Glimpses from My Instagram Gallery

2007-05-10

يا دكتور بطرس إنت أكبر من كدة... عيب ما يصحش


الدكتور بطرس غالي يعني مركزه الدولي مش محتاج تعريف ومكانته مش محتاجة توضيح مش بس لأنه كان الأمين العام الأسبق للأمم المتحدة لكن لأن كان له إنجازات ملموسة على المستوى العالمي إبان حكمه وخصوصا فيما يخص استقلالية الأمم المتحدة وتصديه لهيمنة الولايات المتحدة على المنظمة وهو الأمر الذي أدى في سابقة هي الأولى من نوعها إلى عدم التجديد له لولاية ثانية

المهم الدكتور بطرس مسك بعد كدة منظمة الدول الفرانكوفونية والراجل يعني مش محتاج فعلا تعريف بحجمه ودوره وأهميته

الدكتور بطرس غالي مسكوه من فترة شغلانة غريبة كدة معرفش إزاي ضحكوا عليه بيها ومسكوهاله اسمها رئيس المجلس القومي لحقوق الإنسان في مصر وطبعا ده واحد من المجالس القومية المتخصصة اللي مالهاش أي لازمة في الحياة غير إنها جزء من الديكور المؤسساتي اللي بنزوق بيه وش النظام العكر... لا أعرف حتى الآن كيف قبل الدكتور بطرس غالي أساسا إنه يمسك مثل هذا المنصب اللي مالوش لازمة (طبعا مالوش لازمة لأن المجلس ده للديكور فقط ولأن حقوق الإنسان لا تترسخ بالحقيقة في بلد بعمل مجلس قومي ليها بل باختيار المجتمع كله والنظام والدولة تبنيها بالفعل واعتبارها من المقدسات التي لا تمس وهو بالطبع ليس الحال في بلدنا)

بغض النظر عن حيثيات قبول الدكتور بطرس لعب هذا الدور الهزيل لتجميل وجه النظام فهذا شيء لا يخصنا الآن إلا أن التصريح الأخير اللي صرحه الدكتور بطرس غالي (ونشرته الأهرام ونقله عنها موقع مصراوي) واللي بيكذب فيه تقارير منظمات دولية عتيدة فيما يخص تصنيف مصر (و3 دول تانيا هي روسيا البيضا وأنجولا وقطر) كدول ذات سمعة يعني مش قد كدة في المجال الحقوقي وبالتالي ما يصحش إنها تكون عضو في المجلس الدولي لحقوق الإنسان التابع للأمم المتحدة... والدكتور بطرس بينتقد المنظمات الحقوقية اللي في الداخل واللي في الخارج اللي بتعمل تشويش حول أحقية مصر في العضوية للمجلس الدولي لحقوق الإنسان.

وأكد الدكتور بطرس بطرس غالي رئيس المجلس القومي لحقوق الإنسان أن عضوية مصر بالمجلس الدولي لحقوق الإنسان التابع للأمم المتحدة‏‏ غير مشكوك فيها‏‏ بل ومعترف بها دوليا‏‏ وذلك لأن المجتمع الدولي يعترف بمصداقية المجلس القومي المصري لحقوق الإنسان... طب بالذمة دا اسمه كلام يا دكتور بطرس؟؟؟

هي مصر أصلا فيها حقوق إنسان لما يبقى فيه مصداقية للمجلس - لا مؤاخذة - القومي لحقوق الإنسان؟
وبعدين يا دكتور إنت أكبر بجد من مثل هذه التصريحات ومن أن تُستغل مكانتك لورنشة صورة نظام سمعته فضيحة في مجال حقوق الإنسان وعلى سبيل المثال لا الحصر ابقى روح راجع تقرير العفو الدولية الأخير عن مصر وأكد أن التعذيب والعنف في وزارة الداخلية وفي السجون وأقسام الشرطة هو عنف ممنهج نظامي.

عيب أوي وما يصحش يا دكتور بطرس لحد في مقامك وفي سنك وف مكانتك أن يقبل أن يستغله نظام ساقط كهذا النظام ويعمله واجهة لطيفة تداري وراها زبالتها القذرة في المجال الحقوقي. من فضلك راجع موقفك عشان التاريخ وعشان مكانتك قدام دول العالم المحترمة
‏‏.

ليست هناك تعليقات:

إرسال تعليق