Glimpses from My Instagram Gallery

2007-06-15

غزوة "أم المتقين" المباركة ضد عباد الصليب الكفار


يوم الثلاثاء الماضي حدثت اعتداءات جديدة من المسلمين على المسيحيين في مصر.
خرج المصلون المسلمون بعد صلاة العشاء مساء الثلاثاء من مسجد أم المتقين بالدخيلة ليهاجموا ويحطموا كنيسة العذراء "أم النور" بالدخيلة بالأسكندرية.


من أرشبف غزوة محرم بك المباركة

أصل الحكاية... عيل مسيحي اتخانق مع ابن شيخ الجامع... عادي بتحصل في أحسن العائلات... الشيخ عبد الدايم بقى اللي هو إمام الجامع ما سكتش!! الشيخ ربنا يكرمه راح مولع الليلة وسخن المسلمين "المصلين" على المسيحيين الكفار عباد الصليب اللي ضربوا ابنه. وبناء عليه خرج وفد "مسلم" لعتاب العيل المسيحي اللي ضرب ابن الشيخ فالرواد وابوه غالبا طلعوا قللات الأدب... بس!!! يبقى لازم الكفار عباد الصليب يتأدبوا!!! ويطلع - يا مؤمن - سبعين مسلم في غزوة مباركة ضد أقباط المنطقة وتحديدا ضد الكنيسة (طب إيه علاقة الكنيسة بخناقة بين اتنين عيال عايزين ضرب الجزم) وهات يا تكسير في الكنيسة وضرب في المسيحيين... وطبعا المفروض المسيحيين ما يردوش ولما يردوا يقول لك بس... مش اعتداءات من المسلمين ولا حاجة... دي مواجهات من الجانبين وبالتالي فيه معتقلين من الجانبين وفيه متهمين قدام النيابة من الجانبين وبالتالي يضطر المسيحيون للتنازل عن المحاضر وعن حقوقهم في مقابل الإفراج عن معتقليهم.


نهاره أبيض وليلتنا رز بلبن ومعدل حدوث حوادث اعتداءات المسلمين على المسيحيين (سيبكوا من تسميتها فتنة طائفية والهبل ده... اسمها اعتداءات من المسلمين على المسيحيين لو عايزين تواجهوا الحقايق ونشتغل صح) معدل حدوث الاعتداءات زاد أوي وده معناه إن الحرب الأهلية مش بعيدة خالص. فوقوا بقى الله يكرمكوا قبل ما نروح في ستين داهية... إلا الإخوان المسلمين فين يا جماعة؟؟؟ ويا ريت محدش يقول لي إنهم منهكين من القمع البوليسي ومش فاضيين للشأن الوطني!!

الدولة غائبة أو بتولع الأزمة
والكنيسة ميتة أساسا وقاعدة تلعب سياسة
والإخوان والتيارات المعتدلة سلبية إن لم تكن متواطئة

يبقى سيبك يا شعب من نخبك العفنة دي كلها وقوم فوق لنفسك قبل ما الكلاب ينهشوا لحمك!!
ـ

هناك 21 تعليقًا:

  1. تقدر تقوللي مين اللي مسؤول عن تربية شعب؟
    متقوليش المؤسسات المدنية، لأنها طرح من الشعب مش العكس، و متقوليش المؤسسات الدينية، لأن مبقاش فيه مؤسسات دينية بالمعنى الحقيقي للكلمة، بعد تسييس الأزهر و الكنيسة بقت المؤسسات الدينية عبارة عن مكان لتعاطي التعاليم الدينية من غير ربط التعاليم دي بالحياة العملية و بالشارع الوطني و بناء الوطن

    الفاصل يا سيدي الفاضل بين العلمانية الحقة و العلوقية السياسية خط رفيع جدا، و احنا للاسف لا حصلنا بلد علماني و لا بلد ديني فبقينا بلد فكاهي

    و على فكرة لو مشيت ورى بداية ظهور البرازرات -الاخوان يعني- هتلاقيهم بدأو يظهروا بعد تسييس الازهر، لما شريحة اضطرت تخلق لنفسها البديل الديني الغير متاح

    بيعجبني تحليلك للأزمة الطائفية يا مينا

    بتفكرني بالملك مينا....مبستف القطرين

    :)

    ردحذف
  2. غير معرف6/15/2007 6:09 م

    مرحبا بعصور الاستشهاد!!

    وسلملي على المستقبل الزاهر للوطن. بالحق مين زاهر ده؟

    ردحذف
  3. اعتقد ان النخبه كلها في حاجه الي عدم اعتراف بكونهم نخبه لانهم للاسف غارقين حتي الانوف في الفساد و في التحريض احيانا علي المواجهات بين ابناء الوطن الواحد و لا اعتقد ان كلمةنخبه تستحق ان تطلق الا علي الصادقين و من يملكون حلولا لاشد مشاكلنا استعجالا و استعصاءا علي الحل كمشكلة المواجهات المستمره بين العقائد علي ارض الوطن
    كان في مصر القديمه اكثر من 4000 دين و الان دينين فقط و لم نسمع عن مواجهات بين المصريين قديما فلماذا نتقاتل الان؟
    اعتقد ان النخبه زمان كانت نخبه حقيقيه

    ردحذف
  4. أبناء مصر

    بنحب, هنقدر, هنغير

    http://abna2masr.blogspot.com/

    ردحذف
  5. لي عودة لمناقشة هذا المقال القيم

    تحياتي

    ردحذف
  6. الصراحة انت و زنزانة دايما مفرفشني اهرب من عندها اجيلك انشكح بزيادة
    الف مبروك علينا الفتنة الطائفية و انتهاكات حقوق الانسان يا الف نهار ابيض يا الف نهار مطين
    و المسحيين يخلوا ابنهم يلعب مع ابن شيخ الجامع ليه مش عارفين انه جزمة قديمة و مقدس ؟؟
    ايه النصايب دي يا خواتي
    انا بقول نمنع لعب الاتفال في الشوارع و بالذات الفصل فيما بينهم اذا كانوا من ديانات مختلفة و بالنسبة للعيلين دول نصلبهم هما الاتنين او نشنقهم على باب زويلة عشان الباقي يتعظ
    ايه المصيبة دي عيلين يتخانقوا مع بعض يقوم 70 شخص يهجموا عشان يخدوا يتار الولد الحمار ابن شيخ الجامع؟؟
    لما احنا عندنا نخوة كده مش بنطلع على غزة ليه و نهجم عليها و نحرر فلسطييييز؟؟

    و عجبي

    ردحذف
  7. يا مينا...زي ما نوارة..عايزاك تمد ايدك و تغرس نفسك غصب عن عين المسلمين في البلد...لازم احنا كمان نغرس نفسنا في زبالة التخلف دي...يعني بصراحة..الي بيحصل ده..مسؤول عنه كل مسلم شايف ان مشاكل المسيحيين ما تهموش..وما توجعوش...انا زهقت من القرف ده...ذنب كل مسيحي من دول في رقابتنا..انا عارفة اني بكتب في المكان الغلط..لكن انا بقولك الحل ان عقلاء المسلمين..يلموا بعض..يعملوا جمعية ضد التمييز...و ياخدوا بعض زي الشطار كده...و يروحوا لأماكن الصراع..يبنوا بأيدهم الي وقع من الكنيسة...و يعالجوا بإيدهم..الجرح الي حصل..ويهاجموا بصوتهم المتخلفين الي عملوا كده..ويعملوا بانرز اونلاين..ضد التمييز الديني ده...و ينشروا منشورات..باحاديث الرسول الي بترفض التمييز...و حقوق اهل الذمة...لحد ما المسلمين يفوقوا من التخلف ده...انا اول واحدة عايزة اعمل كده..لو بدأتوا الدعوة دي...هكون اول واحدة في الصف..جايز نطيب الجرح شوية

    ردحذف
  8. أزال المؤلف هذا التعليق.

    ردحذف
  9. زياد باشا

    إيه حكاية تربية شعب دي يا أستاذ... إحنا في فصل هنا؟ إحنا شعب يفتخر بأنه مش متربي يا باشا... إوعى وشك

    حلوة أوي جملتك اللي بتقول

    الفاصل يا سيدي الفاضل بين العلمانية الحقة و العلوقية السياسية خط رفيع جدا، و احنا للاسف لا حصلنا بلد علماني و لا بلد ديني فبقينا بلد فكاهي

    ضحكت من كل قلبي حتى استلقيت على قفايا من هذه الجملة

    إيه ده هو البراذرات طلعوا بعد تسييس الأزهر؟ مع إن على حد علمي الشيخ طنطاوي ما كانش عايش وقتها

    مسخرة يا عم زياد كل ما نحيا فيه وربنا يستر ويعديها على خير... الانفجار غالبا جاي جاي وكلنا هنتضر من الهطل ده
    ===================


    مجهول

    يا خوفي إن فعلا عصور الاستشهاد ترجع من تاني... والمصيبة إن ساعتها كل طرف هتلاقيه بيدعي إن ضحاياه شهداء عند ربهم يحتسبون في الوقت اللي الوطن فيه هيكون الشهيد الحقيقي

    بالنسبة لزاهر هل تقصد سمير زاهر بتاع اتوحاد الكورة؟
    ===========================


    ذو النون العزيز

    فاكر جملة هاني رمزي في مسرحية تخاريف... عمر الناس ما كانت مبسوطة... الناس عمرها ما كانت مبسوطة... مبسوطة الناس عمرها ما كانت... هكذا النخبة... عمر النخبة ما كانت نخبة بجد... بجد عمر النخبة ما كانت نخبة... نخبة ما كانت النخبة عمرها بجد

    طول الوقت كان عندنا شوية حنجورية وشوية مرتزقة ومعندناش حد بجد رجل دولة... ودا في تاريخنا كله... عارف يعني إيه رجل دولة؟ يعني شخص تتجسد فيه آمال وأحلام وطموحات أمة بأكملها ولديه صوت يعبر به عن هذه الأحلام والآمال والطموحات

    وانا بادرس التعريف ده في خضم تحضيري لمحاضرة عن تنمية الأمة أحبطت جدا وانا بادور على واحد في تاريخك يا مصر ينفع يتقال عليه رجل دولة... ما لقيتش!!! إوعى تقول لي عبد الناصر بتاع الوعي الزائف ولا السادات بتاع اللي تكسب به العب به ولا حتى محمد علي الألباني ولا حتى اسماعيل باشا بتاع السخرة... غني عن القول إن سعد زغلول لم يكن هكذا ولا مصطفى كامل... غالبا فعل رجل الدولة الوحيد اللي عدى على تاريخ بلادنا هو مينا على رأي زياد مستف القطرين

    تحياتي
    ========================



    مريم السكرة

    أبناء مصر؟ طيب!!
    ========================


    صاحب البوابة

    مستنيك يا باشا بس اوعى تتأخر
    تحياتي
    =========================



    حفصوصة العزيزة

    يا ستي هو انا وزنزانة لينا أغلى منك؟ يعني إحنا دايما نحب نفرفشك وننعنشك وما نحمكيش من حاجة... عايزة فتنة طائفية هتلاقي... تعذيب هتلاقي... محاكمات مهببة تلاقي... يعني الحقيقة مصر مش حارمانا من حاجة وهتفضل طول عمرها ولادة... واذا كانت هي ولادة فده تخصصي

    هههههههههههه

    بالنسبة لابن الشيخ وابن المسيحيين... معلش يا ستي غلطة ومش هتتكرر وآدي المسيحيين أدبناهم عشان ما يعملوش كدة تاني وما يخرجوش برة حارة النصارى أو الجيتو بتاعهم

    علم ونفذ يا فندم
    ==========================


    سكوت هنصوت العزيزة

    أعتقد فيه مبادرة بيتم الإعداد ليها من فترة هتظهر للنور قريب شديدة العمق والتركيز وف نفس الوقت شاملة كل الأبعاد اللي نفسك فيها

    ليه حذفتي التعليق التاني؟؟ أنا شفته أول ما نزل وكان هايل بسبب شحنة الغضب اللي فيه... لو مش عندك نسخة منه قولي لي وأنزله من الميل عندي

    ردحذف
  10. اذا كان علماء الأزهر اللى المفروض يكونوا قدوة لغيرهم مشغولين بفتاوى أرضاع الكبير، والتبرك ببول الرسول، منتظر ايه من امام مسجد غير كده
    للأسف فى ناس فى مصر بتعتبر المسيحيين كفرة والكلام ده بيتقال فى المساجد ،وتلاقى اللى يقوللك أنصر أخيك المسلم ظالما أو مظلوما
    وأنا الحقيقة معرفش جابوا منين المقولة دى

    ردحذف
  11. حذفته عشان مش موثق

    مش عايزة ابقى حنجورية زي الباقيين...قررت اجيب نص الحادثة التاريخي ... من كتب السيرة..عشان اسد بيها بق اي واحد تسولة انه يتكلم عن المسيحين بشكل غير لائق...منغير ما يتهمني بسوء النقل ... و لقيت ان الوقت مش هيسعفني اني اعمل ده دلوقتي...ليس الا..انا فعلا قرفانة من الهبل الي بيحصل..ونفسي اكون اول من يضرب ابن الاكرمين...بس مستنية الفرصة..وحياة ابوك ان كان عايش..ورحمته ان كان ميت..تقولي لما يطلع النشاط ده
    تحياتي

    ردحذف
  12. همممممممممممممممممم

    الى بيحصل دة عبارة عن هبل بجد

    الشعب الموضوع باتلنسبالهم مبقاش فهم للدين اصلا ...بقى تعصب وحقد وغل اعمى

    على فكرة الجنب الثانى الى هوا المسحيين

    مش ملايكة يا مراقب برضة لا عفوا يعنى

    فيهم كثير متعصبين بشكل غبى اوى يعنى

    وشايفين اننا ولاد ستين......

    بس الى المفروض يتحاسب هنا مش المسلمين الى عملو كدة بس ولا شيخ الجامع

    ولا الازهر ولا الكنيسة النظام كلة بجد

    المشكلة ان كل جمب من امتعصبين بالذات بيروج اشعات هايلة عن الجمب الثانى

    الى الحد الى ممكن يتشال فيها من مخك انهم بشر اصلا
    وتفتكر انهم شياطين وبيعملو كدة لا مؤخذة استغماية فى كلمة عجبتنى بقى بجد

    (طب إيه علاقة الكنيسة بخناقة بين اتنين عيال عايزين ضرب الجزم)

    صح بس مش عارف حاسس فى القصة خيط ناقص

    عامة هاعرف اكثر وابلغك بس فى حاجة غلط كدة

    وانا برضة مش شايف انها اعتدائات من المسلمين على المسيحين

    والا يا يبقى انا مش مسلمي يا انت مش مسيحى
    هيا بيتيجى كدة ابدا بمبدا التعميم

    وهوا خاطئ اصلا وزى ما قولتلك فى خيط ناقص

    والاخوان فى اسكندرية بالذات يا مراقب بك مرمين فى المعتقلات حضرتك من فترة

    المشكلة بقى فى ان كل جنب من الجنبيب هايخد الدين ستار وهاتبقى مدبحة

    ومحدش هايستفيد منها خالص

    اسف على التطويل تحياتى

    ردحذف
  13. شبابيك عربية

    بص على تعليق "علي" مثلا في موضوع المفتي وإباحته لتقنية تسمح بوأد البنات وهتكتشف مدى الانحدار الفكري والتطرف اللي وصلنا إليه

    أما بالنسبة للمقولة اللي بتقول عليها فدي مش مقولة سيادتك دا حديث شريف ومش معناه زي ما بيقصدوا خالص... لأن كمالة الحديث بتقول وكيف أنصره ظالما يا رسول الله فقال: بأن تنهاه عن ظلمه!!

    شفت إن المشكلة مش في النص أو المقولة وإنما في طريقة فهمها وطريقة عرضها؟؟

    =======================


    سكوت هنصوت

    قصة اضرب ابن الأكرمين أعتقد إنها موثقة وقد سمعتها من مصادر عديدة وإن كنت لم أقرأها موثقة
    ========================



    العزيز الغزالي

    لأ يا سيدي المسيحيين مش ملايكة ولأ مش بعضهم متعصبين... كلهم متعصبين وكل المسلمين متعصبين... حلو الكلام؟؟

    مش دي القضية... ما الأهلاوية متعصبين للأهلي والزملكاوية متعصبين للزمالك... وعادي الحياة ماشية

    تعصب المسيحيين آره إيه؟؟
    حرية تعبير على الإنترنت لبعض متطرفيهم في غرف البال توك؟؟ وأراء متطرفة بتسخر من الإسلام على فضائية خارج مصر؟؟ كلام طبعا عيب ومش كويس... بس حرية تعبير ويترد عليها بالفكر وبالكلام وحتى بالشتيمة

    تعصب المسلمين بقى آخره إيه؟
    لأ مالوش آخر ولا له حدود!!!
    دا لا علاقة له بالإسلام الصحيح طبعا
    بس دا واقع حال المسلمين بكل أسف
    تعصب المسلمين ترجمته تتجاوز حدود حرية التعبير والكتب التي تسب المسيحيين وتسخر من ديانتهم على الرصيف وتتجاوز خطاب الشتيمة والتكفير والسخرية من منابر الجوامع في خطب الجمعة ويتجاوز المضايقات التي باتت عادية ضد المسيحيين في أعمالهم ويتجاوز التمييز من الدولة ومن القطاع الخاص في توظيف المسيحيين في أماكن معينة... ويتجاوز تعصب المسلمين حدود الكراهية... تعصب المسلمين فيه حرق بيوت ونهب ممتلكات وتحطيم كنائس وقتل!!! نعم قتل واعتداءات على نساء ورجال دين وعلى ناس مسالمة!!

    لو حضرتك متصور إني بتكلم عن خيال علمي وإن مفيش حاجة من دي بتحصل يبقى يا ريت ما تتكلمش عني تاني في الموضوع ده واتكلم في أي مواضيع تانية ينفع ناخد وندي فيها

    لو شايف إن مفيش حوادث قتل من مسلمين ذد مسيحيين فقط لأنهم مسيحيين يبقى حضرتك عندك مشكلة ولو شايف إن مفيش حوادث اعتداءات على مسيحيين من ملسمين وحرق بيوت ونهب ممتلكات لو شايف إن دا محصلش وما بيحصلش يبقى عندك مشكلة

    لو شايف إن المسيحيين هما كان "بدأوا" يوما بقتل مسلم لأنه مسلم أو حطموا مسجدا أو حرقوا بيوت مسلمين أو اعتدوا على نساء المسلمين أو نهبوا ممتلكات المسلمين بصورة جماعية فيا ريت تفكرني حصل إمتى ده عشان نساوي فعلا في إلقاء اللوم بالتساوي على الطرفين

    يا عزيزي فيه واقع مهبب إن فيه مناخ طائفي محتقن في مصر وفيه مناخ من الكراهية بين المسلمين والمسيحيين وفيه مناخ من التعصب

    بس كل دا كوم وواقع الاعتداءات من المسلمين على المسيحيين كوم تاني... أن تكره أحدا ليست جريمة ولكن أن تقتله فهذه جناية!!! أن تحتقر إنسانا ودينه في قلبك ليست جريمة يعاقب عليها القانون أما أن تحطم دار عبادته فهي عملية إرهابية!!!

    المعتدون المسلمون في حوادث العنف الطائفي هم مجرمون وإرهابيون وأحد أهم حلول المشكلة هي معاقبتهم بالقانون!!! وليس الصلح بالعرف!!!

    فاهمني؟؟

    القانون!!

    المخطئ يعاقب والمجرم يسجن والقاتل يعدم والإرهابي يحاكم!!

    فهمت الفولة يا سيدي؟؟

    إيه بقى حكاية نحاسب النظام دي؟؟
    النظام فاسد ومتواطئ وفيه العبر... بس لما خمسميت مسلم يحرقوا بيوت وينهبوا ممتلكات ويعتدوا على بشر مسالمين دا علاقته إيه بإنك تحاسب النظام... فيه جريمة!!!! ولابد من غقاب المجرم!!! مش فاهم إنت ازاي مش شايف الموضوع على هذا النحو البسيط؟؟؟

    حكاية التعميم... يا سيدي افترض إني باعمم وبقول لك المسيحيين كلهم متعصبين والمسلمين كلهم متعصبين... دا علاقته إيه بارتكاب جرائم إرهابية؟؟؟؟ يا سيدي نفرض المسيحيين أغلبيتهم وحشة هل دا معناه إن المسيحية كخة؟ لأ.... معناه إن المسيحيين وحشين وبعاد عن ربنا... ونفرض أن أغلب المسلمين وحشين هل دا معناه إن الإسلام إرهابي؟ طبعا لأ... معناه إن المسلمين بعاد عن ربنا ومحتاجين يرجعوا لربنا

    دي بديهيات كلنا فاهمينها ومش مكانها هذا الموضوع... إحنا بنتكلم عن عدد من الناس ارتكبوا جريمة!! بس!! عاقبهم بقى يا سيدي!! إيه علاقة ده بالإسلام أو المسيحية؟ ليه علاقة بالمسلمين وبالمسيحيين! ودا مش عيب


    بالنسبة للأخوان وحكاية إنهم مش مركزين في الملف الوطني عشان هما مرميين في السجن... يا سيدي الفاضل... الإخوان المسجونين على مستوى الجمهورية مؤخرا عددهم 790 فردا... فين بقى دور عشرات الألوف اللي برة؟؟

    أنا بحترم الإخوان في حاجات كتير بس دورهم فيما يخص الملف الطائفي وقضية الأقباط دور سلبي جدا وضعيف جدا وملتبس جدا وأنا رأيي هنا رأي موضوعي مش ذاتي

    كلامك الأخير بقى هو المصيبة الحقيقية وهو للأسف صائب جدا
    المشكلة بقى فى ان كل جنب من الجنبيب هايخد الدين ستار وهاتبقى مدبحة

    ومحدش هايستفيد منها خالص

    بالظبط!!! مصر هتشهد بالطريقة اللي ماشيين عليها دي اندلاع حروب أهلية دينية والمسيحيين اللي لغاية دلوقت مسالمين محدش عارف ممكن هما كمان يردوا العنف بعنف إمتى!! وكله هيبقى باسم الدين واشربي يا مصر وخش في سناريو لبناني في مصر واتفرج على الخراب يا جدع

    لو انت شايفني متطرف فانت عندك مشكلة ومحتاج تراجع كلامي كويس قبل ما تراجع نفسك... سعيد بمشاركتك وطول براحتك البيت بيتك

    :D

    ردحذف
  14. العزيز الغزالي
    حلوة العزيز دى العزيز مراقب

    لا مش كلام جميل بس اوك والتعصب مش تدين

    والدين مش كورة بس شغال

    تعصب المسيحيين آره إيه؟؟

    عايز تعصب المسيحين اية حول العالم

    ولا تاريخيا ولا اية بالضبط

    لا حرية التعبير تتوقف عند الاهانة

    يعنى عمرك شوفت حد بيشتم فى البابا شنودة بلاش سيدنا عيسى دة فى الاسلام رسول والايمان بية شرط اساسى

    للايمان عادى انتو بقى حرية الراى
    الى بتقول عليها انك تكدب وتشتم

    فى الرسول صلى الله علية وسلم

    انك تالف وتتريق وووو الخ

    عايز ادلة مفيش مشاكل

    وتعصب المسيحين برة مصر ملهوش نهاية

    لكن فى مصر المشكلة فى حجات كتير

    اوى اولهم العدد ثانيهم التاريخ

    ثالثهم ورابعهم ممكن اذكره بعد كدة


    تعصب المسلمين بقى آخره إيه؟

    الى بيقتلو مسلمين باسم الاسلام دول الاسلام برئ منهم وكويس انك عارف دة

    وحدود حرية الراى مش انت الى بتحددها ولا انا دى ثقفات عامة هايل ممتاز

    بس متقولش تعصب المسلمين قول تعصب المصرين المسلمين والا هاعتبر ان تعصب الامريكان المسيحين ضد الاسلام

    وقول بوش بالنص ان دى حرب صليبية ؟؟

    انة بيتعدى عليان

    انت متقصدش كدة صح تقصد القلة الغير
    واعية للاسلام من المصرين هايل

    بالنسبة للخطب بتاعت التكفير

    فعن اى تكفير نتحدث؟

    اذا كان كل من الجانبين يرى الاخر كافر

    انت ترانى كافر وعلى غير حق؟؟اليس كذالك

    تعلم ايضاء انة ايمانى بتحريف الانجيل جزء اساسى منى وبالتابعية فانا لا اؤمن الا بعيسى ابن مريم وبالسيدة العذراء وبانكم كاهل ذمة اوصنا عليكم الرسول صلى الله علية وسلم

    واوصنا القران خيرا بكم فلكم كل تبجيل

    وبعدين على الجانب الاخر مش فى مسرحيات

    بتتعرض داخل الكنايس فيها سخرية منا؟؟

    الفرق ان خطبنا فى الهواء الطلق؟

    طيب ما زكريا بطرس (الحقير))

    واصر على ذالك الوصف بيهين الرسول صلى الله علية وسلم فى القنوات الفضائية؟؟

    ممتاز سخرية اية ؟ ومنابر اية الى بتسخر منكم؟؟ الازهر مثلا؟؟

    النور ؟؟ الفتح؟.؟؟ جوامع زى
    اية ولا عتقولى اللهم ما انصر الاسلام والمسلمين

    على اليهود والنصارى اعداء الدين؟؟

    طيب مهم الامريكان دول نصراى واعداء الدين ايى الى يضايقك هنا؟


    المضايقات دى موجودة ولا ينكرها الا جاهل او نعام يدفن راسة

    ومعاك فان لازم يكون فى حد ليها

    ودة حقك فى القطاع العام فى الخاص

    فدة مش من حقك انا كصاحب شركة اشغل الى يعجبنى واحط الشروط الى تناسبنى ودة شئ يرجعلى انا مش ليك انت

    لكن لو قولت الوظائف العليا هقولك صح القطاع العام حقك
    لان الدولة مش اسلامية اصلا

    نرجع تانى للتوصيف المسلمين؟؟

    حدد يعنى اية مسلمين؟؟

    وهل معنى واحد جاهل حرق كنيسة اننا نقول المسلمين بيهنو المسحيين؟

    يعنى من حقى علشا فى واحد داس على المصحف فى العراق؟

    اضربك؟ لان الامريكى مسيحى وانت مسيحى؟؟

    ركز على تحديدك لفئة والتعصب او الهبل الى بيحصل فى مصر دة

    انا كمسلم بقف معاك ضدة واى مسلم هايقف ضدة

    لانة خرق حتى لكلمات كتاب الله


    ومش هاكلمك تانى على توصيفك العام لكلمة المسلمين

    وانا مش متصور لانى بنزل الشارع وبساعد اسر كتير فاكيد بشوف بعينى

    ويعنى اية متكلمش عنك تانى ؟؟

    لو مش مرحب بردى فدة حقك طبعا بس ياريت تبينلى السبب؟؟


    لا فى جرايم قتل طبعا والكشح مثال مصصغر للحرب الاهلية الى ممكن تحصل

    وانا معنديش مشاكل

    اة حصل كتير تحب اعرضهملك تاريخيا من اول محاكم التفتيش؟؟

    ولا نتكلم عن الى حصل فى الحروب الصليبة؟؟
    ولا عايز نتكلم عن مصر؟؟

    يعنى نتكلم هنا والان؟؟؟؟


    انا متفق معاك جدااا ان فى واقع مهبب إن فيه مناخ طائفي محتقن في مصر وفيه مناخ من الكراهية بين المسلمين والمسيحيين وفيه مناخ من التعصب وفى افظع فى ناس بتشترى سلاح فى الصعيد منذ قديم الازل

    وهيا ما يرشحها لتشهد حرب اهلية لن ينجى منها احد الا برحمةالله

    المعتدون من المسلمون في حوادث العنف الطائفي هم مجرمون وإرهابيون بل

    واحقر من ذالك كلة صدقنى

    ولو حوكمو بالاسلام فسيكون العقاب اقسى كثيررا

    ومن رايي انهم يتحكمو علنا انا بتكلم جد

    لازم يضرب بيهم مثل وفى دى انا متفق معاك كليا

    القانون؟؟؟ انهى قانون؟؟ فى مصر؟

    لانك انت الى مش فاهم الفولة الى بيحصل

    دة عبارة عن فرجة تفتكر ان الامن مكانش يقدر يوقف كل دة؟؟

    طيب اية رايك ان النظام عارف وان كل

    دة متوقع؟؟
    وركز بس اية الى هايحصل بعد كل الدوشة دى؟؟

    ان المسلمين ارهابيين

    طيب هايل وحشين شوفتو بقى ان قانون الارهاب هايحميكو
    ؟؟!

    بس والنهاية هوا القضاء على اعداء

    الدولة لا اسلام ولا مسيحية ولا يحزنون

    وانا مقتنع ان فى جريمة

    ومش لازم عقابة بس لا لازم جعلة امثولة ...وانا مش شايف الموضوع بسيط حضرتك بس بتتكلم بانفعال ودة حققك لان الضربة فى بيتك

    هقولك اية المشكلة

    لانك لما تقول انهم متعصبين يعنى كالحمار يحمل اسفار

    بياخد نص الاية وينفذها ودة مش صح

    بس ارتكائب الجرائم دى جى من عدم وعى

    من التعصب بس من الكلام بدون وعى

    وانا لما بعلق بعلق على الجريمة ككل انت دخلت فيها بقية ردودى عليك

    الناس الى قتلو يقتلو ومن سرق يحبس وهكذا

    هقولك لية الاخوان ميقدروش يتحركو لان المسجون هوا القيادات وبدونهم

    لو فى الوف مؤلفة مفيش حركة انت تعرف رتب الاخوان؟

    وانا بحترم اى صاحب فكر وانا مش اخوان
    ورايك فى الموضوع دة هابقى انقشة معاك

    فى المدونة الثانية

    وبالنسبة للحرب الطائفية ...

    الكشح مثال صغير ,,تعرف ان الصعيد فية

    اربيجيهات؟؟ كتير اوى؟؟

    وفيى سلاح يسلح جيش كامل.؟دة كلام جد
    وفى ايد مسلمين ومسحيين
    كلة هايخسر حضرتك

    ومحدش هايستفيد منها خالص
    بس لبنان وضع تانى خالص مصر صعب توصلها اوى وانا مش عندى مشكلة وانا

    قولت انك متعصب ودى مش مشكلة دة واقع راجع انت كلامك كويس انا راجعتة مرتين ....انا اسعد بالحوار معاك وطولت تانى... تحياتى ...

    ومدام البيت بيتى ما تجيب كوباية شاى؟؟

    ردحذف
  15. انا دخلت لقيت هنا خناقة
    وبسرعة لانى في الشغل وقفت كتير عند تعليق الاخير
    تعليق غزالي
    احتمال اكون فهمت غلط
    ان الكلام بيناقض بعضه
    يعني مثلا شايف ان الاقباط في مصر مجرد اهل ذمة وبس اوصانا بهم الرسول خيرا وبترجع تاني تقول ان الدولة مش اسلامية اصلا!!تفسرها ازاي؟
    ولو انت شايف انها دولة مش اسلامية يعني مدنية المفترض المساواة ما بين جميع المواطنيين بصرف النظر عن الدين

    سؤالك عن مين بيكفر مين؟
    مين في السر او العلن ؟
    بالظبط بتفكرني بتصريح الوزير الفلسطيني نبيل شعث عند اتهامه بالفساد رقص وغني ان فساده في النور مش زي التانيين الوحشيين اللي بيمارسوا الفساد في الضلمة
    يعني بالنسبة لي مفيش فرق بين فساد نور او هواء طلق وغيره مداري
    لكن برده مش ذنبي كمسيحي ابقي قاعد في بيتي وسامعة شتيمتي من المساجد المحيطة
    المسألة مش مين بيشتم في السر ومين في العلن
    الحكاية تتلخص في جملة واحدة انا ابن هذا الوطن واحمل جنسيته فا بالتالي من حقي مساواتي بباقي مواطنيه

    ردحذف
  16. طيب السلام عليكم ورحة الله وبركاته بعد اذنك يا مراقب... ولو ضايقك ان الموضوع يتحول لنقاش جانبى
    فياريت تمسح تعليقى وانا مش هاضايق بالعكس واسف انى هارد هنا ودة هايكون اخر تعليق علشان محولش مسار البوست
    الا ان اردت انت او زنزانة التكملة
    --------------------------------
    ازيك يا زنزانة يارب تكونى بخير
    كويس انك وقفتى عند تعليقى ومقرتيش باقى التعليقات لانى برد على تعليق مراقب فى الاصل :)
    والكلام مش بيناقض بعضة ولا حاجة اقرى
    كويس بس
    انا بقول للعزيز مراقب انة بيعمم
    وشرحتلة معنى لفظة ببساطة اقرى ردى تانى
    بالنسبة لنظرتى للاقباط فدى
    فيها كلام كتير جدااا لانى متربى مع مينا بس مينا غير مراقب طبعا

    قولت اننا لو هانتكلم اسلامى يبقى اى قبطى مش -اهل مصر بس -يعتبر من اهل ذمة واوصانا بهم الرسول صلى الله علية وسلم خيرا

    لكن واقعيا وفعليا احنا فى بلد مدنية يطبق فيها القانون المدنى ولا علاقة لشرع الله بحكمها ابدا .... فهمتيها؟

    يعنى بعرض الوجهتين بس
    وانا شايف انها دولة مهلبية مش اسلامية ولا ديموقراطية

    وبالنسبة للدعاء هاكرر تانى
    الشيوخ بيدعو على النصارى المعادين للدين الاسلامى المحاربين
    وانا بامم على كدة
    وبقول امين ودة حقى ...
    لما يكون فى نصرانى محارب اميركى بيهتك عرض اختى المسلمة فى العراق
    بلاش ادعى علية؟؟؟؟

    وكالمعتاد تعميم غريب يعنى مهو مينفعش نقول ان كل المساجد وحشة وكخة وكل الشيوخ بيدعو على المسحيين المصريين المسالمين الطيبين وبتشتمو فيهم على المنبر وكل المسيحيين فى العالم وكل من يحمل لقب نصرانى بالنسبة ليا كمسلم ها حلوين وجمال
    وطيبيبن ومش بيغلطو فى الاسلام ولا فى المسلمات فى العالم كلة
    واحنا علشان الشيوخ بتوعنا وحشيين بيدعو عليهم وبيشتموهم

    يا حرام عينى دمعت

    غريب اوى ان موقفى يفكرك بالموقف دة بالذات يمكن لانك انتى مش فاهمة صح زى ما قولتى ودةاكيد فمش هاعلق على التشبية ...
    بس انا ريي ان فساد فى النور اوفى الضلمة كلة عك وفساد
    ولاخر مرة
    الدعوة على النصارى بيقصد بها المحاربين للاسلام يعنى مش بيدعى مثلا على المنبر ويقول اللهم ما اخرب بيت فلان الى ساكن فى البيت الى جمبى

    وبعدين محد يكتب الدعاوى والشتايم!!

    الى بيتشتموها على المنبر

    شتايم ؟؟؟ غريبة دى

    يمكن يكون فى تجاوزات بس هتظل تجاوزات مش كل المساجد كدة

    وان كنت متفق معاكم فى ان دة مش صح لانة مش بيحدد
    بس برضة انا من حقى كمسلم
    يجيلى سى دى لمسرحية متمثلة جوا مكان ربنا فيها تريقه على دينى ونقول انهم مش بيغلطو فينا قدامنا على الاقل
    يعنى معلش عذر اقبح من ذنب
    الحوار هايحخش كدة فى حارة سد
    وموقفك انتى الى انا مستغربلة
    بجد
    وبلاش اشبة لان تشبيهى مش هايكون لزيز
    انا متفق معاكى فى اخر نقطة وبس
    بس هوا مين فى الوطن واخد حقة اصلا؟؟؟

    ردحذف
  17. اهلا غزالي

    كويس اننا وقفنا عند نقطة ان اللي بيدعي علي المنابر بيقصد النصراني المحارب في العراق دا جميل وهو مين مش بيدعي عليهم؟
    اكيد انا وانت وكل الناس بتدعي
    بس دا انت وانا اللي فاهمين هو بيقصد مين؟
    لكن هل كل الناس بتفهم دا؟ ولا بيحصل تعميم من المسلمين ان الدعا والقاعدة تنطبق علي كل المسيحيين ؟
    انا مفهمتش ليه انت مستغرب وجهة نظري؟ اعتقد ان وجهة نظري منطقية، وفي النهاية انا مفرضتهاش عليك ولم ادعي اني محتكرة الحقيقة هو البوست مكتوب ومطروح للنقاش اللي معناه انك تقول رايك وحق الرد مكفول للجميع دون تراشق او اتهامات موجهه لاشخاص ولما قلت تشبيه الفساد بالتأكيد مقصدتش انت شخصيا لكن اكيد اقصد الفكرة لاني سمعتها قبل كدة ف مواقف مختلفة هل دا له علاقة بديانتى؟
    ويا تري ايه التعليق اللي مش لذيذ اللي كان نفسك تقولها ومقولتوش؟
    في غنوة زمان كانت بتقول ان خفت متقولشي وان قولت متخفشي وانا بأييدها (ملحوظة مش بتهمك بالخوف ولكن الغنوة كدة)يعني لو انت كان عندك تشبيه سئ لموقفي وعاوز تقوله قوله لكن لو رجعت ف كلامك يبقي متقولش انا عندي تشبيه لكن مش هيعجبك انا قريت ردك تاني وباقي التعليقات واللي لاحظته هو اصرارك علي مبدأ ان انا هشتم فلان طالما بيشتمنى ودا مبدأ مش هو هدفنا هنا
    لاننا هنا بس بنتناقش حوالين موضوع معين يعني بنحلله ونطرح ابعاده واحتمال حلول
    لكن مش مين فينا اللي يقدر يشتم اكتر
    مش هدفنا
    خلينا افضل نحاول نوصل لكيفية مواجهة قضية معينة
    مع الوضع في الاعتبار ان اكيد مش كل المسلمين كخه ولا كمان كل المسيحيين
    ولا كل المساجد ولا كمان كل الكنايس
    وان اكيد المجتمع كله مش واخد حقه
    فلازم نفكر كل واحد فينا ياخد حقه ازاي؟
    ممكن حد يقول ان طب ما ناخد حقوقنا الاول من النظام وبعدين نبقي ندور علي حقوق الاقباط لو لهم حق كلام منطقي برده
    لكن راي الشخصي بختلف معاه لانه بالظبط زى اللي بيقول ادور علي لقمة العيش ولا ادور علي حقي في المساواة ؟
    انا راي اني ادور علي الاتنين في ذات التوقيت في خطين متوازيين لانهم مفيش واحد فيهم اكثر اهمية من التاني

    في نهاية تعليقي اللي بقي خطبة طويلة
    الاختلاف في الراي لا يفسد للود قضية
    انا عن نفسي مش باخد نهائي المناقشات كمسألة شخصية بالنسبة فكرة قدام فكرة وبس
    كمان مراقب مش بيشيل تعليقات والا كان شال تعليقات تانية كتير غير ان تعليقك مش شايفاة فيها ما يشين وان كنت بختلف معاه
    ولا انا في مدونتي بشيل تعليقات
    اما مسألة اتهامك لمراقب بانه متعصب فأنا مش معاها لان تبادل الاتهامات مفيش اسهل منه فالافضل اننا نتجاوز الاتهامات
    تحياتي

    ردحذف
  18. اهلا zenzana


    فى ناس كتير بتعتبرهم مجاهدين وانا بتكلم جد وجدااا

    ودة فى امريكا نفسها وفى عقليات مصرية هنا مش اسلامية بالتاكيد

    بصى يا زنزانة هامشى معاكى للاخر واقول ان كلمة الله ما انصر الاسلام والمسلمين على النصارى واليهود اعداء الدين واجعل كيدهم فى نحرهم ووو

    دى بتضايقهم لا الشيخ مش بيوضح وهنا

    يمكن فى خيط انتى مركزتيش فيه بس اسمحيلى

    اتكلم فيه المفروض ان يكون فى جزء فى خطبة الجمعة فقهى وجزء عام ...تتصورى انى عمرى ما سمعت خطبة عن حق الجوار؟؟

    ولا عن ان المسيحيين واهل الذمة ليهم حقوق اخوة وواجبات وطن وخلافة

    والمفروض فعلا ان يتم شرح بشكل افضل ان من لم يعتدى عليك وبينك وبينه عهد

    (جيرة-صحبة -زمالة- حتى صباح الخير)

    فهو امن مستغربها لا نك مقرتيش التعليقات بس وكل شخص فينا شايف ان وجه نظرة منطقية ومينفعش حد فينا يفرض وجة نظرة على الاخر لانة مش هايبقى نقاش دة هايبقى ..... حطى مكان النقط ما تحبى

    ومحدش فى العالم يقدر يقول حقيقة كاملة او انة هوا الحق لا ن دة مش موجود

    لكى تكون صادق لابد ان يشوبك بعدالبعد عن الحقيقة

    انا فهمت انك تقصدى الموقف بس التشبية استغربتلة بس مش اكتر
    ديانتك هيا ما تحملية فى قلبك ويعتنقة عقلك وبس؟
    دى مش غنوة دى تتر مسلسل كان بيجى على القناة الثانية فى رمضان
    وبالنسبة للتعليق فليه مناسبة ثانية هقولة فيها وانا فاهم تشبيهك والله
    بس انا مرجعتش فى كلامى انا بس كتبت الى كنت عايز اكتبة ممتاز انك قريتى ردى تانى لا انا اقصد كدة انا اقصد


    القاعدة البسيطة رد الاساءة

    بسم الله الرحمن الرحي

    الشَّهْرُ الْحَرَامُ بِالشَّهْرِ الْحَرَامِ وَالْحُرُمَاتُ قِصَاصٌ فَمَنِ اعْتَدَى عَلَيْكُمْ فَاعْتَدُواْ عَلَيْهِ بِمِثْلِ مَا اعْتَدَى عَلَيْكُمْ وَاتَّقُواْ اللّهَ وَاعْلَمُواْ أَنَّ اللّهَ مَعَ الْمُتَّقِينَ [البقرة : 194]

    صدق الله العظيموالشتيمة ضعف واكيد مش هدف اى حد بيفهم
    وبالنسبة للموضوع فانا قولت رايي

    الى عملو كدة اين كانو لازم يبقو عبر

    بجد يعنى الحكم الى هايطبق عليهم لازم يخلى الباقى يفكر الف مرة قبل ما
    يعمل كدة ...

    واكيد دة مش هدفنا وانا تقريبا قولت وجة نظرى

    القضايا الى زى دى بتتواجة بالردع وبجد

    دى غير احداث اسكندرية ال فاتت

    ولان الحكومة بتتساهل مع النوع دة من الجرائم فهيا بتكتر .. كيفية المواجه هنا هيا الردع ومش شايف غيرة

    انا معاكى فى الراى الاخير انى ادور على حق الجميع
    ودة مفيهوش افضلايات ولا فية كلام

    كويس اننا اتفقنا على المبداء دة

    الاختلاف فى الراى لا يفسد للود قضية

    كالعادة استعجلتى يا رندا انا قولتلة لو هايضايقك ان الموضوع يتحول عن مسارة

    زى ما حصل مع موضوع جيفارا مثلا لانى انا اضايقت فياريت تشيل التعليقات

    الى شوفتها خرجت عن نطاق المووضوع

    انا عارف انك مش بتشيى اى تعليقات من مدونتك
    ودة مش اتهام حاشا لله دة تحليل لاحداثة

    لكتاباتة كلها وتحليل منطقى جدااا

    تحياتي

    ردحذف
  19. غير معرف6/18/2007 9:49 م

    from abdelrady
    بص يا مراقب انا اول مرة اقول تعليق على مدونة .شوف يا مان المشكلة عمرها ما كانت فى الناس المشكلة فى النظام .يعنى ايه نظام؟............خلينا نقول منظومة احسن منظومة القيم و الثقافات و المبادىء؟
    مش شايف انها اتغيرت بعد الثورة ز وبعدين اتغيرت تانى بعد النكسة؟.
    لما فى ناس قالت ان بعدنا عن ربنا هو اللى عمل فينا كدة و بعد كدة اضطرار معظم اهالينا للسفر لدول الخليج علشان اكل العيش.
    باختصار كل ده عمل منظومة اجتماعية تانية خالصز
    المصريين مش متعودين عليها...و الكلام عن الغرب الكافر .طيب الغرب ده ديانته ايه "مسيحى"الله ماحنا كمان عندنا مسيحيين الله؟ يبقوا هما كمان كفار وبقينا واخدين بالنا من اختلاف العقيدة و للاسف بمنتهى الهبل نسينا اختلاف الايديولوجية و الاهداف وهو ده اللى مودينا فى داهية...المسيحيين بيقتلوا اخواتنا ف افغانستان الله ..يا خبر..دا احنا عندنا مسيحيين يبقوا هيقتلونا لما يتمكنوا و الغرب يساعدهم
    معنى كلام العيب فى الجهل وعدم القدرة على قراءة التاريخ وصراعات الاستحواذ و التضعيف.
    يا صاحبى احنا عايثشين فى مجتمع جاهل ..اوعى تفتكر ان اللى بيهاجم المسيحيين فاهم هو بيعمل ايه دول عينة من شعبنا بتجمعهم صرخة واحد بينهق و اهى فرصة يحرقلوا كام بيت و يشوه كام واحد و يخرج شحنة الكبت الجاهل اللى فيه ..ووالله تسعين فى المية منهم عمره ما دخل جامع ولا قرا مصحف دا ان كان بيعرف يقرا اساسا
    يا صاحبى "نحن نحيا بوطن مسجى تلتهم الجرذان اطرافه"
    مش بعيد تلاقى واحد من اللى خرج فى حادث اعتداء دول تانى يوم فى وسط البلد بيحاول يمسك بز بنت محجبة ماشية ف حالها
    هى دى ثقافة الرعاع يا صحبى و يا خوفى لو الرعاع خرجوا على الكل يومها مش هتفرق مسيحى من مسلم.

    ردحذف
  20. أنا متابع الحوار ومستمتع جدا بالجدل الدائر... أعتقد أن الحوار الدائر هام جدا وينبغي ألا يتوقف

    ردحذف
  21. صدق الله العظيم اذ يقول

    "ولن ترضى عنك اليهود ولا النصارى حتى تتبع ملتهم"

    قال الله تعالى : { أفتطمعون أن يؤمنوا لكم وقد كان فريق منهم يسمعون كلام الله ثم يحرفونه من بعد ما عقلوه وهم يعلمون }

    قال تعالى : { الذين يتبعون الرسول النبي الأمي الذين يجدونه مكتوباً عندهم في التوراة والإنجيل يأمرهم بالمعروف وينهاهم عن المنكر ويحل لهم الطيبات ويحرم عليهم الخبائث ويضع عنهم إصرهم والأغلال التي كانت عليهم فالذين آمنوا به وعزروه ونصروه واتبعوا النور الذي أنزل معه أولئك هم المفلحون .

    قل يا أيها الناس إني رسول الله إليكم جميعاً الذي له ملك السماوات والأرض لا إله إلا هو يحيي ويميت فآمنوا بالله وكلماته واتبعوه لعلكم تهتدون }


    { قاتلوا الذين لا يؤمنون بالله ولا باليوم الآخر ولا يحرمون ما حرم الله ورسوله ولا يدينون دين الحق من الذين أوتوا الكتاب حتى يعطوا الجزية عن يد وهم صاغرون }
    ، مع المحافظة على إحقاق الحق ونصره فلا يكون ذلك على سبيل مداهنة المسلمين للمشركين ، وتنازلهم عن شيء من حكم الله ، أو شيء من كرامتهم وهوانهم على أنفسهم ، بل مع الإبقاء على عزتهم والاعتصام بكتاب ربهم وسنة نبيهم صلى الله عليه وسلم ، والبغض لأعداء الله وعدم موالاتهم ؛ عملاً بهدي القرآن ، واقتداءً بالرسول الكريم عليه الصلاة والسلام

    قال الله تعالى : { وإن جنحوا للسلم فاجنح لها وتوكل على الله إنه هو السميع العليم } الآيات ،

    وقال تعالى : { فلا تَهِنوا وتدعوا إلى السلم وأنتم الأعلون والله معكم ولن يتركم أعمالكم } .

    وقد فسّر ذلك نبينا صلى الله عليه وسلم ذلك عملياً ، وحققه مع قريش عام الحديبية ، ومع اليهود في المدينة قبل الخندق ، وفي غزوة خيبر ، ومع نصارى الروم في غزوة تبوك ؛ فكان لذلك الأثر العظيم والنتائج الباهرة من الأمن وسلامة النفوس ، ونصرة الحق ، والتمكين له في الأرض ، ودخول الناس في دين الله أفواجاً ، واتجاه الجميع للعمل في الحياة لدينهم ودنياهم ، فكان الرخاء والازدهار وقوة السلطان وانتشار الإسلام والسلام ، وفي التاريخ وواقع الحياة أقوى دليل وأصدق شهيد على ذلك لمن أنصف من نفسه أو ألقى سمعه واعتدل مزاجه وتفكيره وبرئ من العصبية والمراء ، إن في ذلك لذكرى لمن كان له قلب أو ألقى السمع وهو شهيد ، والله الهادي إلى سواء السبيل ، وهو حسبنا ونعم الوكيل

    ردحذف