Glimpses from My Instagram Gallery

2007-05-25

لما المسيري يضطر يقول كدة يبقى "إتفو" علينا يا بلد

لما الدكتور عبد الوهاب المسيري المفكر العربي الإسلامي والعضو السابق بوفد جامعة الدول العربية لدى هيئة الأمم يوصل بيه الحال إنه يستنى تبرع من أمير سعودي لعلاجه من سرطان الدم ولا يأتي هذا التبرع ولا يرد عليه الأمير أصلا والنظام السياسي في بلدنا منفض له ورافض - ضمنا - علاجه على نفقة الدولة (طبعا بسبب مواقفه السياسية المعارضة)....

ولما الدكتور المسيري يوصل بيه الحال إنه يقول للمصري اليوم إنه
مازال لديه أمل في أن يتصل به الأمير عبدالعزيز بن فهد، ويتكفل بعلاجه إذا علم بالأمر، في حين أنه ليس لديه أدني أمل في أن يتخذ النظام المصري هذه الخطوة، لأن النظام - حسب رأيه - لا يهمه ما أعطاه لمصر...

يبقى مفيش غير حاجة واحد بس ينفع تتقال لهذا البلد...


إتفو عليكي بلد!!

ـ

هناك 18 تعليقًا:

  1. طيب انت عاوز ايه؟
    هي من امتى البلد دي بتسأل في حد؟

    اقترح حل بديل افضل
    زي حملة لمساندة الاستاذ
    مش بقول تضامن كدة حاف
    بقول مساندة

    ردحذف
  2. لما واحد زى ايمن نور والمسجون الاخر يتأجل قرار العفو بتاعهم علشان رأى الطبيب الشرعى يبقى انت فى مصر
    اه نسيت اقولك المسجون التانى عنده شلل رباعى وطالب العفو الصحى تفتكر الطبيب الشرعى محتاج يأكد المعلومة دى
    لما عبد الوهاب المسيرى لا يجد علاج على نفقة الدولة يبقى انت فى مصر
    لما فنانين كتير يتصرف عليهم بالملايين على نفقة الدولة يبقى انت فى مصر
    اى حد يعادى النظام لا يلقى اى مساعدة واى حد يغنى للنظام ينال كل الرضا
    يا ترى هتختار تكون فين

    ردحذف
  3. اللي يضحط في البلد ده انها هي اللي كانت لسه من كام سنة عاملاله برنامج علي القناة الفاشلة اللي خاربة بيت الشعب ع الفاضي اللي اسمها النيل للاخبار
    و كان اسمه بنت صهيون
    عجبت لك يا زمن
    زنزانة الغالية الراجل ده مش حيقبل اي حاجة من حد بالذات تلاميذه رغم انه له دين في اعناقنا جميعا
    من علمني حرفا صرت له عبدا
    لكن ده معلمناش حرف
    ده علمنا مجلدات
    لكن ده اخلاق الكرام
    يحسبهم الجاهل اغنياء من التعفف
    فاي مساعدة مادية حيرفضها
    اما المساعدة المعنوية انا رايي ان ابسط حاجة ان المدونين يحطوا صورة الراجل ده علي مدوناتهم و كل اللي يدخل يدعيله بالشفاء
    و طبعا جناب المراقب فنان بانرز
    ثم هو يعتبر سافر
    فمفيش حاليا حاجة ممكن نعملها
    ربنا يشفيه

    ردحذف
  4. إخص الله يكسفكو بقى تسيبو بنزينة الصحراوي هي اللي تعالج عبدالوهاب المسيري؟

    طب عشرة تسعين بقى وحياتكو ومش عايز اتنين و زفت تسعين

    تحياتي
    زي

    ردحذف
  5. و اتفو على مبدأ الخمسة و تسعين والخالي من الرصاص

    برضو تحياتي
    برضه زي

    ردحذف
  6. يا عم طنش والله الحاجات دة مش بتفرق كثير

    ردحذف
  7. زنزانة

    ما تعرفيش أنا اتوجعت أد إيه لما قريت تصريح الدكتور المسيري في المصري اليوم وهو مستني المساعدة من أحد أمراء السعودية
    يا ستي الدكتور قال أنا مش فقير ولا محتاج مساعدة بس عشان يصرف اللي معاه على علاجه يبقى شغل مكتبه هيقف وأبحاثه وأبحاث مكتبيه هتقف يبقى المساندة الحقيقية تتقدم للناس اللي ورا د/ المسيري واللي منخرطة معاه في مكتبه وفي أبحاثه... أنا مش متخيل أصلا إننا بنتكلم بالطريقة دي عن عبدالوهاب المسيري... دا بجد مفيش بلد ولا دولة ولا أي حاجة لما نبقى قاعدين محتاسين كدة مش عارفين نعمل إيه لهذا الرجل العظيم في محنة مرضه... الله يسامحهم بقى اللي كانوا السبب... أو ما يسامحهمش.. هو حر
    =================


    توتا بذات نفسها في مدونتي؟؟؟
    (وجه مذبهل ومنشكح)
    شلل رباعي بس؟ طيب يبقى لازم يجيب ورقة رسمية تقول إنه ما بيتحركش عشان نديله العفو والمهم إن الورقة تكون ممضية من اتنين تمرجية بالابتدائية ومرتبهم ما قلش عن اتنين واربعين جنيه وربع

    أنا بس عاوز أوضح إنه مش عيب إن الدولة تعالج فنانين على نفقتها... دا الصح والمفروض في ظل غياب أنظمة تأمينية حقيقية لأغلب فئات الشعب وخصوصا خدمات التأمين الصحي الحقيقية... لكن اللي مش طبيعي ومش مقبول إن المفكر العظيم والشيخ الجليل الدكتور المسيري ما يلاقيش فلوس ستعالج بيها ويدور على أمير عربي يتبرع له... دا كلام يوجع أوي أوي

    شرفتينا ويا ريت الزيارة تتكرر عشان تثري المدونة بإضافاتك وبحضورك
    =====================


    المصري أفندي

    لو كان الفقر رجلا لقتلته
    ولو كان المرض رجلا لفتكت به
    ولو كان اللي بالي بالك رجلا كان اتنحى من زمان بقى ربنا ياخده

    لا يوجد فعلا في دنا سوى الصلاة والدعء للدكتور المسيري... ربنا يشفيه ويرجعهولنا بالسلامة
    =====================



    ويا ريت البنزينة ردت على الأستاذ

    إلا البنزينة هي كمان منفضة وودن من طين وودن من عجين.... دا لو يدرى النظام ويفهم دا اللي بيعملوه دا في المسيري فضيحة تاريخية بحق البلد كلها
    ===================



    عمرو غريب

    غريب أوي كلامك بجد
    طب وليه نطنش؟
    ما نموت أحسن أكتر ما احنا ميتين؟؟؟؟

    ردحذف
  8. عزيزي المصري افندي

    في فرق بين الشحاتة وبين مساندة الناس اللس بيحبوك، في كذا حد ف منزلة المسيري اتعرض لنفس الموقف ومنفعهمش الا مساندة اللي حواليهم من محبين واصدقاء، وبالنسبة لفكرة انه خلاص سافر اه دكتور مسيري سافر لكن بفلوس مكتب ابحاثه اللي ممكن يقف لما يرجع بالسلامة
    اذا كنت شايف ان المسيري مش هيقبل مساندة ودعم لعلاجه فا ممكن تطرح بديل ان تدعم عمله ومكتب ابحاثه معرفش ازاي لكن ممكن نفكر

    بص انا فعلا هبدأ اتكلم ف الموضوع واللي عايز يدعم اهلا وسهلا
    لاني مبحبش اقعد افكر واقول هيقبل ما يقبلش ...متقدرش تحكم الا لما تخوض التجربة ومش هتخسر حاجة
    خليك عملي

    ردحذف
  9. كنت لسه بقول الكلام ده لزنزانة

    انا اتوجعت جدا لما قريت الكلام ده امبارح يا مراقب .. نفسي صعبت عليا قوي .. وحسيت بإهانة فظيعة .. احنا بقينا تمنا رخيص قوي


    كنت بقول لزنزانة انه بغض النظر عن شخصيته وعن كونه ناشط ولا معارض ولا مفكر ولا اي حاجة ...
    بني آدم .. مريض
    المفروض الدولة تكون مسؤولة عنه
    ايه المسخرة دي .؟؟؟؟!؟!؟!؟!

    يعني بني آدم عادي جدا عايش في بلد أصيب بمرض وليس في استطاعته علاجه .. يعمل ايه ؟؟ يتحرق ولا يشحت؟؟
    ولا يروح يموت احسن .. خصوصا انه كمان معارض ومش بينافق الحكومة ولا بيمسح جوخ ولا بيتنطط في وسائل الاعلام يسبح بحمد أولياء نعمته في عصر لم يقصف فيه قلم ......

    وقصفت فيه رقاب اصحاب الاقلام ؟؟؟؟؟

    غضبت جدا وانا اقرأ كلام المسيري نفسه انه في انتظار الامير السعودي .. لما زكيبة الفلوس تتمطع وتقرر تحل الكيس وتشحت المصري الغلبان .. المفكر العالم

    اللي بلده اتخلت عنه ورخصت تمنه للدرجة دي .. يا عم مسيري الموت أكرم ..

    اي كلام بعد كده هيكون عيب

    ردحذف
  10. ولما يوصل بينا الحال اننا نقول كده علي البلد اللي ربنا سبحانه وتعالي ذكر اسمها في القران
    واللي واللي واللي ..... بس انت افتكر

    ونقول كده عليشان خاطر حكومه فاشله او حتي علشان خاطر واحد اي ان كان الواحد ده مين

    ونشتم في بلد ملهاش اي دعوه باللي بيعملوه فيها حكمها

    يبقي .... اتفو علينا شعب

    ردحذف
  11. انا لا اؤمن بعبد الوهاب المسيرى
    لا اعرف نت اطلق عليه مفكر كبير
    ما هى المقاييس التى يقاس عليها اوزان المثقفين ؟
    عدد الكتب المقروئة ....اى بائع جرائد اكثر ثقافة
    الانتاج الفكرى ...يحكم عليه بائعو الترمس و الطعمية و البطاطا
    فهم اكثر من يستخدم كتبه
    هل من الممكن ان تشرح لى ما هى نسبة ان يصل كتاب مثل العلمانية الجزئية و الشاملة الى عامة الشعب
    هل من المكمكن ان ترى احداهم يسير و فى يديه موسوعة الصهيونة اللهم الا بائع مشمش حموى يحتاجها بهذا الحجم لكى لكى تكفيه الموسم
    يا سيدى الفاضل ما كتبه المسيرى لا قيمة له
    اقرأ بقية الخبر
    فأسرائيل المعنى الاول بكتاباته تتجاهله
    لأن كتاباته بلا وزن
    حتى انه يسعى الى احدى عرب 48 لكى يترجم له احدى كتبه حتى يجرهم الى مناقشات
    انت امام كاتب بلا هوية
    مجهول
    من عامة الشعب المصرى و من المعنيين بكتاباته
    انا لا اجد شىء قد قدمه لى حتى اسعى لعلاجه على نفقتى
    انا لن اشارك و اعتقد ان اخوتنا فى الوحدة العربية الاشقاء السعوديون لن يفعلوها
    شكرا لحسن تعاونكم
    سعدنا بكم و نرجو ان نكون اسعدناكم
    امضاء
    دولة القانون
    مصر الحرة الديموقراطية
    مصر ...العبور للمستقبل

    ردحذف
  12. عزيزي عباس العبد

    اعتقد ان الازمة مش في هل عبد الوهاب المسيري له وزنه كمفكر ام؟ ولكن هو انسان له الحق في العلاج فقط
    واذا كان استطاع ان يوصل صوته
    للاعلام ليشكوي، فهذا حقه، ولا يعيبه اذا كان من الفئات الاعلي صوتا في المجتمع، بل انه عيب المجتمع الذي لا يصل فيه صوت الا اذا كان صاحب منزلة او واسطة.

    المشاركة اختيار لا اكثر

    ردحذف
  13. يا عم عباس العبد
    ما تقول كلام له معني

    يعني انت عمرك شفت مواطن في الاتوبيس ماسك كتاب النسبية لاينشتين
    و لا ماسك كتاب الجدل لارسطو
    ولا التأملات لماركوس أوريلوس

    ردحذف
  14. و يا عم عباس
    انت منتظر ان اسرائيل تروج لموسوعة موضوعية بتناقش المفاهيم و الايديولوجيا الصهيونية بدون تشنج .
    اسرائيل من مصلحتها ترويج الخطابات المتشنجة - زي نجاد و مفكرين البروتوكولات و حنجوري القوميين - لان هذا يخدم الصورة التي ترسمها لنفسها في وسط محيط همجي متعصب معاد للسامية , و يفيدها جدا تصدير هذه الصورة للغرب .
    و ليس من الحصافة أبدا أن تتولي مناقشة اطروحات المسيرية لتروج له مجانا , تماما كما لا تسمح الحكومة للمعارضين الجذريين بالظهور في التليفزيون او تناقش كلامهم في الصحف القومية , بينما لا مانع من ان يظهر رؤساء احزاب التكافل و الأمة و مصر الفتاة .
    لو مش عاجبك افكار المسيري , من حقك طبعا , بس ابقي استخدم معايير منطقية . لانه بالمعايير بتاعتك دي يبقي نبيل فاروق هو أديب مصر الأول , و نجاد هو المتخصص الأهم في الشؤون الصهيونية لان صحف اسرائيل مش سايبه سيرته .

    ردحذف
  15. أزال المؤلف هذا التعليق.

    ردحذف
  16. يا اخوانا انا بحب المسيرى جدا
    انا كاتب الكلام ده على لسان مفكرو العبور للمستقبل
    او يعنى
    بتوع الحزب الوطنى و الحكومة
    و المعنى فى بطن الشاعر
    اقروا الامضاء
    فى اخر التعليق
    مش عن لسانى انا
    فهمتو قصدى
    يا نهار ابيض
    عودة المنتقم
    ايه ده يا جدعان ده
    ايه يا عم فى ايه
    انت حتاكلنى ولا ايه
    ربنا ما يحكمكم فى حد
    .....
    انا بسخر منهم
    بس
    بقول على الى بيفكروا فيه
    قصدى انهم مش فاهمين حاجة
    بتوع العبور للمستقبل دول
    ..........
    اثنين من ثقال المدونين
    ثقال دى من اختراعى
    علشان محدش يقول انها مش لغة عربية
    اثنين من ثقال المدونين بيردوا على شخص عادى
    احمدك يا رب
    .......
    زنزانة
    عمرو عزت
    احمدك يا رب
    .......
    عمرو عزت

    يا ريت يجيى اليوم الى تلاقى فيه حد
    ماسك كتاب النسبية لاينشتين
    و لا ماسك كتاب الجدل لارسطو
    ولا التأملات لماركوس أوريلوس
    يا ريت بجد
    و اكيد دى امنيتك انت كمان
    ........
    على العموم يا عم
    ربنا يديله الصحة
    انا بحبه قوى الراجل ده
    و شفتله كل مسرحياته يعنى الى من تأليفه
    انا عارف انه مؤلف كبير
    مش هو الى كتب مدرسة المشاغبين
    انا عارفه كويس صح مش كده
    ههههههه
    ...........
    سؤال بجد بقى
    قبل ما امشى من هنا
    مين المسيرى ده
    حد تعرفوه
    من قرايبنكم يعنى
    علشان كده عملينله حملة
    و لا مين بالظبط
    و بالنسبة للخواجة الى اسمه ماركوس اوريلوس مع المسيرى برضه
    نفس العيا كده و لا ده الى حيعمله العملية
    ....
    سلام
    قبل ما يموتونى

    ردحذف
  17. لا مؤاخذة يا عباس
    انا اتشليت فعلا من الكلام

    ماخدتش بالي من قصدك
    حصل خير

    ردحذف
  18. بلو ستون

    كلامك - بكل أسف - صح!!
    الموت أكرم وتخيلي بقى لما يبقى الشعب كله ميت بالحياة... دا عمق المأساة
    =====================


    أحمد عبد الهادي

    لما بنقول البلد يبقى لازم نفرق بين حاجتين: البلد اللي هي مصر اللي بجد اللي هي الشعب واللي هي القيمة الحلوة واللي ربنا ذكرها وباركها وبارك شعبها دي حاجة والبلد الرسممية اللي هي النظام الحاكم وبطانته وطبقة المنتفعين من النظام ودي بقى مصر تانية غير خالص اللي انت بتحكي عليها

    لما البلد بتاعتهم دي مثلا تبقى عضو في مجلس حقوق الإنسان الدولي وهي نفسها البلد بتاعتهم دي اللي بتعذب المعتقلين وتغتصب الغلابة في أقسام الشرطة يبقى اتفو ع البلد دي

    فرق بينا مصرنا ومصرهم... فرق بين بلدنا اللي بجد واللي بتحتضر بالفعل وبلدهم اللي بقت زي الغول المفتري اللي بياكل عياله

    فاكر جملة قالتها بثينة في رواية يعقوبيان وقالت فيها إن البلد دي بقت قاسية على اولادها أوي... أنهي بلد دي؟ بلدهم مش بلدنا... بلدنا إحنا بتموت ومالهاش صوت في مقابل المسخ اللي هو بلدهم والمصيبة إن السمها مصر برضو وعلمها أحمر وأبيض واسود وعليه تسر برضو... وبرضه رموزها الهرم والنيل وقلعة صلاح الدين... بلدهم تبان وكأنها هي بالظبط بلدنا... آخر مرة الفصام ده وصل فيه للدرجة دي إنتهى بهزيمة عسكرية نكراء في 67 ما فقناش من آثارها لحد دلوقت

    فهمت بقى أقصد بكلمة اتفو عليكي بلد؟؟؟

    على فكرة... كنت هاتخنق جدا لو ما حدش طرح السؤال بتاعك ده واستغرب من الجملة وكأنها عادية... لأنها مش عادية!!
    ======================



    عزيزتي الموقعة بعنوان
    مصر الحرة الديمقراطية
    مصر العبور إلى المستقبل

    إنتي مش مصر
    إنتي مسخ مشوه قميء كريه الوجه والصورة

    إتفو عليكي بجد
    ======================


    عمرو عزت لأول مرة في المراقب

    يا مرحبا يا مرحبا

    نورك غطى ع الكهربا
    يا ريت ييجي اليوم ونلاقي الناس فعلا في المترو ماسكة كتاب النسبية لأينشتين

    والنبي ما الاقيش معاك نسخة للمترو؟
    =====================



    عباس العبد
    أشكرك للتوضيح
    وتعيش وتاخد غيرها
    بس بصراحة عمرو وراندا كانوا هيقطعوك وتستاهل... هههههههههههه
    وطبعا المسيري هو مؤالف النص الخالد مدرسة المشاغبين والعيال لما كبرت عملوا حركة كفاية وخلوه الناظر بتاعها وعشان كدة البلد مش عايزة تعالجه إلا لما يعترف على بقية اصحابه وعلى رأسهم الأخ ماركوس أوريلوس


    إن شا الله دايما منوريننا كدة

    ردحذف