Glimpses from My Instagram Gallery

2007-07-24

وبعد ما خليتكوا بالبيت... يعني إيه بقى عصيان مدني بجد؟


الساعة 10 صباح الإثنين 23 يوليو 2007

هاتفي المحمول يرن... أمد يدي نحوه وانا مش شايف حاجة (لأني باقلع اللنسز وانا نايم)
ألو أيوة مين
أيوة الأستاذ فادي معايا
لأ النمرة غلط
(تتذكر هي أن اسمي ليس فادي)
طب فلان موجود
أيوة يا ستي أنا فلان مين معايا
أنا فلانة من جريدة كذا
(بعدين كلام سلامات وتحيات مش فاكر منه حاجة على الإطلاق)
أنا بعمل موضوع عن العصيان المدني ودعوة "خليك بالبيت" سمعت عنها؟
(أنا من غير اللنسز لا باسمع كويس ولا بافهم خالص)
أيوة يا ستي اقفلي واطلبيني بعد خمس دقايق
(خمس دقايق بالمصري المفروض تكون نص ساعة يعني لكن هي عدت فعلا خمس دقايق وطلبتني فعلا)
أيوة يا ستي كنتي بتقولي إيه؟
دعوة كفاية للعصيان المدني يوم ذكرى الثورة...
أنا سألت الناس في الشارع لقيت محدش أساسا سمع عنها!
(أضحك في سري وأكمل لعب دور المصدر بجدية وأستعد للتنظير والبؤرة)
بصي يا ستي هو طبعا الدعوة كان متوقع إنها ما توصلش الشارع
الدعوة بالأساس كانت نخبوية
وأغلب اللي عرفوا عرفوا عن طريق النت والمدونات
والموضوع شوية اتعرف على نطاق أوسع بين النخبة برضه
لما المصري اليوم كتبت عنه
فطبيعي جدا إنك تلاقي محدش عارف حاجة عن الموضوع في الشارع

...........
هو طبعا يعني من العبثية إنك تقولي للناس خليكوا بالبيت
ويعني تعمليها وكأنها حركة ثورية
والناس أصلا قاعدة في البيت لأن النهاردة أجازة!!
(لا أستطيع أن أكتم الضحكة الآن... ما تنسوش إني لسة ما صحيتش وباهيس)
وبعدين إيه التسطيح العجيب ده؟
يعني إيه عصيان مدني والناس أصلا أجازة؟؟؟
وأساسا لو اتفقنا إن الدعوة في الآخر نخبوية
والنخبة المفروض عارفة يعني إيه عصيان مدني
(يا نهار اسود لا تكون النخبة فاكرة العصيان المدني هو إنك ما تنزلش من بيتكوا في يوم أجازة!!!)
وبالتالي المفروض مش هيخيل عليها فكرة عصيان مدني لمدة يوم وهذا اليوم أصلا أجازة!!
وأنا أصلا كل اللي باطلبه منهم إنهم "يخليهم بالبيت"
(كنت هاضرب ضحكتي المسخرة الشهيرة ومسكت نفسي بالعافية مش عشان الزميلة الصحفية ما تتضايقش... بس عشان أمي كانت جنبي ومحبتش أديها انطباع إني بهيس في موضوع جد)

...........
بس خلي بالك من حاجة - لسة بكلم الزميلة الصحفية - الموضوع بالرغم من عدم نجاحه لكنه بالفعل نجح في حاجة ذات دلالة مهمة
وهي طرح كلمة "عصيان مدني" على الملأ وكسر التابوه المفروض حولها
قلت للزميلة إن كلنا عارفين إن الحدث اللي كانوا بيدعوا له ده مش عصيان مدني بجد
حيث أن ألف باء عصيان مدني هو الإضراب الشامل أو الجزئي
والمقاطعة الكاملة لكل ما هو حكومي وإيقاف كل أشكال التعاون مع النظام
وبالطبع دعوة خليك بالبيت لا علاقة لها بكل ده
فأين الإضراب أساسا واليوم أجازة؟
ولكن في الوقت نفسه مجرد فتح الكلام عن العصيان المدني كدة وش وبدون مواربة هو أمر شديد الإيجابية والأهمية

ذكرتها بأن صديقة لنا قد دعت يوما للعصيان المدني
قائلة بتلقائية شديدة وبلهجة واثقة

مش عاوزة مظاهرة ولا وقفة احتجاجية ... عاوزة عصيان مدني


وكانت النتيجة أن تلقت بعد يومين مكالمات تهديد على هاتف منزلها
تحذرها بأن عليها أن "تلم نفسها" فيما تطرحه عن العصيان المدني!

إذن طرح الموضوع بالطريقة دي
وبالسلاسة دي
بل وبالفشل ده
كان إيجابيا للغاية في إنه خلاني وخلاك وخلانا
نتكلم عن العصيان المدني
والجرايد كمان تخش ع الخط والكل يفتي
وبقت ميمة والكل بيدلي بدلوه
(هههههههه حتى أنا)
ودا طبعا مهم وإيجابي

أكدت عليها إنهم
كجريدة تعد منبرا لليسار
عليها أن تركز على أهمية فكرة العصيان المدني وطرحه كحل سلمي للوضع الراهن
ووسيلة لإجبار النظام على الخضوع لمطالب الشعب
وفي التهاية أكدت على إن العصيان المدني بات متطلبا لا غنى عنه
وليس بعيدا عما يحدث من إضرابات واعتصامات عمالية
بدأت منذ ديسمبر الماضي ولم تتوقف حتى الآن
وليس بعيدا كذلك عن بدايات تحركات المهنيين
سواء الأطباء (أطباء بلا حقوق)
أو المهندسون (مهندسون تحت الحراسة وغيرهم)
أو المعلمون (معلمون بلا نقابة)
وأخيرا الاجتماعيون (اجتماعيون بلا حدود)
وقبلهم الصحفيون في نضالهم المستمر لأجل حقوقهم المهنية والإنسانية
وغيرهم وغيرهم

(تنتهي المكالمة بسلامات وتحيات ووعود بالتواصل المشترك مش فاكر منها أي حاجة برضه لأني ما كنتش لسة شربت قهوتي... وكنت أيضا اكتشفت إني لسة ما لبستش اللنسز)


استنوا... لسة هكمل كلام في موضوع العصيان المدني وعن مبادئه وأسسه
فانتظروني
-------------
ملحوظة: الرسمة الي فوق (بتاعة الرفيق جيفارا) أنا اللي راسمها بإيدي
وكنت عاملها أهداء على الجرافيتي وول بتاع الرفيقة سمسمة على الفيس بوك
مش عارف ليه اليومين دول جايبة معايا شمال

هناك 9 تعليقات:

  1. يدعوكم موقع مدون خانه (تحت الانشاء)الى الاجتماع من اجل الاتفاق على الخطوات النهائيه لنشاء مجمع المدونين (مدون خانه)وذلك يوم السبت القادم الموافق 28 / 7 / 2007 وذلك الساعه 6 مساء يوم السبت فى مركز العربى للدرسات العنوان 23 شارع باهر زغلول من شارع المنيل

    ردحذف
  2. العصيان المدني مش بس إضراب عام.
    و مش أن الناس تقعد في البيت خالص.

    العصيان المدني يعني جماعات غفيرة من الناس تنزل الشوارع و تخالف قوانين بعينها و تتعرض للاعتقال و عنف الشرطة و ما تقاومش.

    يعني مثلا احنا ممنوع عندنا التجمهر و الإضراب و التظاهر و سد الطرقات و المبيت في الأماكن العامة.

    ساعة العصيان، تقوم الناس تسيب أشغالها و تنزل تقعد في الساحات و الميادين و قدام المرافق الحيوية و تسد الشوارع و تتجمع حوالين قصور الرئاسة و مراكز الشرطة و يمتنعوا عن التعاون مع الشرطة. و يقعدوا لهم بقى أيام أو أسابيع لغاية ما مطالبهم تتحقق أو حكومتهم تنهار، أو هم ينهاروا أو يعتقلوا كلهم و تتملي السجون و تفيض أو تضرب الشرطة عليهم بالذخيرة الحية و يموت منهم كثير. ال يستحمل أكثر يكسب.

    فاكر لقطة الهنود في فلم غاندي و هما ماشيين طابور و العسكري بيديهم على دماغهم بالنبّوت واحد واحد فيقعوا و ييجي المواطن ال بعده ماشي في نفس الطريق و لا كأن في حاجة حصلت؟

    أو لقطة زحف الشعب على قصر تشاوشسكو؟ صفوف ورا صفوف من الناس انضربت بالذخيرة الحية و وقعت لغاية ما العساكر استسلموا لما فهموا أنهم مش المفروض يضربوا ناسهم.

    ردحذف
  3. عذرا للمقاطعة
    نحتاج الى رأيك ودعمك في حملة القضاء على المخدرات انتظرك هناك
    www.tw3ya.blogspot.com

    ردحذف
  4. بخخخخخخخخخخخخخخ
    كشفتك
    أنت الحاج جرجس
    صباحك عصيان بس مش مدنى
    عصيان وخوابير
    أخبارك أيه
    سمعت أنك عزلت فأقتفيت آثرك مستعينه بمجموعه من الكلاب البوبيسيه المدربه فى كلية التدبير المنزلى
    وأسفر البحث عن أكتشاف مكان تمركزك و قد قمت بضرب سياج أمنى حول مدونتك
    أما عن دعوة كفايه فخد عندك بقا
    فى اليوم ده كنت بالصدفه فى ميدان رمسيس سابقآ
    ميدان الباعه الجائلين و الحوارتجيه حاليآ
    المهم كان برنامج لعاشره مساء بيصور وبيسأل المواطنين
    السؤال التالى
    هل علمت بدعوة كفايه بالبقاء فى البيت وأيه رأيك
    و وقفت أسمع أجابات الناس وسط عدد غفير من الناس
    فى نفس الوقت كان متواجد عدد من العلماء وهم أمناء الشرطه
    اللى حاولوا يفرقوا جموع البشر وقالوا اللى ملوش لازمه يمشى او حتى يبعد وهم أى ألعاملين فى موقع التصوير هاينادوا عليكوا بالأسامى
    وهنا طبعآ وقعت من الضحك
    ورديت على العالم الفذ الأمين
    ليــــه هى نتيجة الثانويه العامه
    الغريب أنا الناس أجمعت على عدم معرفتها أساسآ بكفايه
    وبدأوا يتكلموا فى مواضيع تانيه زى غلاء الأسعار والدنيا حر والبطاله وأسماعيل أبن أخوه بيدور على شقه وبنت أشتكت أنها مخطوبه من خمس سنين وهكذا
    وفجأه أقتحم الزحمه رجل عجوز منهك شايل على وشه علامات البؤس والأرهاق والمذلة ويرتدى ملابس باليه مقطعه يعنى عشان عارفاك ذكى من يومك
    المهم مسك المكرفون وصمم يتكلم
    وقال أنه ميعرفش كفايه دى بتاعت أيه لكنه يعرف أننا نرفض التدخل الأجنبى وأننا بندعم الحكومه وبنساعدها
    وراضيين ومبسوطين وكله تمام
    الى أن سأله أحد الحضور السؤال التالى
    من هو رئيس الحكومه حاليآ
    ؟؟؟؟؟؟؟؟؟؟؟
    وهنا أتنرفز العجوز وقال وأنا أعرف منين هو أنا بشم على ضهر أيدى
    وهنا ضج الجميع بالضحك وتحول موقع التصوير الى كرنفال للسخريه
    فهمت حاجة
    أنا بقا رفضت التصوير
    مع أنى كان نفسى أتكلم وأصرخ وأقول
    شندوشت مربى ياااااااا ريس

    ردحذف
  5. ايه يا عم مينا

    هو كلام الليل زى الزبدة

    يطلع عليه النهار يسيح ولا ايه

    :)

    فين البانرات ياعم

    ؟؟؟

    ولا حتى اى معلومة عن تجار الكيف

    :)

    يلا بطل كسل وادعمنا في الحملة بأى معلومة او حتى دعاية

    تحياتي يا غالي

    ردحذف
  6. Salaam!
    My name is Eduardo, I was invited to write on UWBlog, so I wanted to say you: hello! and invite you to visit my space too.
    It is in spanish, but you can translate it.
    Greetings and warm hug from Chile!

    ردحذف
  7. هو فعلا شيء يضحك انك تعمل عصيان للناس تقعد فيه في البيت في يوم الاجازه اللي هما اصلا قاعدين فيه في البيت
    لكن كما قلت فعلا هناك ايجابيه في طرح الموضوع علنا في الجرائد و المدونات
    زمان كان استحاله تسمع عن شاب شجاع داخل مظاهره لكن الان النقد الموجه للنظام و شخص رئيس النظام نفسه اصبحت علنا و الناس لم تعد تخاف من اي احد لا شرطه و لا امن دوله
    الكل بيتكلم و الكل بينقد و احيانا بيشتم و يسب بصوره صريحه بلا مواربه

    ردحذف
  8. حتى المعارضة مش قادرة تفكر

    ردحذف
  9. مبروك يا عم عالينسيز
    :P

    ردحذف