Glimpses from My Instagram Gallery

2007-06-09

حلاوتك يا قداسة البابا... الكنيسة انضمت للمعارضة يا جدعان!!


أعلنت مصادر مقربة للبابا شنودة أن الكنيسة الأرثوذكسية (يعني م الآخر البابا ... لأن البابا هو الكنيسة والكنيسة هي البابا زي بالظبط ما مصر هي مبارك ومبارك هو مصر) "أعطت أوامرها للكهنة" لحث الأقباط على عدم إعطاء أصواتهم لمرشحي الوطني في انتخابات الشورى وذلك حسبما أكدت جريدة المخبر اليوم

الخبر الحقيقة فيه كذا حاجة مهمة... أولها إن الكنيسة ما زالت بتتعامل مع الأقباط باعتبارهم أنفار في عزبة وأنهم قطيع تسوقه كما تشاء... فأيام انتخابات الرئاسة قرر شنودة أن الأقباط سيدعمون مبارك ونزل الإعلانات والتصريحات بتاعة أنفارالعزبة" (واسم شهرتهم الأقباط) يبايعون الرئيس مبارك (كويس إنه ماقالش ساعتها مبارك صلى الله عليه وسلم)... وكأن أقباط مصر دول بالنسبة لشنودة أنفار بلا رأي مش محتاج أصلا ياخد إذنهم في مبايعة الرئيس من عدمه وكأنه يعتبر نفسه خولي عزبة الأقباط والمتحدث باسم أنفارها... يلف الزمان وييجي وقت التعديلات الدستورية (طبعا في النُص الكنيسة طول الوقت بتاعة النظام وحبيبته وبتطبل للنظام وطبعا الدافع وراء هذا التأييد هو الإخوانوفوبيا)... وقت التعديلات الدستورية يطلع شنودة ويرفض إن الأقباط (اللي هما مواطنين في دولة ومن حقهم يعبروا عن أرائهم المفروض) يرفض إنهم يطالبوا بتغيير المادة التانية من الدستور بتاعة التشريع بحسب مبادئ الشريعة الإسلامية لئلا يؤدي ذلك إلى "تهييج المسلمين" وبعدين ساعتها يضيف قولته الكارثية إن التعديلات الدستورية هي من صلاحيات أولي الأمر!!!!!! واضح إن ساعتها كان بيتنافس هو وطنطاوي على أي "الدينين" يرضي الرئيس أكتر فالشيخ طنطاوي وقتها قال - ردا على مقاطعة المعارضة للاستفتاء - إن من سيقاطع الاستفتاء هو كاتم شهادة والساكت عن الحق هو شيطان أخرس... وزايد الإخوان عليه بالمرة وقتها وقالوا إن اللي هيروح يستفتي يبقى شاهد زور... حلاوتكوا كلكوا يا مشايخ وانتوا هتودونا في داهية كلكوا بعممكوا ودقونكوا سوداء كانت أم بيضاء!!

القصد إن الكنيسة حتى وهي بتنقلب على مواقفها القديمة "المؤيدة" للنظام "رعبا" بالأساس من الإسلاميين والإخوان، برضو بتعمل كدة بنظرية العزبة والأنفار اللي مالهمشي رأي... والأقباط يناموا على "التأييد" ويصحوا فجأة على "المعارضة" وكله شغال وكله ماشي واديها كمان عبثية!!

الحاجة التانية في الخبر ده إن الكنيسة مش قادرة تعترف بإن هي السبب الرئيسي في عزلة الأقباط وما زالت بترمي اللوم على النظام لأن الحزب الوطني ما بيرشحش أقباط، بل - وللمفارقة العبثية - بترمي اللوم على الأقباط نفسهم إنهم "متكاسلون" وما بيرشحوش نفسهم!! طب أرد أقول إيه بس؟؟؟ يعني النظام طلع واطي معاكم وما بيرشحش أقباط - بالرغم من مسح الجوخ من قبل الكنيسة للنظام - ووكمان الأقباط - اللي انتوا بسياساتكم الدينية والاجتماعية عزلتوهم عن المجتمع- طلعوا دلوقت وحشين وكخة؟؟؟ والكنيسة طبعا هي الوحيدة المعصومة وما غلطتش وما بتغلطش إذ تدعي أنها "مرتشدة بالروح القدس" ... إيه الحلاوة دي!!

طب ما الاعتراف بالحق فضيلة وتقولوا أحسن من كدة... إحنا كنا غلطانين في "تأييدنا" الأعمى للنظام وإننا تسببنا في عزلة ملايين الأقباط وتغريبهم عن وطنهم ومجتمعهم وإننا الآن جعلنا الأقباط يدفعون ثمن خيبتنا الدينية والاجتماعية وسياساتنا المتسلطة!! كل جهود الكنيسة في زعمي للتثقيف السياسي للأقباط ومن محاولات إعادة دمجهم في المجتمع ستفشل لأن القاعدة التي تبنى عليها كل هذه الجهود هي قاعدة فاسدة متسلطة... ولابد أولا من إصلح هذه القاعدة والإقرار بالفشل وبالفساد الداخلي في رأيي هو أول خطوات الإصلاح والعلاج الناجح.

ولن أقول في النهاية سوى قول يسوع المسيح لأتباعه يوما...



أَنْتُمْ مِلْحُ الأَرْضِ وَلَكِنْ إِنْ فَسَدَ الْمِلْحُ فَبِمَاذَا يُمَلَّحُ؟ لاَ يَصْلُحُ بَعْدُ لِشَيْءٍ إِلاَّ لأَنْ يُطْرَحَ خَارِجاً وَيُدَاسَ مِنَ النَّاسِ ـ

هناك 27 تعليقًا:

  1. يا سلام عليك يا مراقب
    يعنى هى المعارضة لازم فعلا تكون معارضة
    مش فى مقولة بتقول يتمنعن وهن الراغبات
    هى المعارضة اليومين دول كده يتمنعن والله اعلم بقى
    اهو تغيير شوية معارضة وشوية تأييد بدل ما نزهق منهم
    انت زعلان انهم بيمثلوا اصوات الاخوة الاقباط وانا بيقودهم طيب ما الريس بيتكلم عن مصر هو حد فينا كان عاجبه اللى بيعمله وهو برده بيقودنا

    ردحذف
  2. تفتكر الحركه دي عاملاها الكنيسه عشان ترد القفا للحكومه بالنوسبه لوموقفهاالاخير من موضوع بمها

    ردحذف
  3. اتفضل عندنا
    وليه متكونش حركة لامتصاص غضب الاقباط بعد بمها؟
    او مجرد قفا من الكنيسة لتهويش النظام؟
    او يا ستي مجرد جمع الانفار اللي هم الاقباط تحت جناحها عشان ميخرجوش عن القطيع؟

    ردحذف
  4. مينا باشا

    هو مش لو الأقباط امتنعو عن التصويت لصالح الوطني
    مش ده يبقى تصويت ضمني لصالح الاخوان

    و نوكيا هاتوه من أي تو، واحمد مش زي الحج أحمد

    ولا انا فاهم غلط؟

    تحياتي

    ردحذف
  5. اعتقد ان فيه احتمالات عديده الاخوه و الاخوات اصحابالتعليقات قفشوها كلها
    فعلا ممكن يكون قفا بقفا
    او يكون لم للغنم تحت جناحها افضل ما يلمهم حد تاني
    جايز ده و جايز ده
    و الله اعلم

    ردحذف
  6. عندك حق طبعا يا راندا بس انا اول حاجه جت في بالي اما قريت الخبر ان الكنيسه عايزه توري الحكومه الوش التاني و تقولها بالفم المليان انها مش هتشتمها في ميدان و تصالحها في عطفه...واهو يا ستي يا خبر النهارده بفلوس..

    ردحذف
  7. يا راجل حرام عليك

    الراجل كلامه مش ملزم

    عموما ده خبر يحمل معاني كتير ما بين السطور

    وكلها مش مبشرة

    ربنا يستر

    شكلها ح تقلب زي ايام الزاوية الحمرا

    ردحذف
  8. عزيزي المخبر قصدي المراقب
    ليه منحطش التصريحات كلها جنب بعض ونبص
    الانبا مش فاكر مين سكرتير البابا قال في تصريح لوزعي قال فيه اننا هنتراجع عن موضوع تايد جمال مبارك
    من الاخر كده
    الكنيسه نفسها تاخد حتة اكبر سنة من التورتة فقالت تعمل الفيلم ده
    وده وجهة نظري
    علي فكره المخبر ده دلع بس

    ردحذف
  9. توتا العزيزة

    حلوة أوي يتمنعن وهن الراغبات دي... ولو إنها ذكورية حبتين وهتزعلي منا بتوع الجمعيات النسوية.... اللى هو اسم الفاعل من الفعل يقود يبقى قائد ولا قواد؟
    ------------------



    اتفضل عندكو

    طبعا الموضوع بالأساس هو بمها لأن بسبب بمها الأقباط بدأوا ضغطوا على الكنيسة بسبب تحالفها الدائم مع النظام ووضع البابا بقى حرج وبالتالي بدأ هذه الخطوات بتاعة اللجنة التثقيفية وخطاب شديد اللهجة لمبارك وكلها إشارات إيجابية لكن منطلقة من قاعدة خاطئة وهي دي قضيتي... بينطلق من أي قاعدة!!
    ---------------------


    زنزانة

    الإجابة الصحيحة هي كل ما سبق
    ----------------------


    زياد العزيز

    بص يا سيدي الأقباط فعلا محتاجين يتخلصوا من الإخوانوفوبيا لأنها بالفعل ودتهم في داهية والأقباط محتاجين يتعاملوا مع الإخوان ومع السياسة عموما بواقعية... يعني الأقباط محتاجين ياخدوا ويدوا مع الإخوان... والإخوان النهاردة بيحولوا يحسنوا خطابهم فيما يخص حقوق الإنسان والحريات والأقليات... حلو جدا... دا كدخل لطيف للتفاهم... وف نفس الوقت لما نلاقي سقطات للإخوان مهببة بقطران زي لما المرشد يقول أنا لا أهتم مطلقا للكنيسة والأقباط يسيبوا البلد مع السلامة لا أهتم مطلقا يبقى الأقباط يحاسبوه كسياسي هو وجماعته ولما سعد بيه الكتاتني يقف في مجلس الشعب يرفض تعديل المادة الأولى من الدستور بتاعة المواطنة عشان قال إيه المواطنة دي بدعة غربية وتعني فصل الدين عن الدولة مبديا جهلا شديدا يبقى لنا مع الإخوان وقفة ولما يطلع نائب منهم الأسبوع اللي فات يقول لك يرفض مشروع قانون دور العبادة الموحد ويقول لك لأ نعمل قانون للمسلمين موحد وقانون موحد للأديان التانية يبقى لازم نحاسب الجماعة ولازم الأقباط يواجهوا الجماعة بالمواقف السياسية والتصريحات الغبية دي ويبقى فيه أخد وعطا... مش رفض من الجانبين لبعضهما بهذا الهطل

    ساعتها مش هتبقى أزمة للأقباط لو إخواني نجح ... وساعتها ممكن تتعمل فعلا صفقات ناجحة بين الإخوان والأقباط من نوعية ننجح مرشحكم في دايرة كذا وتنجحوا مرشحنا في دايرة كذا وهكذا
    --------------------



    ذو النون

    وفيه احتمال إن الراجل برضو بيبحث عن دور يسجلهولو التاريخ قبل ما يموت
    --------------------



    نوارة الانتصار

    طبعا كلامه ملزم لكلايين من أتباعه الذين يعتبرونه ملهم من الله وينزعون عليه "القداسة" ما تركزي معانا امال... البابا في الكنايس التقليدية قريب أوي من المرجعية عند الشيعة... يعني زي "السيد" بتاعك كدة
    ههههههههههههه

    المهم
    طبعا الأجواء الحالية أجواء سبتمبرية جدا قريبة جدا من سبتمبر 81 وربنا يستر
    =======================


    يا احمد

    اللي بيلعبوا بالدين في السياسة كلهم عايزين الحرق

    ماهو المرشد برضو قال معندناش مانع إن جمال يمسك بس مش بالوراثة ... يمسك من خلال انتخابات وترشيح... يا سلااااااام... ما هو هيورث عبر انتخابات وترشيح ... أنال يعني هيورث بالجينات؟؟

    كله بيبيع ويكسب واحنا اللي بندفع التمن... ولسة برضه الأسبوع ده قاري عناوين صحف عن إن الجماعة بتبدي مرونة في موضوع جمال ده... تقدر تفسر لي كل العبث دا بإيه غير إن الدقون بتتاجر فينا؟؟؟

    ردحذف
  10. لو تسمحى ارد يا مراقب رد طويل شوية
    اولا
    الكنيسة لا تخطىء
    لأن الكنيسة هى جماعة المؤمنين
    و رأس الكنيسة هو المسيح مؤسسها
    و ده ايمان اى مسيحى
    و بالتالى هى لا تخطىء
    النقطة دى احب اوضحالك
    مثال
    البابا شنودة كتب كتاب مثلا اسمه
    لماذا لا نذهب الى القدس ؟
    الكتاب ده فى شرح و تفاصيل و عقوبات للى يروح و الحاجات دى كلها
    الكلام ده كله ميساويش اكتر من تمنه
    و ممكن تنفضله و متسمعش للى فيه و تروح القدس و ولا يحصلك حاجة
    اما لو البابا شنودة كتب كتاب
    اسمه
    الخلاص فى المفهوم الارثوذوكسى
    فالكتاب ده من تعليم الكنيسة و لا ينسب الى البابا شنودة لأن اكيد البابا شنودة مش مؤلفه
    ده مجمعه من تعاليم الكنيسة فهمت قصدى
    المشكلة فى مصر يا مراقب
    ان فى ناس بدل ما تؤمن بالمسيح
    بتؤمن بالبابا شنودة
    و هى دى المصيبة الى يقوله البابا
    يبقى امين وراه
    ........
    نقطة كمان
    حكاية اللجنة الى عملاها الكنيسة لتعليم الشباب القبطى السياسية و حكاية رفض التصويت لمرشحى الوطنى
    كل ده فى الكلتش
    كلشىنكان
    متصدقش
    ده رد مؤقت
    نوع من انواع القمص
    مقموصين يعنى
    جاب نتيجة
    حترجع ريما
    طب لو مجابش نتيجة
    هو ده رد الفعل الى انا مستنيه
    مش الفعل الرئيسى ده

    ردحذف
  11. ياراجل عيب عليك البابا ده ابونا واحنا اخترناه مش اعتباط لكن بعد تدقيق ووجود صلاحته وكفاءته لهذه المهمه وهى "قيادة الاقباط لطريق الخلاص "
    ودخول الاقباط المجتمع السياسى هو مطلبكم ومطلب جميع المنظمات المصرية التى قالت ان الاقباط ليس لهم دور سياسى وانهم منعزلون .
    ونحن نطيع الحكام الصالحين مثل الرئيس محمد حسنى مبارك واعرف انكم ستقولون انها مجاملة لكن يا ناس ركزوا واعرفوا الكويس من الوحشين وايضا نقوم الطالحين كما امرنا السيد المسيح
    رد على الاستاذ "زياد العزيز" : يا استاذ ازاى الاقباط يتعاملوا مع الاخوان اذا كان شعارهم "الاسلام هو الحل " اى انهم لا يريدوننا ولا يعترفون بنا
    وايضا من قال لكم ان الاقباط يطيعون البابا طاعة عمياء فالبابا يتكلم كما هو موجود بالانجيل ونحن ننفذ ما هو بالانجيل فقط .
    وللاستاذ المحترم المراقب المصرى :رجاء محبة الالتزام بالالقاب فقد قلت مثلا شنودة فكأنك تتكلم عن واحد صاحبك فرجاء الالتزام بالالقاب
    وشــــــــــــــــــــــــكرا

    ردحذف
  12. عباس العبد

    لأ استنى عليا ثواني
    رأس الكنيسة المسيح دا طبعا هو إيمان أي مسيحي بحسب الكتاب المقدس
    بس الكنيسة ينفع تنحرف وتمشي على "دماغها" ودا مثلا كان هو أصل عصور الظلمة وساعتها متقول ليش بقى رأس وجسد... ساعتها فيها كيان منحرف وغير منضبط ولا علاقة له بمبادئ الكتاب المقدس ولا بالقصد الذي أوجدها الله في العالم من أجله

    إذن الكنيسة مدى "دقتها" في الحياة ومدى صحة قراراتها وتوجهاتها ليا يحددها "عصمتها" الزائفة بل يحددها مدى دقتها في اتباع الرأس المسيح والتزامها بالمبادئي الأصيلة في الكتاب المقدس

    بالنسبة لشنودة وكتاب مثل الخلاص في المفهوم الأرثوذكسي تحديدا
    إنت اديتني أعظم مثال لحالة الانحراف عن أصولية الكتاب المقدس
    في هذا الكتاب تحديدا يعلم شنودة تعليما ضد الكتاب المقدس صراحة ويجعله مقررا على الكلية الإكليريكية وهذا يجعله مصدرا للعقيدة بالرغم من مخالفته البديهية لتعاليم الكتاب المقدس
    ومن ثم فإنه يقود شعبه في انحراف ديني وروحي مرعب بسبب مثل هذه التعاليم
    وعندما تغيب الأصولية الكتابية فعندئذ لا مكان سوى للمرجعية التقليدية وشخصنة "الرأس" في الكنيسة بما يؤدي إلى هذه الحالة المتردية من أشخاص متسلطين يحكمون بقبضة من حديد ملفوفة بقفاز حريري
    طبعا معاك في فكرة عبثية اللي بيحصل وإن ولا ليه أي لازمة... بس اللي مش قادر أفهمه يا أخي... الناس اللي تحت بقى... اللي هما ملايين الأقباط اللي من نوعية الصديق اللي رادد تحتك باسم إبرام كارلوس... ألا يفيقون على الإطلاق؟؟؟
    ---------------


    عزيزي إبرام كارلوس

    مهمة القائد الروحي ليست عزل المؤمنين عن المجتمع وعن الوطن بحجة "قيادتهم إلى الخلاص"... القائد الروحي الصحيح هو من يؤهل المؤمنين الذين يخدمهم لكي ما يكونوا كاملين في كل جوانب الحياة وليس فقط جانبها الروحي بل يؤهل المؤمن ليصير "إنسانا" صالحا قادرا على أن يعكس مبادئ الله ومشيئته في كل شيء وفي كل جانب من جوانب الحياة بما فيها أمور الشأن العام

    ردحذف
  13. الاخ العزيز المراقب العام :
    اذا كانت الكنيسه مرت ب"عصور ظلمة " فهى مثل اى دين مر بصعوبات وضيقات وعصور الظلمه دى مرت بها الكنيسة الغربية ومما لاشك فيه ان فيه باباوات كانوا غير كفأ وهى اخطاء بشريه فكلنا بشر وانا لا اسهل المواضيع "فكلنا بشر" وكلنا خطاة .
    ارجوك ان تذكر لى مواقف واوامر خاطئة من البابا والاقباط اطاعوه فيها طاعة عمياء .
    وكل ما قلته انا عارفه وفاهمه وهو كلام جميل جدا لكن يا اخى البابا بيعمل ايه غير كده ده لما فيه كاهن انضم لحزب معارض رفض البابا وقاله"ان الكاهن اصبح كاهن علشان يخدم الناس وهى دى مهمته " هو ده اللى بيأكد حرص البابا علي الاقباط وحياتهم
    وشـــــــــــــــــــــكرا

    ردحذف
  14. اختلف معاك للمرة الثانية يا مراقب
    الكنيسة جماعة المؤمنين
    و رأسها المسيح
    ده مفيش خلاف عليه
    خلاص
    اما ان انها ممكن تنحرف
    فده مش ممكن
    لكن الاشخاص ممكن ينحرفوا فده طبيعى
    و افكرك لما المسيحيين كلهم خرفوا
    فى حادثة شهيرة
    القديس اثناسيوس لما كان بيرد على البدعة
    قالولوا يا اثناسيوس العالم كله ضدك
    قالهم انا ضد العالم
    ....
    طب نعرف ازاى ان احنا بنعانى من انحراف افراد
    من الحالة الروحية و الايمانية للمؤمن
    طيب دى تتقاس ازاى
    المسيح بيقول
    كل ما فعلتموه باحدى اخوتى الصغار فبى فعلتم
    و الاهم من كده
    انتم ملح الارض و نور العالم
    تتقاس بمدى معرفتنا بالفعل الدينى
    او ما يسمى
    بالتقدم و الرقى
    و هو ما دفع بالمثل ان واحد اسمه محمد عبده فى بعثته لفرنسا
    قال انا لقيت اسلام بلا مسلمين و هنا مسلمين بلا اسلام
    شيل مسلمين و حط مسيحيين
    تعرف مدى التقدم الى فيه المسيحيين دلوقتى
    لكن انا معترض على المصطلح على اساس انك بتتكلم ليتورجيات فلازم يكون كلامك دقيق
    فهمت قصدى
    ....
    اما حكاية
    الكتب و كده فانا بديك مثل بس
    .....
    و خد بالك انا قلتلك ان فى ناس بتؤمن بالبابا شنودة اكتر ما بتؤمن بالمسيح
    و طبعا انا مش قصدى ان البابا شنودة هو اثناسيوس بس انا قصدى من الرغى ده كله
    فكرة المصطلح الليتورجى و الطقسى
    على اساس ان فى ناس ممكن تفهم غلط كلامك من ناحية كلمة انحراف الكنيسة
    لانها لا تجوز
    و يبقى نهارك اسود لو وقعت فى ايد مسيحى منغلق و متعصب من اياهم
    حيكفرك و لا شكرى مصطفى فى زمانه
    فهمت قصدى
    .....................
    اما الاخ ابرام
    فده مع نفسه خالص
    بيقولك قيادة الاقباط فى طريق الخلاص
    و ده كلام لاهوتيا يودى فى داهية
    و اختيار الصالح و الكلام ده يودى فى داهيتيين
    مش واحدة بس
    بس يكفيه الصراحة ايمانه البسيط
    الى يودى بقى فى 3 داهيات
    اما حكاية ان ملتزم بتعاليم الانجيل و ان البابا بينفذها و احنا بنطيع البابا لن بيتبعها
    احب اذكرك ان فى بدع خرجت نتيجة طاعة الانجيل بتاعتك دى من غير تغكير
    اريوس و نسطور
    و اؤيدك فى نقطتين
    الاولى حكاية الالقاب لانها فعلا مش مظبوطة قوى يا مراقب
    و حكاية الاخوان
    لأن فيها ان مش واضحة من ناحية المسيحيين فى مصر كلنا فاكرين كلمة الهضيبى باتهمنا بالخيانة و خروجنا من الجيش و دفع الجزية
    ..........
    اما الاخ بورما
    انضمام الكاهن لحزب معارض ده خطا طبعا و انا موافق
    و انضمام الكاهن للحزب الوطنى برضه خطأ
    الكاهن لا يعمل بالسياسة بل يدفع العلمانى للعمل الوطنى
    ما تقروا يا جدعان انطلاق الروح للبابا شنودة
    ة مقالات بين السياسة و الدين لمتى المسكين

    ردحذف
  15. رد على الاستاذ عباس العبد فى ردك على ابرام :
    لماذا قلت "قيادة الاقباط فى طريق الخلاص
    و ده كلام لاهوتيا يودى فى داهية" "اختيار الصالح و الكلام ده يودى فى داهيتيين
    مش واحدة بس
    بس يكفيه الصراحة ايمانه البسيط
    الى يودى بقى فى 3 داهيات " انالا افهم رجاء التوضيح مع ذكر امثلة (لاتقلق نحن لسنا فى امتحان) لكنك تقول كلام مجمل واريد التفصيل ومع
    الشـــــــــــــــــــكر

    ردحذف
  16. عباس العبد

    كلامك مش مختلف كتير عن كلامي على فكرة
    إحنا يمكن الاختلاف بيننا في تعريف المصطلحات
    فلما الكتاب المقدس يتكلم عن الكنيسة ورأسها المسيح بيتكلم عن نموذج كامل ودقيق بحسب مشيئة الله... الكنيسة طبعا هي جماعة المؤمنين وهي مجموعة الأفارد المتحدين معا في إيمان واحد ومسيرة روحية واحدة

    جميل!!

    إنت بتقول لي الكنيسة لا تنحرف وإن اللي بينحرف هو الأفراد
    وأنا هوافقك بس مع إعادة تعريف كلمة كنيسة... فيه مصطلح لطيف بحب استخدمه وهو الكنيسة الإسمية... اللي هما جماعات من الأفراد اللي اعتقادها وإيمانها منحرف وغير دقيق ومخالف لتعليم الكتاب المقدس (ولن أعطيك هنا أسماء وإنما سأتركها لفطنتك) والكنيسة الحقيقية التي هي جسد المسيح والتي هي جماعة المؤمنين الحقيقيين في كل العالم والتي عندما تقيس مدى مطابقتها لواقع الكتاب المقدس وتعاليمه وللنموذج الحقيقي للإكليزيا التي هي الكنيسة الحقيقية تجدها مطابقة بحسب النموذج الأصلي

    طيب دا كلام مثالي جدا... آه لكنه غير مستحيل التطبيق... أي كنيسة إسمية هي كنيسة غير دقيقة أساسا وقائمة على أساسات غير دقيقة وطالما كان الحق الكتابي لا يحتل المكانة الأولى في أي كنيسة باتت مسخا يشبه الكنيسة لكنه ليس الكنيسة

    وبالتالي ما قد سبقت فعرفته - خطأ من وجهة نظرك - ككنيسة منحرفة أعود وأصوب التسمية لأسميها كنائس إسمية بعيدة عن أصولية الكتاب المقدس وغالبا ما يكون التراث السلفي المسمى التقليد هو سبب هذا الفصام بين الكنيسة الزائفة والكنيسة الحقيقية

    على هذا الأساس فإن كل ما بداخل النموذج الفاسد غير الدقيق هو باطل أساسا ويحتاج إلى إعادة الهيكلة من جديد... وينطبق فيه قول المرنم "إذا انقلبت الأعمدة فالصديق ماذا يفعل" أو إذا انهدمت الأساسات فماذا يفعل البار؟
    وبالتالي ما تراه من تردي في حالة ما يسمى كنيسة هو في الحقيقة بسبب أنها ليست حقا كنيسة وإنما هي شوية ناس بتلعب "كنيسة"... فاهم حاجة؟

    يعني عندك شكل بس بعيد جدا عن أي مضمون بحسب النموذج الأصلي

    ‘زاي بقى ترجع للنموذج الأصلي دا قصة تانية... بس لحد ما ده يحصل فهي ملح فاسد لا يمكن أن ترد إليه ملوحته ثانية!!
    --------------------



    عزيزي بورما

    ركز معايا الله يكرمك
    قضيتنا مش البابا حلو ولا وحش
    قضيتنا بالأساس مين السبب في عزلة الأقباط عن المجتمع... الكنيسة بتتهم الحكومة وبتتهم الأقباط نفسهم وهي تتطلع زي الشعرة من العجينة في حين أن من عزلك عن المجتمع وجعلك تائها هكذا هي الكنيسة (كمؤسسة وكقيادة)... ونقطتنا التانية هي التبعية المطلقة للبابا في المواقف السياسية بما ينكر حق الأقباط كمواطنين لهم حرية أن يختاروا المواقف السياسية التي يفضلونها

    عاوز أمثلة... ارجع للموضوع هتلاقيني إديت مثال بتاع أقاط مصر يبايعون مبارك من غير ما حد ياخد رأيهم أصلا

    وبعدين البابا يصرح أرفض أن يكون للأقباط رأي في التعديلات الدستورية فالتعديلات من صلاحيات أولي الأمر وتاني محدش خد رأي الأقباط

    في الاستفتاء على التعديلات نفسها البابا يأمر الأقباط يذهبوا ويصوتوا للنظام لصالح تعديلات شهد العالم كله إنها زي الزفت والقطران وكان مذهلا أن الأقباط كانوا أكتر ناس راحوا صوتوا (عمياني) لهذه التعديلات المعيبة ولو مش مصدق أبقى أجيب لك تقارير مصورة بتقول إن الأقباط أكتر ناس في مصر إدت مشروعية لهذه التعديلات الكارثية وده ليه عشان متقرطسين ومش فاهمين ومنعزلين عن الوطن وعن المجتمع بفعل الكنيسة أولا والنظام ثانيا

    وأخيرا البابا قرر يعارض النظام بعد ما اكتشف إن النظام ما عدش اللعب معاه "بيكسِّب" وبرضو بيقرر إن بقية الأنفار هيعارضوا معاه... يا عم بورما حرقة دمي دي عشان انت واللي زيك يفهموا بقى!!! ويبقوا مواطنين بجد مش رعايا في عزبة "سيدنا"... أتمنى إنك تكون فهمت

    واعذرني على حدتي في الكلام يا سيدي

    ردحذف
  17. رد على الاستاذ المراقب العام :
    انا هسأل س}ال وهسيبك تشوف اجابته هل كل اقباط مصر مغيبين ؟؟؟
    الاف من الاقباط منقادين وراء البابا ؟؟؟
    يا استاذ فى رأيي لا يمكن أن يحدث هذا فأذا كان هناك منقادين وان لا اتعارض معاك فى هذا فبعض عامة الشعب يألهون الكهنه والبابا وهذا بالطبع خطئ و لكننا اخترنا البابا "مش اعتباط لكن بعد تدقيق " (منقولة) واذا اعتبرته راجل عادى فهو ذا فكر سياسى وقراراته دى مش قرارات آله لكنها وهى مش قرارات البابا لوحده دى لجنه من اساقفه مساعدين للبابا وبعدين لما هم_البابا والاساقفه_ بيقولنا على اى حاجه بنفذها علشان هى الاصلح للاقباط ولا تنظر اليها من اى وجهة دينية اخرى فهذا لصالح الاقباط .

    وهناك شى هام اخر اذا كان البابا قرر يعارض الحكومة فلماذا محتفظ برأيه ان اقباط المهجر لا يتدخلون فى شئون مصر الداخلية؟؟؟ وللحديث بقية

    ردحذف
  18. حرام عليكم : سيبوا الاقباط فى حالهم هو القبطى فاضى ىحمى بيته من التهجم عليه زى ما حصل فى العياط والكشح العديسات بوقرقاص صفط اللبن دير المحرق.. صنبو وديروط خانكة والزاوية الحمراء
    ماهو ولاحد حاميهم يبقى يروحوا لمين ؟؟؟؟؟؟؟ للمجتمع اللى رفضهم وعاملهم انهم قله
    ولا للكنيسه اللى هى بيتهم ويسمعوا كلامها اللى هما متأكدين بعد الدراسه ان هو صح وهما اللى مرشحين وختارين قوادها يعنى كل قبطى ذنبه على أختياره
    وشــــــــــــــــــــكرا

    ردحذف
  19. ومش معنى ان الاقباط يروحواينتخبوا الحزب الوطنى بعد كلام البابا ده معناه طاعه عمياء لقواد الكنيسة ما هو الكهنة والاساقفه ما ارغموش حد على كده هما قالوا الصح اللى يمشى بيه يمشى اللى مايمشيش خلاص يا أخى براحته هو هايضربه ولا هايطلعه من الكنيسه وسنرى فى المستقبل القريب كيف ان الكنيسة برؤسائها بشعبها ستكون مع الاصلح لها
    وسنرى ان كان البابا والاساقفه سيؤيدون من؟ المعارضه ام الحزب الوطنى و الرئيس مباراك

    ردحذف
  20. عزيزي بورما

    لا طبعا مش كل الأقباط مغيبين
    ولكن أغلبهم وبالتالي ليس آلاف الأقباط مغيبين بل ملايين منهم
    دا ليه بقى؟
    هو دا السؤال
    إحنا مش بنقول هم مغيبين ولا لأ
    لإن الكل بما فيهم البابا والأساقفة أقروا بأن الأقباط مغيبين - فيما يتعلق بالشأن العام - وبأنهم منعزلين عن المجتمع... وآدي حضرتك كمثال... ما تعرفش إن البابا بقالو أسبوعين بيعمل في لجان كنسية مجمعية عشان بحث مشكلة إن الأقباط منعزلين ومغيبين... إنك مغيب مش شتيمة ولا حاجة عيب... وعزلة الأقباط عملتها الكنيسة

    أستأذنك عشان تفهم أنا بتكلم في إيه وما نضيعش وقت بعض إلحث في التصنيفات عندي في المدونة على كلمة أقباط وعلى كلمة شنودة واقرا ومن فضلك اقرا كويس وحاول تفهم قبل ما تعلق تاني

    لو قريت غالبا هتفهم إيه اللي بتكلم فيه... بس اقرا بموضوعية

    ردحذف
  21. شوف يا سيدى
    مراقب
    ليتورجيا و طقسيا و عقائديا
    لا يمكن ان تنحرف الكنيسة
    لا يمكن
    اتكلم عن الافراد زى ما انت عايز
    لأن الى مودينا فى داهية فى مصر
    نقطة المصطلح
    عيد انت التعريف و عيد الرؤية
    انا موافقك
    المهم مفهوم المصطلح ليه
    لأنى زى ما قلتلك حيطلعك واحد
    يقرفك و يغرفك فى الفاظ و تعاريف و مش حتخلص فاديله من الاول زى ما هو عايز
    انا بتكلم حماية ليك من مسيحى جوانى منغلق متزمت متعصب حيجيبلك كالو فى دماغك
    ...........
    بورما صديقى
    يا ابنى حرام عليك
    انك تقول على نفسك قبطى بتحسسنى ان احنا اقلية عرقية اثنية اسمهم اقباط مصر
    مع ان قبطى معناها مصرى
    احنا اسمنا مسيحيو مصر
    مش اقباط مصر لأن دى معناها مصريين مصر
    و انا بكره اى حد مسيحى او مسلم يقول على اقباط مصر
    انا مسيحى مش عاجباك
    اخبط دماغك فى الحيط انما تتنطط و تقولى انك بتخاف على و انا بحميك و انك قبطى
    ده فى المنام انا اعرف اجيب حقى
    و البابا عمره ما حيجيبلك حقك
    لأن فى مليون طريقة اعذبك و ان بابتسم فى وشك و اقولك يا حبيبى
    اقرأ ابراهيم عيسى انهاردة و انت حتتكيف تمام
    يا سلام يا مراقب
    لو تعرف تسحبها و تنشرها عندك
    نتكلم بقى
    فى التلات نقط الى حضرتك عايزهم
    الخلاص طبعا ده ايمان صرف ... و عقيدة روحية مؤسس على لاهوت روحى
    او ببساطة لاهوت مسيحانى
    كلنا فاهمينه و بنعيشه
    فان حد يقودك للخلاص فالقيادة للمسيح
    ملء قامة المسيح ...تمام
    ان البابا بيقوم بالدور ده
    فده الى انا سميته بيؤمنوا بالبابا اكتر ما بيؤمنوا بالمسيح
    2-
    الكنيسة مهمتها ان تريك الباب
    لا ان تقوم بألاختيار بدل منك لأن ده فيه نوع من الجبر
    بالحقيقة تكونوا احرارا
    3-
    ايمانه البسيط
    لأن ايمانه مبنى على رؤية البابا شنودة مش على صخرة الايمان الكنسى او تعليم الكنيسة
    يعنى لو البابا قال شمال حيقول شمال
    يعنى البابا لو صحى الصبح و قال انا حبقى بوذى حيبقى بوذى لأن ماشى وراه
    نفس فكرة الطلاق
    قبل البابا شنودة كان فى طلاق
    جه البابا الغى الطلاق
    معنى كده الكنيسة كانت غلط بقالها 2000 سنة و جه هو انقذها
    انا لا اؤمن بالبابا شنوده انا اؤمن بالمسيح المسئول عنى انا و البابا
    اؤمن بتعاليم الكنيسة
    اقرا ابوس ايدك انطلاق الروح للبابا شنودة و انت حتفهم كلامى كويس
    خلصنا من دى
    البابا يقول رأيه فى السياسة تمام
    اسمع كلامه على ان كلامه ده صوت الكنيسة مش تمام
    البابا بيلقى محاضرة دينية تمام
    اسمع كلامه تمام لأن ده مش كلامه
    ده كلام تعليم الكنيسة
    فهمت قصدى

    ردحذف
  22. اولا شكرا على الردود
    ثانيا اسمنا اقباط مصر ده مش موضوعنا دلوقتى
    ثالثا والاهم انا حاسس انكم مابتقروش كلامى كله او بدقه وازاى ابحث فى موقعك انت بتتكلم بواجهه مختلفه عنى ايوه هاقراها لكن انا برضوا قريت حاجه تانى وياريت كلكم تقروها هنا
    http://www.copts-united.com/newsnet/newsnet.php?subaction=showfull&id=1181418275&archive=&start_from=&ucat=125&
    ويا ريت تتقروا الفقرات دى كويس
    ":
    لماذا قلت "قيادة الاقباط فى طريق الخلاص
    و ده كلام لاهوتيا يودى فى داهية" "اختيار الصالح و الكلام ده يودى فى داهيتيين
    مش واحدة بس
    بس يكفيه الصراحة ايمانه البسيط
    الى يودى بقى فى 3 داهيات " انالا افهم رجاء التوضيح مع ذكر امثلة (لاتقلق نحن لسنا فى امتحان) لكنك تقول كلام مجمل واريد التفصيل "
    " فبعض عامة الشعب يألهون الكهنه والبابا وهذا بالطبع خطئ و لكننا اخترنا البابا "مش اعتباط لكن بعد تدقيق " (منقولة) واذا اعتبرته راجل عادى فهو ذا فكر سياسى وقراراته دى مش قرارات آله لكنها وهى مش قرارات البابا لوحده دى لجنه من اساقفه مساعدين للبابا وبعدين لما هم_البابا والاساقفه_ بيقولنا على اى حاجه بنفذها علشان هى الاصلح للاقباط ولا تنظر اليها من اى وجهة دينية اخرى فهذا لصالح الاقباط "
    " الكهنة والاساقفه ما ارغموش حد على كده هما قالوا الصح اللى يمشى بيه يمشى اللى مايمشيش خلاص يا أخى براحته هو هايضربه ولا هايطلعه من الكنيسه "

    ردحذف
  23. معهلش يا مراقب
    انت بتقول
    لكهنة والاساقفه ما ارغموش حد على كده هما قالوا الصح اللى يمشى بيه يمشى اللى مايمشيش خلاص يا أخى براحته هو هايضربه ولا هايطلعه من الكنيسه "

    لأ حيطلعه انت ناسى اتعمل ايه فى الى راحو القدس و الفضايح الى كانت فى الجرائد

    ردحذف
  24. الاستاذ عباس العبد :
    فيه حاجات يجب الطاعة فيها (ليست طاعة عمياء) لكن مخالفها يسسب الاضرار لنفسه وللاخرين فيجب معاقبته
    وموضوع القدس دا فيه خطر على حياة الاقباط اللى اهم شئ واغلى شئ على الانسان
    مثال تانى :الهرطقات والبدع مش اصحابها اتحرموا من دخول الكنيسة ليه ؟؟؟؟ علشان لو فضلوا هيضيعوا باقى افراد الكنيسة
    يا استاذ أقرا العهد القديم بالذات اسفار موسى وهتلقى المشاكل اللى مر بيها والقرارت الصارمة التى اتخذها و اعرف اننا خلاص اصبحنا فى عصر النعمة لكن اوامر الله وقراراته لاتتغير
    وشــــــــــــــــــــكرا

    ردحذف
  25. هذه مقاله لكاتب تتكلم عن موضوعنا هذا وعن خروج الكنيسة عن هدوئها المعتاد بعد ان طفح الكيل بها
    http://www.copts-united.com/wrr/go1.php?subaction=showfull&id=1181677078&archive=&start_from=&ucat=171&

    ردحذف
  26. غير معرف5/02/2008 3:44 ص

    ربنا يرحمنا ويكون معانا

    ردحذف
  27. george youssef5/06/2008 10:41 م

    hello,my dear fellow christians.i would like to thank you for overwhelming passion and support for my claim.when i say islamic bak magic.i do not mean to be blunt but it is a phrase that we must all say all the time.healing lies into it with no lies to be said.i like that one.do you.i mean we have a treasure here.who wants to live with moslems or their satanic bak.the bak is as old as islam.i confess that i was not so lucky to pick up my title name.but i was just so eager to say it.just say it george.i told myself countless nights.moslems must die.moslems are not created.they are baks.islamic baks.when israel and america know that.there will be another fate for us.i am not a slave.you christians are not slaves as well.we do not like moslems.no body does.either here or abroad.please consult yohanna el meaamadan at egyptian watchman blog for more,what i wanted to say is that islam is bak.bak islami,and moslems are a bak as well.bak z insann,bak like human,unbelievable.for the first time islamic bak is on the net with this name on wordpress.com and blogspot.thank you from the bottom of my heart.esp.those who took the time to investigate what i said or to confirm it from the 500,000 christians who received the film bak and welcome back our vendetta,it was a good start.i had to say it.GEORGE.at georgeyoussef68@yahoo.ca..if you want to see what i do for a living go to www.buymydishtv.com/27100.

    ردحذف