Glimpses from My Instagram Gallery

2007-07-14

التشيك تأخذ بدعوة علاء سيف لخصي المتحرشين... وأوربا قلقانة

بيقولك الأوربيين قلقانين بسبب عقوبة الإخصاء اللي التشيك بتطبقها ع المعتدين جنسيا على الأطفال... فالتشيك - قال إيه يا ولاد - بتخصي المتحرشين!! وقال إيه كمان بتخيرهم ما بين الإخصاء أو السجن مدى الحياة في مستشفى نفسي... طبعا الإخوة المتحرشون بيفضلو الخصي على أساس إنه أرحم من جلسات الكهربا وتحرشات الإخوة التومرجية بتوع السرايا الصفرا.

منظمات حقوق الإنسان في أروبا والدول المتقدمة مقلوبة بسبب الموضوع ده وإزاي وإزاي نخصي المتحرشين ودا تعذيب وما يصحش!! أنا طبعا مع حقوق الإنسان قلبا وقالبا ومقلوبا كمان... بس يعني هو اغتصاب الأطفال ده مش انتهاك لحقوق البني آدمين برضو؟

وجدير بالذكر أن أول من دعا إلى خصي المتحرشين جنسيا كان خالد الذكر علاء سيف في تدوينته الخالدة الطريقة الدارونية للتخلص من التحرشات الجنسية... وكان سيف قد دعا نساء مصر أن يحملن السلاح - إبر التريكو المسنونة - في حقابهن احتياطيا لأجل هذا الغرض السامي!! وقد قوبلت دعوته هذه وقتها بالاستهجان والاشمئناط! معلش يا علاء طبال الحي لا يطرب! ولا كرامة لنبي في وطنه يا اخويا! بس ولا يهمك آدي التشك أهم خدوا بنظريتك وطبقوها وبرضو بتوع حقوق البني آدمين مش عاتقين أبوهم!

طب بذمتكم ودينكم... لو البت هند كان معاها إبرة التريكو بتاعتها ومتدربة على استعمالها كان الواد العرة أبو توك توك عرف يسلبها أعز ما تملك؟ إننا من هذا المنبر نجدد الدعوة لحمل إبر التريكو في حقائب اليد... ويا نساء مصر وفتياتها... من هنا ورايح خدوا حقكوا بإيدكوا لأن ما بدهاش وحلني على ما تحملوا وتخلفوا بقى عشان النيابة تقبض ع البيه المتحرش عشان تقارن دي إن أيه اللي جابوه بدي إن أيه العيل وتتأكد إن هو العتل الزنيم والوحش اللئيم اللي عمل العملة السودا فيكوا!
ـ

هناك 10 تعليقات:

  1. بصراحة الناس الشيك دول 10/10
    بالنسبة لى بقا انا محجبة ومش حستخدم ابرة التريكو
    ومالوا دبوس الطرحة

    ردحذف
  2. التشيك يقومون بإخصاء المعتدي جنسيا منذ حوالي عشر سنوات تقريبا

    وقد قاموا باستطلاع اراء الناس قبل تشريع هذه العقوبة ووافق عدد كبير من الناس على تطبيق عقوبة الخصي

    يعني هم محترمين نفسهم وبيحافظوا على ستاتهم واطفالهم من زماااااااااان

    واحنا بنطلق سراح المغتصب وبندور له على تبريرات للصبح

    جاتنا القرف

    ردحذف
  3. بكل تأكيد حوادث الاغتصاب يا مينا هي أمر يقشعر له البدن ويترك بصمات وجروح غائرة في النفس وللأبد. يكفي أن نعرف أن المرأة المغتصبة ترتعب من الجنس ونظرتها للرجل فيها كثير من عدم الثقة والخوف.

    وكثيرا جداً ما يلومون المرأة ولو بشكل غير مباشر لأن في وعي الكثيرين المرأة هي المثير الجنسي الباديء ودوماً يقع عليها
    اللوم حتى لو تم تقطيعها لـ مية حتة..

    برضو هي الجاني في نظر الكثيرين وهذا يبين لك كم أن الإنسان، بوجه عام، كما قال هوبس، يمكن أن يصبح ذئب لأخيه الإنسان.

    وحضرتك دكتور وبتأكيد انت بعلم ان الاخصاء ليست وسيلة لرضع المختصب

    لان العملية الجنسية مرتبطة بعدة اجهزة فى جسم الانسان على حسب علمى

    المسالة عبارة عن شاب مش متربي غالبا تعليم ضعيف او معدوم , وشهوة حيوانية , مع مادة مسكرة او مخدرة , وفتاة ضحية في المكان والزمان الغير مناسبين

    ردحذف
  4. تصدق يا مراقب
    حقوق الحيوان اللى دافعت عن رفض المبدأ ده محتاجين علاج اولا
    لان الكيل بمكيالين فى المواقف دى اصلا لا انسانى
    يعنى زى ما انت قلت واخداهم الشفقة والرحمة بالمعتدى لكن المعتدى عليه ولو كان طفلة زى هند كده فليذهب للجحيم هو وطفولته

    بصراحة اذا لم يطبق قانون حازم فى الموضوع ده يبقى كل واحد ياخد حقه بايده احسن وخليها غابة وحيوانات ما دام السلوك الحيوانى هو اللى متبع

    ردحذف
  5. حسبي الله و نعم الوكيل
    و بتقو لالنيابة افرجت عنه بكفالة؟؟؟؟
    المفروض يشنقوه في ميدان عام في التو واللحظة عشان محدش يجرؤ انه يكرر المصيبة دي تاني

    منك لله وقفتلي قلبي
    انا فضلت مش مستوعبة اللعبة اللي في ايديها دي تبقى ايه و مش مصدقه
    قلبي وقف
    بجد انا مش ناقصة

    ردحذف
  6. انا قريت خبر هند و اتنكدت نكد فظيع
    منه لله
    ايه اللي المفروض طفله صغيره جدا زي دي ممكن تعمله بطفل رضيع
    هل هترضعه ؟
    هل هي ممكن تحس بالامومه تجاهه؟
    طفله و لم تنتهي بعد من مشاعر الطفوله و ملاعب الطفوله هل ممكن تستوعب الموقف اللي هي فيه الان؟
    يا تري ايه الحكم النهائي اللي المفروض يتحكم بيه علي الحيوان صاحب الفعله؟
    و ليه العائله لم تتجنب موضوع الحمل ؟

    ردحذف
  7. طب و نخصية ليه..ما نطبق عليه عقوبة المفسدين في الأرض..يقتل او يصلب او تقطع ايدية وارجلة من خلاف..افتكر لو حد واحد من دول تم في ميدان عام..مفيش كلب هبجرؤ يبص لواحدة في الشارع نظرة كده ولا كده..ناهيك عن الإعتداء المباشر عليها..و سلملي على حقوق الإنسان..الي خايفين قوي على حتت ( تييييييت) مش بس اعتدى على بنت..لا كمان طفلة..والبجاحة انه خرج بالسلامة من الحجز...

    ردحذف
  8. والله يا ماقب انا مش عارف اقول ايه
    حاجات عمرها ما كانت بتحصل عندنا هما هوصلو الشعب لغاية فين ؟ وقالك الحيوان القذر ده طالع بكفاله!!

    تحياتي
    عايزين نشوفك علي النت

    ردحذف
  9. حقيقى يا مراقب اللى حصل ده كارثه و مصيبه بكل المقاييس
    ازاى نسمح بأغتيال البراءه
    ايه اللى بيحصل ده
    انا من ساعة ما عرفت و انا فى حالة ذهول و مش مصدقه

    و بعد كل ده يطلع بكفاله
    طيب امتى يتسجن؟
    مش كفايه ضيع مستقبل زهرة لسه بتتفتح
    و طفله تانيه كمان

    طيب ازاى هتربى بنتها و هى عندها 11 سنه

    لازم الموضوع ميعديش كده
    و الا يبقى كل واحد يعمل اللى هو عايزه
    و يا ريت لو يلغوا القانون لأنه مالوش اى لازمه

    ردحذف
  10. Desert cat

    طبعا دبوس الطرحة مهم جدا ودي العبقرية المصرية في الابتكار
    ------------------



    Bella الجميلة

    أنا في الحقيقة لا أرى أي مشكلة في عقوبة الخصي وخصوصا إنها بتتم بشكل كيميائي أو جراحي يعني مش تعذيب... لكن فعلا لو بنت دافعت عن نفسها وخصت الذكر المتحرش برضه أعتقد القانون هيبقى في صفها كدفاع شرعي عن النفس... المهم بس نتدرب كويس ونعلم البنات ينشنوا صح عشان الضربة تيجي في مقتل
    ----------------------



    7ntklm

    الإخصاء هنا مش وسيلة للتأديب والتهذيب والإصلاح... لكنه عقاب رادع بالفعل ليس للمجرم فقط بل لأمثاله الذين لو علموا أن العقوبة مشددة على هذا النحو لما فكروا في اقتراف جرائمهم... والموضوع عشان بس اللي بيستغلوا الفرص ويهيصوا... مالوش علاقة بالحدود وقطع يد السارق وغيره... أنا بتكلم في جريمة محددة وهي التحرش وخصوصا بالقصر والأطفال
    ----------------------




    توتا العزيزة

    هما بتوع حقوق الإنسان معذورين لأنهم بيتعاملوا مع نصوص معين وبيحموها... بالنسبة للكيل بمكيالين فحدثي ولا حرج ودا بقى العادي والطبيعي... لما الكلب البشري اللي اغتصب هند يبقى حر طليق وف نفس الوقت بتسجني عشرات من الأبرياء كل يوم يبقى طبعا في كيل بمكيالين... ولما حقوق الإنسان تدافع عن المغتصب وما تدافعش عن الضحية يبقى فيه طبعا كيل بمكيالين... بالنسبة الولد ده هياخد إيه حكم... هيبان يا توتا وخلينا ما نقاطعش!! بالمناسبة فاكرة زماااااان لما في بداية قضية إسلام نبيه ما تفرحش أوي محدش عارف الحكم في الآخر هيرسي على إيه... برضه شكل كلامك كان صح وغالبا الواد ممكن ياخد براءة!! وكله يبان
    --------------------



    حفصة الجميلة

    أنا صادمني جدا في الفيديو ده إن البنت متماسكة جدا وقوبة وبتتكلم كانها ست في التلاتين من عمرها مش 11 سنة!! دا صادمني بجد... واضح إن طفولة هذا المجتمع تم اغتيالها!! الفيديو فعلا رهيب وبشع
    ----------------------



    ذو النون

    لا شك أنها تجربة غريبة وعجيبة
    أغلب الظن أن أمها هي التي ستقوم برعاية الطفل... وهنا علي أن أحيي أسرة الطفلة التي لم تقتل البنت ولم تخاطر بحياتها في إجهاض غير آمن... بل واجهت الأسرة الموقف مع الابنة بقوة وثبات رائعين

    هو أصلا غريب في السن ده علميا إن يحصل حمل... يعني هي أكيد عندها أصلا بلوغ مبكر وبالتالي لو بتسأل عليما ممكن ترضعه ولا لأ... أكيد طبعا اللي تحمل وتخلف ينفع علميا ترضع... هي سابقى سنها على الأقل بتلات لأربع سنوات

    بالنسبة للأسرة والتخلص من الجنين أولا البنت كانت حامل في خمس أشهر لما اكتشفوا الحمل وبالتالي الإجهاض كان هيؤدي إلى وفاة البنت الأم نفسها... ثانيا: هو حضرتك والمجتمع بيقروا ضمنا شرعية إجهاض المغتصبة؟ دا مش في القانون ومش في الدين ومش في الطب... فيه دول بتشرع الكلام ده بس بنقف ضدها وضد هذه التشريعات لأنها تسلب إنسان (هو الجنين) من أول حقوق الإنسان وهو حق الحياة... العيل يروح فين بعد كدة والأم تتعامل إزاي دي كلها أسئلة مجتمعية مهمة لكن إجااتها ليس من بينها الإجهاض وكأنه حل شرعي أو حلال.
    ---------------------------





    sokoothansawat

    لأ الموضوع بعد إذنك خليه في الإطار بتاع خصي المتحرشين بالأطفال... لكن أقامة الحدود لأ سوري!! أنا بحترم قانون الدولة الوضعي ولو بنطالب بالخصي بنطالب بيه كعقوبة مدنية وضعية مش كإقامة الحدود!! عشان بس الدنيا تبقى واضحة... وأنا ضد الخصي في ميدان عام أو أي عقوبة في ميدان عام... الخصي في جمهورية التشيك بيتعمل كيميائيا أو جراحيا... مش في ميدان عام ولا حاجة... لكن اللي ينفع يتعمل في الميدان العام هو دفاع الضحية عن نفسها بإبرة التريكو أو بدبوس الحجاب وفي المسائل وتدي له عشان تخلص على ذكوريته تماما... دا وضع تاني اسمه الدفاع الشرعي عن النفس والشرف... بالنسبة لبتوع الحقوق الإنسان هما رفضوا خصي الرجالة في التشيك لكن هنا بتوع حقوق الإنسان ناس عداهم العيب ما جابوش سيرة الموضوع بتاع خصي الرجالة خالص لأنه أصلا لا فيه حقوق إنسان ولا فيه رجالة من أصله... عندنا ذكور بس... ينفعوا؟
    ------------------------





    ibn nasser - ابن ناصر

    لأ هي كانت بتحصل قبل كدة... بس الجديد إن فيه أب وأم برغم مستواهم التعليمي المحدود إلا أنهم اتصرفوا صح وفتحوا القضية صح واتعاملوا مع البنت ومع مصيبتها بشكل رائع وغير مسبوق
    -----------------------




    مريم

    أنا عاجبني فعلا الاقتراح بتاع إلغاء القانون لأنه فعلا مالوش أي لازمة... ونسرح بتوع النيابة والقضاة بقى ونقلبها مجالس عرفية كدة زي بتاعة الصلح في الاعتداءات الطائفية

    ونرجع تاني لنظام الدية... واللي تعرف ديته اقتله!!

    قانون الغاب هو القانون الوحيد المحترم في مصر

    ردحذف