Glimpses from My Instagram Gallery

2007-05-16

الإخوان وخفة دمهم... اللي بالي بالك طبعا هو الحل

الإخوان يا جماعة خلاص ثبت بما لا يدع مجالا للشك إنهم اتغيروا جدا خالص

لأ فعلا... يعني مين كان يصدق إن الإخوان مثلا مثلا يعملوا صفقات سياسية مع الأقباط

بغض النظر عن إن الصفقة مشيت ولا لأ بس الموضوع بحد ذاته يورينا إزاي الإخوان بيتغيروا

شوفوا شباب الإخوان مثلا وإزاي ما تفرقهمشي خالص عن أي ناشط من اللي مش إخوان
عادي بيهزروا ويضحكوا ومرات بيشتموا ومش دوجماطيقيين خالص
على سبيل المثال لا الحصر العميد ميت مثلا اللي اقترح أن يكون شعار المرحلة هو القبقاب هو الحل
أو الشاب الإخواني الصاعد الواعد أحمد عبد الفتاح
شباب طبيعي عادي بيتكلموا عادي زي بقية الشباب اللي ف سنهم والحياة عندهم مش مكلكعة

في نفس السياق شفنا شباب من الإخوان على رأسهم عبد المنعم محمود (المحبوس حاليا) بيدافعوا عن حرية الرأي والتعبير في قضية جدلية وشائكة مثلا مثل قضية كريم عامر ودي بجد نقطة مهمة تحسب ليهم

طبعا دي مش دعاية للإخوان بس هي مجرد ملاحظات للمراقب على ما يعتقده تغيير في أسلوب تعبير الإخوان عن نفسهم

الجديد في الموضوع إن مش بس الشباب هم اللي دمهم خفيف وناس طبيعيين عايشين حياتهم وسط الناس لكن الجديد هو إن العدوى انتقلت للكبار كمان فنلاقي تصريحات الدكتور جمال حشمت النهاردة في المصري اليوم

وطبعا كلنا عارفين قصة مأساة جمال حشمت في انتخابات مجلس الشعب الأخيرة حيث حصل على نحو 22 ألف صوت مقابل 9 آلاف وشوية لمنافسه "الوطني" مصطفى الفقي ويا سبحان الله يفوز الفقي (الفقي لما يسعد بقى) ويخسر حشمت ومؤخرا أنصف القضاء حشمت بس المجلس طبعا سيد قراره وببساطة بيطرقع لأحكام القضاء حتى لو كان الحكم من محكمة النقض ذات نفسيها



المهم إن الدكتور جمال حشمت أظهر النهاردة خفة دم غير معهودة وغير مسبوقة ومختلفة خالص عن الصورة النمطية للإخوان وضرب حتة إفيه مالوش حل حيث اقترح الدكتور حشمت إن الجماعة تستخدم شعار "اللي بالي بالك هو الحل" في انتخابات الشورى وأي انتخابات تانية بعد كدة على أساس إنه مش شعار ديني - بعد ما النظام منع استخدام الشعارات الدينية ف الانتخابات - وف نفس الوقت الناس على طول هتفهم لما تشوف المرشح الإخواني رافع شعار اللي بالي بالك هو الحل هتعرف على طول إن قصده إن الإسلام هو الحل واعتمادا على فطنة الجماهير راهن الدكتور حشمت على إن الناس واعية جدا ولو لقيت الشعار دا مرفوع من غير الإخوان هتفهم وبالتالي لو من مرشحي الغد أو الوفد هيفهموا إن اللي بالك هو الليبرالية أو من الحزب الوطني فيفهموا إن الاستبداد والنهب هما الحل وهكذا حتى أن الدكتور حشمت بيقترح تعميم الشعار على كل الهيئات والوزارات فمثلا وزارة الداخلية برضو تستخدمه والناس تفهم منه إن المقصود باللي بالي بالك هو الترويع والتعذيب وهلم جرا

طبعا لم يفت الصحيفة أن تشر إلى أن الدكتور حشمت اعترف ولم ينكر أنه مقتبس الشعار الجديد دا من الفنان القدير محمد سعد في رائعته العظيمة اللمبي



المراقب يرى أن الإخوان مش بس دمهم بقى خفيف طحن وخطابهم اختلف خالص عن زمان
لكن أصبحوا يرحبون أيضا بالتشيع حيث باتوا يروجون ويتبنون أحد أهم مبادئ الشيعة وهو "التقية" تحت عنوان اللي بالك هو الحل

مدد يا سيدي مهدي يا بو عاكف مدددددددددد!!!!
حي ي ي ي ي ي!!!
ـ

هناك تعليق واحد:

  1. والله ضحكتني
    .
    .
    سبحان مغير الاحوال
    .
    .
    .
    .
    تحياتي ادم المصري
    اول دكتور احه
    مدون غير منحاز

    ردحذف