Glimpses from My Instagram Gallery

2007-07-15

عاجل: بشرى النصر الأكيدة في غزوة "الروضة" المجيدة... وسقطت مؤامرات التنصير


بُشْرَىْ اْلْنَصْرِ الأَكِيْدَةِ فِيْ غَزْوَةِ "الَرَّوْضَةِ" الْمَجِيْدَةِ


تمكنت كتئابنا المؤمنة بحمد الله وبنجاح ساحق وسط تكبيرات عشرات المؤمنين وصيحات النصر "الله أكبر... الله أكبر" من دحض مخططات النصارى الكفار الملاحدة في قرية "الروضة" (الشريفة طبعا) بمركز طامية بإمارة الفيوم التي كانت تبغي بناء معبدا جديدا من معابدهم التي يعبدون فيها الصليب والتي يسمونها كنيسة!! وكانت الكنيسة هذه المرة من الكنائس التي يدعوها الكفار "كنيسة إنجيلية" وهم بالطبع من العملاء الخونة والمرتزقة وهم أذيال المؤامرة الصليبية التنصيرية الكبرى ضد الإسلام!! ولا تخفى على جميعكم مخططات مؤتمر كولورادو القذرة للنصارى الخونة الكفار!!

وقد بدأت غزوتنا المجيدة في تمام الحادية عشرة من صباح اليوم الأحد غرة رجب المبارك من عام 1428
بالهجوم على موقع بناء كنيسة النصارى الكفار المسماة الإنجيلية وهي كنيسة قديمة كان غضب الله قد صدَّعها في زلزال الإثنين 15 ربيع الثاني 1413 هـ ... وكانت الحكومة (الكافرة طبعا) قد أصدرت تصريحا بترميم ما هدمه الله مخالفين شرع الله وملقين بأنفسهم إلى التهلكة... ومن ثم فقد ضربنا - بضربة رجل واحد - موقع كنيسة الكفار عباد الصليب ولم تستطع قوى الأمن الكافرة أن تدحض تقدمنا وكيف يغلبونا وقد نصرنا الله وفتح لنا فتحا عظيما!! وقد غنمنا من هذا الفتح كمية لا بأس بها من أجولة الأسمنت وحديد التسليح وزلط البناء... والتي كانت معدة لبناء معبد الصليب!!

وقد فتح الله على بعض النسوة المشاركات في الغزوة المباركة فهتفن مطالبين الإدارة المحلية والمجلس المحلي الشعبي والذين كان رجالهم الأشاوس حاضرين مباركين معنا الغزوة بأن يتم تحويل مبنى معبد الصليب هذا إلى معهد للتعليم الأزهري وإن كنا ما زلنا في نقاش وشورى بيننا فيما إذا كنا نحوله إلى معهد أزهري أم مسجد!

بعد الانتهاء من انقضاضنا الناجح - بإذن الله - على معبد الصليب التابع للكنيسة الإنجيلية، خرج علينا عتاة النصارى مدافعين ومحاولين دحضنا وإفشال غزوتنا المباركة، وإذ خشينا أن يخرجوا علينا بالأسود والوحوش العظام التي يخبئونها داخل كنيستهم السوزوكسية بادرناهم نحن بالهجوم عليهم وعلى كنيستهم وعلى محالهم وممتلكاتهم وكانت الغنيمة هي تحطيم 21 منزلا من منازل عباد الصليب الكفار وتدمير محل بويات يمتلكه الكافر ميشيل شفيق، وتدمير عربة تحمل صناديق لمشروبات ظننا أنها الجعة والعياذ بالله فلم نفتأ نتوقف عن هجمتنا إلا بعد أن تأكدنا بأنفسنا من أن المشروبات كانت غير كحولية وإنما غازية من نوع "شويبس" وهي مما حلله الشرع (فالأصل في الشرع الإباحة) فشربنا معا أنخاب النصر... ولم يحزننا إلا قلة عدد المصابين!! للأسف لم تسفر الغزوى عن قتلى ولا عن سبايا من نساء النصارى بل فقط ثلاثة من المصابين بجروح!!

إنها بروفة صغيرة (أخرى) لنصارى مصر....لما سيحدث لهم ان سولت لهم انفسهم بمحاولة السيطرة على البلاد...بشكل او بآخر او محاولة الاستطالة على اغلبيتها المسلمة بالقول او بالفعل...ظنا منهم انهم يركنون الى ركن شديد ...أمريكا والغرب او الانضمام لهم في حالة غزو مصر وإنني أحذر نصارى مصر أن المتغطي بأمريكا عريان!!

وفي النهاية أقول والله هذه ليست شماتة بالنصارى...ابدا...فليصدقوا او لا يصدقوا
لكنهم يتبعون المثل...دبور وبيزن على خراب عشه!!
---------



ـ البيان هذا بيان تخيلي على لسان من قاموا باعتداءت اليوم على الأقباط في الفيوم

- الكلام بالأحمر والفونط الغامق هي تفاصيل حقيقية وصحيحة من صلب ما حدث في واقعة اليوم بالفيوم

ـ النص الأزرق - بتصرف قليل جدا - ليس تخيليا على الإطلاق بل كان تعليقا لـ واحد من المدونين على ما حدث في بمها واستخدمته هنا فقط للتدليل على أن الحوار التخيلي هنا ليس تخيليا بمعنى الاستحالة وإنما هو تخيلي بمعنى أنه واقع حقيقي في أذهان المعتدين وربما في أذهان قطاع عريض من المسلمين في بلادنا اليوم وهي كارثة وطنية حقا!
ـ

هناك 16 تعليقًا:

  1. مختوم على قفاه7/16/2007 1:11 ص

    هاها
    انا متأكد ان المشروبات كانت كحولية والمسلمين شربوها و علشان كده طلعوا البيان ده !!!

    طبعاً دي نتيجة اكثر من متوقعة نظراً للتخاذل الامني والتعتيم الاعلامي علي الاحداث السابقة ونظرية معلش خليها عايمة واوع تبلغ على اولاد قريتك ونار المسلمين ولا جنة الحكومة وطبعاً بالاضافة الى ان ربنا موجود اللى بتتقال في مناسبات الوحدة الوطنية و الافطار القبطي اللي بيتعمل كل سنة بدون ما يقابله من جانب الازهر

    سيبك انت اللي يجي في الريش بقشيش وكويس ان مفيش حد مات

    ردحذف
  2. مش ممكن
    ايه اللي حصل؟
    امــــــال الأمن اللي فالح بس يتشطر على المدونين الغلابة
    و فين العالم بتوع نسيج واحد
    الظاهر البلد كلها عاملة زي رقاصة عجوزة وطرشة و عميا بترقص على شريط قطر
    مش عارف اعلق على أحداث النهارده
    حسبنا لله ونعم الوكيــــل في كل من كان مسؤل عن شئ زي ده
    .
    .
    بس أرجوك
    بلاش نسخر من الموضوع ده
    هو ده جد الجد اللي بجد لازم يبقى جد

    ردحذف
  3. لاحول ولا قوة الا بالله

    الواحد مش عارف يقول ايه بصراحة
    ومش عارفة ليه الناس بتفكر بالغلو والعدوانية الشديدة دي وديننا دين تسامح يدعو للتسامح مع أهل الأديان الأخرى طالما لم يحدث منهم اي ايذاء لنا

    متى يفهم الناس دينهم الصحيح

    لاحول ولا قوة الا بالله

    ماحدث ليس في مصلحة اي شخص في هذا البلد

    لامسلم ولا مسيحي

    حرام عليكم ياعالم ارحمونا بقى

    ردحذف
  4. الفتن الطائفيه بتزيد
    و الأحتقان بيتوغل
    و التطرف بينتشر
    احنا كده على طريق الدمار
    كل مره الموضوع بيتكرر بنفس الصوره
    فين الأمن
    ربنا يستر

    ردحذف
  5. هههههه
    والله ضحكتني حرام عليك
    هم يضخك وهم يبكي ..
    بس انت جبت العنوان ده ازاي وقالك غزوة!
    ....
    اولا شكلنا مش هنخلص من الحوارات دي اللي يستر بقي لان هتلاقي هجمات انتقاميه وغزوات ومعارك ..وانت عارف امبارح لاقيت عليق عند نوارة مكتوب كالأتي

    مجهول said...
    هذة عقاب من يهاجم الرب يسوع المسيح ويهاجم كنيسه الرب احمد الجيزاوى مثل السادات هاجمه كنيسه الرب وهذا جزائهم.....
    انت كده بقي قولت علي الاخوة المسيحين كفار ستصب عليك اللعنه والعقاب !
    ..
    بعدين يا مينا بأمانه الفونت الاحمر ده حقيقي !
    بجد ؟
    ..


    تحياتي
    ;) احنا بنهذر

    ردحذف
  6. طبعاً البيان التخيلى هو تهريج إن كان حقيقى

    والحمد لله أنه تخيلى

    المهم أن المشكلة أن الحل مش فى التريقة ولا فى سجن الناس ديه ولا حتى فى عناق بين الشيخ والقسيس

    هنقول وهنعيد
    كاتبوا البيان التخيليون
    ما هم إلا خراف ضالة
    ضالة بالنسبة للوطن
    ضالة بالنسبة للدين
    ضالة بالنسبة لأى حاجة

    الحل مش أننا نقابلهم عنفهم وكلامهم اللى ملهوش لازمة بعنف وكلام ملهوش لازمة

    الحل أننا نوصل لكل واحد منهم بشكل مباشر (إتصال) وغير مباشر (إعلامى)

    ونكلم كل واحد منهم بمنطقه
    اللى فاكر أن ده الإسلام كما الأستاذ صاحب الكلام اللى بالأزرق نقوله لأ أنت غلطان ونفهمه .

    واللى هو من إخوانا الأقباط وبيشارك فى أعمال أو تجمعات عنفية (بفرض وجودها) نقول له الإنجيل مقالش كده
    ويسوع مقالش كده .

    وكل صاحب أيدلوجية أيا كانت نكلمه بيها ، مش زى النظام الغبى بتاعنا اللى معندهوش حتى أى أيدلوجية بيواجه بيها هذا الكلام ، معلش نسيت عند أيدلوجية " طااااااااااخ " للمفكر الكبير حبيب العادلى :-)

    ردحذف
  7. انا مش عارفه اقول ايه الغشاوه و الجهل في تزايد خطير البلد رايحه علي فين ربنا يستر بس الامن و السجن مش هما الحل الفهم الصحيح و اقناع الناس بالحق هو الحل بس ازي و الفضائيات و شيوخهم و الشرائيط و ائمه المساجد الاي بينشروا كلام غلط و البسطاء بيصدقهم
    لازم يكون في حل فينك يا ازهر فينك البلد رايحه علي فين ربنا يسترررررر

    ردحذف
  8. الازهر يا ست دنيا غايب من زمان و غيابه تم بفعل فاعل
    هل كان يقدر اي تافه من اي فئه يخرج علينا بعد كام يوم عزله في بيته يربي فيهم لحيته و يلبس الجلابيه و يعمل نيو لوك
    هل كان واحد منهم يقدر ينقد الازهر و يرد فتاواه بل و يحرض الجمهور علي تركها باعتبارها فتاوي حكومه

    هل كل هذا كان ممكن يحصل الا لان الله يلعنه مبارك بيخاف من الازهر فسيطر عليه و مخلهوش يفلفص من تحت رجليه لضمان عدم الاعتراض علي الظلم
    المشكله لها ابعاد متعدده و لا يمكن حصرها في بعض الناس و قلة مندسه كما يقال في كل مره
    مناهج الفكر كلها مطلوب تغييرها
    رؤس الناس المفروض تتغير
    و عاشت مصر حره
    و ربنا يستر علي البلد
    لانها حسب تشبيه الزميل فعلا
    رقاصه دميمه بترقص علي قضبان القطار و مصيرها صدمه واحده و تنتهي اذا ظل الحال كما هو عليه

    ردحذف
  9. جميلة قوى يا شيخ مينا اى والله صدقنى يا مولانا ..عاش كفاح stellyoon من أجل التغيير .. اقبلك قريبًا بوسط القاهرة يا صديق

    ردحذف
  10. بسم الله الرحمن الرحيم


    اللي حصل في الفيوم طبعا مرفوض

    و بيعبر عن جهل و قله عقل

    من ناحيه تانيه اسلوبك في عرض الموضوع و التريقه علي المسلمين و الغزوات و التكبير و هحاوله الاستظراف علي حساب المسلمين تنقص من موقفك كمراقب مصري محايد و بقيت مراقب فبطي

    حتي و لو كان نقلا عن مدونه تانيه


    الاقباط اي نعم بيحاولوا يتجنبوا اي عنف و لكن هل السبب هوا تحضرهم و نبل اخلاقهم و اللا بحكم اقليتهم العدديه؟

    بالنسبه لمؤامرات التنصير . . انا اسف اني ابلغك بانها موجوده و حقيقه مش خيال و في الغالب انت نفسك تعرف عنها اكتر مني . . و انا اتعرضت لمحاولات شبيهه من بعض الاخوه الاقباط و طبعا طلع . . نقبهم طلع علي شونه


    يا ريت نلتزم الموضوعيه في المناقشه
    و بلاش اسلوب كنت أعمي مسلم و أبصرت علي يد الرب يسوع . . الاسلوب ده
    بيجيب نتايج عكسيه


    الموضوع ببساطه ان الاقباط ليهم حقوق يجب ان توثق و تحترم
    و في نفس الوقت عليهم التخلي عن الاساليب الرخيصه في محاولات الضغط علي المسلمين و التحامي بامريكا و اسرائيل عيب و موضوع المسلمين الغزاه عيب

    و الشتيمه في النبي و كل البذائات اللي بنسمعها و نشوفها و سيادتك عارفها كويس . . برضه عيب

    و اللي بيعملوا القذر زكريا بقلظ و عصابه اقباط المهجر برضه عيب

    الاقليات في كل بلد بيكون ليهم قصه كفاح طويل من أجل المساواه بالاغلبيه

    حتي امريكا حبيبه الأقباط كان فيها تمييز عنصري و كانوا السود مايقدروش يركبوا اتوبيسات البيض . . لحد 40 سنه فاتت


    و عشان أجيب من الاخر . . ربنا يكون في عون الأقباط . . مشكله فعلا
    معتبرين البلد بلدهم و المسلمين غزاه و ارهابيين و بدو حفاه و بربر و كل الكلام اللي قلبك يحبه

    بس في اخر اليوم لا امريكا و لا ابو امريكا حيقدر يعمل اي حاجه لأن الاغلبيه الساحقه هي من المسلمين بنسبه تقارب 20 الي 1

    يبقي نقعد مع بعض و نحترم بعض و نتكلم كلام العقل . . و نتخلي عن اوهام امريكا


    و شكرا لاتاحتك الفرصه و حريه التعبير في مدونتك

    ردحذف
  11. مش لاقي طريقة ايجابية للتعبير عن حزني العميق
    حسبي الله ونعم الوكيل

    ردحذف
  12. نسيت اقول لك ان انا كاتب فيهم شعر على الأعمال البطولية دي

    ده مقال هيعجبك
    http://www.sam-youth.blogspot.com/

    ردحذف
  13. مختوم على قفاه

    بتضحك يا اخويا
    لا تتخيل أنا مفزوع إزاي من الواثع المهبب اللي احنا داخلين عليه
    ===================



    أنونيمس

    رقاصة عجوزة وطرشة و عميا بترقص على شريط قطر

    أبلغ ما سمعت من وصف للحالة الراهنة

    الموضوع مفيهوش مجال للسخرية أصلا
    والموضوع جد جدا طبعا ولا يحتمل العبث
    ===========================




    Bella

    كلمة تسامح دي كلمة كريهة... لأنها في ذاتها تحمل استعلاء قميء من طرف ضد الآخر... فالمسيحيين كفار بس إحنا متسامحين معاهم وسايبينهم يعيشوا... بس لازم يحترموا نفسهم وما ينسوش نفسهم.... واخدة بالك إننا إحنا كمان بقينا بنردد نفس الكلام اللي ربونا عليه دون حتى التوقف للحظة للتفكير في معنى الكلام
    ============================




    mariam

    إحنا فعلا داخلين على خراب مرعب
    والأمن سعادتك مشغول بتأمين "الوطن" اللي هو عائلة مكونة من أربع أفراد
    أب وأم
    واتنين عيال
    اختزلوا فيهم معنى الوطن
    وقيمة الوطن
    وأم الوطن
    على أم اللي فيه
    ==========================




    ibn nasser - ابن ناصر

    لا يوجد كلمة واحدة بالفونط الأحمر ما حصلتش وبالنص!!

    الحادثة حقيقية وكارثية والكلام ده هو اللي جوة مئات الآلاف من المسلمين في مصر يا صديقي وللأسف ردود الأفعال بتاعة المسيحيين وتعليقاتهم في الموضوع ده توضح فعلا خطورة الموقف

    بس على فكرة أحمد الجيزاوي تدوينته فعلا كانت خرا وطائفية بشكل مقرف
    =============================




    محمود سعيد

    الحادثة حقيقية وأنا تابعت أحداثها من المصادر ينفسي بالتليفون والخطاب التخيلي هو بالفعل ما يدور في أذهان مئات الألوف من المسلمين في مصر واللي ملايين كمان مستعدة تقبله في لحظة!!

    أما الجزء المكتوب بالخط الأزرق فدا كوبي بيست من تعليق الأخ الصارم الحاسم في مدونتك في موضوع حدث في بمها... يعني ما تستغربش خالص للكلام!! إنت ينفسك شفت الأدمغة الوسخة في التعليقات عندك وهيودونا في ستين داهية الله لا يسامحهم
    ==========================




    دنــــيــــــا مـحـيـرنـي

    الأزهر تعيشي وتفتكري بقى... والكنيسة الرسمية بتلعب سياسة مع النظام وهي المسئولة مع النظام عن تكريس عزلة المسيحيين... إنتي قدام وضع زي الطين

    التطرف الإسلامي تغلغل في ادمغة الناس العادية وبقت سلوكيات الإرهاب الجماعي المجتمعي جزء طبيعي جدا من حياتنا بنشوفه أهوه كل يوم.... أقصد إن العنف ما بقاش عنف جماعات متطرفة إرهابية زي زمان... لكن عنف مجتمعي يمارسه البسطاء العاديون وبتلقائية شديدة جدا... ودا خطير جدا

    ويا خوفي بجد أصحى في يوم
    ألاقي مصر في حرب أهلية
    ===========================




    ذو النون حبيبي واخويا

    حدث معلوماتك
    العنف الديني دلوقت ما بقاش الشاب الملتحي المغيب اللي خارج من أفلام وحيد حامد التسعيناتية
    دا شباب وكهول وأطفال وستات عاديين جدا بسطاء جدا مش منضمين لأي جماعة خارجة عن الشرعية - ولا حتى إخوان - وإنما ناس عادية الكراهية تأصلت فيهم بفعل فواعل كثيرة

    وبالتالي العنف الديني النهاردة عنف مجتمعي مش عنف فئة ضالة منحرفة ودا أخطر بكتير

    مين شكل دماغ الناس العادية بالطريقة الوسخة دي؟
    كتيييييير
    من أول المعتدل المستنير المحرض على قتل المسيحيين محمد عمارة
    لحد شيوخ الفضائيات والجربوع محمد حسان بتاع الكتاب المقدس كتاب جنسي
    ومدرسي التربية الدينية والعربي في المدارس
    والخطاب الإعلامي اللي بيغازل المتأسلمين وقوى التطرف منذ عقود

    وغيره وغيره

    والمحصلة النهائية مجتمع كامل تم تخريبه
    والنتيجة... الحرب الأهلية في الطريق يا رفيق!!!
    =============================




    رضوان آدم حبيبي

    شفت المسخرة يا ابني؟؟
    مهزلة حقيقية!!

    أشوفك على خير يا رفيق
    =============================




    Samir

    مش لاقي طريقة إيجابية للتعبير عن حزنك العميق...
    خلاص
    اكسر تروس الساقية واشتم وتف

    ردحذف
  14. شكرا على النصيحة
    لكن انا في مصر كرهت السياسة والمجتمع والدين وكل حاجة. ببساطة لان القائمين على شئوننا ناس عايشة على كوكب تاني. ناس ماعندهاش مشاكل. ما عضهمش الجوع وماقرصهمش البرد.

    المساكين لهم رب

    بخصوص مشاكل المسيحيين. انا اصطدمت مع الكنيسة بكفاية. الكنيسة اول من يهدر حق المسيحي. طول ما اللي ع الكراسي بيعرفوا يقولوا نعم للحكومة ولساهم عايشين وهم الوحدة الوطنية مافيش مشكلة ها تتحل.

    بمنتهى الوضوح: انا مسيحي يشكك في امانة السلطة الدينية. اللي بنبوس ايديهم بيجاملوا الحكومة بينا.

    ردحذف
  15. amr220

    آسف إنك سقطت سهوا مني في الردود على التعليقات
    خطأ غير مقصود
    أما بعد

    بالنسبة لاعتراضك على أسلوبي
    إنت مش واخد بالك من حاجة
    أنا لا أسخر هنا من الإسلام
    ولا حتى أسخر من المسلمين
    فيه قطاع كبير من المسلمين بالفعل بيفكر بالنص كدة!!!

    على سبيل المثال
    الكتابة الأخيرة اللي بالأزرق دا كان بالفعل تعليق من مدون اسمه الصارم الحاسم على موضوع اعتداءات المسلمين ع المسيحيين في بمها!!

    وكان رأيه إنها بروفة لتأديب المسيحيين

    بالنسبة لموضوع التنصير يا صديقي العزيز

    ما هي المشكلة وما هي الأزمة بالنسبة لك في الدعوة إلى دين آخر غير دينك؟

    الدعوة إلى المسيحية حق من حقوق المسيحيين زي ما الدعوة الإسلامية حق من حقوق المسلمين!!

    هو حرية الاعتقاد عمدك في اتجاه واحد؟
    أنا راجل مسيحي وبادفع من ضرايبي تمويل الدعوة الإسلامية اللي ليها وزارة في الدولة!! على الأقل جدا إن يكون من حقي أدعو كمان لديني ومن غير ما اطلب منك فلوس أو من الدولة!!

    يا ابني يا حبيبي
    إنت جاي تتبلة عليا في مدونتي؟
    أمريكا إيه وإسرائيل إيه وبذاءات ضد النبي... لما تيجي تعلق هنا تعلق بس ع اللي أنا كاتبه مش ع اللي المسيحيين الطائفيين بيكتبوه أو يقولوه... تبقى تروح ترد عليهم في مواقعهم أو قنواتهم... لكن عندي هنا تلتزم بس بالتعليق في الموضوع

    يوجد في حديثك ما يفضح التعميم ضد المسيحيين وكأنهم خونة وعملاء وعايزين الحرق... لأ كلامك لا موضوعي ولا صحيح

    حديثي الساخر في هذه التدوينة لم يكن به أي تجن على أحد!!

    وكل المبالغات الكلامية هنا مؤسسة جميعا على وقائع حقيقية غير متخيلة!! والحديث تخيلي ليس لاستحالته وإنما لأنه تخيل لما بداخل عقلية من يرتكبون هذه الجرائم الإرهابية

    الكارثة يا عمرو ودي اللي لازم أنا وانت نقف قدامها بوعي إن دول مش أعضاء جماعات متطرفة أو إرهابية زي زمان!! دول مسلمين عاديين بيصلوا ويصوموا وعندهم اصحاب وجيران أقباط كمان... بس في وقت بنا كنيسة بيقوموا كمجتمع وكأغلبية ويسرقوا ويحرقوا وممكن يقتلوا وعادي جدا والكارثة إنهم متصورين إنهم بيخدموا الله ورسوله

    وإنت وأنا عارفين إن الإسلام والله والرسول أبرياء من كل هذا حتى لو كان الكل بيعملوه!!!

    إحنا يا صديقي داخلين على حرب أهلية
    وطريقتك بتاعة مين جاب جون في التاني ومين شتم الأول ومين قذر ومين سافل ومين خاين دي هتودينا في داهية

    طب ما بالقياس على شتايمك لبعض المسيحيين الطائفيين يمكننا القول بأن عمارة قذر حسان قليل أدب وديدات فسل رعديد وعبد الكافي مش عارف إيه إلخ

    بس ده هيوصلنا لفين؟
    ولا حاجة
    مزيد من نشوة النتقام اللفظي السخيف!!
    ومزيد من الانحطاط الفكري الممجوج!!

    يا ريت تركز ونبدأ نفكر إزاي ننزع فتيل الحرب الأهلية اللي كل يوم بيزداد اقتناعي إنها قادمة في مصر

    تحياتي واحترامي لشخصك الكريم

    ردحذف
  16. Samir

    عليك نور

    المءسسة الكنسية شريك في جريمة عزل الأقباط عن المجتمع وبالتالي تكريس الطائفية البغيضة... ومش عيب إننا نعترف بده

    بداية الإصلاح إنك تعرف مواطن الفساد وتشاور عليها بإيدك

    يعني بالبلدي تقول لقداسة الأعور إنت أعور في عينه
    وتقول للمؤسسة الغولة يا غولة عينك حمرا

    لو خفت بقى يبقى ما تقولشي
    تروح تموت أحسن

    تحياتي

    ردحذف