Glimpses from My Instagram Gallery

2007-06-12

فضيحة جديدة لمفتي الجمهورية... وأد البنات مجهريا حلال!!


مفتي الجمهورية العلامة الجليل الشيخ الدكتور علي جمعة - بعد أن أفتى فتواه الشهيرة الخاصة بشرب بول الرسول وقوله الفصل بأن كل جسد الرسول طاهر وأن حتى إفرازاته وإخراجاته طاهرة - أفتى فتوى جديدة تجيز وأد البنات مجهريا عبر تقنية البي جي دي الجديدة المستخدمة في العديد من مراكز الإخصاب في مصر... ويستخدمها البعض لاختيار الجنين ذكرا و"التخلص من" الأجنة الإناث وهو ما يعتبر بالطبع وأدا للبنات وتكريسا لذكورية المجتمع العفنة.




ونعم "العلماء" فيكي يا بلد!!
ـ

هناك 24 تعليقًا:

  1. اسمح لي يا اخ مينا انت بتزيف وما بتنقلش الحقايق زي ما هي

    اللي انا فهمته من كلام الدكتور علي جمعة وهو بيتكلم في اللنك اللي انت حاطه

    ان ده مالوش علاقة بوأد البنات
    ده له علاقة باختيار نوع الجنين

    عموما انا عن نفسي لو كنت خلفت وكان عندي التقنية دي كنت اخترت اخلف بنت

    اختيار نوع الجنين زي ما علي جمعة بيقول

    بيحصل قبل التخصيب
    بمعنى

    انه بيتم فصل الكروموزمز من السائل المنوي للرجل وتحق البويضة عند المرأة بالنوع اللي هم عايزينه

    يعني ده تخصيب نوعي

    وأد البنات ده

    اللي انا فهمته
    انهم بعد التخصيب

    لما يعرفوا انها بنت

    يجهضوها

    ده موضوع تاني

    ليه كده يا مينا؟

    لازم تحافظ على مصداقيتك

    اختيار نوع الجنين ماله ومال الوأد

    ومين عايز يخلف صبيان؟

    انا ما شفتش غير اللي بيعوزوا يخلفوا بنات

    انا كان نفسي اخلف بنت

    ردحذف
  2. نوارة العزيزة

    أنا هعتبرك بتمزجي في تعليقك بين الجد والهزار فمش هعتبر إتهامك ليا بالتزييف وانعدام المصداقية على إنه جد لكن لازم يكون هزار

    بصي يا ستي عندما يتعلق الأمر بالعلم اللي بجد والعلماء اللي بجد يبقى يسكت خالص المشايخ ويتكلم الطب ويتكلم أهل العلم... ده مبدئيا

    شوفي بقى أهل العلم بيقولوا إيه ودا اللي بنيت عليه كلامي بالإضافة إلى أن حضرتك دا مجال معرفتي فمش مجرد بانقل خبر مش فاهم فيه لكن أنا فاهم إيه اللي بانقله وعلى أي أساس

    وقال رئيس اتحاد المصريين فى أوروبا د. عصام عبد الصمد، وهو أحد كبار الأطباء بمركز محمد المنقيسي للخصوبة بالعاصمة البريطانية، إن هذه التقنية تستخدم بشكل سيئ فى عدد من مراكز الاخصاب، وأنه سيتوجه بمذكرة تفصيلية الى شيخ الأزهر ونقابة الاطباء المصرية لوقف التلاعب بالأجنة.

    وقال إن هذه التقنية تستخدم فى الأصل لفحص الكروموزومات، وفحص الأمراض الوراثية لتجنبها والكشف عن أي تشوهات أو عيوب خلقية، وليس لتحديد نوع الجنين واستبعاد غير المرغوب فيه، مشيرا إلى أن بعض الأطباء في مصر يستغلون هذا المنهج العلمى لمعرفة نوع الجنين في مرحلة النطفة قبل وضعها في رحم الأم، ثم يستبعدون الكروموزوم إكس الذي يدل على أنه انثى ويبقون على الكروموزوم واي لأنه ذكر.

    في مرحلة إيه؟؟؟؟ النطفة!!! يعني الزيجوت يعني بويضة مخصبة!!!! يعني جنين مش بيفصل الكروموزم من السائل المنوي... وبالتالي هو إجهاض مبكر للإناث ودا مش كلامي لكن الدكتور عصام العريان أمين النقابة بتاعتنا بيأكد كلامي

    رفض الدكتور عصام العريان أمين عام نقابة الأطباء هذه التقنية معتبراً إياها بأنها سبيلا للإجهاض المبكر والمحرم شرعا، وأن ضبط استخدام هذه التقنية من المستحيل.

    ونرجع لكلام الدكتور عصام عبد الصمد تاني وهو بيقول ان هذا الامر مؤثم أخلاقيا ويتنافى مع معايير وأخلاقيات المهنة، معتبراً أن وأد البنات يُمارس اليوم في مصر، ولكن خلال مرحلة مبكرة جدا من حياة الجنين، أو في اليوم الثالث من الإخصاب

    حياة الغاليين عندك يا شيخ لما الموضوع يبقى ليه علاقة بالطب يبقى تصدقي الدكاترة المحترمين وتسدي ودانك عن شوية الجهلة اللي ما يفهموش في الطب والعلم اللي بجد بقرش تعريفة


    على فكرة القرضاوي وقع في نفس السقطة بتاعة جمعة... القضية يا أستاذة هي ميل مجتمعي لتفضيل الذكور هعلى الإناث وبالفعل فيه إجهاض حقيقي لأجنة في هذه التقنية وبالنسبة لي لو جنين عمر يوم واحد بيتقتل هي مازالت جريمة قتل واللي بيتقتل إنسان ذكرا كان أو أنثى

    تحياتي

    ردحذف
  3. انت عندك حق يا مينا وانا اتفق معاك فيما طرحت لو جنين عمر يوم واحد بيتقتل هي مازالت جريمة قتل


    فعلاً جريمة قتل وكمان لأنه في هذه الحالة يعد تلاعبا ومحاولة لتغيير خلق الله

    هى ديجا حامل فى بنت ولا ايه

    ردحذف
  4. فلتت منك يا مراقب دى
    ليه
    لأن اختيار نوع الجنين
    ملوش دعوة بالوأد

    ردحذف
  5. طيب بص

    انا من الجهلة دول

    ومش فاهمة

    ولا فاهمة لزومه ايه

    وفيه واحد تحت بيقول لك فلتت منك مش عارف ايه

    والدكتور اللي بيدافع عن الحكاية دي

    بيقول ده مش اجهاض

    ده حاجة تانية مش فاهماها لاننا كنت ادبي

    يعني بتفضل البويضة ملقحة زي ماهي

    ده اللي انا فهمته

    يعني بيستبعد حاجة معينة

    مش هي بتبقى اتخصبت بنت وهو موت الجنين؟

    هو بنفسه اللي بيحدد نوع الجنين

    باستبعاد ال

    x

    لو عايز ولد

    وكده

    السؤال بقى

    ينفع الواحد لو عايز بنت يستبعد ال

    y

    مجرد سؤال

    المهم ان ده معناه

    ان البويضة الملقحة واللي عمرها يوم دي

    وللا حتى نص ساعة

    مش بتموت

    دي

    زي ما فهمت

    بتتعدل

    وللا ايه يا داكتور

    وبعدين اساسا

    هو نوع الجنين بيبان بدري كده؟

    والنبي انا ما فاهمة ايه لزومه العك ده

    حتى لو عيل ح يطلع عيان وللا عنده مرض وراثي

    ربنا هو اللي عمل كده

    احنا ح نعدل على ربنا

    ما داهية يلعبوا في الجينات ويطلعوا لنا عيل

    شبه محمد صبحي في مسرحية تخاريف

    نص ست نص راجل

    المهم

    انت بتتصيد للمفتي

    ومتغاظ منه لسبب شخصي

    وحاطه في دماغك

    بدليل انك ما جبتش سيرة القرضاوي

    ردحذف
  6. مساء الخير
    انا مكنتش اتمنى انى اختلف معاك فى اول زياره لمدونتك بس مش لاقيه بجد اى علاقه للوأد بالموضوع انا مختلفه كتير مع المفتى لكن فى الموضوع ده هو أتسال عن كون التدخل فى اختيار نوع الجنين حرام ولا حلال والراجل مقالش حاجه غلط بالعكس لو كان حرم التدخل فى اختيار نوع الجنين كنت اختلفت معاه عشان العلم مادام يسرلنا شئ مينفعش يحرمهولنا المفتى دى حريه شخصيه وكمان هو مقالش يا جماعه حرام تغيرو نوع الجنين لانثى
    يعنى الى عايز انثى يختار واللى عايز ذكر هو حر واللى عايز يسيبها مفاجئه هو حر برضه وكله فى الاول والاخر بايد ربنا سبحانه وتعالى
    تحياتى والبلوج بتاعك رائع

    ردحذف
  7. تعليقي علي الموضوع ده هو اية قرانية...قال الله تعالي:" يهب لمن يشاء إناثا ويهب لمن يشاء الذكور "

    أظن بعد الاية دي المفروض مايكونش فيه جدال أساساااا

    ردحذف
  8. يعني انا شايفة ان معظم الناس مختلفة معاك في الرأي ده يا مينا

    وفيه طبيب مش بياع كرشة

    بيقول انه مش قتل اجنة
    ولكن تعديل فيها

    موجود في اللنك اللي انت حاطه

    يعني حتى الاطباء مختلفين في الرأي

    اشمعنى لما المفتي يختلف معاك تكتب العنوان السخيف اللي انت كاتبه ده

    معلش اسمح لي يعني ده رايي

    انا شايفة انه عنوان سخيف وفيه تجاوز ومش عادل

    وموقفك من المفتي غامض وملئ بالتصييد

    ردحذف
  9. من تاني أرجع وأؤكد المفتي لما أفتى في الموضوع بتاع البي جي دي قال إنه مش حرام تحديد نوع الجنين وإن الأصل في الأشياء الإباحة ومفيش نص بيحرم... حلو جدا

    مريم حسمت الموضوع أساسا بحرمانية التدخل في خلق الله وتحديد نوع الجنين لأن الله هو الذي يهب لمن يشاء - يعني بمشيئة ربنا مش بمزاجنا -الذكور ويهب لمن يشاء الإناث... وده بيضع علامات استفهام حوالين فتوى المفتي فيما يخص عدم وجود نص يحرم تحديد نوع الجنين... بس دي مش قضيتي ومش هتكلم فيها

    المفتي بيحاول يصور الموضوع على إن الكروموسومات المحددة للجنس بتتعزل من مني الرجل ويستبعد منها كروموسومات الإكس اللي بتحدد نوع الجنين أنثى ودا مش حقيقي... هو دا تزييف الحقيقة

    الاستبعاد بييجي بعد التخصيب مش قبله!!! ودا مش كلامي دا كلام عصام عبد الصمد أستاذ الخصوبة في لندن واللي أصلا فتح الموضوع أمام الرأي العام وبلغ عن فضيحة أسماها هو "وأد البنات مجهريا" وده قبل ما الأستاذ علي جمعة يدلي بدلو فتاويه في هذا الموضوع

    لما نقول إن استبعاد "النُطَف" (أي الأجنة في مراحلها المبكرة جدا) إذا كانت إكس إكس (أي أنثى) بيحصل بعد الإخصاب... لأن كلمة نطفة معناها زيجوت أو جنين بالفعل (يعني بني آدم للي مش فاهم) فده إجهاض وإجهاض انتقائي للإناث فهو وأد مجهري للبنات... وكلنا فاهمين إن المجتمع بحاله - بسبب ذكوريته - بيفضل خلفة الذكور وبالتالي حكاية إننا نسيب التحديد "لمزاج" البشر هو مصيبة وكارثة أخلاقية وإنسانية وحقوقية قبل ما يكون الموضوع حتى حلال وحرام

    الموضوع مش تصويت على هو الموضوع حلال ولا حرام، ولا أخلاقي ولا غير أخلاقي... لأنه طبيا وعلميا لا أخلاقي ومناف لآداب مهنتي التي أقسمت قسمها يوم تخرجي.... الطبيب اللي بيقول دا مش قتل أجنة ولا وأد بنات دا راجل ذو مصلحة لأنه مدير أحد المراكز المتورطة في الفضيحة

    مش قادر أفهم إزاي لسة في جدل حوالين أخلاقية الموضوع بعد ما الدكاترة المتخصصين قالوا كلمتهم وجزموا بعدم أخلاقيته والدكتور عصام العريان أمين عام نقابة الأطباء (وهو إخواني لمن لا يعلم) جزم بمخالفة الموضوع لآداب المهنة وبعدم أخلاقيته والراجل بتاع لندن هو اللي قال ده وأد بنات!!!


    بالنسبة لعلاقتي بعلي جمعة... فعلا أنا عندي مشكلة شخصية معاه وباتصيد له أخطاء لأننا اولاد ضراير... ههههههههه

    مشكلتي مع جمعة ابقوا اقروا بدايتها في البوست اللي بينتقد فتواه الجليلة بتاعة "مكرمة" تشويه الإناث جنسيا باسم "الختان" واللي دمرت جهود استمرت لعقود لمقاومة هذا السلوك الذكوري المقيت المسمى "ختان الإناث" واسمه في كل الدنيا التشويه الجنسي للأنثى ودا الفتوى فيه برضو لأهل العلم اللي جزموا بأن ختان الإناث مدمر على المستوى الجنسي لأنوثة المرأة ويسبب مشاكل لا حصر لها في الزواج... وطبعا لا يخفى على أحد إن ختان الإناث بيمارس عشان المجتمع ده ذكوري معفن وبيقهر المرأة... أما بالنسبة للدين فالرسول لم يختن بناته والسعودية الوهابية بتاعت السلفيين وأتباعهم لا تختن البنات ومسيحيا ويهوديا لا يوجد على الإطلاق ما يشير إلى فرض أو مكرمة أو أي فائدة من ختان الإناث

    علي جمعة بات رمزا - في نظري - للذكورية المقيتة والتمييز الجنسي ومن ثم لابد من مكافحة مثل هذه الأفكار وتفنيد خطأها من الناحية العلمية ثم الدينية أيضا

    بالنسبة لعنوان التدوينة... هي بالفعل فضيحة وحتى موقع مصراوي لما نشر الخبر نشره على أنها فتوى تفجر مفاجأة من العيار الثقيل... لأنها تجيز تقنية تستخدم ،أحيانا، في قتل الأجنة الاناث تحت ستار تجنب الأمراض الوراثية!!!

    يبدو أن محرر مصراوي برضو فيه حاجة شخصية بينه وبين جمعة... يمكن ولاد ضراير برضو!! وعشان كدة بيتصيد له في الماء العكر!! يا جماعة الموضوع أصلا مفتوح من قبل فتوى جمعة والجدل حواليه باي من الأسبوع اللي فات وفيه كذا حد من المدونين اتكلموا فيه

    ولا هو لما المراقب يتكلم يبقى كلامه كخة؟

    ومن تاني أرجع وأؤكد التقنية الجديدة تستخدم - في هذا السياق - لقتل الأجنة واستبعاد الجنين الأنثى وهذا قتل علني للإناث ووأد لهم وعودة لعصور الجاهلية... وممارسة مقيتة للتمييز الجنسي وتعبير ممجوج عن ذكورية المجتمع الذي بات يبرر ذكوريته بآراء المشايخ ورجال الدين

    ردحذف
  10. لأ يا مراقب
    الرجل سئل عن كون الفعل حرام أم حلال، ولم يتطرق الي "نية" بعض الناس في وأد جنين أنثوي .
    خد بالك إن علي جمعة نفسه عنده بنتين علي ما أذكر ولم يتعرضا للوأد والراجل ده دماغه أكبر من أنه يمشي تبع مجتمعنا اللي فيه ناس مش قليلين بيفضلوا الذكور علي الإناث.

    خد بالك كمان من القاعدة الفقهية بأن الأصل في الأشياء الإباحة وأن التحريم لازم يكون بنص قاطع زي الخنزير والخمر مثلا.

    في الحالة دي لو المفتي حرّم الفعل ده يبقي لازم يجيب نص يتفهم منه أن التقنية دي حرام.

    هجيبلك مثال مشهور ، لعق المرأة لعضو الرجل حرام ولا حلال؟؟
    القرضاوي نفسه لم يستطع القول بأنه حرام لأن مفيش نص، وأنا معرفش رأي الشيوخ الأكثر تشددا زي الألباني والحويني لكن لو هيقولوا حرام مش هيقدروا يجيبوا نص صريح وحتي لو وقفوا علي دماغهم لحد رمضان الجاي.

    أعتقد من الناحية الفقهية الموضوع أعقد من تناولك له يا صديقي . تعرف يا مراقب، حتي لو ده كان وأد والمفتي لم يطلع علي ممارسات الناس باردو مينفعش تقول علي رأيه ده فضيحة.

    أشكرك

    ردحذف
  11. تحديد نوع الجنين لا يجوز أن يكون حرية شخصية طبعا!!!!!!

    مصيبة سودا وتخل بالتوازن الطبيعي لو سبنا الموضوع لمزاجنا وقلنا لربنا خد أجازة إنت من موضوع "وهب من تشاء الذكور ووهب من تشاء الإناث"... مش قادر اتخيل إزاي فيه ناس متصورة إنه ينفع يكون حرية شخصية!!!
    ـ

    ردحذف
  12. يا عم مختار

    فيه حاجات أنتم أدرى فيها بشئون دنياكم ويترك الفتوى فيها لأهل العلم اللي بجد (اللي هما الأطباء وعلماء التخصيب في هذه الحالة)... نفس الفكرة في موت جذع المخ (اللي برضه المشايخ اختلفوا فيه) بالرغم إن الموضوع برضو كان واضح ومحتاج سؤال وإجابة من الأطباء وبعد كدة تقوم الفتوى على أراء الأطباء دول.. ونفس الشيء في موضوع نقل الأعضاء وكمان في ختان الإناث... كل دي أمور الطب هو اللي يقول كلمته فيها وبعدين لو عايز تحلل أو تحرم يبقى المفتي يرجع للآراء المتخصصة دي بما أن مفيش نص

    الأطباء هما أصلا اللي فتحوا الموضوع وقالوا إن ده فيه قتل أجنة... يعني مش أنا اللي فتيت لوحدي... أنا نفسي خدت بآراء علماء الطب بتوعنا... وبعدين يا أخي حتى الدكتور عصام العريان بتاع الإخوان المسلمين وممثل النقابة بتاعتنا قال إن الكلام دا قتل أجنة ليه بقى المفتي يورط نفسه في تصريح وفتوى لا محل لها من الإعراب... وبالنسبة للنص فالنص بتاع "يهب لمن يشاء إناثا ويهب لمن يشاء الذكور" خلاص ينهي الموضوع...

    الفتوى في هذا الأمر يجب أن تكون للأطباء مش لرجال الدين اللي أصلا كانوا أدبي وما يعرفوش في الطب حاجة... خلونا بقى نحترم العقل والعلم شوية الله يكرمكوا

    تقنية تحديد نوع الجنين ليست حرية شخصية ولابد عشان تتحقق من قتل أجنة ودا مش كلامي لكن كلام استشاريين في المجال وبالتالي تحليلها دينيا هو فضيحة وكلام عيب وتعدي حدود ما يُفتى فيه دينيا

    ردحذف
  13. hi
    for me i just like it to be
    ' as God made it '
    whether it was a boy or a gurl or even a diseased one ...
    here in ksa we studied that it's ok to kill the baby ONLY if it's gonna fatal-harm the mother AND before 4 months .. otherwise it's baned .. and i think that's the best thing can be done .. why u would hve duels with nature anyway ?!
    as for those who say it's not killing , and they r not for boys or girls , why then u care bout it ???!!!
    and wen he/she is a diseased one , u may use that technique to cure , not to kill ... and even if he/she lived as a disabled , well , it's ur chance to 'generate' a new helen keller .. huh ?
    after all , interfering with natural balance is corruptive , maybe the 'fashion' one day is girls , the other day is boys , and then we end up with 1:6 males:females society , or 5:16 females to males ... or a 99.9% disabled society ( as if it's not LOL ) or any disaster of that kind .....

    btw , watchman ..
    i wrote these while i was talkin with u , and i stopped messaging cause it was saying ' failed to recieve .... '
    i guess cause u r using yahoo with (unavailble status ) an i'm using WLM ...
    perhaps i'll make a yahoo account to add only u in !!
    i wanted to tell u that day , if u wanna know how powerful windows live spaces , go to
    http://d3vmax.spaces.live.com
    there u'll find everything u can do with a WLS ..
    Sry 4 being so talkative "^^
    c ya =)

    ردحذف
  14. بالنسبة لموضوع "يهب لمن يشاء الذكور ويهب لمن يشاء الإناث" أنا مش سايف والله أعلم إن الآية بتحرم حاجة.
    هو لما ربنا يقول إن الأرزاق بيده معناها إن أنا لو رحت شغلى تانى يوم يبقى أنا باتحدى إرادته بطلبى للرزق. زكذلك هو لما ربنا يقول إن البنات أو الذكور بمشيأته معناه إن أنا لو سعيت لنوع معين يبقى أنا باتحداه؟؟ لو ربنا عايز يمنعنى من إن يكون ليا بنت أو ولد ، لو عمات إيه مش هاقدر وربنا قادر على إللى ماحدش يقدر عليه.
    بالضبط زى لما ربنا يقول إن الشفاء من عنده. يبقى لما جه أول بنى آدم وقال أنا هاعالج الناس من المرض إللى ربنا ابتلاها بيه ، ده راجل تحدى ربنا؟؟؟؟
    يا جماعة بلاش إفترى على النصوص وتحميلها أكتر مما هى عليه؟
    ولو خادتوا بالكوا إن هو ده بالضبط معنى التطرف. إن الواحد يعمى عن الحق ويبدأ يلوى الكلام لصالحه.
    الآيه دى والله أعلم ليست لك أو عليك فى موضوع الحرمانية بالنسبة لهذا الموضوع

    ردحذف
  15. k_dehairy

    يا سيدي حتى لو مش حرام تحديد نوع الجنين... أنا والعلم والأطباء اللي بيفهموا بيقولوا لك إن ده بيتم من خلال قتل الأجنة الإناث في مراحل تكوينهم الأولى... ما تركز معانا أمال

    الموضوع فعلا فيه قتل وإجهاض مبكر يبقى مالوش أصلا لزوم التنظير حوالين التحريم والتحليل

    ردحذف
  16. فضيحة !!

    وأد بنات !!

    انتا ازاي تسمح لنفقسك تتكلم عن فضيلة المفتي بالطريقة دي ؟؟

    انا مهما اختلفت مع فضيلة المفتي عمري ما اتكلم عنه بالطريقة دي


    ولا لما وائل عباس اتكلم بالطريقة دي هجتو عليه

    واتهمتوه باتهامات فظيعة
    د
    وتيجي انتو تتكلمو عن المفتي بالطريقة دي

    نصيحة

    خليك في دينك
    وسيب علماء المسلمين اللي يتكلمو عن الفتاوى اللي انا كمسلم عادي مليش حق اني اتناقش فيها

    فما بالك بمسيحي

    ردحذف
  17. جميل التخريف الى انت بتخرفة دة ومش هقول اكتر من كدة

    لانة فعلا مجرد تخريف

    انت دكتور ؟؟؟؟ ممتاز دكتور اية اصلا؟

    واية علاقة دة بالود البنات؟؟؟

    انت بتتكلم على اساسا ان المهلبية اطعم بالزبيب صح؟؟


    فعلا زى ما توقعت انت متعصب وبشكل غير طبيعى ضد الاسلام

    انا شايف انك فقد مصداقيتك بالنسبالى

    وهيبقى شئ جميل لما اى مدون مسلم يبدا

    يكتب عن تخاريف الكنسية وبالشكل الى يريحة مدام حضرتك بتلعب بالافاظ بالشكل دة

    وحرية الراى طبعا بتكفلك دة يبقى برضة من حق اى حد انة ينقض اى حد واى دين صح!!!!

    ودة من حقه فى التعبير طبعا وميزعلكش طبعا

    هايل يا مينا
    برافو

    ردحذف
  18. غير معرف6/19/2007 12:50 ص

    السلام عليكم

    اول حاجه يا شباب فعلا المفتى ده ابتدى يخرف ويقول اشياء غير منطقيه يعنى هو كل يوم يطلع بفتوى تثير الجدل ولا على راى المثل خالف تعرف قال الله تعالي:" يهب لمن يشاء إناثا ويهب لمن يشاء الذكور يعنى نترك المساله لقدرة الله سبحانه وتعال وبعدين اكثر الناس يفضلون الذكور يعنى الاناث سوف تنقرض مثل الديناصورات هههههههه وبعدين من المفروض مش كل يوم يقحم نفسه فى جدل

    ردحذف
  19. علي

    آه فضيحة!! لما تفتي فيما لا تعلم ظانا أنك تعلم ويطلع إن فتواك تبيح إجهاض أجنة غير مرغوب فيها يبقى لا يوجد وصف غير كلمة فضيحة

    أيوة وأد بنات!! والتعبير ليس من عندي ولكن من العالم الطبيب عصام عبد الصمد استشاري الخصوبة بلندن وأول من أثار الموضوع إعلاميا وقد تقدم بشكوى للأزهر ضد مراكز الإخصاب المصرية التي تمارس هذه التقنية بهذا الأسلوب واصفا ما يحدث بأنه وأد للبنات وعودة للجاهلية!! وقد أكد الطبيب المحترم الدكتور عصام العريان (وهو إخواني) نفس الكلام ووصف الممارسة تلك على أنها مخالفة لأخلاقيات مهنتنا وهو يتحدث هنا بصفته طبيب أولا ومسلم ثانيا وإخواني ثالثا ونقابي رابعا!!

    وائل عباس ماله ومين اللي هاجوا عليه؟ مش فاهم الحتة دي؟ ماله وائل ومين إحنا اللي اتهمناه باتهامات فظيعة؟ وائل من أعز أصدقائي ومش فاكر إني هجت عليه قبل كدة وأكيد عمري ما اتهمته باتهامات فظيعة أو غير فظيعة... إنت بتتكلم في إيه أساسا؟؟؟

    مين احنا اللي بنتكلم ع المفتي وإيه الطريقة دي؟ المفتي أخطأ خطأ جسيما وأفتى فيما لا يعلم ووجب تصحيح خطأه من المتخصصين الذين أوردت أراءهم وده ينهي الكلام

    نصيحتك خليها لنفسك يا سيدي

    وإباحة إجهاض الإناث لن أسمح بها ما حييت والموضوع هنا بيتعدى حدود واحد بيفتي في الدين!!! دا بيشرع جريمة وبيسمح بكارثة تهدد التوازن الطبيعي!!! يبقى كل عاقل لازم يتصدى للعبث ده!!

    علماء المسلمين لما يتكلموا في ما يخص المسلمين من فروض وصلاة وصوم وزكاة وحج وما إلى ذلك فإن هذا لا يخصني... لكن لما حد منهم يتناقش فيما يخص مجتمعي ووطني يبقى من حقي أتناقش وأجادل واعترض وأرفض وأدين وأستنكر وده حقي الدستوري والقانوني ولن أسمح لك ولا لأي ظلامي أن يمنعني من ممارسة حقوقي الدستورية والقانونية

    لو إنت مؤمن بقاعدة "لا تناقش ولا تجادل يا أخ علي" فدا براحتك... أنا بقى هناقش وهجادل وكله بالتي هي أحسن... ولو جدع امسك عليا غلطة

    نهارك أبيض
    ========================


    الأخ غزالي

    أنا لا أخرف ولا أتحدث فيما لا أعلم كما يفعل جمعة... جمعة ما بيفهمش في الطب زي ما انا ما بافهمش في فقه التصوف . وهو لا يعلم الفرق بين استبعاد الجينات قبل الإخصاب واستبعادها بين الإخصاب كما أنني لا أعلم مثلا الفرق بين الصوفية والمعتزلة مثلا!! وهي الحياة كدة... تخصصات!! أنا في علم الحديث عندي معلومات قشرية جدا بما يجعلني جاهلا به ولا أدعي أني ضليع بعلم الحديث وبالمثل جمعة جاهل بالطب وبعلوم الخصوبة ولا فترض به أن يفتي في هذا المجال... وإذا كان يقول إن "افتوى صنعته" فأنا بقى يا سيدي الطب ده صنعتي ودراستي وأكل عيشي... فيا ريت يبعد عن شغلنا عشان كدة عيب... ولما يستفتوه في حاجة تخصنا يبقى ييجي يسألنا واحنا نفهمه

    بالنسبة لسؤالك إذا كنت أنا دكتور... أيوة يا سيدي أنا طبيب خريج سنة ألفين وبادرس ماجستير نسا وتوليد سعادتك... ويا ريت قبل ما تاخدك الجلالة وتعلق تبقى تقرا كويس وتعرف - من اللنكات اللي أنا حاططها - إن تعبير وأد البنات ما كانش من اختراعي وإنما ورد على لسان الدكتور عصام عبد الصمد والتصريح ناقلاه عنه العربية نت ونفس الكلام أكته نقابة الأطباء وكبار الأطباء اللي فاهمين

    اتهامك لي بالتعصب يفتقر إلى الدليل والحجة والبرهان... ولنفترض أني متعصب وحاقد وكل هذه القائمة الجاهزة... برضو هذا لا يمنع إن جمعة غلطان وغلطان وغلطان!!! ولابد أن يعتذر عن فتواه هذه قبل ما تتحول لواقع مرعب ونلاقي المجتمع اختل توازنه وبقى يمارس وأد البنات المجهري عادي خالص وكأنه بيشرب بيبس... الموضوع مش حرية شخصية إنك تحدد نوع الجنين وإلا يبقى حرية شخصية كمان إنك تختار صفاته من كتالوج الجينوم البشري مفكوك الشفرة وتختار لون عينيه وعاوزه مقاس كام وإذا كنت عاوز مواصفات خاصة للقلب وتحب نخلي عمره الافتراضي أد إيه وحجم أعضاؤه أد إيه وهكذا!!! الأهم من كل ده إن الاستبعاد الجيني بيحصل بعد التخصيب يعني بتستبعد أجنة مش بتستبعد جينات من المني زي ما هو فهم خطأ... أنا لا أدعي على جمعة بتعمد إباحة الإجهاض والقتل لا سمح الله لكنني أتهمه بالجهل بالأساس وهذا الجهل هو ما ورطه في إباحة قتل الإناث وهن أجنة

    إيه علاقة فتوى لمفتي الجمهورية تبيح قتل الأجنة الإناث بما تدعي أنه تخاريف الكنيسة؟؟؟ فين العلاقة أساسا؟؟ تصدق بإيه يا شيخ... واضح "تماما" لأي عيل صغير أد إيه أنا فعلا متعصب!!! هههههههههههه

    خد بقى عندك الصدمة دي
    لما الكنيسة بتخرف فعلا فيما يخص الشأن الوطني أنا أول واحد بانتقد تخاريفها وتاريخي يشهد لي!! بل وأول من يدعو المسلم لانتقاد أي تخاريف للكنيسة تخص الشأن الوطني أو المجتمعي!! دا مش بس حق لكل مواطن لكن ده واجب!! وده مالوش علاقة خالص بالطعن في الأديان... يعني لما الكنيسة بتكرس عزلة المواطنين الأقباط يبقى لازم تنتقد من الكل... ولما الكنيسة تنوب عن الأقباط في تأييد - غير شرعي - للنظام يبق لازم تنتقد من الكل... ولما الكنيسة تقرر نيابة عن الأقباط أن تعارض النظام يبقى لازم تنتقد ولما أسقف أحمق يقال عنه أنه بيعلم إن نقل الدم من المسيحي للمسلم خطأ عشان دم المسيحيين طاهر يبقى المفروض يترد عليه ويوجه إليه اللوم والنقد... وهكذا!!

    بالنسبة لنقد الأديان بقى دا موضوع مختلف تماما عن نقد المؤسسات الدينية ولكنه يبقى بالفعل حقا من حقوق التعبير!!! وأنا بالفعل دافعت عن حق ذلك المتطرف الموتور (ولا أقول الحقير كما قلت أنت عن مثيله المسيحي) أبو إسلام عبد الله الذي يهاجم المسيحية ويزدري بها ويحض على كراهية المسيحيين... دافعت عن حقه في التعبير وعن حريته عندما اعتقل على خلفية أفكاره وتعاليمه المتطرفة الخرائية تلك... الأفكار - مهما كانت حدتها وحماقتها - ينبغي أن يُرد عليها بالأفكار فقط!!! الرد بالمسدس أو بالسجن هو رجعية وجاهلية غير مقبولة على الإطلاق

    من حق أي متطرف أن يمارس حرية التعبير حتى لو تعبيره زعلني!! من حقه ومن حريته ومن حقي كمان أرد عليه وعلى أفكاره أما السجن والقتل فسلاح الجهلة والبلطجية ومروجي الإرهاب الحقير

    فهمت حاجة؟
    =======================


    مجهول

    الله ينور عليك

    ردحذف
  20. مينا عزيزى المتعصب هالو

    راجعلك تانى بس انا فى الشغل اصبر بس

    ردحذف
  21. مع تحفظي الشديد على تحديد نوع الجنين , لأن عملي عرفني كويس جدا اننا لو نظريا سمحنا به فسنقضي تماما على أي توازن بين عدد الجنسين خلال بضع عقود
    مجتمعنا لو خير فلن ينجب أغلب أفراده بنات نهائيا

    لكن عايزة أفهم هو أصلا مش كل النطف المخصبة بيتم استخدامها , يعني كدا كدا فيه عملية انتقاء , و لو اعتبرنا هذا نوع من القتل فهو لا يختلف اذا كان عشوائيا أو كان للاناث فقط

    ايه الفرق بين استبعاد نطفة عشوائيا أو استبعادها لأنها اكس اكس , أو لأنها داون ؟؟؟ لو احداهما تعتبر قتل فكلهم قتل


    أرفض اختيار نوع الجنين , لكنه ليس قتلا

    ردحذف
  22. دكتورة بلو روز

    لاحظي عنوان التدوينة أساسا... الحديث تحديدا فيها عن "وأد البنات مجهريا" مش عن قتل بالأساس!! لو انتي عايزة رأيي الشخصي في موضوع استبعاد النطف المخصبة فرأيي إن ده فعلا قتل أجنة أو إجهاض بالمعنى الطبي... في الطب درسنا إن فيه حاجة اسمها إجهاض لدواعي طبية... ربما يرى البعض أن استبعاد النطف غير الصالحة للتخصيب هو من هذا النوع من الإجهاض الطبي أو لا يعتبرونه إجهاضا بالأساس وإنما في تلك الحالة يرونه استبعادا لما هو غير صالح من النطف وتثبيت إحداها فقط والموضوع طلعا زي ما انتي فاهمة معقد في حيثياته... قضيتنا هنا في تقنية البي جي دي هي تمكين الناس في المجتمع من استبعاد النطف على أساس الجنس تحديدا ودا رأى فيه الدكتور عصام عبد المنعم استشاري التخصيب بلندن مش بس إخلال بالتوازن الطبيعي لكن وأدا للبنات وجري بشكواه ع الأزهر ودكتور عصام العريان قال إن الممارسة دي منافية لآداب المهنة وأنا أتفق مع العصامين في طرحهما ففي اعتقادي التلات حاجات موجودين في الموضوع ده ففيه بالفعل إخلال بالتوازن الطبيعي بين الجنسين، وفيه وأد متعمد للبنات (وإن كان وأدا مجهريا ولا تسأليني عن الروح قل الروح من أمر ربي)، وفيه أيضا مخالفة لآداب مهنتنا... وبالتالي كان عيب أوي إن جمعة يفتي فتواه المهببة دي اللي ف رأيي ذكورية للغاية وعدائية ضد المرأة وضد قيم كتير إنسانية سوية... دا ارتداد إلى الدارونية القبيحة

    التطور الطبيعي جدا للتقنية دي واللي مش هيوقفه حاجة غير شوية الناس اللي لسة عندها ضمير إنشاني سوي هو فكرة الكاتالوج الجيني... وتخشي على عيادة الجينات تختاري جينات ابنك اللي عايزة "تفصليه" وطبعا هيبقى البقاء للأصلح والأقوى في ظل هذه المنظومة اللي بعد فك شفرة الجينوم غير مستحيلة بل واقعية جدا وقريبة جدا من التطبيق العملي

    تحياتي

    ردحذف
  23. مينا
    أنا مش دكتور ولا واضح أنى من سنك و بعيد عن الحماسة إن كنت ترى هذا الأمر بهذاالمنظور فعلا دون تطاول أو تعصب أو تزوير لما لم يتم الأتصال بفضيلة الشيخ على أى برنامج ومناقشتة علنا و لما لم يطلب ذلك نقيب الأطباء ولما لم يقم العلماء فى المجال بمحاولة المناظرة
    يا مينا
    جل من لا يخطئ فقد تكون أنت مخطئ وقد يكون هو وقد يكون سأل عن الأمر فأعطاه من أعطاه بيانات طبية خاطئة بناء عليها أفتى (كلام معقول يامينا ووارد يكون الحقيقة ولا أيه ) ويا مينا إن كان لك فى الدنيا عقيدة عدم الإبعاد وعدم الحبس ,عدم المصادرة ,غيرة وترى النقاش والرأى و الرأى الأخر منهجا لحياتك دون تطرف
    فيا أستاذ مينا من الأبدى أيضا عدم التشهير فهذا أيضا قهرا وقهر غير بسيط وخصوصا أنه يتم هنا فى الخفاء عن صاحب حق الرد .
    و يا مينا أنا مسلم وأنت مسيحى ولكن لأنك لا تقاتلنى فى دينى ولا تحاول إخراجى من أرضى وبيتى فلا ينهانى الله أن أقسط إليك وأن أبرك ,بل ومن باب فضائل الأسلام زيارتك عند المرض والسؤال عنك وتعزيتك فى كربك وإنقاذك من الهلاك . فيا أخى مينا لا تفسد هذا وتستعدى بعض إناس لهم طابع الحساسية والرهف على دينهم وشيخهم وتستخدم لغة صارخه وراعى دائما أننا نحب بعضنا ولكننا لسنا على دين واحد فقد يتأذى من هو يملك حساسة .
    وأخيرا إن كنت أقتنعت أعمل إجراء وغير العنوان مثلا وحأكون شاكر وحأتابعك. وإن كان لسه الكلام بغضب وعنف ,دون فعل شئ على أرض الواقع فسأذهب ولن أحاول إيذائك ولو بكلمةولك دينك ولى دين .
    وفى كلتا الحالتين أنا حأكمل وحأسأل عن الموضوع وأتقصى وسأكلم المفتى هاتفيا أو سأرسل له فاكس على دار الأفتاء إن لزم الأمر .

    ردحذف
  24. العزيز مصطفى

    أشكرك على رأيك وتعليقك
    بالنسة للقضية المطروحة والفتوى محل النقاش... دا كان كلام طرحه المفتي من فترة

    ولا أجد في اقتباس تصريحات فضيلة المفتي ووضع الروابط الخاصة بالموضوع أي تشهير

    اضغط على الروابط واقرأ ما أشرت إليه في التدوينة هنا

    أنا في النهاية مش بصادر على رأي حد لكن باحلل واشرح وانقد هذا الرأي وبالفعل السماح باستخدام تقنية مثل هذه لتحديد نوع الجنين في كجتمع ذكوري يفضل البنين على البنات سيؤدي إلى إخلال في التركيب البيولوجي للمجتمع وكأنه وأد بنات حديث

    أنا لا أعرف جمعة بشكل شخصي ولا أهاجمه بشكل شخصي... أنا أعرف الرجل فقط من خلال تصريحاته وفتاواه وهي ما أنقده هنا

    وصف فتوى المفتي بإجازة التقنية المذكورة بعد فتواه بشرب بول الرسول هي بالفعل تندرج تحت بند الفضيحة ولا يوجد تجني هنا بهذا الوصف الوارد بالعنوان

    لا يوجد أحد فوق النقد يا أستاذ مصطفى
    وفي نقدي لم أسب الرجل ولم أشهر به إطلاقا

    تحياتي وشكرا

    ردحذف