Glimpses from My Instagram Gallery

2007-05-19

حاكموا أبو الغيط بتهمة الاستهبال

يا أستاذ أبو الغيط أفندي إنت مُصِرّ تحرق دمي؟
يا عم الحاج حرام عليك المصريين اصحاب عيا وما يستحملوش تصريحاتك العبقرية



بقى انتخاب مصر لعضوية المجلس العالمي لحقوق الإنسان هو رد على المشككين في أحقية مصر لعضوية مجلس حقوق الإنسان بسبب سجل مصر المهبب في هذا المجال؟

طبعا دا كلام عبيط سعادتك... لأن السجل فعلا أسود

يعني أنا مش قادر أفهم دماغ سعادتك
إنت عاوز تقول إن مصر سجلها مش أسود في مجال حقوق الإنسان؟
ولا عاوز تقول إن بالرغم من إن سجلنا مهبب وزي الطين في مجال حقوق الإنسسان لكن دا لا يمنع أحقيتنا بالكرسي؟

الحقيقة أنا راجعت التصريح المستفز بتاع سيادتك ولقيت إنك بتهرج يا راجل... فإنت فعلا مصمم إن سجل مصر في حقوق لا مؤاخذة البني آدمين زي الفل بس الكلاب المشككين بيقولوا غير كدة وبالتالي انتخاب مصر لعضوية القعدة الدولية لحقوق البني آدمين دي بترد على كل الأشكال الوسخة اللي بتشكك في مصر وحلا
وة مصر في مجال حقوق البني آدمين

يعني أنا مش عارف أرد عليك أقول لك إيه بس
أقول حسبي الله ونعم الوكيل زي الإخوان؟
ولا أخرج عن وقاري وأسب وأقذف وألاقي واحد قاضي من صحابك يرفع عليا دعوة ولية في ساعة ضهرية ويطالب بشنقي بعد حجبي وسلخ أظافري وخلع جلدي؟

إنت هتستهبل يا عم الحاج؟

الدلالة الوحيدة لاختيار مصر في القعدة الدولية لحقوق البني آدمين دي هي إن المجتمع الدولي اتهطل في دماغ أممه... وإن العالم ارتد في الليلة بتاعة حقوق الإنسان وقرر يبيع القضية وينفض... لكن مش الدلالة خالص إن مصر فيها إصلاح سياسي وحقوق بني آدمين على الإطلاق... يا ابو الغيط ما انت عارف الفولة

لازم أفكرك بالست مندوبة العفو الدولية لما هزأتكم بسبب قضية عماد الكبير اللي فضحت تعذيب الداخلية الممنهج؟

ولا حضرتك ناسي المواطن محمد عبد القادر اللي اتقتل من جراء التعذيب والصعق الكهربائي في أمن الدولة فرع حدايق القبة - قسم كهربة الحلمات والقضبان؟

طب بما إنك لسة بتستهبل فيما يخص سجل مصر "المشرف" في حقوق البني آدمين فخليني أفكرك بحادثة لايت خفيفقة لطيفة مفيهاش لا اغتصاب ولا كهربة عشان قلبك الرهيف... وحادثة لسة طازة أهيه... بنت اسمها أميرة يا عم الحاج ماتت بضربة شمس من جراء وقوفها في تشريفة زميلك بتاع التعليم... وطبعا كانت مجبرة ودا تحت بند التعذيب برضو... وزميلك يا راجل معندوش دم ولا أخلاق ولا حتى اعتذر ولا قال أنا آسف

شكلك برضو لسة مش مقتنع... طب فاكر عبارة الموت بتاعة صاحبكو وحبيبكو ممدوح اسماعيل؟ أيوة اللي مات فيها فوق الألف بني آدم واللي التقرير النهائي أدان الحكومة فعلا بالإهمال والتقصير... أهي حادثة العبارة دي مالهاش علاقة خالص بسجل مصر الأسود في حقوق البني آدمين

طب استنى... تسمع عن أيمن عبد العزيز نور؟ أيوة اللي سجنه رئيسك في الشغل بسبب انه تجاسر واترشح قدامه للمريسة واللي رئيسك أمر بتعذيبه وإهانته وضربه وسب الدين له واللي شكله هيموت في السجن من فرط المعاملة السيئة والتعذيب

طب حد قال لك على طلعت السادات اللي اتسجن بعد محاكمة عسكرية - في السريع - عشان لسن على الراجل الكبير وكان ناوي يفتح ملف قتل عمه المقفول من 26 سنة ونص؟

بلاش أيمن وطلعت عشان دول قللات أدب ويستاهلوا اللي يجرالهم عشان بيتطاولوا على أسيادهم

الواد عبكريم اللي لا ليه ف الطور ولا ف الطحين إيش قولك بقى لما رئيسك يسجنه سنة كاملة عشان أهانه و3 سنين بس عشان أهان ربنا (دا بحسب وصف القاضي اللي مشغله رئيسك في الشغل) يعني رئيسك بيقول إن إهانته تساوي واحد على تلاتة من إهانة ربنا نفسه (استغفر الله العظيم) بس مسيره يكبر وتبقى إهانته راس براس تعادل إهانة الذات الإلهية... وطبعا دا كله دليل على إننا عندنا حريات اعتقاد وتكفير (قصدي تفكير) وحرية تعبير وإملا كمان وسجلنا أبيض الحمد لله

طب بلاش الكافر عشان الكفر يجب بحرية التعبير والتفكير... الواد المسلم عبمنعم محمود اللي اعتقله رئيسك في الشغل بسبب إنه بعبع وقال كلمتين في مؤتمر عن تعذيبه في الداخلية في حبسة سابقة دا برضه مش دليل على إن سجلنا مهبب في حقوق البني آدمين يا عم الحاج؟؟؟

بص يا عم الحاج اللي ما بيشوفش م الغربال يبقى أعمى

وانت ما بتشوفش حاجة خالص غير الل بيقولوا لك تشوفه وما بتقولش غير اللي يقولولك تقوله وما بتسمعش أساسا يبقى خلاص يا حبيبي مفيش فايدة... روح موت بقى

يا رب تموتوا كلكوا
جتكوا نيلة مليتوا البلد

هناك 4 تعليقات:

  1. انا علقت علي الموضوع السابق لكن الموضوع ده بصراحه مش عارف اقول فيه ايه
    غير ان الراجل ده هو و باقي افراد حكومته بيعتبروا الشعب اهبل و جاهل و غبي و ممكن ينضحك عليه زي الاطفال
    اكيد دي فكرتهم عننا
    و دي مخلياهم مقتنعين بكلامهم قبل ما يتاكدوا اذا كان الشعب اقتنع و للا لا

    ردحذف
  2. غطيني وصوتي يااما
    حقوق الانسان ضاعت
    مصر بقت بتدفع عنها
    مصر بتاعه عماد الكبير والاقسام اياها بقت بتادفع عن حقوق الانسان
    بتقولوا عن ايه يا ولاد
    عن حقوق الانسان
    وذغردتي يالي انتي مش غرمانه

    ردحذف
  3. مجلس بيضم السعودية والصين وكوبا مش بعيد يضم مصر

    مصر اللي اترشح معاها من افريقيا انجولا
    لعضوية المجلس طبعا انا كنت هختار انجولا

    ردحذف
  4. ذو النون

    هو فعلا المصيبة إنه بيقول كلامه عن قناعة ودي أهم حاجة لأن القناعة طبعا كنز لا يفنى ولا يستحدث من العدم
    ===============



    أحمد عبد الفتاح

    بس يا ولا عيب... مصر برضو هي أمك وعيب تتريق عى امك... مالها مصر لما تدافع عن حقوق البني آدمين؟... دا حتى الوزير حدد نوعية الحقوق اللي هتدافع عنها مصر أولا إصدار تشريع دولي ضد الإساءة للأديان... هنا اللعب على وتر الدين (بغض النظر عن الحريات المهم يلعب على وتر الدين عند الناس) وثانيا مجال تعزيز القانون الدولى الإنسانى (أي كلام يا عبد السلام وإديها كمان حرية) وثالثا حماية المدنيين فى أوقات النزاعات المسلحة!! هي دي حقوق الإنسان اللي تعرفها مصر واللي بيدافع عنها أبو الغيط أما حماية المدنيين في وقت السلم فمش حقوق إنسان وحماية البني آدمين من التعذيب مالهاش علاقة برضو وقمع المعارضين مالوش دعوة بيه... رؤية مجتزأة لحقوق الإنسان تؤدي إلى كارثة
    ====================


    زنزانة

    بصي يا ستي... كلامك مظبوط طبعا وعلى عيني وراسي... بس مصر فعلا فازت بأغلبية ساحقة ماحقة ما حصلتش ف التاريخ... ودي الكارثة... أنا رأيي إن التفسير الوحيد المنطقي هو إن العالم اتهطل والمجتمع الدولي بيعاني مؤخرا من عته منغولي... يا راندا العبثية اللي في الموضوع دا مذهلة وصادمة

    ردحذف