Glimpses from My Instagram Gallery

2007-06-13

بعد الفضايح والتشهير... موضوع "سي دي" حيدر بغدادي اتلم خلاص

غريب أمر هذا المجتمع، وغريبة هي فصاميات هذا المجتمع!

منذ أكتر من شهر كتبت عن انتهاك حرمة الحياة الخاصة في البرلمان. وكان الموضوع وقتئذ
عن فضيحة انتهاك حياة العضو البرلماني حيدر بغدادي واستعراض وقائع سي دي حيدر بغدادي داخل البرلمان دون حياء أو خجل أو حتى أدنى شعور بانتهاك حرمة الحياة الخاصة التي يحميها الدستور والقانون. ولكن عن أي قانون تحكي في هذا البلد؟

هذا البلد بات يحكمه قانون مختلف هو قانون الغاب. وباتت تحركه منظومة قيم فاسدة شعارها الأهم هو "اللي تكسب به العب به" و"شيلني واشيلك"، وليذهب جميع الشرفاء إلى الجحيم. تصفية الحسابات هي إحدى السمات الغالبة في هذه
المننظومة الفاسدة. وقضية "سي دي" حيدر بغدادي نموذج متجسد لـ تصفية الحسابات بين الكبار في هذا البلد!!
أشريفٌ هو أم فاسد... لست أعلم! ولكني أعلم شيئا واحدا... أن حيدر بغدادي هو السبب الرئيسي في فضح قضية "هايديلينا" وبطلها النائب "الوطني" هاني سرور الذي بدأت وقائع محاكمته أمس أمام محكمة الجنايات في قضية أكياس الدم الفاسدة. وفي اعتقادي أن قضية "سي ديهات" حيدر بغدادي الجنسية لم تكن إلا تصفية حسابات من أولئك الذين "يسندون" هاني سرور وكان يكتسب "حصانته الحقيقية" منهم.

امبارح بقى موضوع سي دي حيدر بغداي نزل على "فاشوش" حيث اكتفت لجنة القيم بمجلس الشعب بتوجيه اللوم إلى النائب وحسب... إذن كان الموضوع "قرصة ودن" فقط لحيدر ولغير حيدر!!! فالرسالة الواضحة للجميع أن لكل منكم "سي دي" وتسجيلات أدق تفاصيل حياتكم الخاصة موجودة تحت الطلب وستخرج فضائح كل واحد فيكم إلى العلن في الوقت المناسب. إنه إرهاب العصابات يا عزيزي!!

أغلبنا سمع عن فضيحة الفيديو الذي تم تسريبه لأحد الكتاب المعارضين اللي بيظهر فيه في وضع مخل مع شخصية معروفة. وبعضنا سمع عن تسجيلات وصور فاضحة لبعض الناشطين اللي الأمن بيلعب بيها معاهم. وطبعا لا يخفى على أحد من الذي سرب سي دي حسام أبو الفتوح ودينا.... والزمن اللي جاي يا عزيزي هو زمن السيديهات... طب نعمل إيه؟؟؟
نرجع تاني ونقول!!!

القضية الأساسية إنه لازم ترجع تاني قيمة حرمة الحياة الخاصة من جديد إلى مكانها في المجتمع وخصوصا وسط النخبة... لو النخبة نفسها لسة بتتصرف بطريقة المراهقين وتهيص لما يطلع فيديو فضايح وتهلل مع اللي بيهللوا يبقى فيه مشكلة وكارثة!!! لو مش مدركين - كنخبة - إن الدور الجاي على أي واحد فينا يبقى إحنا شركاء في جريمة انتهاك الحياة الخاصة... بحاول افتكر كام واحد غيري اتكلم أيام هوجة فضيحة سي دي حيدر بغدادي وانبرى للدفاع عن حرمة الحياة الخاصة قبل حتى الدفاع عن مكارم الأخلاق، بس مش لاقي كتير عملوا كدة... الأغلبية هيصوا وزاطوا مع الزيطة وراجعوا أغلب عناوين الصحف والمواقع الإلكترونية اللي اتكلمت في الموضوع هتلاقي الأغلبية باعت وكسبت على شرف الراجل وعلى انتهاك حرمة حياته الخاصة.

آخر الكلام:

كلامي ده مش دفاع عن شخص حيدر بغدادي ولكنه دفاع عن حرمة حياتي الشخصية قبل أي حاجة تانية.



ولنتذكر قول يسوع عندما أحضروا إليه امرأة أمسكت في "ذات الفعل" (أي متلبسة بالزنا) فقال قولته التايخية "من منكم بلا خطية فليرمها بحجر"
ـ

هناك 9 تعليقات:

  1. أدى السي دي الهدف منه وكان بمثابة قرصة ودن لحيدر بغدادي حتى لايتمرد على الحزب الوطني ويعمل فيها معارض

    وخلاص الرجل اصبح أليف ورجع لحظيرة الوطني وموضوع هايدلينا اللى زعلهم منه اتلم هو كمان

    ولا عزاء للشعب

    قال حرمة للحياة الخاصة قال

    الله يسامحك يامراقب ياخويا
    ضحكتني وماليش نفس اضحك

    هههههههههههههههههه

    ردحذف
  2. هو في حياة عامة اصلا
    لما هيبقي في حياة خاصة؟

    فكرة السي دي
    بتفكرني بمناقشة سابقة اننا بقينا في دولة مخبرين مش هيبقي الاسلوب دلوقتي الخطف والاعتقال لا كل واحد هيبقي له سي دي يطلع وقت اللزوم او صورة او اي حاجة
    يعني اربط سي دي حيدر بفيديو الصحفي القومي المعروف اربطه كمان بأحدي عضوات كفاية اللي زعم البوليس انها كانت في وضع مخل بالاداب العامة
    هي دي نوعية القضايا اللي هيلفقها الامن

    اربط دا كمان بأننا شعب عايش علي الشائعات

    ردحذف
  3. سمعت من مصادر غير موثوق فيها و لا ف اخلاقها انه حاليا يتم عمل مونتاج و دوبلاج لسي دي عن فضيحة جماعية ل 70 مليون شخص في وضع مخل، يعني حفلة و هيصة

    المشكلة انهم بيحاولو يشيلو في المونتاج بعض المشاهد الاوفر قوي و اللي الحماس اخد بعض الناس بزيادة و كانو بيستخدموا عصيان مقشات

    تحياتي
    و العهدة على الراوي

    ردحذف
  4. ماتشوفلنا يا عم الشريط ده نجيبه إزاي هههههههههههه

    xee
    عصيان المقشات موضة قديمة دلقوتي فيه عواميد نور او عصيان المكانس حاجة مودرن !!

    ردحذف
  5. حرمة حياة خاصة فى مجتمع لا يحترم تلك الخصوصوية، إزاى؟
    ده داء فى المجتمع إنه يستمتع بتعرية خصوصية الآخرين، حلها إنك تجيب مجتمع تانى بثقافة تانية تعيشه فى مصر

    ردحذف
  6. BeLiEvEr فعلا يا

    احنا محتاجين شعب تاني على طريقة انسف حمامك القديم.

    شعب عاوز النسف فعلا

    ردحذف
  7. هههههههههههه بليفر
    ايه رايك نجيب شعب جمهورية موريتانيا الشقيقة؟

    او شعب الهونولولو؟

    نياهاااا

    ردحذف
  8. العزيزة بيلا

    كلامك صح... وكل واحد فينا من هنا ورايح يجهز ودنه للقرص عشان دا موسم عقبال عندك... واللي ماشي مستقيم ومالوش سي دي هيتعمل له سي دي وهيتصور عريان وهيكبوا وشه على جسم هيفا كمان واللي مش عاجبه يقفل بقه أو يتنيل يسيب البلد
    =================


    زنزانة

    قراءتك طبعا صح... دا زمن دولة المخبرين... ودا اللي بيخليهم يجندوا ناس هبلة تبقى أمن ويبقى معرفو للكل إنهم أمن ليس لأجل جمع المعلومات فكل محادثات النشطاء التليفونية ولقاءاتهم متسجلة وعلى الهوا بيتصنتوا عليها لكن زرع المخبرين هدفه زرع الفزع الأمني ودا المراد... يخلي كل ناشط أو منخرط في الشأن العام ماشي يتلفت حواليه ويستنزف طاقة الناس في السؤال هو فلان أمن؟ طب فلانة مخبرة؟ طب هو فيه احتمال حد يكون بيسجل لنا؟ وهكذا... خلق هذا الفزع هو الغاية العظمى لأنها بتخلق خلخلة حقيقية في قلب النخبة هم في أمس الحاجة إليها

    إلا بالحق هي الحياة العامة كمان اتلغت؟ طب مش كنتي تقولي
    ======================


    زياد

    خيالك خصب أوي يا منيل... سبعين مليون في حفلة جنس جماعي... واضح إن حرارة الشمس في الجنوب خلت ملكة الخيال عندك تولع... بس إشطة شغال... أهي تبقى فضيحة جماعية للشعب ويخلصوا مننا ويجيبوا شعب تاني
    =========================


    هاني

    إنت شكلك متابع التطورات التكنولوجية الحديثة في وزارة الداخلية... وشكلك عليم ببواطن الأمور... عواميد نور يا مفتري؟؟!!! طب واللي عنده بواسير؟؟؟ مش حرام عليك؟؟؟
    ==========================



    بيليفر

    بعد فضيحة الجنس الجماعي المتصور فيديو للخمسة وسبعين مليون مواطن (ولا يستثنى الأطفال ولا الشيوخ) تقرر بالفعل الاستبدال بشعب تاني
    =============================


    هاني تاني

    هزر براحتك ياخويا... هتكون أول اللي هيتنسفوا في التعديلات الشعبوية
    ==============================


    زنزانة هانم

    بلاش شعب الهونولولو لأنهم مش مسلمين... شعب موريتانيا كويس بس للأسف متمرد واتعلم ديمقراطية وممكن يتعبنا هنا وينغص عيشة الباشا وعيال الباشا... طب ما الأسهل والأفضل نستورد رئيس موريتانيا؟؟؟

    ممكن ناخده بعقد احتراف لمدة سنتين يعلمنا ديمقراطية ويروح

    ردحذف
  9. غير معرف11/22/2010 4:18 م

    الاستيلاء على شقه بالدويقه بدون وجه حق قام ياسر عبد المقصود احمد بمعاونه نسيبه امين شرطه احمد سمير خطيب ابنه اخيه عبير محمد عبد المقصود,, والمقيم فى منشئه ناصر شارع نبيل الوقاد بمنزل ورثه عبد المقصود الكائن بجوار صيدليه د محمد مالك بتزوير شهاده ميلاد لكل من احمد ياسر عبد المقصود وريم ياسر عبد المقصود على انهم مواليد الدويقه حيث ان ابناءه تم ولادتهم بمنزل عبد المقصود ولهم شقه بنفس العقار ومكتب نرجو عمل تحرياته لان يوجد ناس احق بالشقه..كما انه كان يعيش بدواله الكويت ويعمل حداد مسلح واشقاء زوجته ايضا بالكويت فكيف انه يعيش فى حجره 2 متر فى 2 متر بالدويقه وهو لديه شقه بالفعل ومكتب فى منزل ابيه غير انه يأخذ ايجار محلات بنفس العقار وايجار حصته من السكان...والان يقوم بالاستيلاء على شقه اشقاءه البنات بالدور الرابع .. لصالح زوجه اخيه المرحوم وحماة الطرف التانى فمنذ خطوبه ابنها لا امين الشرطه وهى فرضه سيطرتها على كل شىء.. وتقوم ابنتها بالتهديد والوعيد لكل من يحاول التحدث معهم والوصول لحل .. بالرغم من انها لديها شقه بنفس العقار بالدور الثانى وحجره بالدور الارضى,, وهو يملك شقه بالدور الثالث على يمين السلم ومكتب بالدور الارضى وجاء بأبن عمه ويدعى حسنى مرتجى وافتى بأن لاحق للبنات بميراث فى بيت ابيهم وهذا الشخص قد تم القبض عليه من مباحث امن الدوله من قبل

    ردحذف