Glimpses from My Instagram Gallery

2007-09-13

حبس أربع رؤساء تحرير مصريين بتهمة سب الذات الرئاسية

حبس أربع رؤساء تحرير مصريين بتهمة سب الذات الرئاسية

البقية في حياتكوا... ماتت الحرية!

ماتت الحرية في مصر وهي لسة وليدة!

اتخطفت يا اخوانا وما لحقتش حتى تاخد نفسها!
----

حكم بالحبس على رؤساء التحرير

اليوم الخميس صدر حكم تاريخي على أربعة من رؤساء تحرير جرائد مصرية مستقلة بتهمة سب وقذف فخامة الرئيس وابنه وإهانة الحزب الوطني ورموزه!!

فقد حكمت محكمة جنح العجوزة بالحبس لمدة سنة وغرامة عشرين ألف جنيه على كل من إبراهيم عيسى رئيس تحرير الدستور المصرية وعادل حمودة رئيس تحرير الفجر وعبد الحليم قنديل رئيس تحرير الكرامة ووائل الإبراشي رئيس تحرير صوت الأمة.
ـــــــــــــــــــــــــــــــ

إبراهيم جنح!

طبعا إحنا لسة أصلا ما خلصناش تجهيزات حملة التضامن مع إبراهيم عيسى في جنحة إشاعة مرض الرئيس اللي متحول فيها للمحاكمة... (على رأي نوارة نجم، إبراهيم عيسى من كتر الجنح اللي كل شوية يتهموه بيها هيبقى اسمه إبراهيم جنح) ونلاقي يا مؤمن القضية الجديدة دي واللي صادر فيها حكم حبس سنة وغرامة تهد الحيل... وهو أصلا إبراهيم لسة من كام شهر برضو أدين في قضية مشابهة ودفع بالفعل غرامة عشرين ألف جنيه.

حكم بالسجن قابل للاستئناف!

دلوقت الوضع كالآتي... أربع رؤساء تحرير مصريين محكوم عليهم جكم ابتدائي بالحبس والغرامة بتهمة إهانة الرئيس.... الجديد في القصة إن ما بقاش بس إهانة الرئيس هي اللي توديك السجن لكن إهانة رموز الحزب الوطني كمان توديك السجن بحجة أن رئيسه هو الرئيس مبارك وبالتالي لا يجوز نقده أو العيب فيه!

حيثيات حكم المحكمة!

طب اسمعوا معايا حيثيات الحكم بالسجن والغرامة وشوفوا كمان الكلام اللي اتقال عليه إهانة وسب وقذف شكله إيه واحكموا انتوا عشان ما يبقاش بنتجنى على أحد.

وقالت المحكمة في حيثيات حكمها إن ما نشره رؤساء تحرير الصحف الأربعة من أخبار هي أخبار كاذبة تمس رموز الحزب الوطني الحاكم ومنها عبارات"مصر مهانة خارجيا.. منهارة داخليا"، "الحزب الوطني الذي يحكم مصر بالحديد والنار قرر قتلهم وذبحهم بالحديد والنار"، "الحزب الوطني جزء من منظومة الفساد"... الخ.

وقالت المحكمة إن تلك الأخبار لا صحة لها وتمس كيان الدولة وتؤثر في أفرادها تجاه قيادات الحزب الوطني ورئيسه الذي هو رئيس الجمهورية، وأضافت أن هذا سيؤثر في نفوس أفراد المجتمع ويؤدى إلى تكوين صورة غير حقيقية لديهم عن الحزب والحكومة تفقدهم الثقة في الحزب ورئيسه، بل وباقي رموز الدولة وقياداتها.

لا تعليق على أحكام القضاء (والقدر)!

دا كلام الهيئة القضائية اللي هي المفروض مستقلة وما بتخافش في الحق لا رئيس ولا وزير. وطبعا لا تعليق على حكم القضاء ولا راد لأحكام القدر!!

إهانة المؤسسات جريمة... طب طظ في مصلحة المجاري!

مجرد إنك تقول إن الحزب الوطني جزء من منظومة الفساد يا مواطن معناه إنك هتترمي في السجن! أعتقد إن الحكم دا مش جديد... فكل شوية نلاقي حد بيتسجن بتهمة إهانة مؤسسة ما... طلعت السادات مثلا اتسجن بتهمة إهانة القوات المسلحة وشاب في العشرينات من عمره اتسجن يتهمة إهانة الأزهر... وأعتقد إن هييجي علينا اليوم اللي الكنيسة فيه هي كمان تظبط أحوالها مع الدولة ونلاقي ناس بتتسجن بتهمة إهانة الكنيسة (واخدين بالكوا يا بتوع الإصلاح الكنسي؟) وناس بعد شوية تتسجن بتهمة إهانة مصلحة المجاري وهكذا وصولا إلى أن نجد عم أحمد بتاع كشك السجاير يسجن مواطنا بتهمة إهانة شركة الدخان وعيش حياتك بقى يا مؤمن.


ربيع الحرية قد ولى قبل أن يأتي أصلا!

انتهى ربيع الحرية في مصر حتى قبل أن يبدأ وما رأى البعض أنه اتساعا لهامش الحريات في بلادنا منذ 2005 حتى اليوم فها هو يضيق علينا حتى يكاد يخنق أنفاسنا... وآه يا براح عمال بيضيق!!

اصمتوا وابلعوا ألسنتكم بقى!

قال صلاح جاهين يوما :
في البدءْ كانتْ كِلمة الرب الإله
خلقِتْ حياة
والخلق منها اتعلموا
فاتكلموا
اتكلموا

وأما أنا فأقول لكم اصمتوا!! ابلعوا ألسنتكم! موتوا بغيظكم وصمتكم!
ولا تتجاسروا أن تتكلموا وإلا فالسجن مصيركم
والموت حليفكم!

همسة في أذن الرئيس!

وللرئيس مبارك أقول:
سيدي الرئيس إن مصر تستحق أفضل من ذلك فارحموا مصر، يرحمكم الله!
ــــــــــــــــــــــــــــــــــ

هناك 4 تعليقات:

  1. انا خايفه اكتب تعليق
    اندب لى سنة ولا حاجه
    وبعدين الجاى جاى
    والعيد فرحة
    ماء ماء
    ولا حول ولا قوة الا بالله

    ردحذف
  2. انا شايف ان الناس دى كلها المفروض تتحاكم بتهمة اهانة الشعب

    لما نظيف يقول اننا شعب غير ناضج ديمقراطيا يبقى ده ايه؟
    و لما يتم الأستخفاف بعقولنا يوميا يبقى ايه؟
    و لما الشريف يقول ده ازهى عصور الديمقراطيه يبقى ايه؟
    كفايه بقى لأنى مش ناويه اتسجن دلوقتى

    ردحذف
  3. اى تعليق الواحد هيقوله هيطلع مش ولابد
    واكيد اكيد يودى السجن
    يبقى سلامو عليكو

    ردحذف
  4. ههههههههه
    فيه قاضي في الدنيا ما يعرفش الفرق ما بين الخبر والرأي؟
    يعني انا لما اقول مصر مهانة خارجيا ده خبر كاذب؟
    طيب ايه دليله على انه كاذب

    ====
    وبعدين انت ازاي تشتم مصلحة المجاري؟ وتقول طظ في مصلحة المجاري
    مين قال لك ان مصلحة المجاري طظ
    ده خبر كاذب مالوش اي اساس من الصحة

    وبعدين ايه حكاية اهانة الرئيس
    اهانة ابن الرئيس
    اهانة مؤسسة مش عارف ايه
    اهانة جزمة الرئيس
    ايه الحساسية دي
    حاجة تقطع القلب والله
    انا ما اعرفش ان اللي بيحكمونا مشاعرهم مرهفة كده

    امال احنا نظيف نازل فينا شتيمة ومش بنزعل ليه؟

    ==
    انت يا راجل عمال تبعت لي اتصلي اتصلي عشان تخلص لي الكارت كالعادة
    انت ناسي اننا في رمضان؟
    طبعا ما انت مسيحي ومش بتصلي التراويح
    مش بتصلي التراويح ليه يا كفتس يا متعصب؟
    مش تشاركنا وجدانيا؟
    طيب اياك بقى تفطر
    وزي ما قلت لك
    ح اعمل لك تحليل دم قبل المغرب ولو لقيتك شربت بق مية
    ح ابلغ عنك بتهمة اثارة الفتنة الطائفية واهانة شهر رمضان والاكل فيه وبقية الناس جعانة

    ردحذف