Glimpses from My Instagram Gallery

2007-07-10

الرائع خالد البلشي متضامنا مع أحمد بدر وينتقد خيبة الصحافة التقليدية


الكلام دا ما كنتش هاكتبه لولا إن الرائع خالد البلشي كتب ما كتبه هنا

لما كتبت عن أحمد بدر والاعتداء عليه وعن متابعات قضيته كنت عارف إن جريدة الدستور رفضت تكتب عن الموضوع!!

ولأسباب خاصة جدا استجبت لطلب البعض ولم أكتب منتقدا الدستور ورئيس تحريرها اللي مش فارق معاهم كرامة زميلهم بالرغم إن اللي اعتدوا على أحمد بدر هم رجال الشرطة الأشاوس ومنهم أمن دولة ودول اللي ليل نهار إبراهيم عيسى بيصدع دماغنا بشتيمتهم والهجوم عليهم دون توقف!!

طب يا أبو يحيي هو لما الشرطة الكخة دول يضربوا صحفي زميل... بلاش إنه كمان صحفي في جرنانك يا سيدي... لكن زميل صحفي واعتدت عليه الشرطة وانضرب بالقلم على وشه واتقال له الصحافة ع الجزمة يا ابو يحيي!! مش كان واجب كصحفي زميل جرنانك يتضامن معاه؟؟

طب بلاش خالص يا عم ابراهيم إنه صحفي وكرامة الصحافة والكلام الحمضان دا كله... أحمد بدر مواطن مصري تعرض لانتهاك كرامته على يد رجال الشرطة اللي انت بتنتقدهم وتهاحجم سياساتهم... مش برضه كان واجب تقف جنبه كمواطن يا صحافة يا حرة؟؟؟
الأستاذ خالد البلشي هو اللي داس ع الدمل اللي جوايا لما كتب الكلام اللي جاي ده واللي هانقله لكم بزي ما هو وبدون تعليق مني... ويا ريت ما حدش يعتبرني بازايد على حد!! لولا إن خالد كتب الكلام ده أنا ما كنتش هكتب في الموضوع ده دلوقت خالص... آدي كلام خالد البلشي بدون تعليق أو إضافة مني

خيبة الصحافة التقليدية وعظمة المدونين


فى قضية احمد بدر: خيبة الصحافة وعظمة المدونين


لليوم الخامس على التوالى انتظر أن أرى خبرا فى جريدة مطبوعة عما حدث للزميل احمد بدر ولا أجده

لليوم الخامس على التوالى تتعامل الصحف المطبوعة مع أحد الصحفيين بمنطق" خليه يتأدب " رغم ان الإعتداء الذى تعرض له أحمد لا يخصه وحده فهو يخصنا جميعا كمواطنين ويخص الصحفيين على وجه التحديد فضابط الشرطة الذى اعتدى على أحمد كان يستهدف فيه صحافة مشاغبة اقلقتهم بدليل انه وجدها ذريعة لتفريغ غله فى كل الصحفيين معلنا للجميع اننا جميعا على جزمته وهذا ما قاله بالحرف

ولليوم الخامس على التوالى يثبت المدونون انهم الأحق بالاحترام بعد ان خاضوا وحدهم معركة الدفاع عن الصحافة المطبوعة رغم ان احدا لم يدعهم لذلك بينما تم توجيه الدعوة لجميع الصحف لحضور الوقفة التى نظمها أحمد وزملاؤه بالدستور لتقديم بلاغ بما تعرض له أحمد وتعرض له الصحفيون عند النائب العام بينما امتنعت نقابة الصحفيين ولجنة الحريات بها عن تقديم أى عون او مساعدة لأحمد حتى فى صورة بيان هزيل من البيانات المعتادة وكأن المساندة محجوزة لفئة دون غيرها من الصحفيين ..وهوما دفعنى لتصديق ما نقل عن أحد اعضاء المجلس القريبين من الدستور وانه قال عندما سمع ما حدث لأحمد " يلا خليه يتأدب " والمثير أن المدونين دخلوا على الخط بينما امتنعت جريدة احمد نفسها عن نشر أى خبر عنه بنفس المنطق السابق وهو" خليه يتأدب" لمجرد ان أحمد وزملائه اعترضوا على تأخر مرتباتهم ..

للمرة الألف يثبت المدونون انهم الأحق بالدفاع عنا فقضيتهم الحرية للجميع و لا تحكمهم مصالح شخصية و أهواء ولا ينصاعون لرئيس مجلس ادارة او يداهنون او يجاملون زميلا لهم ليؤكدوا للجميع انهم صحفيون افضل منا ومبدأيون أكثر منا ويا شماتة المدونين فى الصحافة الورقية ويا خيبتنا جميعا والمجد للمدونين واخلاقهم ولكل من ينتصر لحرية الآخرين دون خوف من رئيس أو ممالأة لصديق او استصغار لقيمة مظلوم..

عذرا أحمد بدر تأخرت عن مساندتك وأملى ان يتم تصحيح الخطأ بحقك لكن الحسابات هى التى انتصرت بينما دفعت انت الثمن بتهاوننا فى حقك..

مدونات تضامنت مع أحمد

مدونة عرباوي











هناك 10 تعليقات:

  1. السلام عليكم ورحمة الله وبركاته

    الإخوة الكرام

    طبتم وطاب ممشاكم وتبوأتم من الجنة منزلا

    ياريت نشارك في الحمله دي

    غزة لن تجوع ولن تركع

    وجزاكم الله خيرا

    ردحذف
  2. يحرق ميتين أبو الموازنات اللي تسكتنا على الحق يا أخي ، هو هيبقي حرقة دم من كل ناحية ؟، ولغاية امتي ؟ ، اللي كتبه الأساتذ خالد واللي كتبته انت لازم يتكتب في بيانات ويتوزع علي الناس في الشوارع ، الإنبطاح الإستباقي اللي احنا بنمارسه طول الوقت ده لازم ينتهي بقي ، احنا بإدينا هناخد حقنا كله ....ولا ايه بقي؟

    حربية

    ردحذف
  3. هو انا فعلا استغربت جدا اللى حصل وتخاذل الصحفيين عن نصرة زميلهم !!

    ردحذف
  4. أحمد حربية وسيد تركي

    إنتوا أكتر ناس عارفين الضغوط اللي اتفرضت عليا عشان ما اهاجمش الدستور في موضوع أحمد بدر... وبرضو لما ما اتكلمتش كان الدافع الوحيد عندي هو مصلحة الزملاء اللي مش عايزين مشاكل بس بصراحة اللي بيحصل كدة كتير مش بس عشان مصلحتكوا كصحفيين في الدستور... الموضوع أكبر من كدة... الموضوع له علاقة بالرياء العجيب الذي يمارسه إبراهيم عيسى فهو يهاجم النظام ليل نهار عشان مستبد وفاسد وفي الوقت نفسه نجده يمارس نفس الاستبداد والفساد وأكل الحقوق

    الكورة في ملعبكوا انتوا... أنا والمدونين معاكوا بس خدوا موقف بقى الله يكرمكوا... أكل عيش من غير كرامة يبقى قلته أحسن... واللي بيرزقكوا مش عصام فهمي ولا ابراهيم عيسى

    خدوا موقف بقى لأجل كرامة ليس فقط الصحفيين بل لأجل كرامة المصريين وساعتها أوعدك هنكون كلنا معاكوا... ويا إما الناس دي تمشي صح يا إما يتفضحوا قدام الناس كلها ويتعرف كم الرياء اللي بيمارسوه
    --------------------



    omar مشروع بطل

    الصحفيين غلابة وعايزين ياكلوا عيش يا عم عمر وإن كنت أنا مش متفق على إن أكل العيش يكون مسوغ لانتهاك الكرامة والآدمية... ودا رأيي

    ردحذف
  5. والله حاجه غريبة جدا ان الصحافة تكتم على الخبر ولا كأن شئ حدث
    على ما اعتقد ان اللى حصل ده اهانة لجميع الصحفيين مش للاستاذ احمد بدر لوحدة
    لانه تعرض للاهانة بعد ما اعلن انه صحفى

    ردحذف
  6. غير معرف7/11/2007 1:28 م

    مش عارفه ليه أحنا دايما نمسك فى الذيول ونسيب الرؤوس! ليه مانقدمش بلاغ فى حبيب العدلى شخصيا ؟ مش هوا الراس الكبيره بتاعه النظام اللى بيفترى على الناس؟ وعلى فكره أمناء الشرطه دول مغسول دماغهم وعايزيين برضه ياكلوا عيش. والنظام مفهمهم أن الأن كل من يعترض طريقهم وخصوصا الصحفيين هم من أعداء البلد وعايزين يخربوها ,ومهما نعمل مش هانعرف نغيرهم لأنهم أصبحوا آلات تنفذ من غير عقل ولا تفكير.يعنى أنا يا ما قربت منهم فى حالات مماثله وسألتهم بأبتسامه ودوده : هوا فيه يا كابتن ؟ وصدقونى كانوا بيبادلونى نفس الأبتسامه ويردوا عليا بمنتهى الذوق ,لأنهم مش مبرجمين ضدىوأنا بالنسبه لهم مش من الأعداء،وصدقونى هما كمان غلابه ومقهوريينوبيفضلوا مرميين فى عز الحر لما يبانلهم صاحب.عارفيين الرجاله اللى مديرهم فى الشغل بيقهرهم ,يقوموا يقهروا زوجاتهم وأولادهم؟ يا جماعه تعالوا نمسك فى رأس الحيه,هوا ده اللى هبغبر بصحبح.

    ردحذف
  7. غير معرف7/11/2007 1:50 م

    يا جماعه ده لسه صحفى صغنون بيفك الخط ,ده حتى ماعاهوش كارنيه ,شوف الخيبه ! عايزيين الصحفيين الكبار بتنوا ويتفردوا ويتضامنوا معاه ؟ سيبوه يدعك شويه ويعرف أن الله حق , ولا هوا أحسن من القاضى اللى أضرب بالجزم؟ معارضه لمجرد المعارضه ( زى بتوع مجلس الشعب).

    ردحذف
  8. التدوين و المدونين اثبتوا انهم الانجح في الوقوف بجوار اي شخص و مع اي موقف او قضيه لانهم كما قلت لا تحكمهم التوازنات و ليس لهم مصالح من راء التدوين فطبيعي جدا لما يتوقف الصحفي عن الكتابه تضامنا مع زميل ان لا يتوقف المدون
    المدونون الان يشبهون الهواه من نجوم الفن القدامي
    كانوا محبين لعملهم
    كانوا يهوونه لذلك كانوا ينفقون من جيوبهم علي عملهم احيانا و كان القليل يرضيهم
    الان لا تجد ذلك لان الموضوع اصبح وظيفه
    الفن اصبح وظيفه و الصحافه كذلك ايضا كانت للهواه صارت مهنه للموظفين من يومها و بعد هذا التحول انتهت القيمه الكبري لهم و التي يحظي بها المدونون الان
    انهم هواه لا موظفون

    ردحذف
  9. بصراحة أنا كنت فى الموضوع بتاع الاستاذ أحمد من أوله وحتى الآن ولا أنكر الدور العظيم للمدونات فيه ولكن الاستاذ إبراهيم عيسى الذى لا أعرفه وأنا غير معنيه بالدفاع عنه طبعا أبعد عن الموضوع طبقاً لمعلومات مؤكدة نتيجة معلومات خاطئة أمده بها الاستاذ إبراهيم منصور الذى هو مساعد رئيس التحرير وعضو مجلس نقابة الصحفيين للاسف الشديد ان عضو مجلس النقابة هو الذى تسبب لهذا الموقف من الجريدة وعموما الانتخابات قربت ويجب على كل الصحفيين الشرفاء ان يختاروا اختيارا صحيحا فى الانتخابات القادمة .

    ردحذف
  10. غير معرف6/04/2011 6:37 م

    اللى بيقول احمد بدر صحفي لسه صغير ,, مع مرور الوقت هتعرف مين احمد بدر ,, وهتعرف هو هيكون ايه في تاريخ الصحافه المصريه كلها ,, ويـاريت تفتكروا الاسم دا .. أحمد بدر

    ردحذف