Glimpses from My Instagram Gallery

2007-05-22

أهالي قلعة الكبش محتجزون في قسم عابدين

نشر موقع كفاية عصر اليوم أن ضباط قسم عابدين يحتجزون في هذه الأثناء عدداً من أهالي قلعة الكبش ومحاميهم ؛ حيث توجهوا إلى القسم صباح اليوم لتحرير محضر ضد أجهزة الحي بخصوص إخلاء منازلهم بالقوة، إلا أن ضباط القسم رفضوا تسلم البلاغ و رفضوا السماح للأهالي بمغادرة القسم ولا يزالون محتجزين مع محاميهم...



أيوة حضرتك الخبر ما فيهوش خطأ مطبعي ولا حاجة... الموضوع بالظبط كدة... أهالي قلعة الكبش اللي بيوتهم اتحرقت واللي الدولة بتماطل معاهم مش عايزة تدبر لهم مساكن تأويهم بعد ما بيوتهم احترقت في مارس الماضي كانوا رايحين يقدموا محضر في قسم عابدين ضد أجهزة الحي لتضررهم بسببها وكان رد فعل الظباط الأفاضل - سمعني أحلى سلام مربع ياض لحبيب العادلي - إنهم حجزوهم في القسم هما ومحاميهم!!! أيوة حتى المحامي مرمي في الحجز... عادي يعني إيه المشكلة هو يستاهل اللي يجرالو لأنه مصدق إن فيه قانون في البلد وقال إيه رايح ومعاه الأهالي يبلغ في أجهزة الحي في القسم التابع للحي!! بصراحة يستاهلوا!!
ـ

هناك 8 تعليقات:

  1. طبعا يستاهلوا
    خصوصا المحامي هو فاكر نفسه ايه؟
    دا محامي ومعاه ناس غلابة
    هو فاكر نفسه يقدر يعمل راسه براس الحكومة؟
    هي سايبة ؟ دي الحكومة يابا
    يعني ...بلاش دي

    ردحذف
  2. أعتقد الحكومة مهانش عليها الناس الغلابه دي تبات في الشارع، فإستضافتهم عندها لحين الإنتهاء من مشروع مدينتي
    و المحامي أظن إتمسك علشان طلع كان بيفك كاسيتات في فيصل

    يعني من الاخر أكيد فيه لبس

    بس لبس إيه بالظبط؟؟ اللــــــــه أعلم

    تحياتي

    ردحذف
  3. المحامي فاكرها سايبة مع إنها حلاوة الرشيدي بار... وغالبا فعلا اتمسك بيفك كاستات عربيات... محامي عبقري فعلا وحكومة أعبقر من اللي خلفوه وبالنسبة للبس هو طبعا موجود بس دور كويس... أو اعمل تفتيش ذاتي عشان تلاقي اللبس

    ردحذف
  4. أظن ان تريقتك يا مراقب و xxe
    علي المحامي مش في محلها التريقة المفروض تبقي علي اللي سمع عن الحدوتة ومرحش يدور فعلا علي المحامي دا محبوس ليه هو والاهالي؟
    خصوصا ان المحامي كان بيدور علي انه يعمل فعلا حاجةوهي انه يقدم بلاغ ف قسم الشرطة، وهو الاجراء القانوني المتبع في تلك الحالات، ومينفعش نتهمه بالغباء، بشكل غير مباشر، دا في انتهاك فعلا لحقه، ومش مشكلته هو اذا كان جهاز الشرطة او النظام كله ابن ستين ...

    ردحذف
  5. زنزانة

    كلامك صح 100 % مع توضيح بسيط

    السخرية هنا - كما بدأتيها أنتي نففسك في أول تعليق - هي ليست من المحامي المحترم والذي له كل التقدير طبعا بل السخرية من الواقع الغريب هذا الذي يجعل ضابط شرطة يحبس محاميا ممثلا لمواطنين وممثلا للقانون والعدالة في تجاوز يفوق التصور والمنطق من هؤلاء الذين تصوروا أنهم فوق الجميع وأن القانون تحت جزمتهم

    أين هي نقابة المحامين من الاعتداءات المتكررة على أعضائها والتي باتت أمرا مقززا وأين نقيب المحامين الأستاذ سامح عاشور؟ وأين محامو الإخوان الناشطين نقابيا؟؟ ولا هو النشاط النقابي بس ما بيبانش إلا في أيام الانتخابات وبس؟؟؟

    قضية أهالي قلعة الكبش هي مثال متجسد لغياب الدولة ولاحتقار القانون وحقوق المواطن تحت بيادة الشرطة

    ردحذف
  6. زنزانة تاني

    مرات السخرية والتناول العبثي بيكون هو الأسلوب الوحيد المتبقي ليكي للتعبير عندما تتجاوز عبثية الواقع وكارثيته كل الحدود اللي ينفع تتكلمي فيها بالمنطق والكلام الموزون

    ردحذف
  7. اعتذر عن تعليقي السابق
    لسؤ فهمي مع اني انا اللي بدأت بالتريقةاللي بالتأكيد مكنتش علي المحامي
    ولكن علي النظام الظروف او حتي سخرية القدر وعبثيته
    اقدم اعتذاري لمراقب مصري و xxe

    ردحذف
  8. أنا لسه شايف التعليق ده دلوقت

    و بما أن الموضوع خلص ، يبقى بيس

    تحياتي للجميع
    و بعتذر على تعليقي السخيف

    ردحذف