الهوية لا ينص علي مثل هذه الآداب الحميدة ..

    و في النهاية ..أحب أهني الأخت الكريمة مروة لأنها كانت نعم المثل ..لدينها فقط بآدابها في الحوار و كظمها الغيظ ...فبارك الله لها ..
    و لا أعتقد أن أسلوب السخرية قد جعل لك جمهورا عريضا ...لأنهم و ببساطة واضح جدا أنهم مجموعة من الأصدقاء جاؤوا فقط لمؤازرة صديق لهم و قع في محنة حوار مع شخصية مهذبة ...

    و كما قلت في البداية أن أسلوب مروة فقط جعل لها جمهورا عريضا من المشجعين بغض النظر عن ماهية و جهة النظر اللتي تتبناها

    فعزائي الشديد لك أخي الكريم علي خسارتك الفادحة

    تحياتي "اختلاف الرأي لا يفسد للود قضية "

    د/سلمي

    ردحذف
  49. غير معرف4/17/2012 12:44 ص

    قصة حياة ابراهيم عيسى المسيحى

    ردحذف
  50. بالنسبة للأخوة حاملى مفاتيح الجنة والنار واصحاب صكوك الغفران التى تصنف هذا كافر وهذا مؤمن .. سايق عليكم المنرو ابقوا اعملوا حساب اخوكم الغلبان فى صك ولا اتنين ......

    ردحذف