Glimpses from My Instagram Gallery

2007-07-01

الإخوان المظلومون، والأقباط المرتدون، والقضاة المنتدبون... انتكاسات للعدالة

اليوم الأول من يوليو 2007 كان يوما حافلا في المحكمة الإدارية العليا بمجلس الدولة. شهدت الدائرة الأولى ثلاث قضايا ساخنة وأحداثها لم تكن أقل سخونة. القضية الأولى هي الطعن المقدم من دفاع خيرت الشاطر على قرار إلغاء حكم القضاء الإداري بإبطال قرار رئيس الجمهورية الخاص بإحالة المدنيين إلى القضاء العسكري. والقضية الثانية هي الطعن على حكم القضاء الإداري بعدم إلزام جهة الإدارة بإصدار بطاقات هوية جديدة للمسيحيين الذين تركوا المسيحية إلى الإسلام ثم عادوا إليها. والقضية الثالثة كانت الأغرب والأعجب بين القضايا الثلاث التي اختلفت في كل شيئ واتفقت في عبثيتها!! القضية الثالثة كانت طعنا مقدم (فجأة) من هيئة قضايا الدولة بعدم اختصاص محكمة القضاء الإداري بنظر طلب الإفراج الصحي المرفوعة من الدكتور أيمن نور والتي كان متوقعا أن يفصل فيها القضاء الإداري يوم الثلاثاء 3 يوليو (بعد غد!)
==========

قضية خيرت الشاطر ورد المحكمة

غريب أمر العدالة في بلادنا... زمان كان لما محامي يتجرأ ويطلب رد المحكمة (يعني يطلب تغيير القاضي عشان مش مرتاح لاستقلالية قاضي معين) كان القاضي بلا مناقضة بينسحب حفاظا على مهابته ومهابة القضاء وكرامته... النهاردة دفاع الإخوان الأستاذ ناصر الحافي كان عنده حجج ومبررات عديدة لرد هيئة المحكمة ومع ذلك لم تلتفت له هيئة المحكمة... واحتد القاضي عصام الدين عبد العزيز رئيس الجلسة جدا ورفع صوته على الحافي رافضا كل حيثيات رده للمحكمة... كان من بين مبررات دفاع الشاطربرد المحكمة أن رئيس الجلسة يعمل مستشارا لوزير السياحة وقد أقر رئيس المحكمة بالفعل بأنه مستشار لوزير لسياحة ووزير الإسكان كمان وإن كان قد نفى عمله في أي لجنة قانونية تابعة لمفيد شهاب... وكان الدفاع قد دفع أيضا بعدم جواز أن يكون القاضي اليمين
وهو مستشار لرئيس الجمهورية (خصم أصيل في القضية بصفته من قرر أساسا إحالة المدنيين إلى القضاء العسكري) ضمن من يحكمون في هذه القضية وأجابه المستشار عصام عبد العزيز بأن المستشار المذكور قد تنحى بالفعل من الجلسة السابقة ومازال متنحيا (على الرغم من بقائه على المنصة طوال الجلسة!!)

شهدت جلسة قضية إحالة الشاطر وإخوانه إلى القضاء العسكري مشادات حادة بين دفاع الشاطر ورئيس المحكمة الذي رفض حيثيات الدفاع كلها لرد هيئة المحكمة وكل شوية القاضي يقوزل للدفاع عندك جديد؟ (القاضي أصلا مصر إن عملهم هو وآخرين من بين هيئة المحكمة كمستشارين لجهات تابعة للسلطة التنفيذية لا يعد سببا يجرح استقلاليتهم وحيادهم وبالتالي مش مقتنع بإنه ينسحب من القضية)... إصرار القاضي على عدم رد المحكمة يثير شبهات واقعية من أن محاكمة الشاطر والإخوان كلها معركة سياسية وليست قانونية وهو ما كنا نود لو أن قضاءنا (المستقل) ليربأ به عن نفسه!!

ظل دفاع الإخوان يدافع باستبسال عن طلبه في رد المحكمة ويفند قانونية طلبه حتى أنه أورد حكما للدستوية العليا يحكم بعدم دستورية المادة التي تجعل من حق القاضي يقبل أو يرفض طلب الرد!! احتد القاضي جدا على محامي الإخوان وصرخ في وجهه قائلا "تذكر أن هذه الدائرة بهذا التشكيل قضت لصالحكم (يقصد للإخوان كجماعة) في قضايا أخرى وأن المحكمة لا تكيل بمكيالين وفي غمار انفعاله وإصرار محامي الإخوان على رد المحكمة وتفنيد حيثيات طلبه وأراء فقهاء القانون من شيوخ القضاء في مصر... لم يدعه القاضي يواصل وصرخ القاضي في وجه الجميع "رفعت الجلسة" .... وبعد دقائق جاء حكم المحكمة بحجز القضية لجلسة 2/ 9 للحكم وتقديم المذكرات خلال أسبوعين (طبعا ده معناه ضمنا إنه رفض طلب رد المحكمة وإنه مصر إصرار غريب على الاستمرار في القضية رغم طعن المتقاضي في صلاحيته كقاض لنظر القضية بحكم ما يعتقده المتقاض من أنه انحياز سياسي يحول دون استقلال هيئة المحكمة)
===============


قضية الأقباط "المرتدين" عن الإسلام

تنعقد الجلسة من جديد ويأتي دور قضايا المسيحيين العائدين إلى المسيحية أو المرتدين عن الإسلام بحسب أي منظور ترى منه القضية. كان من بين دفاع المسيحيين في هذه القضية المستشار نجيب جبرائيل المحامي والناشط الحقوقي ومحامي الكنيسة، والأستاذ ممدوح رمزي المحامي ونائب رئيس حزب "الدستوري"... وحضر كذلك ممدوح نخلة الناشط القبطي والقمص مرقص عزيز كاهن الكنيسة المعلقة ممثلا عن الكنيسة. كذلك حضر البعض متدخلين هجوميا مؤيدين لموقف جهة الإدارة الرافض منح هؤلاء المسيحيين العائدين إلى المسيحية بطائق شخصية تحوي البيان الجديد في خانة الديانة.

حكمت المحكمة في نهاية الجلسة بالتأجيل إلى جلسة غدا 2/ 7 لاستكمال أورق المتدخلين هجوميا.
تفاصيل القضية تجدها في أوميجا
===================


قضية أيمن نور والإفراج الصحي


نهاية شديدة السوداوية لليوم الساخن في مجلس الدولة!
طعن من هيئة قضايا الدولة بعدم اختصاص القضاء الإداري بنظر قضية الإفراج الصحي عن نور.
الطعن يأتي قبل يومين فقط من جلسة القضاء الإداري لنظر القضية وكأنه قطع طريق على قاضي القضاء الإداري للحيلولة دون استكماله لعمله الذي بدأه ومنعه من إعمال العدالة في القضية المنظورة أمامه.

الدفاع يطلب وقتا لفحص طعن الدولة والقاضي يديله فرصة 18 ساعة ويؤجل لظهر الإثنين 2/7
!!!

تفاصيل محاكمة أيمن نور وهوامش على قضيته في بوست كامل لاحقا

هناك 10 تعليقات:

  1. اناراى فى قضية المسحيين اللى دخلوا الاسلام

    ان المشلكة فى دينهم
    يعنى ميحلوش التعقيد اللى عاملة الكنيسة بعد الانفصال او الطلاق
    ويعتنقوا الأسلام على الورق وفى الاخر يرجعو يقولو ان المشكلة فى الدين الاسلامى وان المسلمين دول ناس وحشين

    الاخوة المسحيين ياريت يحلوا مشاكلهم بعيد عن الآسلام
    ويشوفوا اى يوسلة تانية
    ولا هم مش عاجبهم المسحسة كمان وعايزين دين على هواهم لكل مشاكلهم

    اما ان يرضوا بدينهم او يغيروا كاثولويك الى ارذوذكس تقريا ويبعدوا عنا بمشاكلهم
    لان محدش ضربهم على ايديهم

    وبعدين دخولهم فى الاسلام لا حينقص ولا
    حيزود عشان نتمسك بيهم
    لكن يجب احترام الدين
    والدين مش فوضى
    **************************

    موضوع ايمن نور
    حيفضلوا يبهدلوا الراجل دا
    لحد ما يموت فى السجن
    حسبى الله ونعم الوكيل فيه
    وفى كل الظالمين

    ردحذف
  2. هههههههههههههههه

    يا مسخرة انت

    انا عملت لنك لمقالك ده عندي

    ردحذف
  3. أحذرك يا أخي مينا من قرار ستصدره وزارة العدل قريبا بمنعك من دخول المحاكم المصرية

    زمان لو فيه حاجة مش عايزين يعلنوها القاضي أو المسئول المتلقح على المنصة بيسأل الأمن : طلعتوا الصحفيين ؟

    دلوقتي قبل بداية الجلسة هيقلهم :طلعتوا الحاج جرجس ؟

    ردحذف
  4. ما بقاش في كلام ممكن يتقال
    عليه العوض

    ردحذف
  5. ههههههههههه
    والله انت مراقب أوى

    ردحذف
  6. طيب أنا أعلق على إيه ولا إيه ولا إيه؟
    بس بجد، دى بقت منظومة حرق دم، ولا يمكن على رأى نوارة، إسكتشات كوميدية للترفيه عن الشعب.

    إن لم تستحى، فأفعل ما شئت فعلا.
    و مصر دلوقتى مفيهاش حد يستحى.

    ردحذف
  7. ya 3m mena hia gat 3ly kda w bas da fih 7agat al3n mn kda wala enta nset 2dit ebrahim 3isa w elli 7sal fiha walla nset mmdo7 esma3il w eltari2a elli harboh biha mn elbalad rabena ystr 3lina w 3lik w 3lihom ya 3m

    ردحذف
  8. بالنسبة لقضية الأستاذ خيرت فده شىء كان متوقع واتوقع ان الكوسة حتشتغل يوم 2 / 7
    ما عن المرتدين فأنا اتوقع ان الحكم حيكون لهم
    وده طبعا بسبب الفساد القضائى أما عن قضيةايمن نور
    فربنا معاه و يصره و يثبته
    السلام عليكم

    ردحذف
  9. الاخ/مينا
    موضوع خيرت الشاطر ولا هو شاطر ولا حاجة دة صراع بين الحكومة والاخوان على الكرسى والهى يولعوا فى بعض الاتنين اما عن المسحيين اللى اسلموا ولا المسلمين اللى اتنصروا دى مش لعبة دى حاجات خطر وبعدين لا هيزودوا المسلمين ولا هينقصوا المسحيين
    اما الاخ ايمنفهو نال جزاء سنمار حد قالة يترشح طيب هو اترشح وسابوة كمان كان عايز ينجح دة افتراء طيب اهو خد كومة من التوسيخ اللى على حق ويحمد ربنا انها جت على كدة بدل ماكان اتوزع لة سى دى زى حسام ودينا الحكاية كلها تزوير كام توكيل يعنى كام سنة ويقعد فى بيتهم وبلاش سياسة وهباب ياعم مينا فية خطوط حمرا وسودا وبرتقالى وكل الالوان واى حد بيتخطاها ياكل من تحت رجلة وعلى نفسها جنت براقش ....كدة ولااية...ممممم
    ابو النجوم

    ردحذف
  10. غير معرف5/19/2008 3:18 م

    كنا نسمع بعجائب الدنيا السبع والان قد اصبح لدينا عجب العجب فى ام الدنيا مصر وفى حكام مصر المرتدون ولا اقصد الشرفاء حشى لله ولاحول ولا قوة الابالله العالى العطيم

    بسم الله الرحمن الرحيم
    " ومن يرتدد منكم عن دينه فيمت وهو كافر
    فأؤلئك حبطت أعمالهم فى الدنيا والآخرة وأؤلئك أصحاب النار هم فيها خالدون "
    صدق الله العظيم - البقرة 217
    طيم

    ردحذف